MARKKC 2

Jisubv Intungko Sipaknc Tani:ko Csa:mokunam

(Met 9.1-8; Lu:k 5.17-26)

1Odokkc Bv Kapernaumdo:pc lo:nyi lowum lcdupc gvnamc, Bv okumdo dung cmna lubito. 2Odokkc bojcrungko tani:yc yadkumsukang, cdcmpila buluk lcganc dungko soyarci kangctomang, yabgo ru:yidosinci; odokkc agomdcm Bv bulum luyirra dungai. 3Odokkc bulu gva:to, Bvkkolo:pc tani: appi:konc intungko sipaknc tani:ko jonga:bomto. 4Odokkc bulu yadkumsunc tani:kvdv:dokki Bvk kcra:do:pc jonga:bomna:ma:layam, Bvk tayc:to mv:dumdcm adkurto; odokkc bulu arungko mokurnammc, bulu jo:nancdcm mclvgto okodo intungko sipaknc tani:dc kcdla dungaji. 5Odokkc Jisubv cdvlo buluk mc:jvgdcm ka:tonc, Bv intungko sipaknc tani:dcm luto, “Ngokkc Aowa, nok pa:pkvdv:dcm mc:yinsungapbitobong.”

6Cdcmpidodcm ainc agom luyirnc tani:ckkc odo tadla dungai, buluk asinkvdv:bo agom mc:yi:mc:sa:la, “Kapila sc amisc scmpc agomcm ludang? 7Cdc Ru:ncpvncmc aimang cmna lunamc! Ru:ncpvncbv:ma:mvlo sc:ko pa:bcm mc:yinsula:dang”?

8Odokkc oddung Jisubv, Bvk yalobo bulu ayv ayvc cdcmpc agom mc:yi:-mc:sa:namdcm tadla, bulum luto, “Kapila nolu noluk asinkvdv:do cdcmpc agomcm mc:dang? 9Okodc gerpoya:dang, ‘Nok pa:pkvdv:dcm mc:yinamsubitobong cmna,’ intungko sincdcm lupcyc:, cdcmanggom scmpc lupcyc, ‘Darobtoka, nok kcdnanc asubdcm la:sa:tok odokkc lambc gvtok cmna:yc?’ 10Cmpige:la tani:kc Awodokkc mo:pvso pa:pkvdv:dcm mc:yinsunanc kemotangc dung cmna kinycpc” cmna Bv intungko sipakncdcm luto 11“Ngo ludung nom, darobtoka, nok kcdla du:nanc asubdcm la:sa:toka odokkc okumpc gvkangkuk.”

12Odokkc bv durobkang, odokkc lomdanna kcdnanc asubdcm la:sa:to odokkc buluk appvngkc kangku:do gvlenna gvkangku; bulu appv:dc kcngcrcjala dungkang odokkc Ru:ncpvncmc airu:nc cmto, scmpc lula, “Ngolu cdvlosin okkomsin cdcmpinncm kangkvmang!”

Jisubv Lebi:m Gognam

(Met 9.9-13; Lu:k 5.27-32)

13Bv lckoda siycng asi ru:yido:pc gvlento odokkc yadkumsunc tani: kvdv:dc bvk dungkodo appv:dc dungkang, odokkc Bv bulum luyirto. 14Odokkc Bv gvtvla du:namc, Alpaeukc awo Lebi:mc ko:rbiko opisdo tedla du:dopc ka:begto, odokkc Bv bvm luto, “Ngok lcdulo gvmvntoka.” Odokkc bv darobto odokkc bvk lcdulo gvmvnkang.

