ܠܘܩܐ 24

ܩܝܵܡܬܵܐ ܕܝܼܫܘܿܥ ܡ̣ܢ ܓܵܘ ܩܲܒ݂ܪܵܐ

ܡܬܝ 28‏:1‏‐10؛ ܡܪܩܘܣ 16‏:1‏‐8؛ ܝܘܚܢܢ 20‏:1‏‐10

1ܒܝܵܘܡܵܐ ܩܵܕ݇ܡܵܝܵܐ ܕܫܲܒܬܵܐ، ܒܨܲܦܪܵܐ، ܟܲܕ ܗܹܫ ܚܸܫܟܵܐ، ܫܩܝܼܠ ܠܗܘܿܢ ܐܵܢܝܼ ܒܲܟ݂ܬܵܬܹ̈ܐ ܗܹܪ̈ܘܿܡܹܐ ܕܗܘܼܕܪܲܝ ܝܗ݇ܘܵܘ ܘܐ݇ܙܝܼܠ ܠܗܘܿܢ ܠܩܲܒ݂ܪܵܐ. 2ܘܚܙܹܐ ܠܗܘܿܢ ܠܟܹܐܦܵܐ ܡܘܼܚܕܸܪܵܐ ܡ̣ܢ ܩܲܒ݂ܪܵܐ. 3ܘܥܒ݂ܝܼܪܗܘܿܢ ܘܠܵܐ ܚܙܹܐ ܠܗܘܿܢ ܦܲܓ݂ܪܵܐ ܕܡܵܪܲܢ ܝܼܫܘܿܥ. 4ܟܲܕ ܐܵܢܝܼ ܥܓ̰ܝܼܒܹ̈ܐ ܒܐܵܗܵܐ، ܗܵܐ ܬܪܹܝ ܐ݇ܢܵܫܹ̈ܐ ܒܓ̰ܘܼܠܹ̈ܐ ܡܲܒܪܸ̈ܩܵܢܹܐ ܟܠܹܐ ܠܗܘܿܢ ܒܕܸܦܢܲܝܗܝ. 5ܘܗܘܹܐ ܠܗܘܿܢ ܒܙܕܘܼܥܬܵܐ، ܘܡܘܼܟܸܦ ܠܗܘܿܢ ܦܵܬܲܝܗܝ ܠܐܲܪܥܵܐ. ܐܝܼܢܵܐ ܐܵܢܝܼ ܐ݇ܢܵܫܹ̈ܐ ܐ݇ܡܝܼܪܗܘܿܢ ܐܸܠܲܝܗܝ، ”ܩܵܡܘܿܕܝܼ ܒܸܛܥܵܝܵܐ ܝܬܘܿܢ ܠܚܵܝܵܐ ܓܵܘ ܡܝܼܬܹ̈ܐ؟ 6”ܠܹܐ ܝܠܹܗ ܠܐܲܟ݂ܵܐ، ܩܝܼܡܵܐ ܝܠܹܗ. ܕܟ݂ܘܿܪܘܼܢ ܕܵܐܟ݂ܝܼ ܗܘܼܡܙܸܡ ܠܹܗ ܥܲܡܵܘܟ݂ܘܿܢ ܗܹܫ ܗ̇ܘ ܓܵܘ ܓܠܝܼܠܵܐ، 7”ܕܘܵܠܹܐ ܝܠܵܗ̇ ܒܪܘܿܢܵܐ ܕܐ݇ܢܵܫܵܐ ܦܵܐܹܫ ܣܘܼܦܝܵܐ ܒܐܝܼܕܵܬܹ̈ܐ ܕܐ݇ܢܵܫܹ̈ܐ ܚܲܛܵܝܹ̈ܐ، ܦܵܐܹܫ ܡܸܚܝܵܐ ܠܙܩܝܼܦܵܐ، ܘܒܝܵܘܡܵܐ ܕܬܠܵܬܵܐ ܩܵܐܹܡ.“ 8ܗ̇ܝܓܵܗ ܐܵܢܝܼ ܕܟ݂ܝܼܪܗܘܿܢ ܗܹܡܸܙܡܵܢܘܼ̈ܗܝ.

