Jenesis 20

Abraham ha Sara yn Gerar

1Hag Abraham eth alena troha tir an Negeb ha triga yntra Kadesh ha Shur; hag yth esa trigys yn Gerar avel alyon. 2Yn-medh Abraham a-dro dhe Sara y wreg, ‘Ow hwoer yw hi’, hag Abimelek myghtern Gerar, a dhannvonas dhe gemmeres Sara. 3Mes Duw a dheuth dhe Abimelek yn hunros yn nos ha leverel dhodho, ‘Awotta, den marow osta, drefenn an venyn re wruss'ta kemmeres; rag demmedhys yw hi dhe wour.’ 4Mes ny wrussa Abimelek dos nes dhedhi, ytho yn-medh ev, ‘Arloedh, a vynn'ta ladha ynwedh kenedhel wiryon? 5A ny leveris ev y honan dhymm, “Ow hwoer yw hi”? Ha hi hy honan a leveris, “Ow broder yw ev.” Gans kolonn lan ha diwleuv gwiryon y hwrug vy hemma.’ 6Hag yn-medh Duw dhodho yn hunros, ‘My ynwedh a woer ty dhe wul hemma gans kolonn lan, rag my ow honan a'th withas orth pegha er ow fynn. Ytho ny wrug vy dha asa dh'y thochya. 7Lemmyn ytho, daskorr y wreg dhe'n gour, rag profoes yw ev, hag ev a bys ragos, ha ty a vew. Mes mar ny wredh hy daskorr, gwra godhvos ty dhe verwel yn sur, ty ha myns eus dhis.’

8Ytho Abimelek a sevis myttin a-varr ha gelwel oll y wesyon ha derivas dhedha oll an taklow ma yn aga skovornow, ha'n wer a borthas own bras. 9Ena Abimelek a elwis Abraham ha leverel dhodho, ‘Pandr'a wruss'ta gul dhyn ni, ha fatell beghis vy er dha bynn, may hwruss'ta dri pegh meur warnav vy ha war ow gwlaskor? Ty re wrug dhymmo vy taklow na dalvia bos gwrys.’ 10Hag yn-medh Abimelek dhe Abraham, ‘Pandr'a veu dha entent, ow kul yndellma?’ 11Hag yn-medh Abraham, ‘Rag my a brederis, Yn sur, nyns eus own Duw y'n tyller ma, hag i a'm ladh drefenn ow gwreg. 12Byttegyns, ow hwoer yw hi yn hwir; myrgh ow thas yw hi, mes nyns yw hi myrgh ow mamm, ha hi a dheuth ha bos gwreg dhymm. 13Ha pan wrug Duw dhymm gwandra dhiworth chi ow thas, my a leveris dhedhi, “Ottomma kuvder a wre'ta gul ragov. Pub le may teun dhodho, lavar ahanav, Ow broder yw ev.” ’ 14Hag Abimelek a gemmeras deves hag oghen ha kethwesyon ha maghtethyon ha'ga ri dhe Abraham, ha daskorr dhodho Sara y wreg. 15Hag yn-medh Abimelek, ‘Awotta, yma ow thir a-dheragos. Gwra triga le may fo plegadow dhis.’ 16Ha dhe Sara yn-medh ev, ‘Awotta, my re ros dhe'th vroder mil vath arghans. Hemm yw rag kudha an offens er dha bynn yn dewlagas peub eus genes; hag yn pup-tra ewnhes osta.’ 17Ytho Abraham a bysis war Dhuw ha Duw a sawyas Abimelek ha'y wreg ha'y vaghtethyon, hag i a dhineythis fleghes. 18Rag an Arloedh re wrussa degea oll an torrow yn chi Abimelek drefenn Sara, gwreg Abraham.

Currently Selected:

Jenesis 20: ABK

Highlight

Copy