ܒܪܝܬܐ 3
3
ܚܘܼܘܹܐ ܥܲܠܕܘܼܝܹܐ ܠܚܵܘܵܐ
1ܘܚܘܼܘܹܐ ܒܘܼܫ ܝܵܕܘܿܥܵܐ ܝܗ݇ܘܵܐ ܡ̣ܢ ܟܠܲܝܗܝ ܚܲܝܘܵܬܹ̈ܐ ܕܕܸܫܬܵܐ ܕܥܒ݂ܝܼܕ ܠܹܗ ܡܵܪܝܵܐ ܐܲܠܵܗܵܐ. ܘܐ݇ܡܝܼܪܹܗ ܠܒܲܟ݂ܬܵܐ، ”ܫܲܪܝܼܪܬܵܐ ܝܠܵܗ̇ ܕܐ݇ܡܝܼܪܹܗ ܐܲܠܵܗܵܐ، ’ܠܵܐ ܐܵܟ݂ܠܝܼܬܘܿܢ ܡ̣ܢ ܟܠ ܐܝܼܠܵܢܵܐ ܕܓܲܢܬܵܐ؟‘“ 2ܘܐ݇ܡܝܼܪܵܗ̇ ܒܲܟ݂ܬܵܐ ܠܚܘܼܘܹܐ، ”ܡ̣ܢ ܛܥܘܼܢܬܵܐ ܕܐܝܼܠܵܢܹ̈ܐ ܕܓܲܢܬܵܐ ܟܹܐ ܡܵܨܲܚ ܐܵܟ݂ܠܲܚ، 3ܐܝܼܢܵܐ ܒܘܼܬ ܛܥܘܼܢܬܵܐ ܕܐܝܼܠܵܢܵܐ ܕܝܼܠܹܗ ܒܒܹܝܬ݇ ܦܲܠܓܵܐ ܕܓܲܢܬܵܐ، ܐ݇ܡܝܼܪܹܗ ܐܲܠܵܗܵܐ، ’ܠܵܐ ܐܵܟ݂ܠܝܼܬܘܿܢ ܡܸܢܹܗ، ܘܠܵܐ ܕܵܩܪܝܼܬܘܿܢ ܒܝܼܹܗ، ܕܠܵܐ ܡܵܝܬܝܼܬܘܿܢ.‘“ 4ܘܐ݇ܡܝܼܪܹܗ ܚܘܼܘܹܐ ܠܒܲܟ݂ܬܵܐ، ”ܡܝܵܬܵܐ ܠܹܐ ܡܵܝܬܝܼܬܘܿܢ؛ 5ܣܵܒܵܒ ܒܝܼܕܵܥܵܐ ܝܠܹܗ ܐܲܠܵܗܵܐ ܕܒܝܵܘܡܵܐ ܕܐܵܟ݂ܠܝܼܬܘܿܢ ܡܸܢܹܗ، ܒܸܬ ܦܵܬܚܝܼ ܥܲܝܢܵܘ̈ܟ݂ܘܿܢ، ܘܒܸܬ ܗܵܘܹܝܬܘܿܢ ܐܲܝܟ݂ ܐܲܠܵܗܹ̈ܐ، ܝܵܕܥܵܢܹ̈ܐ ܕܛܵܒ݂ܬܵܐ ܘܒܝܼܫܬܵܐ.“
ܢܦܵܠܬܵܐ ܕܒܲܪܢܵܫܵܐ
6ܘܚܙܹܐ ܠܵܗ̇ ܒܲܟ݂ܬܵܐ ܕܨܦܵܝܝܼ ܝܗ݇ܘܵܐ ܐܝܼܠܵܢܵܐ ܠܹܐܟ݂ܵܠܵܐ ܡ̣ܢ ܛܥܘܼܢܬܹܗ، ܘܡܲܒܣܸܡܵܢܵܐ ܝܗ݇ܘܵܐ ܠܥܲܝܢܹ̈ܐ، ܘܫܘܼܗܘܸܬܵܐ ܠܸܥܒ݂ܵܕܹܗ ܐ݇ܢܵܫܵܐ ܚܲܟܝܼܡܵܐ، ܘܫܩܝܼܠ ܠܵܗ̇ ܡ̣ܢ ܛܥܘܼܢܬܹܗ، ܘܐ݇ܟ݂ܝܼܠ ܠܵܗ̇، ܘܝܘܼܗ݇ܒܸܠ ܠܵܗ̇ ܐܘܼܦ ܠܓܲܒ݂ܪܘܼܗ̇ ܕܝܼܗ݇ܘܵܐ ܥܲܡܘܼܗ̇، ܘܐ݇ܟ݂ܝܼܠ ܠܹܗ. 7ܗ̇ܝܓܵܗ ܦܝܼܫ ܠܗܘܿܢ ܦܬܝܼܚܹܐ ܥܲܝܢܹ̈ܐ ܕܬܸܪܘܲܝܗܝ؛ ܘܝ݇ܕܝܼܥ ܠܗܘܿܢ ܕܫܘܼܠܚܵܝܹ̈ܐ ܝܗ݇ܘܵܘ، ܘܚܝܼܛ ܠܗܘܿܢ ܒܥܘܼܕܵܠܹ̈ܐ ܛܲܪ̈ܦܹܐ ܕܬܹܐܢܵܐ، ܘܥܒ݂ܝܼܕ ܠܗܘܿܢ ܐܸܠܲܝܗܝ ܒܲܪ̈ܘܵܢܹܐ. 8ܘܫܡܝܼܥ ܠܗܘܿܢ ܩܵܠܵܐ ܕܡܵܪܝܵܐ ܐܲܠܵܗܵܐ ܒܸܚܕܵܪܵܐ ܒܓܲܢܬܵܐ ܒܦܲܝܚܘܼܬܵܐ ܕܝܵܘܡܵܐ، ܘܛܘܼܫܝܵܐ ܠܗܘܿܢ ܓܵܢܲܝܗܝ ܐܵܕܵܡ ܘܒܲܟ݂ܬܹܗ ܡ̣ܢ ܦܵܬܵܐ ܕܡܵܪܝܵܐ ܐܲܠܵܗܵܐ ܒܓܵܘܵܐ ܕܐܝܼܠܵܢܹ̈ܐ ܕܓܲܢܬܵܐ. 9ܘܩܪܹܐ ܠܹܗ ܡܵܪܝܵܐ ܐܲܠܵܗܵܐ ܠܐܵܕܵܡ ܘܐ݇ܡܝܼܪܹܗ ܐܸܠܹܗ، ”ܐܲܝܟܵܐ ܝܘܸܬ؟“ 10ܘܐ݇ܡܝܼܪܹܗ، ”ܩܵܠܘܼܟ݂ ܫܡܝܼܥ ܠܝܼ ܒܓܲܢܬܵܐ، ܘܙܕܝܼܥ ܠܝܼ، ܣܵܒܵܒ ܫܘܼܠܚܵܝܵܐ ܝܘܸܢ، ܘܛܘܼܫܝܵܐ ܠܝܼ ܓܵܢܝܼ.“ 11ܘܐ݇ܡܝܼܪܹܗ ܐܸܠܹܗ ܡܵܪܝܵܐ، ”ܡܵܢܝܼ ܩܲܡ ܡܲܕܸܥ ܠܘܼܟ݂ ܕܫܘܼܠܚܵܝܵܐ ܝܘܸܬ؟ ܗܵܐ، ܐ݇ܟ݂ܝܼܠ ܠܘܼܟ݂ ܡ̣ܢ ܐܝܼܠܵܢܵܐ ܕܦܩܝܼܕ ܠܝܼ ܐܸܠܘܼܟ݂ ܕܠܵܐ ܐܵܟ݂ܠܹܬ؟“ 12ܐ݇ܡܝܼܪܹܗ ܐܵܕܵܡ، ”ܒܲܟ݂ܬܵܐ ܕܝܘܼܗ݇ܒܸܠ ܠܘܼܟ݂ ܕܗܵܘܝܵܐ ܥܲܡܝܼ، ܗ̇ܝ ܩܲܡ ܝܵܗ݇ܒ݂ܵܐ ܠܝܼ ܡ̣ܢ ܐܝܼܠܵܢܵܐ، ܘܐ݇ܟ݂ܝܼܠ ܠܝܼ.“ 13ܐ݇ܡܝܼܪܹܗ ܡܵܪܝܵܐ ܐܲܠܵܗܵܐ ܠܒܲܟ݂ܬܵܐ، ”ܐܵܗܵܐ ܡܘܿܕܝܼ ܝܠܹܗ ܕܥܒ݂ܝܼܕ ܠܵܟ݂ܝ؟“ ܘܐ݇ܡܝܼܪܵܗ̇ ܒܲܟ݂ܬܵܐ، ”ܚܘܼܘܹܐ ܩܲܡ ܥܲܠܕܹܐ ܠܝܼ، ܘܐ݇ܟ݂ܝܼܠ ܠܝܼ.“
ܠܵܘܛܬܵܐ ܥܲܠ ܚܘܼܘܹܐ
14ܐ݇ܡܝܼܪܹܗ ܡܵܪܝܵܐ ܐܲܠܵܗܵܐ ܠܚܘܼܘܹܐ،
”ܣܵܒܵܒ ܥܒ݂ܝܼܕ ܠܘܼܟ݂ ܗܲܕܟ݂ܵܐ،
ܒܘܼܫ ܠܝܼܛܵܐ ܝܘܸܬ ܡ̣ܢ ܟܠ ܒܥܝܼܪܵܐ ܘܡ̣ܢ ܟܠ ܚܲܝܘܬܵܐ ܕܕܸܫܬܵܐ؛
ܥܲܠ ܟܹܪ݇ܣܘܼܟ݂ ܒܸܬ ܚܵܕܪܹܬ،
ܘܥܲܦܪܵܐ ܒܸܬ ܐܵܟ݂ܠܹܬ ܟܠܲܝܗܝ ܝܵܘܡܵܢܹ̈ܐ ܕܚܲܝܘܼ̈ܟ݂.
