LU:KKC 6

Yodla Du:nam Longcdok Agom Tawunam

(Met 12.1-8; Mark 2.23-28)

1Yodla du:nam longcdo, arvgara:dok Bv gvddom, Bvk agom tadjvgla gvmvnnc tani:kvdv:dc a:yc ckkcm pvrge:la doto, buluk alakkvdv:dokki nodpu: nodpungge:la. Cmpige:la Parisi:kvd:dok akke luto. 2Kapila nolu yodnam longcdo lujvg lurodok lukampc ipcma:namdcm idu:n?

3Odo Jisubv lubito, “Nolu pokvma:nci Dawidbv kcno:la okkom ikaji, bv:lang odokkc bvk lcdulo sc:kobulu du:mvndungaji: 4Kapc Bv Ru:ncpvnckc okumdo gva:toji, odokkc lcngkansunamdok pita:dcm dotonc, okodcm lujvg lurodok lukamdcmpc dormo ager gerncdc:ma:mvlo sc:kosin dopc ma:nama:ji, odokkc bvk lcdulo du:mvnnckvdv:dcmsin bisutonc?” 5Odokkc Bv bulum luto, “Tani:kc Awodc yodla du:nam longcdok ru:tumc.”

Alagc Lagsannc Tani:dc

(Met 12.9-14; Mark 3.1-6)

6Yodla du:nam longkonkoncm, Bv kumko okumdo gva:la luitdowcm, lagbvg alagdc laksannc tani:ako odo dungai. 7Odokkc ainc agom luyirnckvdv:dc:lang Parisi:kvdv:dc Bvm kanggabbomla dungai, Bv yodla du:do longgcm kinamcm csa:moyckuji csa:mokuma:ycji cmna, odomvlo Bvm atv lumurko lubegpa:ycji cmna. 8Cmpige:la Bv buluk mc:namkvdv:dcm kinto, odokkc Bv laksannc tani:dcm luto, “so:p gva:la dagrobtok sido.” Odo bv dagrobkang odokkc dagkkang. 9Odokkc Jisubv bulum luto, “Ngo nolum tawudung, yodla du:nam longcdo lujvg lurodok lukampc ainc agercmyc aima:nc agerko gerpa:donc, turnamko moturpcnamcyc cdcma:mvlo cdcm mokepcnamcyc?” 10Odokkc Bv buluk appv:dcm kanggo:to, odokkc bvm luto, “Nok alagdcm laglentok,” odokkc bv cdcmpc laglento, odo bvk alagdcm aimotoku. 11Cmpige:la bulu aglvngc okopci ikang odokkc bulu Jisumc o:ko ila:ycji cmna bulu bulu agom luposuto.

Jisubv Vyvngkolang Anyi Agom Tadjvgla Gvmvnnc Tani:kvdv:dcm Balennam

(Met 10.1-4; Mark 3.13-19)

12Odo ayirdo Bv kumpc cmna adi:pc gvkang; odokkc Ru:ncpvncmc yumc yumbu:do kumto. 13Odokkc longckunamc, Bvk agom tadjvgla gvmvnnc tani:kvdv:dcm Bv gokkumsuto, odokkc bulukkolok vyingkolang anyiko balento, sc:kobulum Bv mclvgnam lutad lugo:nc cmna amin minnvgtoji; 14Simon, sc:kom Bv Pitor cmna mintoji, odokkc Andriwubv bvk bvrodc, odokkc Jakoblang Jo:nbv, odokkc Pilipbv, Bartolmiwubv, 15Odokkc Metiubv, Tomasbv, odokkc Jakobbv Alphaeuskc awodc, odokkc Simonbv sc:kom mc:dap-darabnc cmna mintungaji, odokkc Juda:b Jakobkc awodc, 16Odokkc Iskariot Juda:bv, sc:ko mcjvgcm mirupc imotoji.

Jisubv Poyirto odokkc Csa:motoku

(Met 4.23-25)

17Odokkc Bv buluk lcdulo gvige:kula omannc among mo:di:kolo dagkang, Bvk bottcru:nc mclvgla ager germonam tani:kvdv:dok lckopc odokkc Judia odokkc Jerusalem odokkc siycng asi Ti:rclang Sidon ru:yikvd:dokkc bottaru:pc yadkumsunc tani:yc Bvk agom tadkapc gvto odokkc buluk kinamkvdv:dokkc csangamokakupc gvto; 18odokkc cdc aima:nc uiyc pa:la kinckvdv:dcm aiyammotoku. 19Odokkc yadkumsunc tani:appv:dc Bvm gakkvpc cmna mato, kapila:nc ilang-gvlangc Bvkkolokkc lenkang odokkc bulum aiyammotoku.

