ܣܘܥܪ̈ܢܐ 2

ܐ݇ܬܵܝܬܵܐ ܕܪܘܼܚܵܐ ܕܩܘܼܕܫܵܐ

1ܐܝܼܡܲܢ ܕܗܘܹܐ ܠܹܗ ܝܵܘܡܵܐ ܕܦܲܢܛܹܩܘܼܣܛܹܐ، ܟܠܲܝܗܝ ܬܲܠܡܝܼ̈ܕܹܐ ܓ̰ܡܝܼܥܹܐ ܝܗ݇ܘܵܘ ܡܥܘܼܕܵܠܹ̈ܐ ܒܚܕܵܐ ܕܘܼܟܵܐ.#ܟܗܢ̈ܐ 23‏:15‏‐21؛ ܬܢܝܢ ܢܡܘܣܐ 16‏:9‏‐11 2ܡܸܢܫܸܠܬܵܢܹܐ ܗܘܹܐ ܠܹܗ ܐܲܝܟ݂ ܩܵܠܵܐ ܕܦܵܘܚܵܐ ܪܵܒܵܐ ܚܲܝܠܵܢܵܐ ܡ̣ܢ ܫܡܲܝܵܐ، ܘܡܠܹܐ ܠܹܗ ܠܟܠܹܗ ܒܲܝܬܵܐ ܕܝ݇ܬܝܼܒܹܐ ܝܗ݇ܘܵܘ ܓܵܘܹܗ. 3ܘܦܝܼܫ ܠܗܘܿܢ ܚܸܙܝܹܐ ܐܸܠܲܝܗܝ ܠܸܫܵܢܹ̈ܐ ܦܪ̈ܝܼܫܹܐ ܐܲܝܟ݂ ܢܘܼܪܵܐ ܘܝ݇ܬܝܼܒ݂ ܠܗܘܿܢ ܥܲܠ ܟܠ ܚܲܕ ܡܸܢܲܝܗܝ. 4ܟܠܲܝܗܝ ܦܝܼܫ ܠܗܘܿܢ ܡܸܠܝܹܐ ܡ̣ܢ ܪܘܼܚܵܐ ܕܩܘܼܕܫܵܐ، ܘܫܘܼܪܹܐ ܠܗܘܿܢ ܗܲܡܙܘܼܡܹܐ ܒܠܸܫܵܢܹ̈ܐ ܦܪ̈ܝܼܫܹܐ ܐܲܝܟ݂ ܕܪܘܼܚܵܐ ܝܘܼܗ݇ܒܸܠ ܠܹܗ ܐܸܠܲܝܗܝ ܠܗܲܡܙܘܼܡܹܐ.

