ܝܘܚܢܢ 11

ܡܵܘܬܵܐ ܕܠܲܥܵܙܲܪ

1ܐܝܼܬ ܗ݇ܘܵܐ ܚܲܕ ܐ݇ܢܵܫܵܐ ܡܪܝܼܥܵܐ ܫܸܡܹܗ ܠܲܥܵܙܲܪ، ܡ̣ܢ ܒܹܝܬ ܥܲܢܝܵܐ ܡܵܬܵܐ ܕܡܲܪܝܲܡ ܘܚܵܬܘܼܗ̇ ܡܵܪܬܵܐ. 2ܐܵܗܵܐ ܡܲܪܝܲܡ ܝܼܗ݇ܘܵܐ ܗ̇ܝ ܕܡܫܝܼܚ ܠܵܗ̇ ܐܲܩܠܵܬܹ̈ܐ ܕܡܵܪܲܢ ܒܒܸܣܡܵܐ ܘܡܸܫܝܲܝ ܠܵܗ̇ ܒܟܵܘܣܘܼܗ̇. ܠܲܥܵܙܲܪ ܡܪܝܼܥܵܐ ܐܲܚܘܿܢܘܼܗ̇ ܝܗ݇ܘܵܐ. 3ܐܲܢܹܐ ܚܵܬܘܵܬܹ̈ܐ ܫܘܼܕܸܪܗܘܿܢ ܚܲܒܪܵܐ ܠܟܸܣ ܝܼܫܘܿܥ، ܒܹܐܡܵܪܵܐ، ”ܡܵܪܲܢ، ܗ̇ܘ ܕܟܹܐ ܡܲܚܸܒܸܬ ܠܹܗ ܡܪܝܼܥܵܐ ܝܠܹܗ.“ 4ܐܝܼܡܲܢ ܕܫܡܝܼܥ ܠܹܗ ܝܼܫܘܿܥ، ܐ݇ܡܝܼܪܹܗ، ”ܐܵܗܵܐ ܡܲܪܥܵܐ ܠܹܐ ܝܠܹܗ ܡܲܪܥܵܐ ܕܡܵܘܬܵܐ، ܐܝܼܢܵܐ ܩܵܐ ܬܸܫܒܘܿܚܬܵܐ ܕܐܲܠܵܗܵܐ ܝܠܹܗ، ܕܒܝܼܹܗ ܦܵܐܹܫ ܚܩܝܼܪܵܐ ܒܪܘܿܢܵܐ ܕܐܲܠܵܗܵܐ.“ 5ܝܼܫܘܿܥ ܟܹܐ ܡܲܚܸܒ ܗ݇ܘܵܐ ܠܡܵܪܬܵܐ ܘܠܚܵܬܘܼܗ̇ ܡܲܪܝܲܡ ܘܠܠܲܥܵܙܲܪ. 6ܐܝܼܡܲܢ ܕܫܡܝܼܥ ܠܹܗ ܕܠܲܥܵܙܲܪ ܡܪܝܼܥܵܐ ܝܗ݇ܘܵܐ، ܥܘܼܪܩܸܠ ܠܹܗ ܒܗ̇ܝ ܕܘܼܟܵܐ ܕܝܼܗ݇ܘܵܐ ܬܪܹܝ ܝܵܘܡܵܢܹ̈ܐ. 7ܗ̇ܝܓܵܗ ܐ݇ܡܝܼܪܹܗ ܠܬܲܠܡܝܼܕܘܼ̈ܗܝ، ”ܩܘܼܡܘܼܢ ܡܸܢܕܪܸܫ ܐܵܙܲܠ݇ܚ ܠܝܼܗܘܼܕ.“ 8ܐ݇ܡܝܼܪܗܘܿܢ ܐܸܠܹܗ ܬܲܠܡܝܼܕܘܼ̈ܗܝ، ”ܪܲܒܝܼ، ܡ̣ܢ ܩܵܕ݇ܡ ܐܵܕܝܼܵܐ ܝܗܘܼܕܵܝܹ̈ܐ ܒܵܥܝܼ ܗ݇ܘܵܘ ܪܵܓ̰ܡܝܼ ܗ݇ܘܵܘ ܠܘܼܟ݂، ܘܐܲܢ݇ܬ ܒܵܥܹܝܬ ܡܸܢܕܪܸܫ ܐܵܙܹܠ݇ܬ ܠܬܵܡܵܐ؟