ܡܬܝ 17

ܫܘܼܚܠܵܦܵܐ ܕܝܼܫܘܿܥܥܲܠ ܛܘܼܪܵܐ

ܡܪܩܘܣ 9‏:2‏‐13؛ ܠܘܩܐ 9‏:28‏‐36

1ܡ̣ܢ ܒܵܬ݇ܪ ܐܸܫܬܵܐ ܝܵܘܡܵܢܹ̈ܐ، ܠܘܼܒܸܠ ܠܹܗ ܝܼܫܘܿܥ ܥܲܡܹܗ ܠܫܸܡܥܘܿܢ ܟܹܐܦܵܐ، ܘܠܝܲܥܩܘܿܒ݂، ܘܠܝܘܿܚܲܢܵܢ ܐܲܚܘܿܢܵܐ ܕܝܲܥܩܘܿܒ݂، ܘܐ݇ܣܝܼܩ ܠܗܘܿܢ ܠܛܘܼܪܵܐ ܪܵܡܵܐ ܒܢܲܦ̮ܫܲܝܗܝ. 2ܦܝܼܫ ܠܹܗ ܫܘܼܚܠܸܦܵܐ ܩܵܕ݇ܡܲܝܗܝ. ܦܵܬܹܗ ܒܘܼܗܪܸܢܵܗ̇ ܐܲܝܟ݂ ܫܸܡܫܵܐ، ܘܠܒ݂ܝܼܫܬܹܗ ܡܘܼܚܘܸܪܵܗ̇ ܐܲܝܟ݂ ܢܘܼܗܪܵܐ. 3ܘܗܵܐ ܦܝܼܫ ܠܗܘܿܢ ܚܸܙܝܹܐ ܐܸܠܲܝܗܝ ܡܘܼܫܹܐ ܘܐܹܠܝܼܵܐ ܗܲܡܙܘܼܡܹܐ ܥܲܡܹܗ. 4ܘܐ݇ܡܝܼܪܹܗ ܫܸܡܥܘܿܢ ܟܹܐܦܵܐ ܠܝܼܫܘܿܥ، ”ܡܵܪܝܼ، ܨܦܵܝܝܼ ܝܠܵܗ̇ ܐܸܠܲܢ ܕܦܵܝܫܲܚ ܠܐܲܟ݂ܵܐ، ܘܐܸܢ ܐܲܢ݇ܬ ܒܵܥܹܝܬ، ܒܸܬ ܥܵܒ݂ܕܹܢ ܬܠܵܬ ܡܛܲܠܠܹ̈ܐ، ܚܕܵܐ ܩܵܬܘܼܟ݂، ܘܚܕܵܐ ܩܵܐ ܡܘܼܫܹܐ ܘܚܕܵܐ ܩܵܐ ܐܹܠܝܼܵܐ.“ 5ܘܟܲܕ ܗ̇ܘ ܗܲܡܙܘܼܡܹܐ، ܗܵܐ ܥܢܵܢܵܐ ܒܲܗܪܵܢܬܵܐ ܥܒ݂ܝܼܕ ܠܵܗ̇ ܛܸܠܵܢܝܼܬܵܐ ܥܲܠܲܝܗܝ، ܘܗܵܐ ܩܵܠܵܐ ܡ̣ܢ ܓܵܘ ܥܢܵܢܵܐ ܐ݇ܬܹܐ ܠܹܗ ܒܹܐܡܵܪܵܐ، ”ܐܵܗܵܐ ܝܠܹܗ ܒܪܘܿܢܝܼ ܡܘܼܚܸܒܵܐ ܕܒܝܼܹܗ ܒܣܝܼܡ ܠܵܗ̇ ܠܝܼ، ܐܸܠܹܗ ܫܡܸܥܡܘܼܢ.“ 6ܐܝܼܡܲܢ ܕܫܡܝܼܥ ܠܗܘܿܢ ܬܲܠܡܝܼ̈ܕܹܐ، ܢܦܝܼܠ ܠܗܘܿܢ ܥܲܠ ܦܵܬܘܵܬܲܝ̈ܗܝ ܘܙܕܝܼܥ ܠܗܘܿܢ ܪܵܒܵܐ. 7ܐܝܼܢܵܐ ܝܼܫܘܿܥ ܐ݇ܬܹܐ ܠܹܗ ܘܕܩܝܼܪܹܗ ܒܝܼܲܝܗܝ ܘܐ݇ܡܝܼܪܹܗ ܐܸܠܲܝܗܝ، ”ܩܘܼܡܘܼܢ، ܠܵܐ ܙܵܕܥܝܼܬܘܿܢ.“ 8ܐܝܼܡܲܢ ܕܡܘܼܪܸܡ ܠܗܘܿܢ ܥܲܝܢܲܝ̈ܗܝ، ܠܵܐ ܚܙܹܐ ܠܗܘܿܢ ܐ݇ܢܵܫܵܐ ܐܸܠܵܐ ܝܼܫܘܿܥ ܒܢܲܦ̮ܫܹܗ.

