San Juan 17

Jesuu ich khapeen kõit Ẽwandamag jeeutarr

1Maimua mag jaau dichwia ʉ̃gthaag eerpanaa ich Ayag magjim:

“Tata, ya ag ora pabaadem. Mʉg pʉch ipierraa chirʉm gaaimua chadcha pʉch Iewaakha chirʉm õrag khaphʉ apibá ajim, magbaawai muajã ĩchab pʉchta amag tho iekhapieg. 2Mʉ pʉch Iewaa aawai pʉchdeuta mʉrʉg mʉg durr gaai thumaam khʉʉn khãaijã iek theeg ʉ̃rpai apinaa, pʉchdeu mʉch iek ʉkhapimam khʉʉnjã ĩchab mʉch dʉi ich mag wenʉrraju aai apieg ʉu pua mʉrʉg pʉch jua theegjã deejimgui ajim. 3Mag am ich mag mʉ dʉi wenʉrraagan, amau pʉjã khaphʉnaa mʉjã khaphʉ aju aai nʉmgui ajim: ãba pʉʉta Ẽwandam charau, maagwai mʉ Jesucristo, pʉchdeu pʉitarr.

4’Pua mʉchig phidag deetarr thum mʉg jẽb gaai waubarmua mua õrag khaphʉ apibarmgui ajim, pʉʉta chadcha Ẽwandam chi jua thierriu. 5Nau mʉgtarr khur deeu mʉ pʉch aar pabaimaawai, warr mʉg durr ompaaju nawe mʉchta pʉch dʉi ãba nem iek theeg chi Porkha chirarrjo, ũwaai mʉrʉg agjo iek theeg apinaa chi Porkhapibá a jeeumajim ich kõitpai.”

6Maimua jũrr maar kõit ich mag Ẽwandamag jeeumamua magjim: “Sĩi mʉg durr gaai parhooba thʉnʉm khʉʉn eemua pʉchdeucha jʉr auwia pʉch iek ʉkhapi autarr khʉʉnagan ya mua jaaujimgui ajim, pʉ jãga sĩerrʉ́. Warrgarwe pʉch denkha auju arr khʉʉn aawai pua mʉrʉg deejimgui ajim, mʉ dʉi mʉg ogdʉba wenʉrramkhĩir. Pua mʉrʉg amag jaaupitarr mua jaauwi, ʉkhawi, ĩsin ʉu pʉchdeu khõsimjota wenʉrrʉmgui ajim, maar igwia. 7Ya ĩsin amau khaphʉ nʉmgui ajim, nem thum mua waunaa jaaujerr pʉchdeu mʉchig jaaumampierr mua wau chitarr. 8Pua jaaupitarr iek ya mua amag jaaujim; mag jaaubaawai amachdeujã ʉkham khõsi ʉkhajierramgui ajim. Magnaa ich Ayag maar kõit iekhamamua, Ya amau ʉkha nʉmgui ajim, chadcha pʉ aarmuata mʉ beejim, pʉchdeu mʉ pʉiwia.”

9Mag iekhakhagmamua warag, “Tata, mʉg mʉch dʉi durrum khʉʉn kõitta muan pʉrʉg jeeu chirʉmgui ajim. Mua chan sĩi mʉg durr gaai sĩi mʉch iekjã ʉkhaba nʉm khʉʉn kõit jeeuba, pʉchdeu mʉrʉg deewia pʉch iek ʉkhapi autarr khʉʉn kõitta jeeu chirʉmgui ajim, amjã ĩchab pʉ denkha durraawai. 10Pua khaphʉ chirʉmgui ajim, mʉ õor thum pʉ denkha thʉnʉm; maagwai thum pʉ õorkha thʉnʉm khʉʉnjã mʉ denkha thʉnʉm. Maguata amau pua khõsimjo wenʉrrʉm gaaimua, pʉ tho iekhamam dʉi mʉjã õrau wajapha tho iekhaajemgui” ajim.

11Magnaa, “Tata, mʉ chan tag mʉg durr gaai chitabajugui ajim, deeu pʉ dʉi ãba chiraag ũwaai pʉ aar maagpaawai. Pari mʉ khapeen chan wetba, ich mʉig eegar nʉisijugui ajim, maar igwia. Maagwai pʉrʉgta am kõit mua jeeu chirʉmgui ajim, pʉchpaita thumaam khʉʉnau ee aju aai naawai. Pʉch iekhau pua am chig apiba, pʉchdeu mʉrʉg deetarr jua theegau am thʉa wai chirsí ajim, ich jãg maach numijã o ãba nʉmjo amjã ich mag o ãba wenʉrramkhĩir. 12Mʉg jẽb gaai mʉchta am kha ogdʉba chitaawain pua mʉrʉg jua theeg deetarrau mua am chig apiba thʉa wai chitajimgui ajim, magamkhĩirta pua amag mʉ iek ʉkhapitarr aawai. Mag am thʉa wai chitaawai ãbjã okhooba, ãba ya ag nawe chi okhoom arr appaita okhoobarmgui ajim. Dau ãb jãgbarmʉn, jãan pʉch iek phã sim gaai jaau simjo ich jãgju arr aawai ajimgui” ajim, Judas igwia.

