San Lucas 1

Salud

1Teófilo, khapeer wʉjʉu:

Mʉg ẽsap gaai murua pʉrʉg jawaagpam Jesuu õrag iekhamatarr dʉi irua nem waumatarrpa ãba. Pua khaphʉ sim, jũrram khʉʉnau ich mʉg iekpai phã ẽkha nʉm warrpem irua nem waubaaderr aarmua irua nem jaaumatarrpa. Maadeu khaphʉ nʉm, magʉm thum chadcha ajim. Maagwai õraujã thum ich ag iekpai maach ee khakhapdo wejom, 2ar warrcha irua nem waubaaderr amach daúacha ootarrta õrag jaaujerr khʉʉnau maachigjã jaautarrjo. 3Maguata muajã ĩchab phãju khĩirjubaadejim, pʉ athee. Mamʉ mʉg phãju nawe, sĩi año khapan i dʉi ãba wenʉrraajerr khʉʉn dʉi khaar aarmua khĩeb o nʉm aar estudie chirʉʉ awia ĩsta pʉrʉg phã deepʉi chirʉm jooi Teófilo. 4Mʉg murua pʉrʉg phã deepʉi chirʉmʉn, pʉchdeu thʉ̃rbaawai Jesús igwia õrau jaau nʉm pua ũurjemʉn chadcharam iekhau a khap amkhĩrau.

Juan thaabaju jaautarr

5Murua pʉrʉg jaaum ig chirʉmʉn mʉgau:

Erodes Judea durr reikha sim jaar ĩchab sĩejim aajem phad Zacarías a thʉ̃r sim, judionaan eem. Mag Zacarías warrgar phad Abías khakhitarr dʉi ãba phadnaan phidkhaajerr khʉʉn chaain ewagam khʉʉn den arr aawai ĩchab Abianaan ajim aajem. Chi Zacarías ʉʉi Elizabed a thʉ̃r sĩejim aajem. Majã ĩchab warrgar phad Aarón a thʉ̃ʉrjerr ag chaain ewagam khʉʉn kha ajim anaabá. 6Ich mag jooi Zacarías anʉm ich ʉʉi dʉi Ẽwandam dakhĩir ajapha wenʉrraajeejim aajem, i ipierraa. Mag gaaimua ãbmuajã am eugar iek chigaapai iekhaba aajeejim anʉm. 7Mamʉ mag wenʉrrʉmjã chi ʉʉi bʉ̃ʉrjã chaai ooba khitarr aawai chaai ãbjã chukhu naajim aajem. Mag chaaijã chukhu nʉmta ya amach numwe jooiraa khithee ajim anʉm.