9ܘܕܝܼܪܗܘܿܢ ܡ̣ܢ ܩܲܒ݂ܪܵܐ، ܘܗܘܼܩܹܐ ܠܗܘܿܢ ܟܠܲܝܗܝ ܐܲܢܹܐ ܠܚܲܕܸܥܣܲܪ ܘܠܟܠܲܝܗܝ ܐ݇ܚܹܪ̈݇ܢܹܐ. 10ܘܐܲܢܹܐ ܝܗ݇ܘܵܘ ܒܲܟ݂ܬܵܬܹ̈ܐ: ܡܲܪܝܲܡ ܡܲܓ݂ܕܠܵܝܬܵܐ، ܘܝܘܿܚܲܢ، ܘܡܲܪܝܲܡ ܝܸܡܵܐ ܕܝܲܥܩܘܿܒ݂، ܘܒܲܟ݂ܬܵܬܹ̈ܐ ܐ݇ܚܹܪ̈݇ܢܹܐ ܥܲܡܲܝܗܝ. ܐܲܢܹܐ ܗܘܼܩܹܐ ܠܗܘܿܢ ܟܠ ܡܸܢܕܝܼ ܠܫܠܝܼܚܹ̈ܐ. 11ܐܝܼܢܵܐ ܐܵܢܝܼ ܠܵܐ ܗܘܼܡܸܢܗܘܿܢ ܠܒܲܟ݂ܬܵܬܹ̈ܐ، ܘܚܫܝܼܒ݂ ܠܗܘܿܢ ܗܹܡܸܙܡܵܢܲܝ̈ܗܝ ܐܲܝܟ݂ ܗܹܡܸܙܡܵܢܹ̈ܐ ܕܫܹܐܕܵܢܹ̈ܐ. 12ܩܝܼܡ ܠܹܗ ܫܸܡܥܘܿܢ ܟܹܐܦܵܐ ܘܪܚܝܼܛ ܠܹܗ ܠܩܲܒ݂ܪܵܐ، ܘܟܝܼܦ ܠܹܗ ܘܚܙܹܐ ܠܹܗ ܠܟܸܬܵܢܹ̈ܐ ܡܘܼܬܒܹܐ ܒܢܲܦ̮ܫܲܝܗܝ. ܘܐ݇ܙܝܼܠ ܠܹܗ ܟܲܕ ܥܲܓ̰ܘܼܒܹܐ ܒܘܼܬ ܡܸܢܕܝܼ ܕܗܘܹܐ ܠܹܗ.

