Jenesis 37

Istori Yosep

1Yakob a drigas y'n pow may hwrussa y das godriga ynno, yn pow Kanan.

2An re ma yw henedhow Yakob: Yosep, seytek bloedh y oes, esa ow peuri an flokk gans y vreder; maw ova, gans mebyon Bilha ha gans mebyon Zilpa, gwragedh y das; ha Yosep a dhros drog dherivas anedha dh'aga thas. 3Lemmyn Ysrael a gara Yosep moy es oll y vebyon erell, rag ev a veu mab y gothni; hag ev a wrug kota liesliw#37:3 kota liesliw: Henn yw an treylyans hengovek, ow siwya an Septuagint. Styr an Ebrow yw ansertan. Martesen pows gwrys a lien ha warnedhi brosweyth; po pows hir ow trehedhes dhe'n dhewufern ha gans bregholow hir ow trehedhes dhe'n konnaow-bregh. ragdho. 4Ha'y vreder a welas y hwre aga thas y gara moy es y vreder oll, hag i a'n kasas, ha ny yllens kewsel yn kuv ganso.

5Lemmyn Yosep a hunrosas hunros ha'y dherivas dh'y vreder; hag i a'n kasas hwath moy. 6Yn-medh ev dhedha, ‘Goslowewgh, my a'gas pys, an hunros ma re hunrosis: 7awotta, yth esen ni ow kelmi manalow y'n gwel, hag awotta, ow manal vy a sevis, ha pesya a'y sav ynwedh; hag awotta, agas manalow hwi a dheuth oll a-dro, hag omblegya dhe'm manal vy.’ 8Hag yn-medh y vreder dhodho, ‘A vydhydh ow reynya warnan yn hwir? Po a vydhydh orth agan rewlya?’ Ytho i a'n kasas hwath dhe voy drefenn y hunrosow ha'y eryow. 9Hag ev a hunrosas hunros arall ha'y dherivas dh'y vreder, ha leverel, ‘Otta, my re hunrosas hunros arta, hag otta, an howl ha'n loer hag unnek ster a omblegyas dhymm.’ 10Mes ev a'n derivas dh'y das ha dh'y vreder ha'y das a'n rebukyas ha leverel dhodho, ‘Pyth yw an hunros ma re wruss'ta hunrosa? A wren ni dos, my ha'th vamm ha'th vreder, dhe omblegya dhe'n leur a-ragos?’ 11Ha'y vreder a borthas avi orto; mes y das a withas an dra yn y vrys.

12Y vreder eth dhe beuri flokk aga thas yn Shekem. 13Hag Ysrael a leveris dhe Yosep, ‘A nyns usi dha vreder ow peuri yn Shekem? Deus, my a wra dha dhannvon dhedha.’ Hag yn-medh ev dhodho. ‘Ottavy.’ 14Hag yn-medh ev dhodho, ‘Ke lemmyn dhe weles mars yw pup-tra yn poynt da gans dha vreder ha gans an flokk, ha dri dhymm derivas warnedha.’ Ytho ev a'n dannvonas dhiworth nans Hebron, hag ev a dheuth dhe Shekem. 15Ha neb unn gour a'n kavas, hag, awotta, yth esa ow kwandra a-dro y'n gwel; ha'n gour a wovynnas orto, ‘Pyth es'ta ow hwilas?’ 16Yn-medh ev, ‘Yth esov ow hwilas ow breder. Lavar dhymm, my a'th pys, ple'mons i ow peuri?’ 17Hag yn-medh an gour, ‘Gyllys alemma yns i. Rag my a's klewas ow leverel, “Deun ni dhe Dothan.” ’ Ytho Yosep eth war-lergh y vreder ha'ga havoes yn Dothan. 18Hag i a'n gwelas a-bell, hwath kyns ev dhe dhos nes dhedha, hag i a vrasas er y bynn dh'y ladha. 19Hag i a leveris an eyl dh'y gila, ‘Ottomma an hunroser enos ow tos. 20Deun lemmyn ha gwren ni y ladha ha'y dewlel yn onan a'n puthow, ha leverel, neb unn tebel vest dh'y dhybri; ha ni a welvydh pandr'a vydh y hunrosow.’ 21Mes Rewben a glewas ha'y dhelivra mes a'ga leuv ha leverel, ‘Na wren ni kemmeres y vewnans.’ 22Hag yn-medh Rewben dhedha, ‘Na wrewgh skoellya goes; tewlewgh e a-berth y'n puth ma y'n difeythtir. Na wrewgh ystynn leuv er y bynn’ – may halla y dhelivra mes a'ga leuv ha'y dhri arta dh'y das. 23Pan dheuth Yosep bys yn y vreder i a stryppyas y gota dhiworto, an kota liesliw esa warnodho; 24hag i a'n kemmeras ha'y dewlel a-berth y'n puth. Gwag o an puth, heb bos dowr ynno.

25Hag i a esedhas dhe dhybri bara, hag i a dhrehevis aga lagasow ha mires, hag awotta, karavan a Yshmaelysi ow tos dhiworth Gilead. Yth esa aga howrvergh ow toen spisys, balsam ha myrr, ow vyajya dh'aga doen yn-nans dhe Ejyp. 26Hag yn-medh Yuda dh'y vreder, ‘Py par prow vydh mar ledhyn agan broder ha keles y woes? 27Deun, gwren ni y wertha dhe'n Yshmaelysi ma na vydh agan leuv warnodho. Agan broder, agan kig ni yw ev.’ Ha'y vreder a goelas orto. 28Ena tus a Midyan, gwikoryon, a dremenas, hag i a dennas Yosep ha'y dhrehevel yn-mes a'n puth; hag i a'n gwerthas dhe'n Yshmaelysi a ugens bath a arghans, hag i a dhros Yosep dhe Ejyp.

29Ena Rewben a dhehwelis dhe'n puth, hag otta, nyns esa Yosep y'n puth hag ev a skwardyas y dhillas 30ha dehweles dh'y vreder ha leverel, ‘Nyns usi an maw ena. Ha my, ple'th av?’ 31Hag i a gemmeras kota Yosep ha ladha bogh ha troghya an kota y'n goes. 32Ena i a dhannvonas an kota liesliw ha'y dri dh'aga thas ha leverel, ‘Ni re gavas hemma. Mir mars yw kota dha vab, po nag yw.’ 33Hag ev a'n aswonnis ha leverel, ‘Kota ow mab! Tebel vest re'n dybris. Skwardys yw Yosep yn sur!’ 34Ena Yakob a skwardyas y dhillas ha gorra yskar a-dro dh'y dhiwglun, ha kyni rag y vab lies dydh. 35Hag oll y vebyon hag oll y vyrghes a sevis rag y gonfortya mes ev a skonyas a vos konfortys, hag ev a leveris, ‘My a vynn mos yn-nans dhe'n bedh dhe'm mab, ow kyni.’ Ha'y das a oelas ragdho. 36Mes an Midyanysi a'n gwerthas yn Ejyp dhe Potifar, onan a lyswesyon Faro, an chyf rennyas.#37:36 onan a lyswesyon Faro, an chyf rennyas: Po onan a spadhesigyon Faro, an chyf dibenner.

Currently Selected:

Jenesis 37: ABK

Highlight

Copy