15ܕܸܫܡܸܢܵܝܘܼܬܵܐ ܒܸܬ ܡܲܬܒܸܢ ܒܹܝܠܘܼܟ݂ ܘܒܹܝܠ ܒܲܟ݂ܬܵܐ،
ܘܒܹܝܠ ܙܲܪܥܘܼܟ݂ ܘܒܹܝܠ ܙܲܪܥܘܼܗ̇.
ܗ̇ܘ ܒܸܬ ܒܵܠܹܣ ܠܪܹܫܘܼܟ݂،
ܘܐܲܢ݇ܬ ܒܸܬ ܢܵܝܨܹܬ ܠܥܸܩܒܹܗ.“
ܕܝܵܢܬܵܐ ܠܒܲܟ݂ܬܵܐ ܘܠܓܲܒ݂ܪܵܐ
16ܘܠܒܲܟ݂ܬܵܐ ܐ݇ܡܝܼܪܹܗ،
”ܡܲܙܝܘܼܕܹܐ ܒܸܬ ܡܲܙܝܸܕܸܢ ܓ̰ܘܼܢܓ̰ܵܪ̈ܵܟ݂ܝ ܒܙܲܒ݂ܢܵܐ ܕܒܛܵܢܬܵܟ݂ܝ؛
ܒܓ̰ܘܼܢܓ̰ܵܪܹ̈ܐ ܒܸܬ ܗܲܨܠܲܬܝ ܒܢܘܿܢܹ̈ܐ،
ܘܠܓܲܒ݂ܪܵܟ݂ܝ ܒܸܬ ܗܵܘܝܵܐ ܫܲܗܘܲܬܬܵܟ݂ܝ،
ܐܝܼܢܵܐ ܗ̇ܘ ܒܸܬ ܥܵܒܹܕ ܫܘܼܠܛܵܢܵܐ ܥܲܠܵܟ݂ܝ.“
17ܘܠܐܵܕܵܡ ܐ݇ܡܝܼܪܹܗ،
”ܣܵܒܵܒ ܫܡܝܼܥ ܠܘܼܟ݂ ܠܩܵܠܵܐ ܕܒܲܟ݂ܬܘܼܟ݂، ܘܐ݇ܟ݂ܝܼܠ ܠܘܼܟ݂ ܡ̣ܢ ܐܝܼܠܵܢܵܐ ܕܦܩܝܼܕ ܠܝܼ ܐܸܠܘܼܟ݂، ܒܹܐܡܵܪܵܐ، ’ܠܵܐ ܐܵܟ݂ܠܹܬ ܡܸܢܹܗ،‘
ܠܝܼܛܬܵܐ ܝܠܵܗ̇ ܐܲܪܥܵܐ ܒܘܼܬ ܕܝܼܘܼܟ݂،
ܒܓ̰ܘܼܢܓ̰ܵܪܹ̈ܐ ܒܸܬ ܐܵܟ݂ܠܹܬ ܡܸܢܘܼܗ̇ ܟܠܲܝܗܝ ܝܵܘܡܵܢܹ̈ܐ ܕܚܲܝܘܼ̈ܟ݂؛
18ܟܸܬܘܹ̈ܐ ܘܩܝܼܘܵܪܹ̈ܐ ܒܸܬ ܡܲܓ̰ܝܸܢܵܐ ܐܸܠܘܼܟ݂؛
ܘܒܸܬ ܐܵܟ݂ܠܹܬ ܝܲܪܩܵܐ ܕܕܸܫܬܵܐ.