Mc:ponammclang Mc:dvrmc:songc

(Met 5.1-12)

20Odokkc Bvk agom tadjvgla gvmvnnc tani:kvdv:dcm Bv bcrsa:la kangge:la luto:

“Opankvdv:dc gernc-pu:nc, kapila:nc Ru:ncpvnckc

migom doko mo:pvdc nolu:kkc.

21“Su:pak kcno:nckvdv:dc gernc-pu:nc,

kapila:nc nolu dotv:tv:tv:ycku.

Su:pak kabnckvdv:dc gernc-pu:nc,

kapila:nc nolu yvrycku.

22“Tani:kvdv:dc cdvlo nolum tayumycji nolu gernc-pu:nc, odokkc bulu cdvlo nolum angupc du:moycji odokkc nolum aima:pc luycji, odokkc nolum amincm aisi:ma:nc cmna minycji, Tani:kc Awodok lcgangc! 23Odo longcdo yvrra mc:pola so:langka, odokkc mc:pola sumgo:langka, kapila:nc ka:toka, nok amanc taycngamo:to bojcru:ycku; kapila:nc buluk abukvdv:dc cdcmv:pc agom lungornckvdv:dcm ika.

24“Cmpige:la sc:kobulu mircmdu:nc nolu:kkcpc mc:dvrpcnamc,

kapila:nc noluk mc:pom nolu pa:toibong.

25“Su:pak pv:nckvdv:dc mc:dvrpcnamc nolu,

kapila:nc nolu kcno:ycku.

“Su:pakjc nolu yvrra du:nc nolu mc:dvrpcnamc

kapila:nc nolu mc:dvryc odokkc kappa:ycku.

26“Nolu mc:dvrpcnamc, appvng tani:kvdv:dc cdvlo nolum aidag cmna ludagji, kapila:nc cdcmv:pc buluk abukvdv:dc lume:pc lungor lunc tani:kvdv:dcm luka.

Mirukvdv:dcm Aipc Mc:nam

(Met 5.38-48; 7.12)

27“Cmpige:la ngo tadla du:nckvdv:scm ludung, noluk mirukvdv:dcm Aipc mc:langka, sc:kobulu nolum tayumdagnc bulum aipc ila:sa:langka, sc:kobulu nolum pelvgdagnc bulum aipc mc:lvglangka, 28sc:kobulu nolum aisi:ma:nc cmna ludagnc buluk lcgang kumnang. 29Nom migmo aborkolok piycmvlo akon migmodcmsin pidopc toka:bilang; odokkc nok ku:t galugdcm la:pakbiycmvlo nok galugdcmsin la:yoka cmna lutumyoka. 30Nokkolok konc appv:dcm bilangka; odokkc nokkolok ainc attarko la:ncdokkcm bvkkolok cdcmbulum lckoda mayokuka. 31Odokkc nom kapc tani:kvdv:dc imvlo aipc mc:donc, bulum cdcmv:pc ilangka.

32“Nolum aipc mc:nong kvdv:dcm nolu aipc mc:mvlo, nolu okodcm pa:ycn? Kapila:nc papi:kdv:dci bulum aipc mc:nckvdv:dcm aipc mc:dag. 33Odokkc sc:kobulu nolum ainc agerko gerdagnc bulumong aincko imvlo, nolu okodcm pa:ycn? Kapila:nc papi:kvdv:dc cdcmv:pc idag. 34Odokkc sc:kobulukkolok nolu pa:pc cmna mc:donc bulumong murkong bipongcm bimvlo, nolu:kkc okodc dungka:n? Papi:kvdv:dc:sin papi:kvdv:dcm murkong bipongcm bidag, bojcrungko pa:latkupc cmna. 35Cmpige:la noluk mirukvdv:dcm aipc mc:langka, odokkc ainc agercm gerrangka, odokkc murkongcm bipo:langka, okkomsin pa:latkupc cmna mc:ma:pc; odokkc noluk amanc bojcru:yc, odokkc Appvng Udbo:ya:pc Du:ncdok omma:pc iyc; kapila:nc ainc agerko ibincdcm mcngkinma:ncdcmlang avwongkcpc mc:suncdcm ayangabodag. 36Ayangabopc Mc:ncpc Ilang, Noluk Abub Ayangabokammcmpc.

