ܒܪܝܬܐ 12

ܐܲܠܵܗܵܐ ܒܲܪܘܼܟܹܐ ܠܐܲܒ݂ܪܵܡ

1ܐ݇ܡܝܼܪܹܗ ܡܵܪܝܵܐ ܠܐܲܒ݂ܪܵܡ، ”ܦܠܘܿܛ ܡ̣ܢ ܐܲܪܥܘܼܟ݂، ܘܡ̣ܢ ܫܲܪܒܬܘܼܟ݂، ܘܡ̣ܢ ܒܲܝܬܵܐ ܕܒܵܒܘܼܟ݂، ܘܙܹܠ݇ ܠܘܼܟ݂ ܠܐܲܪܥܵܐ ܕܡܲܚܙܸܝܢܘܼܟ݂. 2ܒܸܬ ܥܵܒ݂ܕܹܢܘܼܟ݂ ܥܲܡܵܐ ܓܘܼܪܵܐ، ܘܒܸܬ ܒܲܪܟܸܢܘܼܟ݂، ܘܒܸܬ ܓܲܪܘܸܣܸܢ ܫܸܡܘܼܟ݂، ܕܗܵܘܹܝܬ ܒܘܼܪܟܬܵܐ. 3ܒܸܬ ܒܲܪܟܸܢ ܠܒܲܪܟ݂ܵܢܘܼܟ݂، ܘܠܵܝܛܹܢ ܠܠܵܝܛܵܢܘܼܟ݂، ܘܒܸܬ ܦܵܝܫܝܼ ܒܘܼܪܟܹܐ ܒܝܼܘܼܟ݂ ܟܠܲܝܗܝ ܫܲܪ̈ܒܵܬܹܐ ܕܐܲܪܥܵܐ.“

ܐܲܒ݂ܪܵܡ ܒܸܦܠܵܛܵܐ ܡ̣ܢ ܗܵܪܵܢ

4ܘܦܠܝܼܛ ܠܹܗ ܐܲܒ݂ܪܵܡ ܐܲܝܟ݂ ܕܐ݇ܡܝܼܪܹܗ ܐܸܠܹܗ ܡܵܪܝܵܐ، ܘܐ݇ܙܝܼܠ ܠܹܗ ܥܲܡܹܗ ܠܘܿܛ. ܘܐܲܒ݂ܪܵܡ ܒܲܪ ܫܲܒ݂ܥܝܼ ܘܚܲܡܸܫ ܫܸܢܹ̈ܐ ܝܗ݇ܘܵܐ ܟܲܕ ܦܠܝܼܛ ܠܹܗ ܡ̣ܢ ܚܵܪܵܢ. 5ܘܠܘܼܒܸܠ ܠܹܗ ܐܲܒ݂ܪܵܡ ܥܲܡܹܗ ܠܣܲܪܲܝ ܒܲܟ݂ܬܹܗ، ܘܠܠܘܿܛ ܒܪܘܿܢܵܐ ܕܐܲܚܘܿܢܘܼܗܝ، ܘܟܠ ܡܸܢܕܝܼ ܕܩܸܢܝܵܐ ܝܗ݇ܘܵܐ، ܘܟܠܲܝܗܝ ܓܵܢܵܬܹ̈ܐ ܕܓܵܘ ܒܲܝܬܹܗ ܕܒܚܵܪܵܢ، ܒܹܐܙܵܠܵܐ ܠܐܲܪܥܵܐ ܕܟܢܲܥܢ، ܘܡܛܹܐ ܠܗܘܿܢ ܬܵܡܵܐ.

6ܥܒ݂ܝܼܪܹܗ ܐܲܒ݂ܪܵܡ ܒܐܲܪܥܵܐ ܗܲܠ ܕܘܼܟܵܐ ܕܫܟܹܝܡ؛ ܗܲܠ ܒܲܠܘܼܛܵܐ ܕܡܘܼܪܵܐ. ܒܗ̇ܝ ܥܕܵܢܵܐ ܟܢܲܥܢܵܝܹ̈ܐ ܒܐܲܪܥܵܐ ܝܗ݇ܘܵܘ. 7ܘܦܝܼܫ ܠܹܗ ܓܸܠܝܵܐ ܡܵܪܝܵܐ ܠܐܲܒ݂ܪܵܡ، ܘܐ݇ܡܝܼܪܹܗ ܐܸܠܹܗ، ”ܠܙܲܪܥܘܼܟ݂ ܒܸܬ ܝܵܗ݇ܒܹܢܵܗ̇ ܐܵܗܵܐ ܐܲܪܥܵܐ.“ ܘܒܢܹܐ ܠܹܗ ܐܲܒ݂ܪܵܡ ܬܵܡܵܐ ܡܲܕܒܚܵܐ ܠܡܵܪܝܵܐ ܕܦܝܼܫ ܠܹܗ ܓܸܠܝܵܐ ܐܸܠܹܗ. 8ܘܫܘܼܢܹܐ ܠܹܗ ܡ̣ܢ ܬܵܡܵܐ ܠܛܘܼܪܵܐ ܕܒܡܲܕܢܚܵܐ ܕܒܹܝܬ ܐܹܝܠ، ܘܢܩܝܼܫ ܠܹܗ ܡܲܫܟܢܹܗ، ܒܒܹܝܬ ܐܹܝܠ ܡ̣ܢ ܡܲܥܪܒ݂ܵܐ ܘܥܵܝ ܡ̣ܢ ܡܲܕܢܚܵܐ. ܘܒܢܹܐ ܠܹܗ ܬܵܡܵܐ ܡܲܕܒܚܵܐ ܠܡܵܪܝܵܐ، ܘܩܪܹܐ ܠܹܗ ܒܫܸܡܵܐ ܕܡܵܪܝܵܐ. 9ܘܓ̰ܘܝܼܓ̰ ܠܹܗ ܐܲܒ݂ܪܵܡ ܒܹܐܙܵܠܵܐ ܠܓܹܒܵܐ ܕܬܲܝܡܢܵܐ.

ܐܲܒ݂ܪܵܡ ܓܵܘ ܡܸܨܪܹܝܢ

10ܗܘܹܐ ܠܹܗ ܟܸܦܢܵܐ ܒܐܲܪܥܵܐ، ܘܨܠܹܐ ܠܹܗ ܐܲܒ݂ܪܵܡ ܠܡܸܨܪܹܝܢ ܠܡܲܫܚܘܼܛܹܐ ܬܵܡܵܐ، ܣܵܒܵܒ ܚܲܝܠܵܢܵܐ ܝܗ݇ܘܵܐ ܟܸܦܢܵܐ ܒܐܲܪܥܵܐ. 11ܘܗܘܹܐ ܠܵܗ̇ ܟܲܕ ܩܘܼܪܒܸܢܹܗ ܠܸܥܒ݂ܵܪܵܐ ܠܡܸܨܪܹܝܢ، ܐ݇ܡܝܼܪܹܗ ܠܣܲܪܲܝ ܒܲܟ݂ܬܹܗ، ”ܒܝܼܕܵܥܵܐ ܝܘܸܢ ܕܒܲܟ݂ܬܵܐ ܫܲܦܝܼܪܬܵܐ ܝܘܲܬܝ؛ 12ܒܸܬ ܗܵܘܝܵܐ ܕܟܲܕ ܚܵܙܝܼ ܠܵܟ݂ܝ ܡܸܨܪ̈ܵܝܹܐ ܒܸܬ ܐܵܡܪܝܼ، ’ܒܲܟ݂ܬܹܗ ܝܠܵܗ̇ ܐܵܗܵܐ،‘ ܘܒܸܬ ܩܵܛܠܝܼ ܠܝܼ، ܘܒܸܬ ܫܵܒ݂ܩܝܼ ܚܲܝܬܵܐ ܐܸܠܵܟ݂ܝ. 13ܒܲܣ ܐܵܡܪܲܬܝ ܕܚܵܬܝܼ ܝܘܲܬܝ، ܕܗܵܘܝܵܐ ܨܦܵܝܝܼ ܐܸܠܝܼ ܒܘܼܬ ܕܝܼܵܟ݂ܝ، ܘܕܚܵܝܵܐ ܓܵܢܝܼ ܒܥܸܠܬܵܐ ܕܝܼܵܟ݂ܝ.“ 14ܗܘܹܐ ܠܵܗ̇ ܟܲܕ ܥܒ݂ܝܼܪܹܗ ܐܲܒ݂ܪܵܡ ܠܡܸܨܪܹܝܢ، ܚܙܹܐ ܠܗܘܿܢ ܡܸܨܪ̈ܵܝܹܐ ܕܒܲܟ݂ܬܵܐ ܪܵܒܵܐ ܫܲܦܝܼܪܬܵܐ ܝܗ݇ܘܵܐ.