“ 9ܓ̰ܘܼܘܸܒ ܠܹܗ ܐܸܠܲܝܗܝ ܝܼܫܘܿܥ، ”ܗܵܐ ܠܲܝܬ ܬܪܸܥܣܲܪ ܣܵܥܲܬܹ̈ܐ ܓܵܘ ܚܲܕ ܝܵܘܡܵܐ؟ ܐܸܢ ܐ݇ܢܵܫܵܐ ܚܵܕܹܪ ܒܝܵܘܡܵܐ ܠܹܐ ܬܲܪܩܸܠ، ܣܵܒܵܒ ܟܹܐ ܚܵܙܹܐ ܒܲܗܪܵܐ ܕܐܵܗܵܐ ܕܘܼܢܝܹܐ. 10”ܐܝܼܢܵܐ ܐܸܢ ܚܵܕܹܪ ܒܠܲܝܠܹܐ، ܒܸܬ ܬܲܪܩܸܠ ܣܵܒܵܒ ܠܲܝܬ ܒܲܗܪܵܐ ܒܝܼܹܗ.“ 11ܡ̣ܢ ܒܵܬ݇ܪ ܕܗܘܼܡܙܸܡ ܠܹܗ ܗܲܕܟ݂ܵܐ، ܐ݇ܡܝܼܪܹܗ ܐܸܠܲܝܗܝ، ”ܠܲܥܵܙܲܪ ܡܘܼܚܸܒܲܢ ܕܡܝܼܟ݂ܵܐ ܝܠܹܗ، ܐܝܼܢܵܐ ܒܹܐܙܵܠܵܐ ܝܘܸܢ ܕܡܲܪܥܸܫܸܢܹܗ.“ 12ܓ̰ܘܼܘܸܒ ܠܗܘܿܢ ܬܲܠܡܝܼ̈ܕܹܐ، ”ܡܵܪܲܢ، ܐܸܢ ܕܡܝܼܟ݂ܵܐ ܝܠܹܗ، ܒܸܬ ܗܵܘܹܐ ܒܘܼܫ ܨܦܵܝܝܼ.“ 13ܝܼܫܘܿܥ ܗܲܡܙܘܼܡܹܐ ܝܗ݇ܘܵܐ ܒܘܼܬ ܡܵܘܬܹܗ، ܐܝܼܢܵܐ ܬܲܠܡܝܼܕܘܼ̈ܗܝ ܚܫܝܼܒ݂ ܠܗܘܿܢ ܕܗܲܡܙܘܼܡܹܐ ܝܗ݇ܘܵܐ ܒܘܼܬ ܕܡܵܟ݂ܵܐ ܕܫܸܢܬܵܐ. 14ܗ̇ܝܓܵܗ ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ ܓܲܠܝܵܐܝܼܬ، ”ܠܲܥܵܙܲܪ ܡܝܼܬܵܐ ܝܠܹܗ. 15”ܘܐܵܢܵܐ ܒܸܚܕܵܝܵܐ ܝܘܸܢ ܕܠܹܐ ܝܘܸܢ ܗ݇ܘܵܐ ܬܵܡܵܐ، ܩܵܐ ܕܐܲܚܬܘܿܢ ܗܲܡܸܢܝܼܬܘܿܢ. ܐܝܼܢܵܐ ܩܘܼܡܘܼܢ ܕܐܵܙܲܠ݇ܚ ܠܟܸܣ ܠܹܗ.“ 16ܗ̇ܝܓܵܗ ܬܐܘܿܡܵܐ، ܗ̇ܘ ܕܦܵܐܹܫ ܩܸܪܝܵܐ ܓ̰ܲܡܵܐ، ܐ݇ܡܝܼܪܹܗ ܠܚܲܒ݂ܪ̈ܵܘܵܬܹܗ ܬܲܠܡܝܼ̈ܕܹܐ، ”ܐܵܙܲܠ݇ܚ ܐܘܼܦ ܐܲܚܢܲܢ ܕܡܵܝܬܲܚ ܥܲܡܹܗ.“