5ܐܝܼܬ ܗ݇ܘܵܘ ܐ݇ܢܵܫܹ̈ܐ ܒܸܥܡܵܪܵܐ ܓܵܘ ܐܘܿܪܸܫܠܸܡ، ܙܵܕܥܵܢܹ̈ܐ ܡ̣ܢ ܐܲܠܵܗܵܐ، ܡ̣ܢ ܟܠ ܐܘܼܡܬܵܐ ܕܬܚܘܿܬ ܫܡܲܝܵܐ. 6ܐܝܼܡܲܢ ܕܫܡܝܼܥ ܠܗܘܿܢ ܠܗ̇ܘ ܩܵܠܵܐ، ܓ̰ܡܝܼܥ ܠܹܗ ܟܠܹܗ ܟܸܢܫܵܐ ܘܫܓ݂ܝܼܫ ܠܹܗ ܣܵܒܵܒ ܟܠ ܚܲܕ ܡܸܢܲܝܗܝ ܫܡܝܼܥ ܠܹܗ ܐܸܠܲܝܗܝ ܗܲܡܙܘܼܡܹܐ ܒܠܸܫܵܢܵܐ ܕܓܵܢܹܗ. 7ܟܠܲܝܗܝ ܥܘܼܓ̰ܸܒ ܠܗܘܿܢ ܪܵܒܵܐ، ܘܐܵܡܪܝܼ ܗ݇ܘܵܘ ܚܲܕ ܠܗ̇ܘ ܐ݇ܚܹܪ݇ܢܵܐ، ”ܟܠܲܝܗܝ ܐܲܢܹܐ ܕܗܲܡܙܘܼܡܹܐ ܝܢܵܐ، ܗܵܐ ܠܹܐ ܝܢܵܐ ܓܠܝܼܠܵܝܹ̈ܐ؟ 8”ܕܵܐܟ݂ܝܼ ܝܠܵܗ̇ ܕܐܲܚܢܲܢ ܒܸܫܡܵܥܲܝ ܝܘܲܚ ܕܗܲܡܙܘܼܡܹܐ ܝܢܵܐ ܒܠܸܫܵܢܵܐ ܝܸܡܵܝܵܐ ܕܟܠ ܚܲܕ ܡܸܢܲܢ؟ 9”ܦܲܪ̈ܬܵܝܹܐ، ܘܡܵܕܵܝܹ̈ܐ ܘܥܝܼܠܵܡܵܝܹ̈ܐ، ܘܥܵܡܪ̈ܵܢܹܐ ܕܒܹܝܬ ܢܲܗܪ̈ܝܼܢ، ܘܡ̣ܢ ܝܼܗܘܼܕ، ܘܩܵܦܵܕܘܿܩܝܼܵܐ، ܘܡ̣ܢ ܦܘܼܢܛܘܿܣ ܘܐܵܣܝܼܵܐ، 10”ܡ̣ܢ ܦܪܘܼܓ݂ܝܼܵܐ، ܘܦܲܡܦܘܼܠܝܼܵܐ، ܘܡܸܨܪܹܝܢ، ܘܡ̣ܢ ܐܘܼܚܕܵܢܹ̈ܐ ܕܠܝܼܒܝܼܵܐ ܩܘܼܪܒܵܐ ܕܩܸܘܪܝܼܢܹܐ، ܘܚܵܙܘܿܩܹ̈ܐ ܡ̣ܢ ܪܗ݇ܘܿܡܹܐ، 11”ܝܗܘܼܕܵܝܹ̈ܐ، ܘܩܠܝܼܒܵܝܹ̈ܐ، ܘܩܪܹ̈ܛܵܝܹܐ، ܘܥܵܪ̈ܵܒܵܝܹܐ، ܒܸܫܡܵܥܲܝ ܝܘܲܚ ܗܲܡܙܘܼܡܹܐ ܥܒ݂ܵܕܹ̈ܐ ܓܘܼܪܹ̈ܐ ܕܐܲܠܵܗܵܐ ܒܠܸܫܵܢܵܐ ܕܓܵܢܲܢ.“ 12ܥܲܓ̰ܒܝܼ ܗ݇ܘܵܘ ܟܠܲܝܗܝ ܘܫܵܓ݂ܫܝܼ ܗ݇ܘܵܘ، ܒܹܐܡܵܪܵܐ، ”ܐܵܗܵܐ ܡܘܿܕܝܼ ܝܠܹܗ؟“ 13ܐ݇ܚܹܪ̈݇ܢܹܐ ܡܲܣܚܸܪܝܼ ܗ݇ܘܵܘ ܘܐܵܡܪܝܼ ܗ݇ܘܵܘ، ”ܐܲܢܹܐ ܐ݇ܢܵܫܹ̈ܐ ܪ̈ܵܘܵܝܹܐ ܝܢܵܐ ܒܚܲܡܪܵܐ ܚܵܕ݇ܬܵܐ.“