9ܘܟܲܕ ܒܸܨܠܵܝܵܐ ܝܗ݇ܘܵܘ ܡ̣ܢ ܛܘܼܪܵܐ، ܦܩܝܼܕܲܝ ܠܹܗ ܝܼܫܘܿܥ ܕܠܐ݇ܢܵܫܵܐ ܠܵܐ ܐܵܡܪܝܼ ܡܸܢܕܝܼ ܒܘܼܬ ܐܵܗܵܐ ܚܸܙܘܵܐ ܗܲܠ ܕܩܵܐܹܡ ܒܪܘܿܢܵܐ ܕܐ݇ܢܵܫܵܐ ܡ̣ܢ ܓܵܘ ܡܝܼܬܹ̈ܐ. 10ܒܘܼܩܸܪܗܘܿܢ ܡܸܢܹܗ ܬܲܠܡܝܼܕܘܼ̈ܗܝ ܘܐ݇ܡܝܼܪܗܘܿܢ، ”ܩܵܡܘܿܕܝܼ ܣܵܦܪܹ̈ܐ ܟܹܐ ܐܵܡܪܝܼ ܕܐܹܠܝܼܵܐ ܘܵܠܹܐ ܝܠܵܗ̇ ܕܐܵܬܹܐ ܩܵܕ݇ܡܵܝܬܵܐ؟“#ܡܠܐܟ݂ܝ 4‏:5 11ܓ̰ܘܼܘܸܒ ܠܹܗ ܝܼܫܘܿܥ ܘܐ݇ܡܝܼܪܹܗ ܐܸܠܲܝܗܝ، ”ܐܹܠܝܼܵܐ ܒܹܐܬܵܝܵܐ ܝܠܹܗ ܩܵܕ݇ܡܵܝܬܵܐ ܕܡܲܕܸܪ ܡܸܢܕܪܸܫ ܟܠܲܝܗܝ ܡܸܢܕܝܼܵܢܹ̈ܐ. 12”ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܕܐܹܠܝܼܵܐ ܐ݇ܬܝܼܵܐ ܝܠܹܗ، ܘܐ݇ܢܵܫܹ̈ܐ ܠܵܐ ܝ݇ܕܝܼܥ ܠܗܘܿܢ ܐܸܠܹܗ، ܘܥܒ݂ܝܼܕ ܠܗܘܿܢ ܒܝܼܹܗ ܡܸܢܕܝܼ ܕܒܣܝܼܡ ܠܵܗ̇ ܠܗܘܿܢ، ܘܗܲܕܟ݂ܵܐ ܒܪܘܿܢܵܐ ܕܐ݇ܢܵܫܵܐ ܒܸܬ ܩܲܒܸܠ ܚܲܫܵܐ ܡܸܢܲܝܗܝ.“ 13ܗ̇ܝܓܵܗ ܦܘܼܪܡܹܐ ܠܗܘܿܢ ܬܲܠܡܝܼ̈ܕܹܐ ܕܒܘܼܬ ܝܘܿܚܲܢܵܢ ܡܲܥܡܕܵܢܵܐ ܗܲܡܙܘܼܡܹܐ ܝܗ݇ܘܵܐ ܥܲܡܲܝܗܝ.