13Mag ich Ayag jeeumamua, “Tata, mʉ ũwaai deeu pʉ aar mam, pari mua mag am kõit jeeu chirʉmgui ajim, amach dakhĩircha. Mʉig agtha am dʉi eegar chirʉwe mag jeeu chirʉmgui ajim, amach jʉ̃gʉucha ũr naawai mʉch onee chirʉmjo ĩchab amjã onee nʉisimkhĩir. 14Pua amag pʉch iek jaaupitarr ya mua amag jaauwia ʉkhatarr aawai ya am maach deneugui ajim. Mag gaaimua pʉ iek ʉkhaba nʉm khʉʉnau jũrr am kha khõchkhaba wai nʉmgui ajim, tag amach igar khaba naawai. 15Mua chan pʉrʉg, mʉg durr gaaimua warre am chawag phe athaad aba, muan sĩita pʉrʉg, am thʉabá a chirʉmgui ajim, dosãtau am khũgurwia amachdeu ʉkhatarr iekta deeu isegam ugua. 16Tata, pua khaphʉ simgui ajim, mʉ mʉig eegarm khaba chirʉm. Magua mʉ khapeenjã ya sĩi mʉig eegar parhoobam khʉʉnjo khaba thʉnʉm, am mʉ dʉita wenʉrraawai. 17Magua mua pʉrʉgta am kõit jeeu chirʉmgui ajim, pʉch iek jaau nʉm phidag gaaita am phe wai chitamkhĩir. Magnaa, Tata, ãba pʉch iekta chadam iekhaugui ajim. 18Ich jãg pʉch iekta mʉg durr gayam khʉʉnag jaaumkhĩir pʉchdeu mʉ pʉitarrjo, ich agjo pʉch iek ʉkhaba thʉnʉm khʉʉnag ich ag iek jaaumkhĩirta muajã jũrr am pʉi chirʉmgui ajim. 19Mʉchdeu mag pʉrʉg pʉch iek jaau nʉm phidag gaaita am phe wai chitapi chirʉmʉn, mʉg pʉ ipierraa am kõit ʉdʉraa mʉch thõopi chirʉm gaaimuata magpi chirʉmgui ajim, magbaawai amaujã mʉchdeu amag jaaupi chirʉmjo chadcha pʉ iekta jaau wenʉrramkhĩir.

20’Tata, mua mʉg pʉrʉg jeeu chirʉm chan sĩi cha mʉch dʉi wenʉrrʉm khʉʉn kõitpai khaba, mʉg atag amau jaau wetum ũrwia mʉch iek ʉkhaju khʉʉn kõitpata pʉrʉg jeeu chirʉmgui ajim. 21Tata, jãg maach numijã o ãba naajemjo, ich agjo ĩchab amjã maach dʉi o ãbata phe wai chitapim khõsi chirʉmgui ajim. Mag amʉn magan bigaaum khʉʉnaujã mag oowia khaphʉ aju, puata mʉ pʉijim. 22Pʉchdeu mʉ pʉiwia mau eegar chirʉmjã agtha pʉch dʉi ãba ʉ̃gthar chirʉmjo apitarrjo, ya amjã mua mʉch dʉi õor ãbpaimjota phe wai chitʉmgui ajim, maachjo o ãba ich mag naamkhĩir. 23Magua, mʉ am dʉi chirʉm aig, pʉjã mʉ dʉi sim, mag nʉmua maach thum o ãba naag. Maagwai pʉ iek ʉkhaba nʉm khʉʉnaujã khaphʉ aju, puata chadcha mʉ pʉijim. Mag gaaimua ĩchab khaphʉ ajugui ajim, ich jãg pʉchdeu mʉ khõsi simjo amjã pua khõsi chirʉm.”

24Magnaa deeu ũwaai, “Tata, mua khaphʉ chirʉmgui ajim, mʉ ũwaai pʉ aar chiraimaawai ich jãg warr mʉg jẽb ompaaju nawe pua chadcha mʉ khõsi pʉch dʉi ãba chi jua thierrkha wai chirarrjo deeu pua mʉrʉg ich ag jua theeg deeju. Pari mag pʉ aar chiraimaawai mʉch khapeenjã ĩchab mʉch chirʉm aigta mʉch dʉi phe wai chitam khõsi chirʉmgui ajim, mag jua theeg pua deeu mʉrʉg deebarm amag oomkhĩir. 25Tata, puata thumaam khʉʉn dʉi chadcha nem agcha waaujeewai pʉrʉgta jeeu chirʉmgui ajim. Ar pʉ iek ʉkhaba nʉm khʉʉnau chan pʉ khaugba nʉm, mag amachdeu ʉkhaba nʉm gaaimua. Pari õor pom sĩi pʉ khaugba thʉnʉm daar, muan pʉ khaphʉ chitʉm; maagwai cha mʉ dʉi durrum khʉʉnaujã puata mʉ pʉitarr khaphʉ nʉmgui ajim ĩchab. 26Ya mua amag jaaujim, pʉ jãga sĩerrʉ́. Pari ichiita warag mua amag ich jãg jaau chitajugui ajim, ich jãg pʉchdeu mʉ daupii wai simjo amaujã jũrr agdaujo amach khapeen kha khõsi amkhĩir. Amag magamkhĩran, mʉchta am dʉi chitajugui” a iekhamajim ich Ayag maar kõit.

Currently Selected:

San Juan 17: noaA

Highlight

Copy