ܡܲܡܠܠܵܐ ܕܫܸܡܥܘܿܢ ܟܹܐܦܵܐ ܒܝܵܘܡܵܐ ܕܦܲܢܛܹܩܘܼܣܛܹܐ

14ܗ̇ܝܓܵܗ ܟܠܹܐ ܠܹܗ ܫܸܡܥܘܿܢ ܟܹܐܦܵܐ ܥܲܡ ܚܲܕܸܥܣܲܪ ܫܠܝܼܚܹ̈ܐ، ܡܘܼܪܸܡ ܠܹܗ ܩܵܠܹܗ ܘܗܘܼܡܙܸܡ ܠܹܗ ܩܵܐ ܟܸܢܫܵܐ، ”ܐ݇ܢܵܫܹ̈ܐ ܝܗܘܼܕܵܝܹ̈ܐ ܘܟܠܲܝܗܝ ܥܵܡܪ̈ܵܢܹܐ ܕܒܐܘܿܪܸܫܠܸܡ، ܒܵܥܹܝܢ ܕܡܲܕܥܸܢܵܘܟ݂ܘܿܢ ܒܘܼܬ ܐܵܗܵܐ. ܡܲܨܝܸܬܘܼܢ ܠܗܹܡܸܙܡܵܢܝܼ̈. 15”ܐܲܢܹܐ ܐ݇ܢܵܫܹ̈ܐ ܠܹܐ ܝܢܵܐ ܪ̈ܵܘܵܝܹܐ ܐܲܝܟ݂ ܕܒܸܚܫܵܒ݂ܵܐ ܝܬܘܿܢ، ܣܵܒܵܒ ܐܲܚܟ̰ܝܼ ܣܵܥܲܬ ܕܬܫܲܥ ܕܩܵܝܕܲܡܬܵܐ ܝܠܵܗ̇. 16”ܐܵܗܵܐ ܦܝܼܫܬܵܐ ܝܗ݇ܘܵܐ ܢܘܼܒܝܼܬܵܐ ܒܝܲܕ ܝܘܼܐܹܝܠ ܢܒ݂ܝܼܵܐ ܕܐ݇ܡܝܼܪܹܗ:

17ܒܸܬ ܗܵܘܝܵܐ ܒܝܵܘܡܵܢܹ̈ܐ ܐ݇ܚܵܪ̈ܵܝܹܐ، ܒܹܐܡܵܪܵܐ ܝܠܹܗ ܐܲܠܵܗܵܐ، ܒܸܬ ܫܲܦܟܸܢ ܪܘܼܚܝܼ ܥܲܠ ܟܠܲܝܗܝ ܐ݇ܢܵܫܹ̈ܐ، ܘܒܸܬ ܢܲܒܝܼ ܒܢܘܿܢܵܘ̈ܟ݂ܘܿܢ ܘܒܢܵܬܵܘ̈ܟ݂ܘܿܢ؛ ܓ̰ܘܲܢܩܵܘ̈ܟ݂ܘܿܢ ܒܸܬ ܚܵܙܝܼ ܚܸܙܘܹ̈ܐ، ܘܣܵܒ݂ܵܘ̈ܟ݂ܘܿܢ ܒܸܬ ܚܵܠܡܝܼ ܚܸܠܡܹ̈ܐ.

18ܘܐܘܼܦ ܥܲܠ ܪܹ̈ܓܵܘܵܬܝܼ ܘܥܲܠ ܚܹܕܲܡܝܵܬܝܼ̈ ܒܸܬ ܫܲܦܟܸܢ ܪܘܼܚܝܼ ܒܐܵܢܝܼ ܝܵܘܡܵܢܹ̈ܐ ܘܒܸܬ ܢܲܒܝܼ،

19ܒܸܬ ܡܲܚܙܹܝܢ ܕܘܼܡܵܪܹ̈ܐ ܒܫܡܲܝܵܐ ܡ̣ܢ ܥܸܠܸܠ ܘܢܝܼܫܲܢܩܹ̈ܐ ܥܲܠ ܐܲܪܥܵܐ ܡ̣ܢ ܠܠܬܸܚܬ، ܕܸܡܵܐ ܘܢܘܼܪܵܐ ܘܗܵܘܓܵܐ ܘܬܸܢܵܐ.

20ܫܸܡܫܵܐ ܒܸܬ ܦܵܐܹܫ ܫܘܼܚܠܸܦܵܐ ܠܚܸܫܟܵܐ، ܘܣܲܗܪܵܐ ܠܕܸܡܵܐ،

ܡ̣ܢ ܩܵܕ݇ܡ ܕܐܵܬܹܐ ܝܵܘܡܵܐ ܓܘܼܪܵܐ ܘܣܲܗܡܵܢܵܐ ܕܡܵܪܝܵܐ.