8-9Mag nʉm ee jũrr Abianaanta Ẽwandamag jeeujem deg phidkhaju seman arr aawai mag jooi Zacarías anʉmta ag deg phidkha sĩejim aajem, ich khapeen ich dʉi ãba phidkhaajerr khʉʉnpa, warm khʉʉnaujã semanpierr ich mag phidkha diichjerrjo. Mamʉ mag phadnaan khapan thʉnaajerr aawai ed eepierr ãb jʉr auwia Ẽwandam atheem incienso phaan duubjeejim anʉm. Amach warrgarwejã ich maagjerr aawai mag edjã mag nʉmua jooi Zacarías thʉ̃rta oberjim aajem, mag incienso phaag. 10Mag ich thʉ̃rta obertarr aawai ierr Ẽwandamag incienso phaajem ag nasãd wau kherʉm aar simich, daaugajãr amach biirdʉajem aigpaita sĩi õor pom Ẽwandamag jeeu khodthʉnaajim aajem. 11Mag í agtha ierr Ẽwandamag jeeu sim ee, Ẽwandam chogta ʉ̃gtharmua beewia i khĩirphee dʉnʉʉubaichejim anʉm, chi incienso phaajem ag nasãd wau sim bigaau juachaar gar. 12Zacariaau mag oo athaawai khĩir eu awia warag jooi kha duuibaadejim aajem, jãphierr nʉm iekhau. 13Mamʉ magbaawai chi Ẽwandam chogau irig, —Zacarías, oob jãphierram ajim anʉm. Pua Ẽwandamag jeeu chitʉʉ aajerr ĩsta irua pʉ iek ʉkhabarm: Pʉ ʉʉi Elizabed bi ee pawia pʉrʉg chaai oo deejugui ajim anʉm. Mag chaai thaaba khersiewai pua i thʉ̃rdam Juan a thʉ̃rjugui ajim anʉm. 14Magbaawain chadau pʉ onee chirsiju. Mag nʉm dʉi ĩchab õor pom onee ajurau, i thaababarm abarm amachdeu ũr athaawai. 15Mag chaairau bi eewe Ẽwandam Akhaar ich gaai phẽs wai khitajugui ajim anʉm. Mag chaairau ich erraawe vinojã doba, ni nag deeum khĩir awia khãijã bʉ̃ʉrjã ich i ee auba ich mag khitajugui ajim anʉm. 16Mag chaai jooipawia Ẽwandam iek jaaubaadeewaita israelnaan khapaana ãsie amach mor khĩirjuwia deeu eeupemjo maach Por Ẽwandam iek ʉkhajurau, warrgar amach jooinau ʉkhaajerrjo a jaaumajim aajem. 17I gaaimuata õor ee Ẽwandamau ich jua theeg oopijugui ajim anʉm, warrgar ich i jaaumie Elías khakhitarr dʉi aajerrjo. Irua Ẽwandam i jaau nʉrrʉm ũrwia, jooin amach chaain dʉi khajap khaba wenʉrraajerr khʉʉnjã khõinaa wenʉrranaa ĩchab i iek ũrmapha aajerr khʉʉnaujã amach jooin warrgarm khʉʉn denjo i ipierraa aju, maagwai Ẽwandamau mag am Porkhaju päaiwaijã amach thãraucha khõsi i iek ũrmkhĩir a jaauchejim aajem chi Ẽwandam chogau.

18Magbaawai jooi Zacariaau, —Mamʉ ¿jãga magbarju? ajim anʉm, chi Ẽwandam chogag. Ya mʉg mʉ jooiraa chirʉm, maimua mʉ ʉʉijã ĩchab ũanaa khitʉmta ¿jãga mag chaai oobarju? ajim anʉm.

19Magbaa jũrr chi Ẽwandam chogau irig, —Zacarías, mʉʉn Gabriel a thʉ̃ʉrjemgui ajim anʉm. Mʉchta Ẽwandam garcha i bʉkhʉrr phidkhaajem. Ichdeu mʉ pʉiwiata pʉ aig mʉ beejimgui ajim anʉm, cha mʉchdeu iek jaau chirʉm jawaan. 20Mamʉ mʉg murua pʉchig jaau chirʉm pʉchdeu ʉkhaba abarm gaaimua, pʉ meu meraa chirsijugui ajim anʉm, bʉ̃ʉrjã iekhaba. Maimua ya chi chaai atham edta deeu pʉ iek eerdʉjugui ajim anʉm. Murua pʉrʉg mag jaau chirʉmʉn, chadcha thum mʉchdeu cha jaau chirʉmjoo aju a jaaumajim aajem, chi Ẽwandam chog ʉ̃gtharmua beetarrau.

21Magʉmich daaugajãr õor pom Ẽwandamag jeeuwai pos thʉnarr khʉʉnau i nʉ nʉmua jũrr amach khapeenag, —Keena, ¿jãga abarmta mʉg jooi Zacarías jãg da oberchebáma? anaajim anaabá.

22Mamʉ mag nʉm ee obercheewaijã pod õrag iekhaba, iekham ig nʉmjã sĩi juaupaita jajaau aajeejim anʉm, pod iek oberba aawai. Magbarm aigta khaugaa aphobaadejim anaabá, Ẽwandamau khãijã dau daau irig iekhachewiata mag sĩsim.