ܝܼܫܘܿܥ ܢܘܼܚܵܡܵܐ ܘܚܲܝܹ̈ܐ

17ܐܝܼܡܲܢ ܕܡܛܹܐ ܠܹܗ ܝܼܫܘܿܥ ܠܒܹܝܬ ܥܲܢܝܵܐ، ܡܘܼܫ݇ܟ̰ܸܚ ܠܹܗ ܕܠܲܥܵܙܲܪ ܗܘܝܼܵܐ ܝܗ݇ܘܵܐ ܓܵܘ ܩܲܒ݂ܪܵܐ ܐܲܪܒܥܵܐ ܝܵܘܡܵܢܹ̈ܐ. 18ܒܹܝܬ ܥܲܢܝܵܐ ܡܐܲܝܟ݂ ܬܪܹܝ ܡܝܼܠܹ̈ܐ ܪܸܚܩܵܐ ܝܗ݇ܘܵܐ ܡ̣ܢ ܐܘܿܪܸܫܠܸܡ، 19ܘܪܵܒܵܐ ܝܗܘܼܕܵܝܹ̈ܐ ܐ݇ܬܝܼܹܐ ܝܗ݇ܘܵܘ ܠܟܸܣ ܡܵܪܬܵܐ ܘܡܲܪܝܲܡ ܠܝܼܵܗ݇ܒܲܝ ܠܸܒܵܐ ܒܘܼܬ ܐܲܚܘܿܢܲܝܗܝ. 20ܐܝܼܡܲܢ ܕܫܡܝܼܥ ܠܵܗ̇ ܡܵܪܬܵܐ ܕܐ݇ܬܹܐ ܠܹܗ ܝܼܫܘܿܥ، ܦܠܝܼܛ ܠܵܗ̇ ܠܐܘܼܪܚܹܗ، ܐܝܼܢܵܐ ܡܲܪܝܲܡ ܝ݇ܬܝܼܒ݂ܬܵܐ ܝܗ݇ܘܵܐ ܓܵܘ ܒܲܝܬܵܐ. 21ܐ݇ܡܝܼܪܵܗ̇ ܡܵܪܬܵܐ ܠܝܼܫܘܿܥ، ”ܡܵܪܝܼ، ܐܸܢ ܗܵܘܹܝܬ ܗ݇ܘܵܐ ܠܐܲܟ݂ܵܐ، ܠܹܐ ܡܵܐܹܬ ܗ݇ܘܵܐ ܐܲܚܘܿܢܝܼ. 22”ܐܝܼܢܵܐ ܐܘܼܦ ܐܵܕܝܼܵܐ ܒܝܼܕܵܥܵܐ ܝܘܵܢ، ܟܠ ܡܸܢܕܝܼ ܕܛܵܠܒܹܬ ܡ̣ܢ ܐܲܠܵܗܵܐ ܒܸܬ ܝܲܗ݇ܒܸܠ ܠܘܼܟ݂.“ 23ܐ݇ܡܝܼܪܹܗ ܐܸܠܘܼܗ̇ ܝܼܫܘܿܥ، ”ܒܸܬ ܩܵܐܹܡ ܐܲܚܘܿܢܵܟ݂ܝ.“ 24ܐ݇ܡܝܼܪܵܗ̇ ܐܸܠܹܗ ܡܵܪܬܵܐ، ”ܒܝܼܕܵܥܵܐ ܝܘܵܢ ܕܒܸܬ ܩܵܐܹܡ ܒܢܘܼܚܵܡܵܐ، ܒܝܵܘܡܵܐ ܐ݇ܚܵܪܵܝܵܐ.