21ܒܗ̇ܘ ܝܵܘܡܵܐ ܟܠ ܡ̇ܢ ܕܩܵܪܹܐ ܒܫܸܡܵܐ ܕܡܵܪܝܵܐ ܒܸܬ ܦܵܪܹܩ.#ܝܘܐܝܠ 2‏:28‏‐32

22”ܐ݇ܢܵܫܹ̈ܐ ܒܢܲܝ̈ ܝܼܣܪܵܝܹܠ، ܫܡܸܥܡܘܼܢ ܠܗܹܡܸܙܡܵܢܝܼ̈: ܝܼܫܘܿܥ ܢܵܨܪܵܝܵܐ، ܐ݇ܢܵܫܵܐ ܡ̣ܢ ܐܲܠܵܗܵܐ، ܦܝܼܫ ܠܹܗ ܡܘܼܚܙܝܼܵܐ ܐܸܠܵܘܟ݂ܘܿܢ ܒܚܲܝܠܹ̈ܐ ܘܒܕܘܼܡܵܪܹ̈ܐ، ܘܒܢܝܼܫܲܢܩܹ̈ܐ ܐܲܝܢܝܼ ܕܐܲܠܵܗܵܐ ܥܒ݂ܝܼܕ ܠܹܗ ܒܐܝܼܕܹܗ ܓܵܘܵܘܟ݂ܘܿܢ ܐܲܝܟ݂ ܕܟܠܵܘܟ݂ܘܿܢ ܟܹܐ ܝܵܕܥܝܼܬܘܿܢ. 23”ܐܵܗܵܐ ܝܼܫܘܿܥ ܦܝܼܫ ܠܹܗ ܣܘܼܦܝܵܐ ܐܸܠܵܘܟ݂ܘܿܢ ܒܨܸܒ݂ܝܵܢܵܐ ܘܒܝ݇ܕܲܥܬܵܐ ܩܵܕ݇ܡܵܝܬܵܐ ܕܐܲܠܵܗܵܐ، ܘܒܐܝܼܕܵܬܹ̈ܐ ܥܵܘܵܠܹ̈ܐ ܙܩܝܼܦ ܠܵܘܟ݂ܘܿܢ ܘܩܛܝܼܠ ܠܵܘܟ݂ܘܿܢ ܐܸܠܹܗ. 24”ܐܝܼܢܵܐ ܐܲܠܵܗܵܐ ܡܘܼܩܸܡ ܠܹܗ ܡ̣ܢ ܓܵܘ ܡܝܼܬܹ̈ܐ، ܘܦܘܼܨܹܐ ܠܹܗ ܐܸܠܹܗ ܡ̣ܢ ܓ̰ܘܼܢܓ̰ܵܪܹ̈ܐ ܕܡܵܘܬܵܐ، ܣܵܒܵܒ ܡܵܘܬܵܐ ܠܹܐ ܡܵܨܹܐ ܗ݇ܘܵܐ ܚܲܡܹܐ ܗ݇ܘܵܐ ܠܹܗ ܓܵܘ ܩܲܒ݂ܪܵܐ. 25”ܣܵܒܵܒ ܕܵܘܝܼܕ ܐ݇ܡܝܼܪܹܗ ܒܘܼܬ ܕܝܼܹܗ:

ܚܙܹܐ ܠܝܼ ܠܡܵܪܝܵܐ ܒܟܠ ܙܲܒ݂ܢܵܐ ܩܵܕ݇ܡܝܼ، ܣܵܒܵܒ ܥܲܠ ܝܲܡܝܼܢܝܼ ܝܠܹܗ ܕܠܵܐ ܫܵܥܫܹܢ،

26ܒܘܼܬ ܐܵܗܵܐ ܚܕܹܐ ܠܹܗ ܠܸܒܝܼ ܘܦܨܝܼܚ ܠܹܗ ܠܸܫܵܢܝܼ، ܐܘܼܦ ܦܲܓ݂ܪܝܼ ܒܸܬ ܚܵܝܹܐ ܒܗܹܒ݂ܝܼ.

27ܣܵܒܵܒ ܠܹܐ ܫܵܒ݂ܩܹܬ ܠܓܵܢܝܼ ܒܫܝܘܿܠ، ܠܹܐ ܝܵܗ݇ܒܹܬ ܠܩܲܕܝܼܫܘܼܟ݂ ܠܸܚܙܵܝܵܐ ܚܪܵܒ݂ܵܐ.

