ܒܪܝܬܐ 9
9
ܐܲܠܵܗܵܐ ܒܲܪܘܼܟܹܐ ܠܢܘܿܚ
1ܒܘܼܪܸܟ݂ ܠܹܗ ܐܲܠܵܗܵܐ ܠܢܘܿܚ ܘܠܒܢܘܿܢܘܼ̈ܗܝ ܒܹܐܡܵܪܵܐ، ”ܦܪܹܝܡܘܼܢ ܘܙܘܼܕܘܼܢ ܘܡܠܹܝܡܘܼܢ ܠܐܲܪܥܵܐ. 2ܙܕܘܼܥܬܵܘܟ݂ܘܿܢ ܘܣܲܗܡܵܢܘܼܬܵܘܟ݂ܘܿܢ ܗܵܘܝܼ ܥܲܠ ܟܠܵܗ̇ ܚܲܝܘܬܵܐ ܕܐܲܪܥܵܐ، ܘܥܲܠ ܟܠܵܗ̇ ܦܵܪܲܚܬܵܐ ܕܫܡܲܝܵܐ، ܘܥܲܠ ܟܠ ܪܲܚܫܵܐ ܕܪܵܚܹܫ ܥܲܠ ܐܲܪܥܵܐ، ܘܥܲܠ ܟܠܲܝܗܝ ܢܘܼܢܹ̈ܐ ܕܝܵܡܵܐ؛ ܒܐܝܼܕܵܘܟ݂ܘܿܢ ܦܝܼܫܹܐ ܝܢܵܐ ܣܘܼܦܝܹܐ. 3ܟܠ ܪܲܚܫܵܐ ܕܝܼܠܹܗ ܚܵܝܵܐ، ܗܵܘܹܐ ܐܸܠܵܘܟ݂ܘܿܢ ܠܡܹܐܟ݂ܘܼܠܬܵܐ؛ ܐܲܝܟ݂ ܕܝܘܼܗ݇ܒܸܠ ܠܝܼ ܐܸܠܵܘܟ݂ܘܿܢ ܝܲܪ̈ܩܹܐ، ܒܝܼܵܗ݇ܒ݂ܵܐ ܝܘܸܢ ܐܸܠܵܘܟ݂ܘܿܢ ܐܘܼܦ ܟܠ ܡܸܢܕܝܼ ܐ݇ܚܹܪ݇ܢܵܐ. 4ܐܲܚܟ̰ܝܼ ܒܸܣܪܵܐ ܕܕܸܡܹܗ ܓܵܘܹܗ ܝܠܹܗ ܠܵܐ ܐܵܟ݂ܠܝܼܬܘܿܢ، ܣܵܒܵܒ ܚܲܝܹ̈ܐ ܓܵܘ ܕܸܡܵܐ ܝܢܵܐ. 5ܫܲܪܝܼܪܵܐܝܼܬ ܒܸܬ ܛܵܠܒܹܢܹܗ ܕܸܡܵܘܟ݂ܘܿܢ ܡ̣ܢ ܫܲܦܟ݂ܵܢܵܐ ܕܕܸܡܵܐ. ܟܠ ܚܲܝܘܬܵܐ ܕܩܵܛܠܵܐ ܒܸܬ ܦܵܝܫܵܐ ܩܛܝܼܠܬܵܐ؛ ܘܟܠ ܐ݇ܢܵܫܵܐ ܕܩܵܛܹܠ ܒܸܬ ܦܵܐܹܫ ܩܛܝܼܠܵܐ.
6ܟܠ ܕܫܲܦܸܟ݂ ܕܸܡܵܐ ܕܐ݇ܢܵܫܵܐ،
ܒܝܲܕ ܐ݇ܢܵܫܵܐ ܕܸܡܹܗ ܒܸܬ ܦܵܐܹܫ ܫܘܼܦܟ݂ܵܐ؛
ܣܵܒܵܒ ܐܲܠܵܗܵܐ ܐܲܝܟ݂ ܨܲܠܡܹܗ ܥܒ݂ܝܼܕ ܠܹܗ ܒܲܪܢܵܫܵܐ.