Maigmua atag ich mag jooi meu meraa khersijim anaabá. 23Maimua ich phidkha sĩerr seman thum ober eebaadeewai ich diig petajim aajem. 24Maimua mag chi Ẽwandam chogau jaauthurtarr khur chadcha jopcha Elizabed bi eepajim anaabá. Mag ich jõorbaadeewai dawagjã oberba, cinco meses sĩi degpai sĩejim anʉm. 25Mag degpai simua, “Maach por Ẽwandamauta mʉʉn eeg oobarmgui” aajeejim anʉm. “Chaai chukhu aawai õor ee khĩir naa ʉrraajerrjã tag mʉ chigag chukhu ʉrraju. Ʉucha jãgbarm Ẽwandamau” aajeejim anʉm.

Jesús thaabaju jaautarr

26Magtarr khur seis meses dichwia nʉm ee, Ẽwandamau ʉ̃gtharmua deeu ich chog Gabriel pʉijim aajem, jũrr Galilea durr phobordam Nazaret a thʉ̃r sim ee daupeer õor meraa khitʉm María a thʉ̃r sĩerr aar. 27Mag daupeer woun ãb José anʉm dʉi jua pʉraag ya iek deewi sĩejim aajem. Mamʉ mag iek deewi nʉmjã José bʉ̃ʉrjã agtha María dʉi khapes aba naajim aajem. Chi José anʉm warrgar rey David khakhitarr ag chaain ewagam khʉʉn den ajim aajem. 28Mag ich chogbapäaiwai chi Ẽwandam chog beewi chi daupeer sim aar dubwia irig, —¿Jãgpai ʉ María? Onee abá aichejim anʉm. [Ẽwandamau nem ajapha aag ʉʉin khapan thʉnʉm ee pʉʉta jʉr atham.] María, chadcha Ẽwandam maach Porou pʉʉta eeg oobarmgui ajim anʉm irig.

29Mag ũrbaawai khĩirju sĩi awia ich odegpai “¿Jãgwia irua mʉrʉg mag iekhabaiche?” ajim anʉm. 30Magbaawai chi Ẽwandam chogau, —Oob khĩirjum, pʉʉta Ẽwandamau ʉu eeg oobarbahab ajim anʉm. 31Pua chaai emkhooidam paarpaju. Mag chaai Jesús a thʉ̃rbá ajim anʉm. 32Ichta thumaam khʉʉn khãai ʉ̃rʉʉcha sĩerraju, maimua ichpai Cha Ʉ̃gthaa Phuu Nʉm ag Iewaa a thʉ̃rjugui ajim anʉm. Maagwai maach Por Ẽwandamau irigta israelnaan thumaam khʉʉn Reikhapiju, warrgar pãach jooin David khararrag khapitarrjo. 33Mag ichta thumaam khʉʉn Porkhabaadem aigmua atag i jua theeg bʉ̃ʉrjã oba, ich mag sĩerraju a jaaujim aajem.

34Magbaawai Mariaau chi Ẽwandam chogag, —Mamʉ mʉg agtha mʉ õor meraa jaaijã chukhu ʉmta, ¿jãga magbarjuma? ajim anʉm.

35Magbaawai chi Ẽwandam chogau magjim anʉm:

—Jãan ich Cha Ʉ̃gthaa Phuu Nʉm ag Akhaar pʉ gaai sĩeicheewaita pʉ jõorjugui ajim anʉm, ich iiu aawai. Mag gaaimua mʉg chaai pua oobarm bʉ̃ʉrjã khaibag chukhu auwia ich mag khitaju. Ich Ẽwandamauta ich iiu pʉ bi ee papi sim den aawai i thʉ̃r Ẽwandam Iewaa a thʉ̃rjugui a jaaujim aajem. 36Maimua warag irig, Pʉde ũrbá ajim anʉm, pʉ naamhũan Elizabed ũanaa khitab mamʉ, iruajã chaai emkhooi paarpajugui ajim anʉm ĩchab. Õrau pod irua chaai oobaju aajerrjã ya seis meses simgui ajim anʉm, bi ee patarr. 37Ẽwandam athee chan bʉ̃ʉrjã phithurm nem chukhumgui ajim anʉm.