19ܒܕܲܥܬܵܐ ܕܦܵܬܘܼܟ݂ ܒܸܬ ܐܵܟ݂ܠܹܬ ܠܲܚܡܵܐ،
ܗܲܠ ܕܕܵܝܪܹܬ ܠܐܲܪܥܵܐ،
ܣܵܒܵܒ ܡܸܢܘܼܗ̇ ܦܝܼܫ ܠܘܼܟ݂ ܫܩܝܼܠܵܐ؛
ܣܵܒܵܒ ܥܲܦܪܵܐ ܝܘܸܬ، ܘܠܥܲܦܪܵܐ ܒܸܬ ܕܵܝܪܹܬ.“
20ܘܩܪܹܐ ܠܹܗ ܐܵܕܵܡ ܫܸܡܵܐ ܕܒܲܟ݂ܬܹܗ، ܚܵܘܵܐ،#3:20 ܫܸܡܵܐ ܕܚܵܘܵܐ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܚܵܝܵܐ ܒܠܸܫܵܢܵܐ ܥܸܒ݂ܪܵܝܵܐ ܣܵܒܵܒ ܗ̇ܝ ܗܘܹܐ ܠܵܗ̇ ܝܸܡܵܐ ܕܟܠ ܚܵܝܵܐ. 21ܘܥܒ݂ܝܼܕ ܠܹܗ ܡܵܪܝܵܐ ܐܲܠܵܗܵܐ ܠܐܵܕܵܡ ܘܠܒܲܟ݂ܬܹܗ ܟܘܿܬܝܼܢܝܵܬܹ̈ܐ ܕܓܸܠܕܵܐ، ܘܡܘܼܠܒܸܫܲܝ ܠܹܗ.
ܛܪܵܕܬܵܐ ܕܒܲܪܢܵܫܵܐ ܡ̣ܢ ܓܲܢܬܵܐ
22ܘܐ݇ܡܝܼܪܹܗ ܡܵܪܝܵܐ ܐܲܠܵܗܵܐ، ”ܗܵܐ، ܐܵܕܵܡ ܗܘܹܐ ܠܹܗ ܐܲܝܟ݂ ܚܲܕ ܡܸܢܲܢ، ܝܵܕܥܵܢܵܐ ܕܛܵܒ݂ܬܵܐ ܘܒܝܼܫܬܵܐ. ܘܐܵܕܝܼܵܐ، ܕܠܵܐ ܕܦܲܫܸܛ ܐܝܼܕܹܗ ܘܫܵܩܹܠ ܐܘܼܦ ܡ̣ܢ ܐܝܼܠܵܢܵܐ ܕܚܲܝܹ̈ܐ، ܘܐܵܟܹܠ ܘܚܵܝܹܐ ܠܥܵܠܲܡ.“ 23ܒܘܼܬ ܐܵܗܵܐ، ܦܘܼܠܸܛ ܠܹܗ ܐܸܠܹܗ ܡܵܪܝܵܐ ܐܲܠܵܗܵܐ ܡ̣ܢ ܓܲܢܬܵܐ ܕܥܕܸܢ، ܘܥܒ݂ܝܼܕ ܠܹܗ ܕܦܵܠܹܚ ܠܐܲܪܥܵܐ ܕܡܸܢܘܼܗ̇ ܦܝܼܫ ܠܹܗ ܫܩܝܼܠܵܐ. 24ܘܛܪܝܼܕ ܠܹܗ ܠܐܵܕܵܡ، ܘܡܘܼܬܸܒ݂ ܠܹܗ ܟܪ̈ܘܿܒܹܐ ܒܡܲܕܢܚܵܐ ܕܓܲܢܬܵܐ ܕܥܕܸܢ، ܘܣܲܝܦܵܐ ܠܵܗܝܵܢܵܐ ܒܸܚܕܵܪܵܐ ܡ̣ܢ ܟܠ ܓܹܒܵܐ، ܠܸܢܛܵܪܵܐ ܠܐܘܼܪܚܵܐ ܕܐܝܼܠܵܢܵܐ ܕܚܲܝܹ̈ܐ.
Currently Selected:
ܒܪܝܬܐ 3: ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