ܒܐܘܼܪܚܵܐ ܠܥܲܡܵܐܘܿܣ

ܡܪܩܘܣ 16‏:12‏‐13

13ܒܗ̇ܘ ܝܵܘܡܵܐ ܬܪܹܝ ܡܸܢܲܝܗܝ ܒܹܐܙܵܠܵܐ ܝܗ݇ܘܵܘ ܠܚܕܵܐ ܡܵܬܵܐ ܫܸܡܘܼܗ̇ ܥܲܡܵܐܘܿܣ، ܪܸܚܩܵܐ ܡ̣ܢ ܐܘܿܪܸܫܠܸܡ ܫܲܒ݂ܥܵܐ ܡܝܼܠܹ̈ܐ، 14ܘܗܲܡܙܘܼܡܹܐ ܝܗ݇ܘܵܘ ܚܲܕ ܥܲܡ ܕܗ̇ܘ ܐ݇ܚܹܪ݇ܢܵܐ ܒܘܼܬ ܟܠܲܝܗܝ ܐܲܢܹܐ ܕܩܘܼܘܸܡ ܠܗܘܿܢ. 15ܟܲܕ ܐܵܢܝܼ ܗܲܕܟ݂ܵܐ ܗܲܡܙܘܼܡܹܐ ܘܒܲܩܘܼܪܹܐ ܚܲܕ ܡ̣ܢ ܗ̇ܘ ܐ݇ܚܹܪ݇ܢܵܐ، ܝܼܫܘܿܥ ܒܓܵܢܹܗ ܐ݇ܬܹܐ ܠܹܗ ܠܟܸܣ ܠܲܝܗܝ ܘܫܘܼܪܹܐ ܠܹܗ ܒܹܐܙܵܠܵܐ ܥܲܡܲܝܗܝ. 16ܐܝܼܢܵܐ ܐܵܢܝܼ ܠܵܐ ܝ݇ܕܝܼܥ ܠܗܘܿܢ ܐܸܠܹܗ ܣܵܒܵܒ ܥܲܝܢܲܝ̈ܗܝ ܕܒ݂ܝܼܩܹܐ ܝܗ݇ܘܵܘ ܡ̣ܢ ܠܝܼܕܵܥܹܗ. 17ܘܒܘܼܩܸܪܹܗ ܡܸܢܲܝܗܝ، ”ܡܘܿܕܝܼ ܝܢܵܐ ܐܲܢܹܐ ܗܹܡܸܙܡܵܢܹ̈ܐ ܕܗܲܡܙܘܼܡܹܐ ܝܬܘܿܢ ܚܲܕ ܥܲܡ ܕܗ̇ܘ ܐ݇ܚܹܪ݇ܢܵܐ ܟܲܕ ܒܹܐܙܵܠܵܐ؟“ ܘܐܵܢܝܼ ܟܠܹܐ ܠܗܘܿܢ ܦܫܝܼܡܹܐ. 18ܓ̰ܘܼܘܸܒ ܠܹܗ ܚܲܕ ܡܸܢܲܝܗܝ ܫܸܡܹܗ ܩܲܠܝܘܿܦܵܐ ܘܐ݇ܡܝܼܪܹܗ ܐܸܠܹܗ، ”ܐܲܚܟ̰ܝܼ ܐܲܢ݇ܬ ܝܼܘܸܬ ܢܘܼܟ݂ܪܵܝܵܐ ܡ̣ܢ ܐܘܿܪܸܫܠܸܡ ܕܠܹܐ ܝܘܸܬ ܒܝܼܕܵܥܵܐ ܒܘܼܬ ܡܸܢܕܝܼ ܕܗܘܹܐ ܠܹܗ ܓܵܘܘܼܗ̇ ܒܐܲܢܹܐ ܝܵܘܡܵܢܹ̈ܐ؟“ 19ܒܘܼܩܸܪܹܗ ܡܸܢܲܝܗܝ، ”ܡܘܿܕܝܼ؟“ ܓ̰ܘܼܘܸܒ ܠܗܘܿܢ ܐܸܠܹܗ، ”ܒܘܼܬ ܝܼܫܘܿܥ ܢܵܨܪܵܝܵܐ، ܐ݇ܢܵܫܵܐ ܢܒ݂ܝܼܵܐ ܘܚܲܝܠܵܢܵܐ ܒܗܹܡܸܙܡܵܢ ܘܒܦܘܼܠܚܵܢܵܐ ܩܵܕ݇ܡ ܐܲܠܵܗܵܐ ܘܩܵܕ݇ܡ ܟܠܹܗ ܥܲܡܵܐ. 20”ܣܘܼܦܹܐ ܠܗܘܿܢ ܐܸܠܹܗ ܓܘܼܪ̈ܵܢܹܐ ܕܟܵܗܢܹ̈ܐ ܘܪܹ̈ܫܵܢܹܐ ܕܝܼܲܢ ܠܕܝܼܘܵܢ ܕܡܵܘܬܵܐ ܘܡܚܹܐ ܠܗܘܿܢ ܠܙܩܝܼܦܵܐ. 21”ܐܲܚܢܲܢ ܒܗܹܒ݂ܝܼ ܝܘܲܚ ܗ݇ܘܵܘ ܕܗ̇ܘ ܒܸܬ ܦܲܪܸܩ ܗ݇ܘܵܐ ܠܝܼܣܪܵܝܹܠ. ܥܲܠ ܟܠܹܗ ܐܵܗܵܐ، ܐܸܕܝܘܿܡ ܝܵܘܡܵܐ ܕܬܠܵܬܵܐ ܝܠܹܗ ܗܵܐ ܡ̣ܢ ܕܐܲܢܹܐ ܗܘܹܐ ܠܗܘܿܢ. 22”ܐܘܼܦ ܚܲܕ݇ܟܡܵܐ ܡ̣ܢ ܒܲܟ݂ܬܵܬܹ̈ܐ ܡܸܢܲܢ ܩܲܡ ܡܲܥܓ̰ܸܒܝܼ ܠܲܢ. ܐ݇ܙܝܼܠ ܠܗܘܿܢ ܠܩܲܒ݂ܪܵܐ ܩܵܝܕܲܡܬܵܐ ܓ̰ܲܠܕܹܐ، 23”ܘܟܲܕ ܠܵܐ ܚܙܹܐ ܠܗܘܿܢ ܠܦܲܓ݂ܪܹܗ، ܐ݇ܬܹܐ ܠܗܘܿܢ ܘܐ݇ܡܝܼܪܗܘܿܢ ܐܸܠܲܢ ܕܚܙܹܐ ܠܗܘܿܢ ܡܲܠܲܐܟܹ̈ܐ ܬܵܡܵܐ، ܐܲܝܢܝܼ ܕܐ݇ܡܝܼܪܗܘܿܢ ܐܸܠܲܝܗܝ ܕܚܵܝܵܐ ܝܠܹܗ. 24”ܐܘܼܦ ܐ݇ܢܵܫܹ̈ܐ ܡܸܢܲܢ ܐ݇ܙܝܼܠ ܠܗܘܿܢ ܠܒܹܝܬ ܩܒ݂ܘܼܪܵܐ، ܘܡܘܼܫ݇ܟ̰ܸܚ ܠܗܘܿܢ ܗܲܕܟ݂ܵܐ، ܐܲܝܟ݂ ܕܐ݇ܡܝܼܪܗܘܿܢ ܒܲܟ݂ܬܵܬܹ̈ܐ، ܐܝܼܢܵܐ ܐܸܠܹܗ ܠܵܐ ܚܙܹܐ ܠܗܘܿܢ.“ 25ܗ̇ܝܓܵܗ ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܝܵܐ ܒܵܨܘܿܪܹ̈ܐ ܕܦܲܪܡܵܝܬܵܐ، ܘܝܲܩܘܼܪܹ̈ܐ ܒܠܸܒܵܐ ܠܗܲܡܘܼܢܹܐ ܟܠܲܝܗܝ ܐܵܢܝܼ ܕܗܘܼܡܙܸܡ ܠܗܘܿܢ ܢܒ݂ܝܼܹ̈ܐ، 26”ܠܹܐ ܝܗ݇ܘܵܐ ܐܵܢܲܢܩܵܝܬܵܐ ܕܩܲܒܸܠ ܗ݇ܘܵܐ ܚܲܫܵܐ ܡܫܝܼܚܵܐ ܒܐܲܢܹܐ ܘܥܵܒܹܪ ܗ݇ܘܵܐ ܠܬܸܫܒܘܿܚܬܹܗ؟“ 27ܘܫܘܼܪܹܐ ܠܹܗ ܡ̣ܢ ܡܘܼܫܹܐ ܘܡ̣ܢ ܟܠܲܝܗܝ ܢܒ݂ܝܼܹ̈ܐ ܦܲܫܘܼܩܹܐ ܐܸܠܲܝܗܝ ܟܠܲܝܗܝ ܟܬܵܒܹ̈ܐ ܒܘܼܬ ܓܵܢܹܗ.