“ 25ܐ݇ܡܝܼܪܹܗ ܐܸܠܘܼܗ̇ ܝܼܫܘܿܥ، ”ܐܵܢܵܐ ܝܘܸܢ ܢܘܼܚܵܡܵܐ ܘܚܲܝܹ̈ܐ. ܡ̇ܢ ܕܗܲܡܸܢ ܒܝܼܝܼ، ܐܵܦܸܢ ܡܵܐܹܬ ܒܸܬ ܚܵܝܹܐ. 26”ܘܟܠ ܡ̇ܢ ܕܚܵܝܹܐ ܘܗܲܡܸܢ ܒܝܼܝܼ، ܠܹܐ ܡܵܐܹܬ ܠܥܵܠܲܡ. ܗܲܡܘܼܢܹܐ ܝܘܲܬܝ ܒܐܵܗܵܐ؟“ 27ܐ݇ܡܝܼܪܵܗ̇ ܐܸܠܹܗ، ”ܗܹܐ، ܡܵܪܝܼ، ܗܲܡܘܼܢܹܐ ܝܘܵܢ ܕܐܲܢ݇ܬ ܝܼܘܸܬ ܡܫܝܼܚܵܐ، ܒܪܘܿܢܵܐ ܕܐܲܠܵܗܵܐ، ܗ̇ܘ ܕܐܵܬܹܐ ܠܥܵܠܡܵܐ.“ 28ܡ̣ܢ ܒܵܬ݇ܪ ܕܐ݇ܡܝܼܪܵܗ̇ ܐܵܗܵܐ، ܐ݇ܙܝܼܠ ܠܵܗ̇ ܘܩܪܹܐ ܠܵܗ̇ ܠܡܲܪܝܲܡ ܚܵܬܘܼܗ̇ ܒܛܸܫܘܵܐ ܘܐ݇ܡܝܼܪܵܗ̇، ”ܪܲܒܝܼ ܠܐܲܟ݂ܵܐ ܝܠܹܗ، ܘܒܸܩܪܵܝܵܟ݂ܝ ܝܼܠܹܗ.“ 29ܐܝܼܡܲܢ ܕܫܡܝܼܥ ܠܵܗ̇ ܡܲܪܝܲܡ، ܩܝܼܡ ܠܵܗ̇ ܒܓ̰ܲܠܕܘܼܬܵܐ ܘܐ݇ܬܹܐ ܠܵܗ̇ ܠܟܸܣ ܠܹܗ. 30ܝܼܫܘܿܥ ܗܹܫ ܠܹܐ ܝܗ݇ܘܵܐ ܥܒ݂ܝܼܪܵܐ ܓܵܘ ܡܵܬܵܐ، ܐܝܼܢܵܐ ܒܗ̇ܝ ܕܘܼܟܵܐ ܝܗ݇ܘܵܐ ܕܬܦܝܼܩ ܠܵܗ̇ ܒܝܼܹܗ ܡܵܪܬܵܐ. 31ܘܝܗܘܼܕܵܝܹ̈ܐ ܕܝܼܗ݇ܘܵܘ ܥܲܡܘܼܗ̇ ܓܵܘ ܒܲܝܬܵܐ ܒܝܼܵܗ݇ܒ݂ܘܼܗ̇ ܠܸܒܵܐ ܟܲܕ ܚܙܹܐ ܠܗܘܿܢ ܠܡܲܪܝܲܡ ܕܩܝܼܡ ܠܵܗ̇ ܒܓ̰ܲܠܕܘܼܬܵܐ ܘܦܠܝܼܛ ܠܵܗ̇، ܦܠܝܼܛ ܠܗܘܿܢ ܒܵܬ݇ܪܘܼܗ̇ ܒܸܚܫܵܒ݂ܵܐ ܕܒܹܐܙܵܠܵܐ ܝܗ݇ܘܵܐ ܠܩܲܒ݂ܪܵܐ ܠܸܒܟ݂ܵܝܵܐ ܬܵܡܵܐ. 32ܐܝܼܡܲܢ ܕܐ݇ܬܹܐ ܠܵܗ̇ ܡܲܪܝܲܡ ܠܕܘܼܟܵܐ ܕܝܼܗ݇ܘܵܐ ܝܼܫܘܿܥ ܘܚܙܹܐ ܠܵܗ̇ ܐܸܠܹܗ، ܢܦܝܼܠ ܠܵܗ̇ ܩܵܕ݇ܡ ܐܲܩܠܵܬܹ̈ܗ ܘܐ݇ܡܝܼܪܵܗ̇ ܐܸܠܹܗ، ”ܡܵܪܝܼ، ܐܸܢ ܗܵܘܹܝܬ ܗ݇ܘܵܐ ܠܐܲܟ݂ܵܐ، ܠܹܐ ܡܵܐܹܬ ܗ݇ܘܵܐ ܐܲܚܘܿܢܝܼ.“ 33ܐܝܼܡܲܢ ܕܚܸܙܝܵܐ ܠܹܗ ܝܼܫܘܿܥ ܒܸܒܟ݂ܵܝܵܐ، ܘܐܘܼܦ ܐܵܢܝܼ ܝܗܘܼܕܵܝܹ̈ܐ ܕܝܼܗ݇ܘܵܘ ܥܲܡܘܼܗ̇ ܒܸܒܟ݂ܵܝܵܐ، ܦܝܼܫ ܠܹܗ ܫܓ݂ܝܼܫܵܐ ܘܫܥܝܼܫܵܐ ܒܪܘܼܚܹܗ. 34ܒܘܼܩܸܪܹܗ ܝܼܫܘܿܥ، ”ܐܲܝܟܵܐ ܡܘܼܬܸܒ݂ ܠܵܘܟ݂ܘܿܢ ܐܸܠܹܗ؟“ ܘܐܵܢܝܼ ܓ̰ܘܼܘܸܒ ܠܗܘܿܢ، ”ܡܵܪܲܢ، ܬܵܐ ܘܚܙܝܼ.“ 35ܒܟܹܐ ܠܹܗ ܝܼܫܘܿܥ. 36ܐ݇ܡܝܼܪܗܘܿܢ ܝܗܘܼܕܵܝܹ̈ܐ، ”ܚܙܹܝܡܘܼܢ ܟܡܵܐ ܟܹܐ ܡܲܚܸܒ ܗ݇ܘܵܐ ܠܹܗ.“ 37ܘܐ݇ܚܹܪ̈݇ܢܹܐ ܡܸܢܲܝܗܝ ܐ݇ܡܝܼܪܗܘܿܢ، ”ܠܹܐ ܡܵܨܹܐ ܐܵܗܵܐ ܕܦܬܝܼܚ ܠܹܗ ܥܲܝܢܹ̈ܐ ܕܣܸܡܝܵܐ ܥܵܒܹܕ ܕܐܘܼܦ ܐܵܗܵܐ ܠܵܐ ܡܵܐܹܬ؟“

ܝܼܫܘܿܥ ܡܲܩܘܼܡܹܐ ܠܲܥܵܙܲܪܡ̣ܢ ܓܵܘ ܡܝܼܬܹ̈ܐ

38ܡܸܢܕܪܸܫ ܝܼܫܘܿܥ ܦܝܼܫ ܠܹܗ ܫܓ݂ܝܼܫܵܐ. ܐ݇ܬܹܐ ܠܹܗ ܠܟܸܣ ܩܲܒ݂ܪܵܐ، ܕܝܼܗ݇ܘܵܐ ܓܸܦܝܼܬܵܐ، ܘܟܹܐܦܵܐ ܡܘܼܬܒ݂ܵܐ ܥܲܠ ܬܲܪܥܘܼܗ̇. 39ܐ݇ܡܝܼܪܹܗ ܝܼܫܘܿܥ، ”ܫܩܘܿܠܘܼܢ ܠܹܗ ܟܹܐܦܵܐ.“ ܐ݇ܡܝܼܪܵܗ̇ ܡܵܪܬܵܐ ܚܵܬܵܐ ܕܡܝܼܬܵܐ، ”ܡܵܪܝܼ، ܐܵܕܝܼܵܐ ܚܡܝܼܩܵܐ ܝܠܹܗ، ܣܵܒܵܒ ܐܲܪܒܥܵܐ ܝܵܘܡܵܢܹ̈ܐ ܝܢܵܐ ܕܓܵܘ ܩܲܒ݂ܪܵܐ ܝܠܹܗ.