ܒܵܣܲܡܬܵܐ ܕܒܲܪ ܐܸܓܵܪܵܐ

ܡܪܩܘܣ 9‏:14‏‐29؛ ܠܘܩܐ 9‏:37‏‐43

14ܟܲܕ ܐ݇ܬܹܐ ܠܗܘܿܢ ܠܟܸܣ ܟܸܢܫܵܐ، ܩܘܼܪܒܸܢܹܗ ܠܟܸܣ ܝܼܫܘܿܥ ܚܲܕ ܐ݇ܢܵܫܵܐ، ܘܒܪܝܼܟ ܠܹܗ ܩܵܕ݇ܡܘܼܗܝ ܘܐ݇ܡܝܼܪܹܗ، 15”ܡܵܪܝܼ، ܪܲܚܸܡ ܥܲܠ ܒܪܘܿܢܝܼ، ܕܒܲܪ ܐܸܓܵܪܵܐ ܝܠܹܗ، ܘܚܸܪܒܵܐ ܡܪܝܼܥܵܐ ܝܠܹܗ. ܪܵܒܵܐ ܓܵܗܹ̈ܐ ܟܹܐ ܢܵܦܹܠ ܓܵܘ ܢܘܼܪܵܐ، ܘܪܵܒܵܐ ܓܵܗܹ̈ܐ ܟܹܐ ܢܵܦܹܠ ܓܵܘ ܡ̈ܝܼܵܐ. 16”ܘܡܘܼܐܬܹܐ ܠܝܼ ܠܟܸܣ ܬܲܠܡܝܼܕܘܼ̈ܟ݂. ܐܝܼܢܵܐ ܠܵܐ ܡܨܹܐ ܠܗܘܿܢ ܒܲܣܡܝܼ ܠܹܗ.“ 17ܓ̰ܘܼܘܸܒ ܠܹܗ ܝܼܫܘܿܥ ܘܐ݇ܡܝܼܪܹܗ، ”ܝܵܐ ܫܲܪܒܬܵܐ ܠܵܐ ܡܗܘܼܡܸܢܬܵܐ ܘܦܟ̰ܝܼܠܬܵܐ، ܗܲܠ ܐܝܼܡܲܢ ܒܸܬ ܗܵܘܹܝܢ ܥܲܡܵܘܟ݂ܘܿܢ؟ ܗܲܠ ܐܝܼܡܲܢ ܒܸܬ ܛܵܥܢܹܢ ܝܘܼܩܪܵܘܟ݂ܘܿܢ؟ ܡܲܝܬܹܝܡܘܼܢ ܠܹܗ ܠܟܸܣ ܠܝܼ ܠܐܲܟ݂ܵܐ.“ 18ܘܢܓ̰ܝܼܘ ܠܹܗ ܝܼܫܘܿܥ ܒܫܹܐܕܵܐ، ܘܦܠܝܼܛ ܠܹܗ ܡܸܢܹܗ، ܘܒܣܝܼܡ ܠܹܗ ܝܵܠܵܕ݇ܐ ܒܗ̇ܝ ܣܵܥܲܬ. 19ܗ̇ܝܓܵܗ ܐ݇ܬܹܐ ܠܗܘܿܢ ܬܲܠܡܝܼ̈ܕܹܐ ܠܟܸܣ ܝܼܫܘܿܥ ܒܢܲܦ̮ܫܲܝܗܝ ܘܒܘܼܩܸܪܗܘܿܢ ܡܸܢܹܗ، ”ܩܵܡܘܿܕܝܼ ܠܵܐ ܡܨܹܐ ܠܲܢ ܐܲܚܢܲܢ ܦܲܠܛܲܚ ܡܸܢܹܗ ܫܹܐܕܵܐ؟“ 20ܓ̰ܘܼܘܸܒ ܠܹܗ ܐܸܠܲܝܗܝ ܝܼܫܘܿܥ ܘܐ݇ܡܝܼܪܹܗ، ”ܒܘܼܬ ܒܵܨܘܿܪܘܼܬܵܐ ܕܗܲܝܡܵܢܘܼܬܵܘܟ݂ܘܿܢ. ܣܵܒܵܒ ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܐܸܢ ܗܵܘܹܐ ܠܵܘܟ݂ܘܿܢ ܗܲܝܡܵܢܘܼܬܵܐ ܐܲܝܟ݂ ܕܲܢܕܸܟܬܵܐ ܕܚܲܪܕܲܠ، ܒܸܬ ܐܵܡܪܝܼܬܘܿܢ ܠܐܵܗܵܐ ܛܘܼܪܵܐ، ’ܫܲܢܝܼ ܡ̣ܢ ܐܵܗܵܐ ܕܘܼܟܵܐ ܠܗ̇ܝ ܕܘܼܟܵܐ ܐ݇ܚܹܪ݇ܬܵܐ،‘ ܘܒܸܬ ܦܵܐܹܫ ܫܘܼܢܝܵܐ. ܡܸܢܕܝܼ ܠܹܐ ܗܵܘܹܐ ܥܸܨܝܵܐ ܐܸܠܵܘܟ݂ܘܿܢ. 21ܐܝܼܢܵܐ ܐܵܗܵܐ ܓܸܢܣܵܐ ܠܹܐ ܦܵܠܹܛ ܐܸܠܵܐ ܒܨܵܘܡܵܐ ܘܒܨܠܘܿܬܵܐ.“

ܝܼܫܘܿܥ ܡܸܢܕܪܸܫ ܡܲܚܒܘܼܪܹܐ ܒܘܼܬ ܡܵܘܬܹܗ ܘܩܝܵܡܬܹܗ

ܡܪܩܘܣ 9‏:30‏‐32؛ ܠܘܩܐ 9‏:43‏‐45

22ܟܲܕ ܫܸܪܝܹܐ ܝܗ݇ܘܵܘ ܓܵܘ ܓܠܝܼܠܵܐ، ܐ݇ܡܝܼܪܹܗ ܝܼܫܘܿܥ ܐܸܠܲܝܗܝ، ”ܗܕܝܼܪܵܐ ܝܠܹܗ ܒܪܘܿܢܵܐ ܕܐ݇ܢܵܫܵܐ ܕܦܵܐܹܫ ܣܘܼܦܝܵܐ ܒܐܝܼܕܵܬܹ̈ܐ ܕܒܢܲܝ̈ܢܵܫܵܐ. 23”ܒܸܬ ܩܵܛܠܝܼ ܠܹܗ، ܘܒܝܵܘܡܵܐ ܕܬܠܵܬܵܐ ܒܸܬ ܦܵܐܹܫ ܡܘܼܩܸܡܵܐ.“ ܘܦܫܝܼܡ ܠܗܘܿܢ ܪܵܒܵܐ.

ܙܘܼܙܵܐ ܕܪܹܫܝܼܬܵܐ

24ܘܟܲܕ ܐ݇ܬܹܐ ܠܗܘܿܢ ܠܟܦܲܪܢܵܚܘܿܡ، ܐ݇ܬܹܐ ܠܗܘܿܢ ܠܟܸܣ ܫܸܡܥܘܿܢ ܟܹܐܦܵܐ ܐܵܢܝܼ ܕܫܵܩܠܝܼ ܗ݇ܘܵܘ ܬܪܹܝ ܙܘܼܙܹ̈ܐ ܩܵܐ ܟܠ ܪܹܫܵܐ،#ܡܦܩܢܐ 30‏:13 ܘܒܘܼܩܸܪܗܘܿܢ ܡܸܢܹܗ، ”ܠܹܐ ܝܲܗ݇ܒܸܠ ܪܲܒܝܼܵܘܟ݂ܘܿܢ ܬܪܹܝ ܙܘܼܙܹ̈ܐ؟“ 25ܓ̰ܘܼܘܸܒ ܠܹܗ ܫܸܡܥܘܿܢ ܟܹܐܦܵܐ ܘܐ݇ܡܝܼܪܹܗ، ”ܗܹܐ.“ ܘܐܝܼܡܲܢ ܕܥܒ݂ܝܼܪܹܗ ܠܒܲܝܬܵܐ، ܡ̣ܢ ܩܵܕ݇ܡ ܕܗܲܡܙܸܡ ܗ݇ܘܵܐ ܫܸܡܥܘܿܢ ܟܹܐܦܵܐ، ܒܘܼܩܸܪܹܗ ܡܸܢܹܗ ܝܼܫܘܿܥ، ”ܡܘܿܕܝܼ ܒܸܚܫܵܒ݂ܵܐ ܝܘܸܬ ܫܸܡܥܘܿܢ، ܡܲܠܟܹ̈ܐ ܕܐܲܪܥܵܐ ܡ̣ܢ ܡܵܢܝܼ ܟܹܐ ܫܵܩܠܝܼ ܙܘܼܙܵܐ ܕܪܹܫܝܼܬܵܐ، ܡ̣ܢ ܒܢܘܿܢܲܝ̈ܗܝ ܝܲܢ ܡ̣ܢ ܢܘܼܟ݂ܪ̈ܵܝܹܐ؟“ 26ܓ̰ܘܼܘܸܒ ܠܹܗ ܫܸܡܥܘܿܢ ܟܹܐܦܵܐ ܘܐ݇ܡܝܼܪܹܗ، ”ܡ̣ܢ ܢܘܼܟ݂ܪ̈ܵܝܹܐ.“ ܐ݇ܡܝܼܪܹܗ ܝܼܫܘܿܥ، ”ܒܲܣ ܒܢܘܿܢܹ̈ܐ ܚܹܐܪܹ̈ܐ ܝܢܵܐ.“ 27”ܐܝܼܢܵܐ ܕܠܵܐ ܡܲܟܪܸܒܲܚ ܠܗܘܿܢ، ܙܹܠ݇ ܠܝܵܡܵܐ ܘܕܪܝܼ ܟ̰ܲܢܓܵܠ، ܘܢܘܼܢܵܐ ܩܵܕ݇ܡܵܝܵܐ ܕܕܵܒ݂ܩܹܬ ܠܹܗ، ܦܬܘܿܚ ܦܘܼܡܹܗ ܘܒܸܬ ܡܲܫ݇ܟ̰ܚܸܬ ܙܘܼܙܵܐ ܕܣܹܐܡܵܐ. ܫܩܘܿܠ ܘܗܲܒ݂݇ܠ ܠܹܗ ܡ̣ܢ ܓܹܒܝܼ ܘܡ̣ܢ ܓܹܒܘܼܟ݂.“

Currently Selected:

ܡܬܝ 17: ABTAB

Highlight

Copy