28ܘܩܘܼܪܒܸܢܗܘܿܢ ܠܡܵܬܵܐ ܕܒܹܐܙܵܠܵܐ ܝܗ݇ܘܵܘ ܐܸܠܘܼܗ̇، ܐܝܼܢܵܐ ܝܼܫܘܿܥ ܡܘܼܚܙܹܐ ܠܹܗ ܐܲܝܟ݂ ܕܐܸܢ ܒܹܐܙܵܠܵܐ ܝܗ݇ܘܵܐ ܠܚܕܵܐ ܕܘܼܟܵܐ ܒܘܼܫ ܪܸܚܩܵܐ. 29ܐܝܼܢܵܐ ܐܵܢܝܼ ܡܘܼܠܝܸܨ ܠܗܘܿܢ ܐܸܠܹܗ، ܒܹܐܡܵܪܵܐ، ”ܦܘܼܫ ܠܟܸܣ ܠܲܢ، ܣܵܒܵܒ ܪܲܡܫܵܐ ܩܲܪܒܘܼܢܹܐ ܝܠܹܗ، ܘܝܵܘܡܵܐ ܒܸܓܢܵܝܵܐ ܝܠܹܗ.“ ܘܥܒ݂ܝܼܪܹܗ ܕܦܵܐܹܫ ܗ݇ܘܵܐ ܠܟܸܣ ܠܲܝܗܝ. 30ܘܟܲܕ ܝ݇ܬܝܼܒ݂ ܠܗܘܿܢ ܠܣܘܼܦܪܵܐ، ܫܩܝܼܠ ܠܹܗ ܠܲܚܡܵܐ ܘܒܘܼܪܸܟ݂ ܠܹܗ ܘܩܨܹܐ ܠܹܗ ܘܝܘܼܗ݇ܒܸܠ ܠܹܗ ܐܸܠܲܝܗܝ. 31ܒܗ̇ܝ ܥܕܵܢܵܐ ܡܨܹܐ ܠܗܘܿܢ ܚܵܙܝܼ ܝܗ݇ܘܵܘ، ܘܝ݇ܕܝܼܥ ܠܗܘܿܢ ܐܸܠܹܗ، ܐܝܼܢܵܐ ܗ̇ܘ ܛܠܝܼܩ ܠܹܗ ܡ̣ܢ ܩܵܕ݇ܡ ܥܲܝܢܲܝ̈ܗܝ. 32ܘܐ݇ܡܝܼܪܗܘܿܢ ܚܲܕ ܠܗ̇ܘ ܐ݇ܚܹܪ݇ܢܵܐ، ”ܠܹܐ ܝܗ݇ܘܵܐ ܠܸܒܲܢ ܒܸܩܝܵܕܵܐ ܒܓܵܘܲܢ، ܟܲܕ ܗܲܡܙܘܼܡܹܐ ܝܗ݇ܘܵܐ ܥܲܡܲܢ ܒܐܘܼܪܚܵܐ ܘܦܲܫܘܼܩܹܐ ܟܬܵܒܹ̈ܐ ܐܸܠܲܢ؟“ 33ܩܝܼܡ ܠܗܘܿܢ ܒܗ̇ܝ ܥܕܵܢܵܐ ܘܕܝܼܪܗܘܿܢ ܠܐܘܿܪܸܫܠܸܡ، ܘܚܙܹܐ ܠܗܘܿܢ ܠܚܲܕܸܥܣܲܪ ܬܲܠܡܝܼ̈ܕܹܐ ܘܐ݇ܚܹܪ̈݇ܢܹܐ ܥܲܡܲܝܗܝ ܓ̰ܡܝܼܥܹܐ ܠܸܚܕܵܕܹ̈ܐ، 34ܘܒܹܐܡܵܪܵܐ، ”ܫܲܪܝܼܪܵܐܝܼܬ ܡܵܪܲܢ ܩܝܼܡܵܐ ܝܠܹܗ، ܘܦܝܼܫ ܠܹܗ ܚܸܙܝܵܐ ܠܫܸܡܥܘܿܢ ܟܹܐܦܵܐ.“ 35ܐܘܼܦ ܐܵܢܝܼ ܬܪܹܝ ܗܘܼܩܹܐ ܠܗܘܿܢ ܡܸܢܕܝܼ ܕܗܘܹܐ ܠܹܗ ܒܐܘܼܪܚܵܐ، ܘܕܵܐܟ݂ܝܼ ܝ݇ܕܝܼܥ ܠܗܘܿܢ ܐܸܠܹܗ ܐܝܼܡܲܢ ܕܩܨܹܐ ܠܹܗ ܠܲܚܡܵܐ.