7ܘܐܲܚܬܘܿܢ، ܦܪܹܝܡܘܼܢ ܘܙܘܼܕܘܼܢ، ܡܠܹܝܡܘܼܢ ܠܐܲܪܥܵܐ ܘܙܘܼܕܘܼܢ ܓܵܘܘܼܗ̇.“
ܘܲܥܕܵܐ ܕܐܲܠܵܗܵܐ ܠܢܘܿܚ
8ܐ݇ܡܝܼܪܹܗ ܐܲܠܵܗܵܐ ܠܢܘܿܚ ܘܠܒܢܘܿܢܘܼ̈ܗܝ ܥܲܡܹܗ، 9”ܗܵܐ ܐܵܢܵܐ ܫܲܬܐܘܼܣܹܐ ܝܘܸܢ ܘܲܥܕܝܼ ܥܲܡܵܘܟ݂ܘܿܢ ܘܥܲܡ ܙܲܪ̈ܥܵܘܟ݂ܘܿܢ، ܕܡ̣ܢ ܒܵܬ݇ܪ ܡܸܢܵܘܟ݂ܘܿܢ، 10ܘܥܲܡ ܟܠ ܓܵܢܵܐ ܚܵܝܬܵܐ ܕܝܼܠܵܗ̇ ܥܲܡܵܘܟ݂ܘܿܢ: ܦܵܪܲܚܬܵܐ، ܒܥܝܼܪܵܐ، ܘܟܠ ܚܲܝܘܬܵܐ ܕܐܲܪܥܵܐ ܕܝܼܠܵܗ̇ ܥܲܡܵܘܟ݂ܘܿܢ، ܟܠܲܝܗܝ ܐܵܢܝܼ ܕܦܠܝܼܛ ܠܗܘܿܢ ܡ̣ܢ ܩܹܒ݂ܘܼܬܵܐ، ܟܠܵܗ̇ ܚܲܝܘܬܵܐ ܕܐܲܪܥܵܐ. 11ܒܸܬ ܫܲܬܐܸܣܸܢ ܘܲܥܕܝܼ ܥܲܡܵܘܟ݂ܘܿܢ، ܕܠܹܐ ܦܵܝܫܵܐ ܩܛܝܼܥܬܵܐ ܐ݇ܚܹܪ݇ܢܵܐ ܟܠ ܚܲܝܘܼܬܵܐ ܒܝܲܕ ܡ̈ܝܼܵܐ ܕܛܵܘܦܵܢܵܐ، ܘܠܹܐ ܗܵܘܹܐ ܐ݇ܚܹܪ݇ܢܵܐ ܛܵܘܦܵܢܵܐ ܕܡܲܚܪܸܒ݂ ܠܐܲܪܥܵܐ.“ 12ܘܐ݇ܡܝܼܪܹܗ ܐܲܠܵܗܵܐ، ”ܐܵܗܵܐ ܝܠܹܗ ܢܝܼܫܲܢܩܵܐ ܕܘܲܥܕܵܐ ܕܒܸܥܒ݂ܵܕܵܐ ܝܘܸܢ ܒܹܝܠܝܼ ܘܒܹܝܠܵܘܟ݂ܘܿܢ ܘܒܹܝܠ ܟܠ ܓܵܢܵܐ ܚܵܝܬܵܐ ܕܝܼܠܵܗ̇ ܥܲܡܵܘܟ݂ܘܿܢ، ܠܕܵܘܪܹ̈ܐ ܕܠܥܵܠܲܡ. 13ܡܘܼܬܸܒ݂ ܠܝܼ ܩܸܫܬܝܼ ܒܥܢܵܢܵܐ، ܘܒܸܬ ܗܵܘܝܵܐ ܢܝܼܫܲܢܩܵܐ ܕܘܲܥܕܵܐ ܒܹܝܠܝܼ ܘܒܹܝܠ ܐܲܪܥܵܐ. 14ܐܝܼܡܲܢ ܕܡܲܝܬܸܝܢ ܥܢܵܢܹ̈ܐ ܥܲܠ ܐܲܪܥܵܐ، ܘܩܸܫܬܵܐ ܦܵܝܫܵܐ ܚܙܝܼܬܵܐ ܓܵܘ ܥܢܵܢܹ̈ܐ، 15ܒܸܬ ܕܵܟ݂ܪܹܢܹܗ ܘܲܥܕܝܼ ܕܝܼܠܹܗ ܒܹܝܠܝܼ ܘܒܹܝܠܵܘܟ݂ܘܿܢ ܘܒܹܝܠ ܟܠ ܓܵܢܵܐ ܚܵܝܬܵܐ ܕܟܠ ܓܸܢܣܵܐ، ܕܡ̈ܝܼܵܐ ܐ݇ܚܹܪ݇ܢܵܐ ܠܹܐ ܗܵܘܝܼ ܛܵܘܦܵܢܵܐ ܕܡܲܚܪܸܒ݂ܝܼ ܠܟܠ ܚܲܝܘܼܬܵܐ. 16ܐܝܼܡܲܢ ܕܡܲܒܝܸܢܵܐ ܩܸܫܬܵܐ ܓܵܘ ܥܢܵܢܹ̈ܐ، ܒܸܬ ܓܲܫܩܸܢ ܥܲܠܘܼܗ̇ ܘܕܵܟ݂ܪܹܢ ܠܘܲܥܕܝܼ ܕܠܥܵܠܲܡ ܒܹܝܠ ܐܲܠܵܗܵܐ ܘܒܹܝܠ ܟܠ ܓܵܢܵܐ ܚܵܝܬܵܐ، ܕܟܠ ܓܸܢܣܵܐ ܕܥܲܠ ܐܲܪܥܵܐ.“ 17ܘܐ݇ܡܝܼܪܹܗ ܐܲܠܵܗܵܐ ܠܢܘܿܚ، ”ܐܵܗܵܐ ܝܠܹܗ ܢܝܼܫܲܢܩܵܐ ܕܘܲܥܕܵܐ ܕܫܘܼܬܐܸܣ ܠܝܼ ܒܹܝܠܝܼ ܘܒܹܝܠ ܟܠ ܓܵܢܵܐ ܕܝܼܠܵܗ̇ ܥܲܠ ܐܲܪܥܵܐ.“
ܒܢܘܿܢܹ̈ܐ ܕܢܘܿܚ
18ܒܢܘܿܢܹ̈ܐ ܕܢܘܿܚ، ܕܦܠܝܼܛ ܠܗܘܿܢ ܡ̣ܢ ܩܹܒ݂ܘܼܬܵܐ، ܝܼܗ݇ܘܵܘ، ܫܹܝܡ، ܘܚܵܡ، ܘܝܲܦ̮ܬ. ܚܵܡ ܝܼܗ݇ܘܵܐ ܒܵܒܵܐ ܕܟܢܲܥܢ. 19ܐܲܢܹܐ ܬܠܵܬܵܐ ܝܼܗ݇ܘܵܘ ܒܢܘܿܢܹ̈ܐ ܕܢܘܿܚ؛ ܘܡ̣ܢ ܕܐܲܢܹܐ ܦܪܝܼܣ ܠܗܘܿܢ ܐ݇ܢܵܫܹ̈ܐ ܠܦܵܬܵܐ ܕܐܲܪܥܵܐ. 20ܘܫܘܼܪܹܐ ܠܹܗ ܢܘܿܚ ܠܸܥܒ݂ܵܕܵܐ ܐܲܟܵܪܘܼܬܵܐ، ܘܢܨܝܼܒ݂ ܠܹܗ ܟܲܪܡܵܐ. 21ܘܫܬܹܐ ܠܹܗ ܡ̣ܢ ܚܲܡܪܵܐ ܘܪܘܹܐ ܠܹܗ، ܘܓܘܼܠܝܵܐ ܠܹܗ ܓܵܢܹܗ ܒܡܲܫܟܢܹܗ. 22ܘܚܙܹܐ ܠܹܗ ܚܵܡ، ܒܵܒܵܐ ܕܟܢܲܥܢ، ܫܘܼܠܚܵܝܘܼܬܵܐ ܕܒܵܒܘܼܗܝ، ܘܡܘܼܕܸܥ ܠܹܗ ܠܬܸܪܘܲܝܗܝ ܐܲܚܘܿܢܘܵܬܹ̈ܗ ܕܝܼܗ݇ܘܵܘ ܠܒܲܕܲܪ. 23ܫܩܝܼܠ ܠܗܘܿܢ ܫܹܝܡ ܘܝܲܦ̮ܬ ܥܵܒܵܝܬܵܐ ܘܡܘܼܬܒ݂ܵܐ ܠܗܘܿܢ ܥܲܠ ܪ̈ܘܼܦ̮ܫܵܢܲܝܗܝ، ܘܐ݇ܙܝܼܠ ܠܗܘܿܢ ܠܵܒܵܬ݇ܪܵܐ، ܘܟܘܼܣܹܐ ܠܗܘܿܢ ܠܫܘܼܠܚܵܝܘܼܬܵܐ ܕܒܵܒܲܝܗܝ؛ ܦܵܬܘܵܬܲܝ̈ܗܝ ܠܵܒܵܬ݇ܪܵܐ ܝܗ݇ܘܵܘ، ܘܠܵܐ ܚܙܹܐ ܠܗܘܿܢ ܠܫܘܼܠܚܵܝܘܼܬܵܐ ܕܒܵܒܲܝܗܝ.