“ 40ܓ̰ܘܼܘܸܒ ܠܹܗ ܐܸܠܘܼܗ̇ ܝܼܫܘܿܥ، ”ܠܵܐ ܐ݇ܡܝܼܪܝܼ ܐܸܠܵܟ݂ܝ ܕܐܸܢ ܗܲܡܸܢܲܬܝ ܒܸܬ ܚܵܙܝܲܬܝ ܫܘܼܒ݂ܚܵܐ ܕܐܲܠܵܗܵܐ؟“ 41ܫܩܝܼܠ ܠܗܘܿܢ ܠܟܹܐܦܵܐ. ܘܡܘܼܪܸܡ ܠܹܗ ܝܼܫܘܿܥ ܥܲܝܢܘܼ̈ܗܝ ܠܫܡܲܝܵܐ ܘܐ݇ܡܝܼܪܹܗ، ”ܝܵܐ ܒܵܒܵܐ، ܫܲܟܘܼܪܹܐ ܝܘܸܢ ܐܸܠܘܼܟ݂ ܕܩܲܡ ܫܵܡܥܹܬ ܠܝܼ. 42”ܐܵܢܵܐ ܟܹܐ ܝܵܕܥܹܢ ܕܒܟܠ ܥܕܵܢܵܐ ܟܹܐ ܫܵܡܥܹܬ ܠܝܼ. ܐܝܼܢܵܐ ܒܘܼܬ ܐܵܗܵܐ ܟܸܢܫܵܐ ܕܟܸܠܝܵܐ ܝܠܹܗ ܠܐܲܟ݂ܵܐ ܐ݇ܡܝܼܪܝܼ ܐܲܢܹܐ ܗܹܡܸܙܡܵܢܹ̈ܐ ܕܗܲܡܸܢܝܼ ܕܐܲܢ݇ܬ ܫܘܼܕܸܪܘܼܟ݂ ܐܸܠܝܼ.“ 43ܡ̣ܢ ܒܵܬ݇ܪ ܕܗܘܼܡܙܸܡ ܠܹܗ ܗܲܕܟ݂ܵܐ، ܡܘܼܩܘܸܚ ܠܹܗ ܒܩܵܠܵܐ ܪܵܡܵܐ، ”ܠܲܥܵܙܲܪ، ܬܵܐ، ܦܠܘܿܛ!“ 44ܘܦܠܝܼܛ ܠܹܗ ܗ̇ܘ ܡܝܼܬܵܐ، ܐܝܼܕܘܼ̈ܗܝ ܘܐܲܩܠܘܼ̈ܗܝ ܐ݇ܣܝܼܪܹܐ ܒܩܸܛܥܵܛܹ̈ܐ ܕܓ̰ܘܼܠܹ̈ܐ، ܘܦܵܬܹܗ ܐ݇ܣܝܼܪܬܵܐ ܒܝܵܠܸܚܬܵܐ. ܘܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܫܪܹܝܡܘܼܢ ܠܹܗ، ܘܫܒ݂ܘܿܩܘܼܢ ܐܵܙܹܠ.“

ܝܗܘܼܕܵܝܹ̈ܐ ܒܸܒܥܵܝܵܐ ܕܩܵܛܠܝܼ ܠܝܼܫܘܿܥ

ܡܬܝ 26‏:1‏‐5؛ ܡܪܩܘܣ 14‏:1‏‐2؛ ܠܘܩܐ 22‏:1‏‐2