ܝܼܫܘܿܥ ܦܝܵܫܵܐ ܚܸܙܝܵܐ ܠܬܲܠܡܝܼ̈ܕܹܐ

ܡܬܝ 28‏:16‏‐20؛ ܡܪܩܘܣ 16‏:14‏‐18؛ ܝܘܚܢܢ 20‏:19‏‐23؛ ܣܘܥܪ̈ܢܐ 1‏:6‏‐8

36ܘܟܲܕ ܬܲܠܡܝܼ̈ܕܹܐ ܗܲܡܙܘܼܡܹܐ ܗܲܕܟ݂ܵܐ، ܝܼܫܘܿܥ ܒܓܵܢܹܗ ܟܠܹܐ ܠܹܗ ܓܵܘܲܝܗܝ ܘܐ݇ܡܝܼܪܹܗ، ”ܫܠܵܡܵܐ ܐܸܠܵܘܟ݂ܘܿܢ، ܐܵܢܵܐ ܝܘܸܢ ܠܵܐ ܙܵܕܥܝܼܬܘܿܢ.“ 37ܘܐܵܢܝܼ ܚܓ̰ܝܼܠ ܠܗܘܿܢ ܘܙܕܝܼܥ ܠܗܘܿܢ، ܒܸܚܫܵܒ݂ܵܐ ܕܪܘܼܚܵܐ ܒܸܚܙܵܝܵܐ ܝܗ݇ܘܵܘ. 38ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܩܵܡܘܿܕܝܼ ܒܸܫܓ݂ܵܫܵܐ ܝܬܘܿܢ، ܘܩܵܡܘܿܕܝܼ ܒܸܥܒ݂ܵܪܵܐ ܝܢܵܐ ܚܘܼܫܵܒܹ̈ܐ ܓܵܘ ܠܸܒܵܘܟ݂ܘܿܢ؟ 39”ܚܙܹܝܡܘܼܢ ܐܝܼܕܵܬܝܼ̈ ܘܐܲܩܠܵܬܝܼ̈ ܕܐܵܢܵܐ ܝܘܸܢ ܒܓܵܢܝܼ. ܕܩܘܿܪܘܼܢ ܒܝܼܝܼ ܘܚܙܹܝܡܘܼܢ، ܣܵܒܵܒ ܪܘܼܚܵܐ ܠܲܝܬ ܠܵܗ̇ ܒܸܣܪܵܐ ܘܓܲܪ̈ܡܹܐ، ܐܲܝܟ݂ ܕܒܸܚܙܵܝܵܐ ܝܬܘܿܢ ܕܐܵܢܵܐ ܐܝܼܬ ܠܝܼ.“ 40ܡ̣ܢ ܒܵܬ݇ܪ ܕܐ݇ܡܝܼܪܹܗ ܗܲܕܟ݂ܵܐ، ܡܘܼܚܙܹܐ ܠܹܗ ܐܸܠܲܝܗܝ ܐܝܼܕܵܬܹ̈ܗ ܘܐܲܩܠܵܬܹ̈ܗ. 41ܗܹܫ ܐܵܢܝܼ ܠܵܐ ܗܲܡܘܼܢܹܐ ܡ̣ܢ ܚܲܕܘܼܬܵܐ ܘܥܘܼܓ̰ܵܒܵܐ، ܐ݇ܡܝܼܪܹܗ ܐܸܠܲܝܗܝ، ”ܐܝܼܬ ܠܵܘܟ݂ܘܿܢ ܠܐܲܟ݂ܵܐ ܡܸܢܕܝܼ ܠܹܐܟ݂ܵܠܵܐ؟“ 42ܘܝܘܼܗ݇ܒܸܠ ܠܗܘܿܢ ܐܸܠܹܗ ܚܲܕ ܣܵܗܡܵܐ ܡ̣ܢ ܢܘܼܢܵܐ ܛܘܝܼܬܵܐ ܘܫܵܢܵܐ ܕܕܸܒ݂ܫܵܐ. 43ܘܫܩܝܼܠ ܠܹܗ ܘܐ݇ܟ݂ܝܼܠ ܠܹܗ ܩܵܕ݇ܡ ܥܲܝܢܲܝ̈ܗܝ. 44ܘܐ݇ܡܝܼܪܹܗ ܐܸܠܲܝܗܝ، ”ܐܲܢܹܐ ܗܹܡܸܙܡܵܢܹ̈ܐ ܗܘܼܡܙܸܡ ܠܝܼ ܐܸܠܵܘܟ݂ܘܿܢ ܟܲܕ ܥܲܡܵܘܟ݂ܘܿܢ ܝܼܘܸܢ ܗ݇ܘܵܐ، ܕܘܵܠܹܐ ܝܗ݇ܘܵܐ ܕܦܵܐܹܫ ܬܘܼܡܸܡܵܐ ܟܠ ܡܸܢܕܝܼ ܕܟܬܝܼܒ݂ܵܐ ܝܠܹܗ ܒܘܼܬ ܕܝܼܝܼ ܒܢܵܡܘܿܣܵܐ ܕܡܘܼܫܹܐ ܘܒܢܒ݂ܝܼܹ̈ܐ ܘܒܡܲܙܡܘܿܪܹ̈ܐ.“