28ܡܘܼܚܙܹܐ ܠܘܼܟ݂ ܐܘܼܪܚܵܐ ܕܚܲܝܹ̈ܐ، ܘܒܸܬ ܡܵܠܹܝܬ ܠܝܼ ܒܘܼܣܵܡܵܐ ܩܵܕ݇ܡ ܦܲܪܨܘܿܦܘܼܟ݂.#ܡܙܡܘܪ̈ܐ 16‏:8‏‐11

29”ܐ݇ܢܵܫܹ̈ܐ ܐܲܚܘܿܢܘܵܬܹ̈ܐ، ܐܵܡܪܹܢܵܘܟ݂ܘܿܢ ܦܫܝܼܛܵܐܝܼܬ ܒܘܼܬ ܕܵܘܝܼܕ، ܪܹܫܵܐ ܕܐܲܒ݂ܵܗܵܬܹ̈ܐ، ܕܡܝܼܬ ܠܹܗ ܘܦܝܼܫ ܠܹܗ ܩܒ݂ܝܼܪܵܐ، ܘܩܲܒ݂ܪܹܗ ܠܐܲܟ݂ܵܐ ܝܠܹܗ ܗܲܠ ܐܸܕܝܘܿܡ ܝܵܘܡܵܐ. 30”ܐܝܼܢܵܐ ܣܵܒܵܒ ܢܒ݂ܝܼܵܐ ܝܗ݇ܘܵܐ، ܘܟܹܐ ܝܵܕܹܥ ܗ݇ܘܵܐ ܕܒܡܵܘܡܵܬܹ̈ܐ ܝ݇ܡܹܐ ܠܹܗ ܐܸܠܹܗ ܐܲܠܵܗܵܐ، ܕܡ̣ܢ ܙܲܪܥܹܗ ܒܸܬ ܡܲܬܸܒ݂ ܚܲܕ ܡܲܠܟܵܐ ܒܫܵܘܦܹܗ،#ܒ. ܫܡܘܐܝܠ 7‏:12‏‐13؛ ܡܙܡܘܪ̈ܐ 132‏:11 31”ܚܙܹܐ ܠܹܗ ܡ̣ܢ ܩܵܕ݇ܡ ܥܕܵܢܵܐ ܘܗܘܼܡܙܸܡ ܠܹܗ ܒܘܼܬ ܩܝܵܡܬܵܐ ܕܡܫܝܼܚܵܐ، ܕܠܵܐ ܦܝܼܫ ܠܹܗ ܫܒ݂ܝܼܩܵܐ ܒܫܝܘܿܠ، ܘܦܲܓ݂ܪܹܗ ܠܵܐ ܚܙܹܐ ܠܹܗ ܚܪܵܒ݂ܵܐ. 32”ܠܐܵܗܵܐ ܝܼܫܘܿܥ ܡܘܼܩܸܡ ܠܹܗ ܐܲܠܵܗܵܐ ܡ̣ܢ ܓܵܘ ܡܝܼܬܹ̈ܐ ܘܐܲܚܢܲܢ ܟܠܲܢ ܣܵܗܕܘܼ̈ܗܝ ܝܘܲܚ. 33”ܦܝܼܫ ܠܹܗ ܡܘܼܪܡܵܐ ܠܝܲܡܝܼܢܵܐ ܕܐܲܠܵܗܵܐ، ܘܫܩܝܼܠ ܠܹܗ ܡ̣ܢ ܒܵܒܵܐ ܩܵܘܠܵܐ، ܕܝܼܠܹܗ ܪܘܼܚܵܐ ܕܩܘܼܕܫܵܐ، ܘܫܘܼܦܸܟ݂ ܠܹܗ ܠܐܵܗܵܐ ܩܵܘܠܵܐ ܕܵܐܟ݂ܝܼ ܕܒܸܚܙܵܝܵܐ ܝܬܘܿܢ ܘܒܸܫܡܵܥܵܐ. 34”ܣܵܒܵܒ ܕܵܘܝܼܕ ܠܵܐ ܐ݇ܣܝܼܩ ܠܹܗ ܠܫܡܲܝܵܐ، ܐܝܼܢܵܐ ܐ݇ܡܝܼܪܹܗ:

ܐ݇ܡܝܼܪܹܗ ܡܵܪܝܵܐ ܠܡܵܪܝܼ، ܝ݇ܬܘܿܒ݂ ܡ̣ܢ ܝܲܡܝܼܢܝܼ،

35ܗܲܠ ܕܥܵܒ݂ܕܹܢܹܗ ܕܸܫܡܸܢܘܼܟ݂ ܟܘܼܒ݂ܫܵܐ ܬܚܘܿܬ ܐܲܩܠܵܬܘܼ̈ܟ݂.#ܡܙܡܘܪ̈ܐ 110‏:1

36”ܒܘܼܬ ܐܵܗܵܐ ܦܵܝܫܵܐ ܝ݇ܕܝܼܥܬܵܐ ܠܟܠܲܝܗܝ ܒܹܝܬ ܝܼܣܪܵܝܹܠ، ܠܐܵܗܵܐ ܝܼܫܘܿܥ ܕܐܲܚܬܘܿܢ ܙܩܝܼܦ ܠܵܘܟ݂ܘܿܢ ܥܒ݂ܝܼܕ ܠܹܗ ܐܲܠܵܗܵܐ ܡܵܪܝܵܐ ܘܡܫܝܼܚܵܐ.“ 37ܐܝܼܡܲܢ ܕܫܡܝܼܥ ܠܗܘܿܢ ܐܲܢܹܐ ܗܹܡܸܙܡܵܢܹ̈ܐ، ܦܝܼܫ ܠܗܘܿܢ ܢܝܼܨܹܐ ܒܠܸܒܲܝܗܝ ܘܐ݇ܡܝܼܪܗܘܿܢ ܠܫܸܡܥܘܿܢ ܟܹܐܦܵܐ ܘܠܫܲܪܟܵܐ ܕܫܠܝܼܚܹ̈ܐ، ”ܐ݇ܢܵܫܹ̈ܐ ܐܲܚܘܿܢܘܵܬܹ̈ܐ، ܡܘܿܕܝܼ ܥܵܒ݂ܕܲܚ؟“ 38ܓ̰ܘܼܘܸܒ ܠܹܗ ܫܸܡܥܘܿܢ ܟܹܐܦܵܐ، ”ܬܲܘܸܒܘܼܢ، ܘܦܘܼܫܘܼܢ ܥܡܝܼܕܹܐ ܟܠ ܚܲܕ ܡܸܢܵܘܟ݂ܘܿܢ ܒܫܸܡܵܐ ܕܝܼܫܘܿܥ ܡܫܝܼܚܵܐ ܕܦܵܝܫܝܼ ܦܘܼܚܠܹܐ ܚܛܝܼܵܬܵܘ̈ܟ݂ܘܿܢ ܘܕܩܲܒܠܝܼܬܘܿܢ ܡܵܘܗܲܒ݂ܬܵܐ ܕܪܘܼܚܵܐ ܕܩܘܼܕܫܵܐ، 39”ܣܵܒܵܒ ܩܵܘܠܵܐ ܐܸܠܵܘܟ݂ܘܿܢ ܝܼܠܹܗ ܘܠܒܢܘܿܢܵܘ̈ܟ݂ܘܿܢ ܘܠܟܠܲܝܗܝ ܐܵܢܝܼ ܕܝܼܢܵܐ ܪܸܚܩܵܐ، ܠܟܠܲܝܗܝ ܐܵܢܝܼ ܕܐܲܠܵܗܵܐ ܩܵܪܹܐ ܠܗܘܿܢ.“

40ܒܪܵܒܵܐ ܗܹܡܸܙܡܵܢܹ̈ܐ ܐ݇ܚܹܪ̈݇ܢܹܐ ܚܘܼܦܸܛ ܠܹܗ ܐܸܠܲܝܗܝ ܘܦܘܼܪܦܸܠ ܠܹܗ ܒܝܼܲܝܗܝ، ܒܹܐܡܵܪܵܐ، ”ܦܲܪܩܘܼܢ ܓܵܢܵܘܟ݂ܘܿܢ ܡ̣ܢ ܐܵܗܵܐ ܫܲܪܒܬܵܐ ܦܟ̰ܝܼܠܬܵܐ.“ 41ܐܵܢܝܼ ܕܗܘܼܡܸܢܗܘܿܢ ܦܝܼܫ ܠܗܘܿܢ ܥܡܝܼܕܹܐ. ܒܗ̇ܘ ܝܵܘܡܵܐ ܡܐܲܝܟ݂ ܬܠܵܬܵܐ ܐܲܠܦܹ̈ܐ ܐ݇ܢܵܫܹ̈ܐ ܦܝܼܫ ܠܗܘܿܢ ܡܘܼܙܝܸܕܹܐ ܠܡܸܢܝܵܢܲܝܗܝ.