45ܪܵܒܵܐ ܡ̣ܢ ܝܗܘܼܕܵܝܹ̈ܐ ܕܐ݇ܬܝܼܹܐ ܝܗ݇ܘܵܘ ܠܟܸܣ ܡܲܪܝܲܡ، ܟܲܕ ܚܙܹܐ ܠܗܘܿܢ ܡܸܢܕܝܼ ܕܥܒ݂ܝܼܕ ܠܹܗ ܝܼܫܘܿܥ، ܗܘܼܡܸܢܗܘܿܢ ܒܝܼܹܗ. 46ܐܝܼܢܵܐ ܐ݇ܚܹܪ̈݇ܢܹܐ ܡܸܢܲܝܗܝ ܐ݇ܙܝܼܠ ܠܗܘܿܢ ܠܟܸܣ ܦܪ̈ܝܼܫܹܐ ܘܐ݇ܡܝܼܪܗܘܿܢ ܐܸܠܲܝܗܝ ܡܸܢܕܝܼ ܕܥܒ݂ܝܼܕ ܠܹܗ ܝܼܫܘܿܥ. 47ܗ̇ܝܓܵܗ ܓܘܼܪ̈ܵܢܹܐ ܕܟܵܗܢܹ̈ܐ ܘܦܪ̈ܝܼܫܹܐ ܩܪܹܐ ܠܗܘܿܢ ܟܢܘܼܫܝܵܐ ܘܐ݇ܡܝܼܪܗܘܿܢ، ”ܡܘܿܕܝܼ ܥܵܒ݂ܕܲܚ؟ ܣܵܒܵܒ ܐܵܗܵܐ ܐ݇ܢܵܫܵܐ ܪܵܒܵܐ ܢܝܼܫܲܢܩܹ̈ܐ ܒܸܥܒ݂ܵܕܵܐ ܝܠܹܗ. 48”ܘܐܸܢ ܫܵܒ݂ܩܲܚ ܠܹܗ ܗܲܕܟ݂ܵܐ، ܟܠܲܝܗܝ ܒܸܬ ܗܲܡܸܢܝܼ ܒܝܼܹܗ، ܘܒܸܬ ܐܵܬܝܼ ܪ̈ܗ݇ܘܿܡܵܝܹܐ ܘܫܵܩܠܝܼ ܐܲܬܪܲܢ ܘܛܵܝܸܦܲܢ.“ 49ܚܲܕ ܡܸܢܲܝܗܝ ܫܸܡܹܗ ܩܲܝܵܦܵܐ، ܕܝܼܗ݇ܘܵܐ ܓܘܼܪܵܐ ܕܟܵܗܢܹ̈ܐ ܒܗ̇ܝ ܫܹܢ݇ܬܵܐ، ܐ݇ܡܝܼܪܹܗ ܐܸܠܲܝܗܝ، ”ܐܲܚܬܘܿܢ ܠܹܐ ܝܬܘܿܢ ܒܝܼܕܵܥܵܐ ܡܸܢܕܝܼ، 50”ܐܵܦܠܵܐ ܬܲܚܡܘܼܢܹܐ ܝܬܘܿܢ، ܕܒܘܼܫ ܨܦܵܝܝܼ ܝܠܵܗ̇ ܐܸܠܲܢ ܕܚܲܕ ܐ݇ܢܵܫܵܐ ܡܵܐܹܬ ܡ̣ܢ ܓܹܒܵܐ ܕܟܠܹܗ ܥܲܡܵܐ ܘܠܵܐ ܟܠܵܗ̇ ܐܘܼܡܬܵܐ ܛܵܠܩܵܐ.“ 51ܐܵܗܵܐ ܠܵܐ ܐ݇ܡܝܼܪܹܗ ܡ̣ܢ ܓܵܢܹܗ. ܐܝܼܢܵܐ ܣܵܒܵܒ ܓܘܼܪܵܐ ܕܟܵܗܢܹ̈ܐ ܝܗ݇ܘܵܐ ܒܗ̇ܝ ܫܹܢ݇ܬܵܐ، ܢܘܼܒܹܐ ܠܹܗ ܕܝܼܫܘܿܥ ܒܸܬ ܡܵܐܹܬ ܗ݇ܘܵܐ ܡ̣ܢ ܓܹܒܵܐ ܕܟܠܵܗ̇ ܐܘܼܡܬܵܐ، 