45ܗ̇ܝܓܵܗ ܦܬܝܼܚ ܠܹܗ ܠܪܸܥܝܵܢܲܝܗܝ ܕܦܲܪܡܝܼ ܗ݇ܘܵܘ ܠܟܬܵܒܹ̈ܐ. 46ܐ݇ܡܝܼܪܹܗ ܐܸܠܲܝܗܝ، ”ܗܲܕܟ݂ܵܐ ܟܬܝܼܒ݂ܵܐ ܝܠܹܗ، ܘܵܠܹܐ ܝܗ݇ܘܵܐ ܕܡܫܝܼܚܵܐ ܩܲܒܸܠ ܗ݇ܘܵܐ ܚܲܫܵܐ ܘܒܝܵܘܡܵܐ ܕܬܠܵܬܵܐ ܩܵܐܹܡ ܗ݇ܘܵܐ ܡ̣ܢ ܓܵܘ ܡܝܼܬܹ̈ܐ. 47”ܘܒܫܸܡܹܗ ܦܵܝܫܝܼ ܡܘܼܟܪܸܙܹܐ ܬܝܵܒ݂ܘܼܬܵܐ ܘܦܘܼܚܵܠܵܐ ܕܚܛܝܼܵܬܹ̈ܐ ܠܟܠܲܝܗܝ ܐܸܡܘܵܬܹ̈ܐ، ܫܲܪܘܼܝܹܐ ܩܵܕ݇ܡܵܝܬܵܐ ܡ̣ܢ ܐܘܿܪܸܫܠܸܡ. 48”ܘܐܲܚܬܘܿܢ ܣܵܗܕܹ̈ܐ ܝܬܘܿܢ ܥܲܠ ܐܲܢܹܐ. 49”ܗܵܐ ܐܵܢܵܐ ܒܸܬ ܫܲܕܪܸܢܵܘܟ݂ܘܿܢ ܡܸܢܕܝܼ ܕܒܵܒܝܼ ܩܘܼܘܸܠ ܠܹܗ ܕܒܸܬ ܫܲܕܸܪܵܘܟ݂ܘܿܢ. ܐܝܼܢܵܐ ܐܲܚܬܘܿܢ ܟܠܹܝܡܘܼܢ ܓܵܘ ܡܕܝܼܢ݇ܬܵܐ ܕܐܘܿܪܸܫܠܸܡ ܗܲܠ ܕܩܲܒܠܝܼܬܘܿܢ ܚܲܝܠܵܐ ܡ̣ܢ ܪܵܘܡܵܐ.“

ܣܘܼܠܵܩܵܐ ܕܡܫܝܼܚܵܐ

ܡܪܩܘܣ 16‏:19‏‐20؛ ܣܘܥܪ̈ܢܐ 1‏:9‏‐11

50ܦܘܼܠܛܲܝ ܠܹܗ ܥܲܠ ܒܹܝܬ ܥܲܢܝܵܐ، ܡܘܼܪܸܡ ܠܹܗ ܐܝܼܕܵܬܹ̈ܗ ܘܒܘܼܪܟܲܝ ܠܹܗ. 51ܟܲܕ ܗ̇ܘ ܒܲܪܘܼܟܲܝ ܝܗ݇ܘܵܐ، ܦܪܝܼܫ ܠܹܗ ܡܸܢܲܝܗܝ ܘܦܝܼܫ ܠܹܗ ܡܘܼܐܣܩܵܐ ܠܫܡܲܝܵܐ. 52ܘܐܵܢܝܼ ܣܓ݂ܝܼܕ ܠܗܘܿܢ ܐܸܠܹܗ، ܘܕܝܼܪܗܘܿܢ ܠܐܘܿܪܸܫܠܸܡ ܒܚܲܕܘܼܬܵܐ ܓܘܼܪܬܵܐ. 53ܘܐܵܢܝܼ ܒܟܠ ܥܕܵܢܵܐ ܓܵܘ ܗܲܝܟܠܵܐ ܝܗ݇ܘܵܘ ܫܲܒܘܼܚܹܐ ܘܒܸܚܩܵܪܵܐ ܠܐܲܠܵܗܵܐ. ܐܵܡܹܝܢ.

Currently Selected:

ܠܘܩܐ 24: ABTAB

Highlight

Copy