24ܐܝܼܡܲܢ ܕܪܥܝܼܫ ܠܹܗ ܢܘܿܚ ܡ̣ܢ ܚܲܡܪܹܗ ܘܝ݇ܕܝܼܥ ܠܹܗ ܡܘܿܕܝܼ ܥܒ݂ܝܼܕ ܠܹܗ ܐܸܠܹܗ ܒܪܘܿܢܹܗ ܙܥܘܿܪܵܐ، 25ܐ݇ܡܝܼܪܹܗ،
”ܠܝܼܛܵܐ ܝܠܹܗ ܟܢܲܥܢ؛
ܪܹܓܵܐ ܕܪܹ̈ܓܵܘܵܬܹܐ ܗܵܘܹܐ ܠܐܲܚܘܿܢܘܵܬܹ̈ܗ.“
26ܡܸܢܕܪܸܫ ܐ݇ܡܝܼܪܹܗ،
”ܡܒܘܼܪܟ݂ܵܐ ܝܠܹܗ ܡܵܪܝܵܐ ܐܲܠܵܗܵܐ ܕܫܹܝܡ؛
ܘܗܵܘܹܐ ܟܢܲܥܢ ܪܹܓܵܐ ܐܸܠܹܗ.
27ܡܲܦܪܹܐ ܐܲܠܵܗܵܐ ܠܝܲܦ̮ܬ،#9:27 ܫܸܡܵܐ ܕܝܲܦ̮ܬ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܡܲܦܬܘܼܝܹܐ ܒܠܸܫܵܢܵܐ ܥܸܒ݂ܪܵܝܵܐ ܘܥܵܡܹܪ ܒܡܲܫܟܢܹ̈ܐ ܕܫܹܝܡ؛
ܘܗܵܘܹܐ ܟܢܲܥܢ ܪܹܓܵܐ ܐܸܠܹܗ.“
28ܚܝܹܐ ܠܹܗ ܢܘܿܚ ܡ̣ܢ ܒܵܬ݇ܪ ܛܵܘܦܵܢܵܐ ܬܠܵܬܡܵܐܐ ܘܚܲܡܫܝܼ ܫܸܢܹ̈ܐ. 29ܗܘܹܐ ܠܗܘܿܢ ܟܠܲܝܗܝ ܚܲܝܹ̈ܐ ܕܢܘܿܚ ܬܫܲܥܡܵܐܐ ܘܚܲܡܫܝܼ ܫܸܢܹ̈ܐ، ܘܡܝܼܬ ܠܹܗ.
Currently Selected:
ܒܪܝܬܐ 9: ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
Videos for ܒܪܝܬܐ 9
EP 25. Why Do So Many Cultures Have Flood Myths? The Truth Behind the Stories
Under The Hood
Ep 34. Genesis 10: How Noah’s Sons Shaped the World & God's Redemption Story
The Bible Show
Episode 19: Feeding of Four thousand with the Syrophonecian woman
The Bible Show
Ep 34. Genesis 10: How Noah’s Sons Shaped the World & God's Redemption Story
The Bible Show