15ܚܸܙܝܵܐ ܠܗܘܿܢ ܪܵܘܪ̈ܒ݂ܵܢܹܐ ܕܦܸܪܥܘܿܢ، ܘܚܩܝܼܪܵܐ ܠܗܘܿܢ ܠܟܸܣ ܠܹܗ، ܘܦܝܼܫ ܠܵܗ̇ ܠܘܼܒܸܠܬܵܐ ܒܲܟ݂ܬܵܐ ܠܒܲܝܬܵܐ ܕܦܸܪܥܘܿܢ. 16ܥܒ݂ܝܼܕ ܠܹܗ ܛܵܒ݂ܬܵܐ ܦܸܪܥܘܿܢ ܠܐܲܒ݂ܪܵܡ ܒܘܼܬ ܕܝܼܘܼܗ̇؛ ܘܗܘܹܐ ܠܵܗ̇ ܠܹܗ ܥܸܪ̈ܒܹܐ، ܘܒܸܩܪ̈ܵܬܹܐ، ܘܚܡܵܪܹ̈ܐ، ܘܪܹ̈ܓܵܘܵܬܹܐ، ܘܚܹܕܲܡܝܵܬܹ̈ܐ، ܘܚܡܵܪ̈ܝܵܬܹܐ، ܘܓܘܼܡܠܹ̈ܐ. 17ܐܝܼܢܵܐ ܡܚܹܐ ܠܹܗ ܡܵܪܝܵܐ ܠܦܸܪܥܘܿܢ ܘܠܒܲܝܬܹܗ ܡܲܚܘܵܬܹ̈ܐ ܓܘܼܪܹ̈ܐ ܒܘܼܬ ܥܸܠܬܵܐ ܕܣܲܪܲܝ ܒܲܟ݂ܬܵܐ ܕܐܲܒ݂ܪܵܡ. 18ܘܩܪܹܐ ܠܹܗ ܦܸܪܥܘܿܢ ܠܐܲܒ݂ܪܵܡ ܘܐ݇ܡܝܼܪܹܗ ܐܸܠܹܗ، ”ܡܘܿܕܝܼ ܝܠܹܗ ܐܵܗܵܐ ܕܥܒ݂ܝܼܕ ܠܘܼܟ݂ ܐܸܠܝܼ؟ ܩܵܡܘܿܕܝܼ ܠܵܐ ܡܘܼܕܸܥ ܠܘܼܟ݂ ܐܸܠܝܼ ܕܒܲܟ݂ܬܘܼܟ݂ ܝܼܗ݇ܘܵܐ؟ 19ܩܵܡܘܿܕܝܼ ܐ݇ܡܝܼܪܘܼܟ݂، ’ܚܵܬܝܼ ܝܠܵܗ̇،‘ ܕܫܩܝܼܠܵܐ ܠܝܼ ܐܸܠܝܼ ܠܒܲܟ݂ܬܵܐ؟ ܐܵܕܝܼܵܐ ܗܵܐ ܒܲܟ݂ܬܘܼܟ݂، ܫܩܘܿܠ ܘܙܹܠ݇.“ 20ܘܦܩܝܼܕ ܠܹܗ ܦܸܪܥܘܿܢ ܕܐ݇ܢܵܫܹ̈ܐ ܐܵܙܠ݇ܝܼ ܥܲܡܹܗ؛ ܘܡܘܼܦܫܸܛ ܠܗܘܿܢ ܐܸܠܹܗ، ܘܠܒܲܟ݂ܬܹܗ، ܘܠܟܠ ܕܐܝܼܬ ܗ݇ܘܵܐ ܠܹܗ.

Currently Selected:

ܒܪܝܬܐ 12: ABTAB

Highlight

Copy