15Odokkc bvk okumdo dopctv:pc cmna tcbuldo teda:toncm bojcrungko migomcm dorpcnam murkong urkumsunnc odokkc papi:kvdv:dc Jisukc odokkc Bvk agom tadla gvmvnnc tani:kvdv:dok lcdulo teda:mvnkang; kapila:nc Bvk lcdulo gvmvnnc kvdv:dc bojcrungkai. 16Odokkc Parisi:kvdv:dok ainc agom luyirnckvdv:dc, bulu ka:namc Bv:jc papi:kvdv:dok odokkc migomcm dorpcnam murkong urkumsunc kvdv:dok lcdulo domvndung, Bvk agom tadla gvmvnnc tani:kvdv:dcm luto, “Bv kapila migomcm dorpcnam murkong urkumsunc kvdv:doklang papi:kvdv:dok lcdulo domvndang?”

17Odokkc cdvlo Jisubv cdcm tadbegtonc, Bv bulum luto, “Sc:kobulu csa:la du:nc bulum kinam ka:namcm mapcnam kamang, cmpige:la sc:kobulu kidu:nc buluk lcgangcmvn mapcnammcn; Ngo dormo kancdcm gokkapc gvmang, cmpige:la papi:kvdv:dcmmvn.”

Doma:pc Menna Du:namdcm Tawunam

(Met 9.14-17; Lu:k 5.33-39)

18Cdcmpidodcm Jo:nkc agom tadjvgla gvmvnnc tani:kvdv:dc:lang Parisi:kvdv:dc gva:to odokkc Bvm luto, “Kapila Jo:nkc agom tadjvgla gvmvnnc tani:kvdv:dc odokkc Parisi:kvdv:dc apin doma:pc yoddang, cmpige:la nok agom tadjvgla gvmvnnc tani:kvdv:dc yodma:n?” 19Odo Jisubv bulum luto, Magbodc du:dodcm yamgurkvdv:dc doma:pc yodla:donci? Magbodcm bulu du:botvdo appv:do bulu doma:pc yodla:mang. 20Longckoncm pvnga:ycpc, cdvlo magbodcm buluk-kolokkcm gvpakboyckuji, odokkc odo bulu odo longcdo doma:pc yodyc.

21Sc:kosin anu gainkokki aku gainno potakla attarcm ommang; bv cdcmpc imvlo cdc potakdc odokkc bedpakyc, akudc anudokkc, odokkc cdcmyam aima:ya:pc bedyc. 22Odokkc sc:kosin anu angur alangcm aku lc:nanclo lc:mang; bv cdcmpc lc:mvlo, angur ala:dc ki:lv:dcm bukporbomyc; odokkc angur ala:dc aima:pc bidse-bidye ycpc, odokkc ki:lv:dc:sin cdcmv:pc iyc; cmpidag anu ala:dcm anupc monam lc:nanclo lc:pcnammc.

Yodla Du:nam Longcdok Agom Tawunam

(Met 12.1-8; Lu:k 6.1-5)

23Ager germa:pc yodla du:nam longckolo Bv arvg arangkolok gvdungai; odokkc bulu lambc gvla du:dodcm Bvk agom tadjvgla gvmvnnc tani:kvdv:dc a:yckvdv:dok pvrrobbomkang. 24Odokkc Parisi:kvdv:dc Bvm luto, “Ka:tok, kapila no yoddo longgcm okodcm lujvglurodok lukampc ipa:ma:nc cdcm idang?”

25Bv bulum luto, “Nolu cdvlosinyc pokvma:n Dawidbv okkom ikaji, cdvlo dolv:daganc odokkc kcnongka:nc, bv odokkc sc:kobulu bvk lcdulo dungaji: 26kapc Abiatarbv dormo ager gernclok bottarya:ncdc, odokkc kangornam pita:dcm bv Ru:ncpvnckc okumdo gvangkanc; cdvlo dotonc, okodc sckkcpcsin lujvgluro adkampc imangaji dormo ager gernclok donamma:mvlo, odokkc bvk lcdulok odo du:mvnnc kvdv:dcmsin bitonc?” 27Odokkc Bv bulum luto, “yodla du:nam longcdcm tani:lcgangc ru:tungai; 28cdcmpidag tani:kc Awodc Yodnam longcdoksin ru:tumc.”

Currently Selected:

MARKKC 2: MISIBSI

Highlight

Copy