52ܘܠܵܐ ܐܲܚܟ̰ܝܼ ܡ̣ܢ ܓܹܒܵܐ ܕܐܘܼܡܬܵܐ، ܐܝܼܢܵܐ ܡ̣ܢ ܓܹܒܵܐ ܕܟܠܲܝܗܝ ܒܢܘܿܢܹ̈ܐ ܒܘܼܪܒܸܙܹܐ ܕܐܲܠܵܗܵܐ، ܕܓ̰ܲܡܸܥ ܠܗܘܿܢ ܘܚܲܝܸܕ ܠܗܘܿܢ. 53ܡ̣ܢ ܗ̇ܘ ܝܵܘܡܵܐ ܡܘܼܚܫܸܚ ܠܗܘܿܢ ܕܩܵܛܠܝܼ ܠܹܗ. 54ܒܘܼܬ ܐܵܗܵܐ ܝܼܫܘܿܥ ܠܵܐ ܚܕܝܼܪܹܗ ܐ݇ܚܹܪ݇ܢܵܐ ܓܲܠܝܵܐܝܼܬ ܓܵܘ ܝܗܘܼܕܵܝܹ̈ܐ، ܐܸܠܵܐ ܐ݇ܙܝܼܠ ܠܹܗ ܠܚܕܵܐ ܕܘܼܟܵܐ ܩܘܼܪܒܵܐ ܠܒܲܪܝܼܵܐ، ܠܚܕܵܐ ܡܵܬܵܐ ܫܸܡܘܼܗ̇ ܐܲܦܪܹܝܡ. ܘܦܝܼܫ ܠܹܗ ܬܵܡܵܐ ܥܲܡ ܬܲܠܡܝܼܕܘܼ̈ܗܝ.

55ܐܝܼܡܲܢ ܕܩܘܼܪܒܸܢܹܗ ܥܹܐܕܵܐ ܕܦܸܨܚܵܐ ܕܝܗܘܼܕܵܝܹ̈ܐ، ܪܵܒܵܐ ܐ݇ܣܝܼܩ ܠܗܘܿܢ ܡ̣ܢ ܡܵܬܘܵܬܹ̈ܐ ܠܐܘܿܪܸܫܠܸܡ ܕܕܲܟ݂ܝܼ ܗ݇ܘܵܘ ܓܵܢܲܝܗܝ ܡ̣ܢ ܩܵܕ݇ܡ ܥܹܐܕܵܐ، 56ܘܛܵܥܝܼ ܗ݇ܘܵܘ ܒܵܬ݇ܪ ܝܼܫܘܿܥ ܘܒܲܩܪܝܼ ܗ݇ܘܵܘ ܚܲܕ ܡ̣ܢ ܗ̇ܘ ܐ݇ܚܹܪ݇ܢܵܐ، ܐܵܢܝܼ ܕܟܸܠܝܹܐ ܝܗ݇ܘܵܘ ܓܵܘ ܗܲܝܟܠܵܐ، ”ܡܘܿܕܝܼ ܒܸܚܫܵܒ݂ܵܐ ܝܬܘܿܢ، ܠܹܐ ܐܵܬܹܐ ܠܥܹܐܕܵܐ؟“ 57ܐܝܼܢܵܐ ܓܘܼܪ̈ܵܢܹܐ ܕܟܵܗܢܹ̈ܐ ܘܦܪ̈ܝܼܫܹܐ ܦܩܝܼܕܹܐ ܝܗ݇ܘܵܘ ܕܐܸܢ ܐ݇ܢܵܫܵܐ ܝܵܕܹܥ ܗ݇ܘܵܐ ܐܲܝܟܵܐ ܝܠܹܗ ܝܼܫܘܿܥ، ܡܲܕܸܥ ܗ݇ܘܵܐ ܠܗܘܿܢ، ܕܕܵܒ݂ܩܝܼ ܗ݇ܘܵܘ ܠܹܗ.

Currently Selected:

ܝܘܚܢܢ 11: ABTAB

Highlight

Copy