38Magbaa Mariaau magjim anʉm:

—Mʉʉn Ẽwandamau nem jawaata ũr ʉmgui ajim anʉm, ichdeu nem jaaubarmpierr aag. Mag khai magan Ẽwandamau cha pua jaau simjo aju aai sim mʉ dʉi ajim anʉm.

Mag jaau pʉawia chi Ẽwandam chog deeu ʉ̃gthar petajim aajem.

Mariaau Elizabed oon matarr

39Mag Ẽwandam chogau ichig iek jaauthurtarr khur khãai khapancha khaba nʉm ee, Mariaau ich naamhũan Elizabed oon majim aajem Judea durr, durr dapag ee phobordam kherʉm ee. 40Mag petawia, jooi Zacarías di aar barwia, ich naamhũanag, —¿Jãgpai ʉ Elizabed? aimajim anʉm.

41Mag Mariaau ichig iekhabaichem ũrbaawai warre ũan Elizabed bi eem chaaita pogogor khabaadejim anaabá. Magbarm dʉi ich ũan Elizabed gaaijã Ẽwandam Akhaar phẽs aicheewai onegau Mariaag, 42—Kadam, pʉchta ãba chadcha ʉʉin khapan thʉnʉm ee Ẽwandamau ʉuhcha abarm; maimua pʉ chaaijã ʉucha khitajugui ajim anʉm, õor ee Ẽwandam na. 43Khanii mʉg mʉ aphʉʉ ʉrrʉmua mua khap ʉajĩ pʉ maach Por ãdkha simua mʉch oon beeju. Ʉu pʉ beejimgui ajim anʉm María. 44Jãguata pʉ iekhabaichem mʉchdeu ũr atham dʉi, mʉ chaai agtha bi ee kherʉmuajã khaug athaawai, thʉgdʉdʉ khabaadejimgui ajim anaabá, onegau. 45María, Ẽwandam chogau pʉchig jaauchetarr iek pʉchdeu ʉkhatarr gaaimua chadcha pʉʉta onee ʉrraju. Maach Por Ẽwandamau ich chog dʉi pʉrʉg jaaupʉitarr iekhan thum ichdeu jaautarrjoo chadcha obebergmajugui ajim anʉm.

46Magbaawai Mariaau Ẽwandamag jeeumamua magjim aajem:

“Ẽwandam, pʉchta ãba maar Por aawai mʉch thãrauchata pʉrʉg ʉu ajim a ʉm.

47Mʉ thãar onee ʉm Ẽwandam, pʉch maar peerdʉajemuata mʉch dʉi mʉgbarm gaaimua.

48Chadcha puan mʉ dʉi pʉchdeu ampierr aju aai sim.

Õrau oowai sĩi mʉg maadeu nem igab ʉrrʉmta pua mʉ jʉr atham.

Pua mʉ dʉi mʉgbarm gaaimua ĩsmua atag ich mag õrau mʉ igwia, ‘¡Maagwai jãg ʉʉi onee khaba ʉabá!’ ajurau.

49Pʉchdeupaita chadcha maar thum wai dʉnʉm.

Pʉchdeu mʉ dʉi mʉgbarm gaaimua õrau pʉ jua theeg khaphʉ nʉisiju.

50Mʉg atagjã ar pʉch ipierraam khʉʉnan ich jãg pua am dau ee aug khaug paraa chitaju.

51Pʉ jua theegjom khʉʉn chan mʉg jẽb gaai ooba aajem.

Wir aig amach thoo aajerr khʉʉnjã ya pʉ jua eegar paaukhabaadem.

52Mʉg jẽb gaai chi thethem thethem aajem khʉʉnjã iek theeg chukhu isegkhʉʉiwia jũrr aphʉʉ maadeu igbajojoo khitheem khʉʉnta pua por phiriupʉimaajem.

53Aphʉʉ jãdaúa durrumjo khitheem khʉʉnaujã pʉrʉg jeeuwai pua amachdeu nem ig nʉm thum deejem.

Mamʉ riknaan, jũrr pua dau aug ee päaijem, pʉch igba nʉm kõit.

54Ẽwandam, pua nawe pʉch iekhatarr khĩir akhooba,

chadcha ĩsta pʉch chognaan israelnaan ʉu eeg oogpam, pʉchdeu warrgarwe maar jooinag jaaujerrjo.