ܫܲܪܝܼܟܘܼܬܵܐ ܕܡܗܘܼܡܢܹ̈ܐ

42ܘܐܲܢܹܐ ܟܠ ܥܕܵܢܵܐ ܥܲܡ ܥܘܼܕܵܠܹ̈ܐ ܝܗ݇ܘܵܘ ܒܝܘܼܠܦܵܢܵܐ ܕܫܠܝܼܚܹ̈ܐ، ܘܒܫܲܪܝܼܟܘܼܬܵܐ، ܘܒܩܨܵܝܬܵܐ ܕܠܲܚܡܵܐ ܘܒܨܠܘܿܬܵܐ. 43ܢܦܝܼܠ ܠܵܗ̇ ܙܕܘܼܥܬܵܐ ܥܲܠ ܟܠ ܚܲܕ ܐ݇ܢܵܫܵܐ، ܘܪܵܒܵܐ ܕܘܼܡܵܪܹ̈ܐ ܘܢܝܼܫܲܢܩܹ̈ܐ ܦܵܝܫܝܼ ܝܗ݇ܘܵܘ ܥܒ݂ܝܼܕܹܐ ܒܝܲܕ ܫܠܝܼܚܹ̈ܐ ܓܵܘ ܐܘܿܪܸܫܠܸܡ. 44ܘܟܠܲܝܗܝ ܡܗܘܼܡܢܹܐ ܥܲܡ ܥܘܼܕܵܠܹ̈ܐ ܝܗ݇ܘܵܘ، ܘܟܹܐ ܫܲܪܸܟܝܼ ܗ݇ܘܵܘ ܒܹܝܠܲܝܗܝ ܟܠ ܡܸܢܕܝܼ ܕܐܝܼܬ ܗ݇ܘܵܘ ܠܗܘܿܢ. 45ܡܸܢܕܝܼ ܘܩܸܢܝܵܢܵܐ ܕܐܝܼܬ ܗ݇ܘܵܘ ܠܗܘܿܢ ܙܘܼܒܸܢܗܘܿܢ ܘܦܘܼܠܸܥ ܠܗܘܿܢ ܠܟܠ ܚܲܕ ܐܲܝܟ݂ ܕܣܢܝܼܩܘܼܬܹܗ. 46ܟܠ ܝܵܘܡܵܐ ܟܹܐ ܓ̰ܵܡܥܝܼ ܗ݇ܘܵܘ ܓܵܘ ܗܲܝܟܠܵܐ ܒܚܕܵܐ ܓܵܢܵܐ ܘܩܵܨܝܼ ܗ݇ܘܵܘ ܠܲܚܡܵܐ ܓܵܘ ܒܵܬܲܝ̈ܗܝ، ܘܐܵܟ݂ܠܝܼ ܗ݇ܘܵܘ ܡܹܐܟ݂ܘܼܠܬܵܐ ܒܚܲܕܘܼܬܵܐ ܘܦܫܝܼܛܘܼܬܵܐ ܕܠܸܒܵܐ، 47ܘܫܲܒܚܝܼ ܗ݇ܘܵܘ ܠܐܲܠܵܗܵܐ، ܦܝܵܫܵܐ ܡܝܘܼܩܪܹܐ ܒܟܠܹܗ ܥܲܡܵܐ، ܘܡܵܪܲܢ ܟܠ ܝܘܿܡ ܟܹܐ ܡܲܙܝܸܕ ܗ݇ܘܵܐ ܠܡܸܢܝܵܢܵܐ ܕܐܵܢܝܼ ܕܦܵܪܩܝܼ ܗ݇ܘܵܘ.

Currently Selected:

ܣܘܥܪ̈ܢܐ 2: ABTAB

Highlight

Copy