San Juan 16
16
1’Mua pãrag ag nawe mag õrau pãar oomapha aju a chirʉmʉn, ya pãach dʉi chadcha magphobaadeewaijã mua pãachig jaaujerrta khĩir eyaanaa warag ubʉ nʉisimkhĩrau ajim. 2Ya amauta pãar dʉi magphobaademʉn, pãran amau amach eemua jʉr werppʉiwia amach culto waaujem eejã tag dubpibajugui ajim. Mamag nʉʉ awia juauchajã pãar khechmaju. Mag pãar khech nʉm khʉʉnau amachdeupain Ẽwandamau pãar dʉi magpi sĩewaita mag nʉm ajurau. 3Mag amau pãar dau aug wau nʉmʉn, agtha bʉ̃ʉrjã mʉ Aai khaugba ni mʉjã khaugba aawaiu. 4Ya mua pãrag ag nawe mag jaau chirʉmʉn, ya chadcha pãach mag am jua ee dau aphʉʉ aadeewaijã mua pãachig amau pãach dʉi magju a jaaujerr khap amkhĩraugui ajim.
Jãga aicheju Ẽwandam Akhaar õor thãar ee sĩeicheewai
’Mag mʉch gaaimua pãar dau aphʉʉ ajujã warrcha mʉch khapeenkha awaag pãar thʉ̃rkha aauwaiwe mua chadcha pãrag jaaubajimgui ajim, agtha pãar dʉi amau magju wají narr aawai; mag nʉm dʉi ĩchab mʉchcha pãar dʉi chitaawai. 5Pari ĩs ya mʉch chirarr aar mʉch pʉitarr dʉi ãba chiraan mam aawai warre pãrag jaau chirʉmgui ajim. Pari mag mʉ mam a chirʉm ũrwia oneenaa ni ãbmuajã, “¿Jãgata sĩ mag pʉ sĩeimaju durrjã?” aba, 6sĩita warag okhĩirjuu nʉm, pãach appai aphobaadeewai pãach dau aphʉʉ aju khĩirjuwia. 7Pari mag mʉ maju a chirʉmʉn, chadcha pãach wajapcha amkhĩraugui ajim. Mʉ maba akhiin, Ẽwandam Akhaar mag pãar khĩir jãsenkhajujã beebaju. Magarrau mʉ petaawain chadau mʉchdeuchata mʉch jũrr mag pãar khĩir jãsenkhajujã pʉijugui ajim. 8Mag ichcha pierrwain chadau ichdeuta wajapha õrag khaphʉ apijugui ajim, khan gaaimuata Ẽwandam dʉi mag iekkhõr paraa nʉ, khan agá Ẽwandam dau na agpierraa nem wau nʉm, maimua jãga ich Ẽwandamaujã ichdeu khap aju ich iek ʉkhaba nʉm khʉʉn dʉi. 9Ichdeuta amag khaug aupijugui ajim, amachdeu mʉ iek ʉkhaba nʉm gaaimua mag Ẽwandam dʉi iekkhõr paraa nʉm. 10Ichdeuta amag khĩirjupi aujugui ajim, chadcha mʉchjã agpierraa Ẽwandam dau na nem wau chitarr gaaimua ũwaai mʉch Aai aar chiraimam. Mag mʉ mam pabaadeewai pãrau tag mʉ oobamgui ajim. 11Maigta ich ag Ẽwandam Akharaupai ĩchab mag dosãt mʉg durr gaai chi porkha sĩerrʉmjã ich igar nʉm khʉʉn dʉi Ẽwandamau ich garmua ya podbapʉimjã khaphʉ apijugui ajim.
12Mag jajawagmamua, —Agtha pãrag iek jaauju pooma wai chirʉmgui ajim, pari mʉʉgwaiwe par pãrag jaaukhiinjã pod pãrau khaugbaju. 13Ich Ẽwandam Akhaarcha pierrwain chadau, ichdeuta mag chadam iekjã khap apiejeewai, Ẽwandamau pãachig jaaumam thumaa pãrau khaphʉ ajugui ajim. Mag irua jaaumamjã chadam iekhaugui ajim, irua sĩi ich khĩraupaita nem jaauba chi Ayau ichig jaaumamta jũrr pãrag jaaumaawai. Mag sĩewai mʉg atag nem obeberg majujã pãrag khaphʉ apijugui ajim, ichdeupai. 14Iruata mʉ jaauju aai chirʉm aawai ichdeuta mua jaaujerr iekjã mʉchdeu jaaujerrjo ũwaai pãrag khĩir eyaa apinaa wajapcha khap apiju. Mag sim aig chan ichta tho iekhapiba, mʉʉta irua pãrag tho iekhapi simgui ajim. 15Wajapcharan mag mua jaaujerr iek khaphʉ api sim aiguin, mʉ Aai iekpata ĩchab khaphʉ api simgui ajim, mʉchdeujã i iekta jaaujerr aawai.
Okhĩirjug arrta jũrr onegag paju
16Maimua marag, —Nau mʉgtarr khur nʉʉpai awia, tag pãrau mʉ oobajugui ajim. Pari agtarr khur nʉʉpai awia deeu maach oojugui ajim.