Ammem Kcba:ba:nam

(Met 7.1-5)

37“Kcbangcm momvnsuyoka, nolumsin kcbangcm moma:ycpc: aimang cmna lugc:yoka, nolumsin aimang cmna luma:ycpc; mc:yinsulangka, nolumsin mc:yinsuycpc; bilangka, odo cdcmv:pc nolumsin biycpc; 38aiyo:pc kvla, nv:sv:la sckku:la lckopc, bi:pokdopc, noluk kcra:do yarrvgbiycpc. Kapila:nc noluk kvnamkvdv:dcmpc nolu kvla binamcm pa:latyckupc.”

39Bvm kvkanbila kvnam do:yvngkosin kvbito: “Miglunc tani: akonc miglunc tani:koncm gvbola:dolang? Bulu anyipakdc jikongkolo gvboloksuma:yclang? 40Agom tadjvgla gvmvnnc tani:akonc bvk luyirncdcm bottcya:ncmang, ckvdaggom aiyo:pc luyirambo:mvlo appv:dc bvk luyirncdcmpc idag. 41Kapila nok bvrodok amigdok takotdcm ka:don, cmpige:la nok avkc amigdok sv:po:dcm ka:suma:nc? 42Cdcmpcmanggom nok bvrodcm kapc lula:don, ‘Bvrra, nok amigdok du:nc takotdcm ngo la:pak bisoi,’ nok amigdok sv:po:dcm avyc ka:suma:pc ige:la? C:i kcvgpc agom lunckvdvnga, noluk avkc amigdok sv:po:dcm la:paksupo:tok, odokkc odo nolu aiyo:pc nok bvrodok amigdo du:nc takotdcm ka:begycpc.

Vsvng Amv:dc:lang odok A:ycdc

(Met 7.16-20; 12.33-35)

43“Kapila:nc ainc vsvng amvng akosin aima:nc a:ycm e:mang, cdcmanggom lckoda aima:nc vsvngamvngc ainc a:ycm e:dolang; 44Kapila:nc vsvng appv:dcm odok a:yckvdv:dokki kindag. Kapcnc ta:ngkanc vsv:lokkcm tajvga:ycm pvrkummang, cdcmpcmanggom angurkvdv:dcm agrubnc ta:ngkanc vsv:lokkcm pvrmang. 45Ainc tani:dc Bvk ainc kumsungcmpinc asindokkcm ainc attarcm la:lendag, odokkc aima:nc tani:dc bvk aima:nc kumsu:dokkcm aima:ncm la:lendag; kapila:nc asinbo abarungko du:la:mvn bvk nappa:dc agom ludang.

Okum Monc Tani: Anyidc

(Met 7.24-27)

46“Kapila nolu ngom ‘Ru:tuma, Ru:tuma,’ cmna gogdon, odokkc ngo okodcm lulvgdoji cdcm ima:pc? 47Sc:kobvi ngokkolo:pc gva:donc odokkc ngok agomkvdv:dcm taddonc odokkc cdcmbulum idonc, kapc idagnc cdcm lcngkanbiyc: 48bv okum monc tani:koncmpc idag, sc:ko o:rv:pc aru:dcm ngundagji, odokkc moko amo:dcm vlv:tayclo modagnc; odokkc cdvlo pu:mi: assc gvla pu:sangka:ji, asidc bidla cdc okumdcm nvnga:to, odokkc cdcm bidkukla:tomang, kapila:nc cdcm kvnggv:pc motungai. 49Cmpige:la sc:kobv cdcmbulum tadge:la lukamdcmpc ima:ycji cdc mogcngko kama:pc okum monc tani:koncmpc idag; okodcm csarc nvnga:tonc, odokkc vgcmpc cdc dvrtapkang, odokkc cdc okumdc dvrmvg dvrsvgdankang.”

Currently Selected:

LU:KKC 6: MISIBSI

Highlight

Copy