Jenesis 23

Mernans Sara

1Ha Sara o seyth bloedh ha hwegh-ugens hy bloedh – bloedh bewnans Sara. 2Ha Sara a verwis yn Kiryath-arba, yw Hebron yn pow Kanan, hag Abraham a dheuth dhe gyni rag Sara hag oela rygdhi. 3Hag Abraham a sevis yn-bann dhiworth an korf ha kewsel orth mebyon Heth ow leverel, 4‘My yw alyon ha godriger yn agas mysk; grontyewgh dhymm perghennogeth rag ynkleudhva genowgh, may hylliv ynkleudhyas an korf mes a'm golok.’ 5Mebyon Heth a worthybis Abraham ow leverel dhodho, 6‘Goslow orthyn, ow arloedh; pryns Duw osta yn agan mysk. Ynkleudh an korf y'th tewis a'gan ynkleudhvaow. Denvyth ahanan ny vynn nagha dhis y ynkleudhva dhe ynkleudhyas an korf.’ 7Hag Abraham a sevis hag omblegya dhe dus an pow, dhe vebyon Heth, 8ha kewsel orta ow leverel, ‘Mars yw bodh agas brys my dhe ynkleudhyas an korf mes a'm golok, goslowewgh orthiv ha pled gans Efron mab Sohar ragov, 9may rollo dhymm kav Makpela usi dhodho, orth penn y bark. Re wrello y ri dhymm orth pris leun yn agas mysk, avel perghennogeth rag ynkleudhva.’ 10Yth esa Efron owth esedha yn mysk mebyon Heth, hag Efron an Hittyas a worthybis Abraham yn klewans mebyon Heth, a beub esa ow tremena dre yet an sita, ow leverel, 11‘Nansi, ow arloedh, goslow orthiv. My a re dhis an park ha'n kav usi ynno; yn golok mebyon ow fobel my a'n re dhis. Gwra ynkleudhyas an korf usi genes.’ 12Hag Abraham a omblegyas dherag pobel an pow. 13Hag ev a gewsis orth Efron, yn klewans pobel an pow, ow leverel, ‘Mes mar mynnydh, klew vy my a'th pys. My a re an mona rag an park. Kemmer e dhiworthiv, ha my a vynn ynkleudhyas ena an korf usi dhymm.’ 14Hag Efron a worthybis Abraham, ow leverel dhodho, 15‘Ow arloedh, goslow orthiv. An tir a dal peswar kans shekel arghans. Pyth yw henna yntra ty ha my? Gwra ynkleudhyas an korf usi genes.’ 16Hag Abraham a woslowas orth Efron, hag Abraham a boesas dhe Efron an arghans re lavarsa yn klewans mebyon Heth, peswar shekel a arghans war-lergh usadow an varchons. 17Ytho park Efron a veu statyes, esa yn Makpela a-dal Mamre: an park ha'n kav esa ynno hag oll an gwydh esa y'n park yn oll an emlow a-dro, 18dhe Abraham avel posseshyon dherag mebyon Heth, dherag peub esa owth entra dre yet y sita.#23:18 y sita: Efron. 19Wosa hemma, Abraham a ynkleudhyas Sara y wreg y'n kav a bark Makpela a-dal Mamre, yw Hebron yn pow Kanan. 20Ha'n park ha'n kav usi ynno a veu statyes dhe Abraham gans mebyon Heth avel perghennogeth rag ynkleudhva.

Currently Selected:

Jenesis 23: ABK

Highlight

Copy