55Nacha jooi Abranag jaauwai, i chaain ewagam khʉʉn eem ãb thaababarmuata maar peerdʉ auju atarr aawai, ĩs ewag nassi pawiata chadcha ich mag abarm.”

Maga ajim aajem Mariaau Ẽwandamag jeeumamua i tho iekhatarr.

56Mag María ich naamhũan Elizabed oon mawia i di aig ed thãrjupjo sĩejim aajem. Mag sĩi awiata deeu ich diig petajim aajem.

Juan chi õor por choomie thaabatarr

57Mag María i aig sĩewia petarr khur ya ich auju ed aadeewai ũan Elizabedau chaai chi emkhooidam oojim aajem. 58Mag Ẽwandamau ʉu i eeg oowia jõorpitarr chaai atham a ũrbaawai am dʉi di dakha naajerr khʉʉnau chi Elizabed khodnaan dʉimua am aig beewia irig, “Ʉuta Ẽwandamau pʉ chaai oopibarm; pʉ chaai gaaimua maarjã onee nʉmgui” aajeejim anʉm, jũrr bee thʉnʉm khʉʉnau.

59Maimua mag autarr ocho días aadem ee, deeu chi Elizabed aig i khapkhʉʉn dʉi i khodnaanpa bee thʉnʉisijierram aajem, chi chaai meheudam phʉʉrbichpʉi nʉm oon. Mag beewi chadcha phʉʉrbichpʉijim aajem. Mamʉ chi chaai thʉ̃r chi dennaanau agtha jaauba narr aawai bigaaum khʉʉnaun chi chaaidamjã ich aai gaaita Zacarías a thʉ̃rm ig naajim anaabá. 60Mamʉ magbaawai chi ãdau, —Ʉ̃hʉ̃, i thʉ̃r chan mag khabam. Mʉ chaairan Juan ata thʉ̃rjugui ajim anʉm.

61Magbaawai amachdeu jũrr irig, —¿Khan jãgwia pua i mag thʉ̃rm ig ʉ? Pãar ee ãbjã mag thʉ̃r chukhu sĩebahab ajierram anʉm, mag gaai i thʉ̃raag.

62Magbaawai jũrr chi ayag, —¿Pʉ chaai khan a thʉ̃r nʉ? a jeeujierram aajem.

Mamʉ mag jooi meu meraa khitʉmta kachpa khĩ thʉnarr aawai, jũrram khʉʉnau mag parhooba juau jajaaukhamua ichig jeeu nʉm khaug athaawai, 63jũrr ich garmua tabaldam jeeuwia, ag gaai “Iin Juan ata thʉ̃rju” a phãnaa, amag oopijim anaabá. Mag oopibaawai thum aig thʉnarr khʉʉnau amach odegpai, “¿Khan ajaug gaaimuata ãba mag gaaita chaai thʉ̃rm ig nʉma?” ajierram anʉm. 64Mamʉ mag phãnaa irua oopibarm dʉicha ĩchab ich jooi Zacarías iek eerdʉ sĩsijim anaabá. Magbaawai Ẽwandamag jeeumamua magjim anʉm:

—Ʉuhcha jãg pʉchdeu jaautarrjoo abarm, Ẽwandam. Mʉ ũan chaai thaabaawaita pua mʉ iek eerdʉpiju atarr aawai ya chadcha deeu mʉ iek eerdʉ chirsim. Ĩsin chadau mʉch meukhudamaucha pʉrʉg ʉu ajim a chirʉm Ẽwandam ajim anʉm.

65-66Mag oobaawai thum aig narr khʉʉnau, “Jãan ich iiuta jãgpibarm” a khĩirju nʉisijierram anaabá. Maimua ereu phobaadewia amach wenʉrrʉmpierr amachdeu oomatarr thum ich mag jajawag wetmarr aawai Judea durr ee didam ãhãbdo khekhedʉm eem khʉʉnaupa khakhapdo ich mag sĩi bĩi joisijim aajem. Mamʉ mag chi jaau wenʉrrʉm khʉʉn iek ũrmam khʉʉnau thumaa khĩirjuwia amach wir aigpai, “Mag chaaidam mʉg atag jooipabaadeewai, ¿jãgata khitajuuta mag jaau nʉma, bʉ̃rʉʉ khitwe mag nʉm?” aajeejim anʉm.