17Irua magbaawai maar khapeen ãaur khʉʉnau amach wir aigpai, —Keena, ¿khan aawaíuma aajeejim, mag nau nʉʉpai awia tag maadeu i oobam anʉm; pari mag simta, wa ag khur nʉʉpai awia deeu maach ooju anʉm? Magnaa i iek mag ich Aai aar maju aawaita mag i oobam aajem, 18¿khan aawai khai mag nau nʉʉpai awia aawai? Mua chan pod khaugbamgui aajeejim jũrram khʉʉnau.
19Pari maar khapeenau amach eepai mamagkhamua ichig jeeum ig nʉmjã ich Jesuu khaphʉ sĩerr aawai ich garmuata jũrr marag magjim:
—Chadcha mua pãrag, nau mʉgtarr khur nʉʉpai awia pãrau tag mʉ oobam, pari ag khur nʉʉpai awia deeu maach ooju a chirʉmgui ajim. ¿Mua mag iekhatarr igwiata pãar mag khaugbabamkharrá? 20Mua mʉg jaau chirʉwe chan pãrau pod khaug auba nʉm, pari ya chadcha pãach dakhĩir magbaadeewaita mʉ iek ʉkhaba nʉm khʉʉn onee thʉnʉm daar, pãar mʉ athee icharaucha bĩewia okhĩirjuu ajugui ajim. Mag pãar okhĩirjug pooma ajup mamʉ, ya deeu pãach daúacha mʉ oophobaadeewai jũrr pãar oneeta aphobaadejugui ajim. 21Pãrau khaphʉ nʉmgui ajim, ʉʉi chaai awaagpaawai bi machgau onee khaba aadeejem; pari mag thʉnʉʉ awia ya chi chaaidam athaawai, tag gaai machag thʉnarrjã khĩirjuba, jũrr oneeta aadeejem. 22Ich jãg ʉʉi chaai machgau noobaadeejemjo, pãarjã nau nʉʉpai awia agjo dau nowaa aphobaadebajup, pari mag nʉm deeu maach oobaawai ũwaai pãar thãar onee aphobaadejugui ajim. Mag pãar onee aphobaadem chan ãbmuajã tag pãar okhĩirjuu apibajugui a jaaumajim marag ich Jesuupai.
23-24’Ya mag ed paawai, cha mua jaau chirʉm pãrau khaphʉ naaju aawai, tag ĩsimjo mʉrʉg jejeeu abajugui ajim. Pãar mʉ denkha naawai mʉ Ayag nem jeeu nʉm thum irua pãrag deejugui ajim. Pari mag mʉ denkha nʉm awiajã agtha pãrau bʉ̃ʉrjã mʉ Ayag mʉ iek gaai thʉwia nem jeeuba nʉm. Magta jeeubat ajim, pãachdeu nem jeeu nʉm deebaawai wajapcha onee aag.
Jesuuta mʉg durr gayam jua theeg thum podbapʉim
25’Ĩsin mua sĩi pãrag dawaacha khaba, bigawaapaita jaau chirʉmjo chirʉmgui ajim, khaugpimaphamjo. Pari jãg nʉʉ awia ya ag ed pabaadeewai tag jãg jaauba, warre dawaata pãrag mʉch Aai igwia jaaumajugui ajim. 26-27Mag ed paawai ya tag pãar kõit mua mʉch Ayag ich jãg jeeu chitaju khaba chirʉmgui ajim. Magju khãai pãachdeuchata warre mʉ iek gaai thʉwia irig jeeuju aai nʉisijugui ajim, ichdeujã pãar khõsi sĩewai. Irua mag pãar khõsi simʉn, chadcha mʉ i aarmua beetarr pãrau khaphʉnaa mʉ khõsi naawaiugui ajim. 28Mʉʉn chadcha mʉch Aai aar i dʉi ãba chirawiata mʉg durr gaai beejim. Magtarr aawai mʉg durr pʉawia ũwaai mʉch Aai aar maagpamgui ajim.
29Magbaawaita marau, —Ĩsin chadau pua warre dawaata jaaumabma anaajim irig, jãg sĩi khaugpimaphamjo bigawaapai khaba. 30Ya ĩsin chad marau khaphʉ nʉmgui anaajim, pua chadchata nem thum khaphʉ sim. Maguata bʉ̃ʉrjã pʉchig jeeubamjã pua maar khĩirjug khaphʉ jaaubapʉim. Maguata marau khaphʉ nʉmgui ajim, pʉ chadcha Ẽwandam sim aarmuachata beejim.
31Magbaawaita ich Jesuu magjim marag:
—Ĩsta pãrau mag khaphʉ nʉm anaabma, 32pari magtarrau oo chirakhimgui ajim. Ya pãar jĩerraugwia mʉch appai barpʉaju ora paagpam. Mag pãrau mʉch appai mʉ barpʉawiajã mʉch ap khaba chirʉmgui ajim, mʉ Aai mʉ dʉi sĩewai. 33Oob khĩirjumiet, mua ag nawe thum pãrag mag jaau chirʉmʉn, pãach warag mʉ denkha wenʉrrʉm gaaimua onee amkhĩraugui ajim. Mʉig eegar nʉweran pãar chadcha dau aphʉʉ wenʉrraju; pari khĩirdam onee abat ajim; mua mʉch garmuata mʉg durr gayam jua theeg thum podpʉiwia pãar eeg oo wai chitajugui ajim.
Currently Selected:
San Juan 16: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