Mag, ich Ẽwandamau bʉ̃rʉʉwe ich khõchagpierr bãaupʉijim anaabá.

67Ich ag ed agtarr khur nʉʉpai awia jooi Zacarías gaai Ẽwandam Akhaar phẽs aicheewai Ẽwandam i jaaujem khʉʉn denjo iekhamamua María chaai igwia magjim anʉm:

68“Ẽwandam, ʉuhcha pua pʉch chaain eeg oowia ĩsin chad maar peerdʉ awaagpam.

Magua maar onee nʉmgui ajim anʉm.

69Warrgar pʉ chog David khakhitarr ag chaain ewagam khʉʉn eemta pua chi jua thierr maar athee pʉibapʉim, maar peerdʉ aumkhĩir, 70ich warrgarwe pʉch i jaaumienau õrag jaaujerrjo.

71Amau jaauwai mag ‘Pʉchdeu pʉibarmuata maar peerdʉ auju’ aajeejim, ‘thum maach oomapha aajem khʉʉn jua eemua, maimua ĩchab chi dajãumie maach khũgurwia pekau ee burrpieg ẽkha sĩerraajem jua eemuajã agjo.’

Maagjerr ĩsta ʉu ag ed pabaichemgui” ajim anʉm.

72“Ẽwandam, pʉchdeu maar jooin israelnaan dʉi iek deetarr bʉ̃ʉrjã khĩir akhooba, ʉu pua maar dau ee aug khaugbarm.

73Mag iek deetarr ed pua pʉch iiucha jooi Abranag jaauwai, pua maar peerdʉ auju ajim, 74maach oomapham khʉʉn ogkhaba, ni dosãtjã ogkhaba, 75ãba pʉch dʉipai ajapha wenʉrramkhĩir, tag bʉ̃ʉrjã pekau wau wenʉrram ugua.”

76Mag nacha Mariaau chaai ooju igwia iekha dichtarr khur jũrr ich chaai igmamuata jooirau magjim anʉm:

“Iewaadam, pʉʉta Cha Ʉ̃gthaa Phuu Nʉm ag i jaaumie a thʉ̃rju.

Puata maach Por maju ee i na õrag, ‘Maach peerdʉajem ya beeimʉʉ sim’ a jaaumaju, ya mag jaaubarm ũrwia õrau i pierrwai amach thãraucha khõsi i iek ʉkhamkhĩir; 77maimua amag maach peerdʉajem iek jaaubaawai amach khaibag thumaa ãsie ewag khĩirjuwia Ẽwandamag chugpaapi jeeumkhĩir.

78Magaag atheeta Ẽwandamau maach thumaam khʉʉn khĩir jãsenkhawia ich Chaai pʉi sim, peerdʉju khaugba aawai pod ʉ̃gthar oberbaju aajerr khʉʉnpa peerdʉ aumkhĩir.

79Mag amach peerdʉju pierrum khaphʉ aademʉn, sĩi õor khĩchag ee nʉmjo nʉm khʉʉnau ãspa urum khaug athamjo warag ãspapiwia khʉd chaar ee paaukhabaademjo Ẽwandam dʉi khõinaa wenʉrraju.”

Ma ajim aajem jooi Zacariaau ich iek eerdʉtarr ed iekhatarr.

80Maimua chi Juandam bãaumam dʉi Ẽwandamau ich Akhaarta i gaai phẽs deejim anaabá, ich dʉi ubʉ nʉrrʉmua ich iek jaau khaug amkhĩir. Jooipawia, ich ap õor chukag ee warp mawia sĩejeejim aajem. Maimua Ẽwandamau ich iek Israelpienag ũrpiju ed aadeewaita chi Juanau õrag jaaubaadejim aajem.

Currently Selected:

San Lucas 1: noaA

Highlight

Copy