LU:KKC 11

Jisukc Kumnamcm Poyirnam

(Met 6.9-13; 7.7-11)

1Bv mo:takkolo kumna dungai, odokkc cdvlo Bv kumaptonc, Bvk agom tadjvgla gvmvnnc tani:kvdv:dok akonc Bvm tawuto, “Ru:tuma, ngolum kumnamcm kumyirteipcn, Jo:nbv bvk agom tadjvgla gvmvnnc tani:kvdv:dcm luyirnamdcmpc.” 2Odo Bv bulum luto, “Cdvlo nolu kumdonc, scmpc kumlang:

‘Abba nok amindc kumpcnammc ika:langka.

Nok migom doko mo:pvd pvngangka:langka.

3Ngoluk lo:dvscm donam dogangcm lodvscm bi:ka;

4Odokkc ngoluk pa:pkvdv:dcm mc:yinsuteika,

kapila:nc ngolusin ngolukkolok dogcsunam mc:yinsudo;

Odokkc ngolum ankang ka:namno:pc gvboyoka.’ ”

5Odokkc Bv bulum luto, “Nolukkolok sc:kokc ajonc du:nc yumc yorang kvdvsudodcm gvla bvm ludonc, ‘Ajona, ngom pitang borumko bipoipcn; 6kapila:nc ngok ajonkonc gvgo:la gva:dung, odokkc bvm bipc ngokkc okkosin katomang;’ 7odokkc bv ara:bokkc luycnci,’ ngom gogkvngogmvnyok; su:pak yabgom mokapsutakbong, odokkc ngok ommangkvdv:dc ngok lcduso asublo yubamdu:bong; ngo darobla:mang odokkc nom okkomsin bila:mang.’ 8Ngo nolum lubidung, bv darobla okkomsin bimanggom bvk mcmang ke:ke:pc kotvnamkokki bv darobyc odokkc okkomci bv kodagji bv biyc.

9“Odokkc ngo nolum lubidung, kotoka, cdcm nolum biyc; matoka, odokkc nolu pa:yc; ranku:toka, odokkc cdcm nolum moge:biycpc. 10Kapila:nc appvngci sc:kobulu kodagnc pa:dag, odokkc sc:kobvi madagnc pa:dag, odokkc ranku:ncdcm moge:biyc. 11Noluk ara:lo oko abudc, bvk awodc ongo apirko koycmvlo, ongoko bima:pc tabvadorko bidonc; 12Cdcmpcmanggom bv apvko koycmvlo, taketabvko bidonc? 13Nolu cdcmpcmvlo, sc:kobulu aima:nc, noluk ommangkvdv:dcm kapc ainc amancm bipcnammcji kindo, cdcm cddvko bojcya: pc taycng among Abubv Angunnc Yalodcm sc:ko koycnc bvm biycnc!”

Jisubv:lang Beeljebulbv

(Met 12.22-30; Mark 3.20-27)

14Cdcmpidodcm Bv agom lula:ma:nc uiko mcnpakla dungai; uidc gvlenpaknamc, agom lula:ma:nc tani:dc lukangku, odokkc tanikvdv:dc kangaksukang. 15Cmpige:la buluk akedc lukang, “Bv uikvdv:dok migom awo Beeljebuldokki uikvdv:dcm mcnpakdag.”

16Akedc Bvm ankang ka:pc cmna, taycngamo:tok kanggodko ka:pc cmna mato. 17Cmpige:la Bv, buluk mc:namkvdv:dcm kinna:yam, bulum luto, “Migom doko mo:pv appvngc avyc avdok lukampc tadma:pc angu angumvlo cmmumpc usanpakdag, odokkc angusunc okum crangc open orendag. 18Odokkc Satancgom avyc avycm angusumvlo, kapc bvk migom doko mo:pvdc du:ycn? Kapila:nc nolu ludung ngo uiycm Beeljebuldokki mcnpakdung cmna. 19Odokkc ngo Beeljebulkokki uiycm mcnpakdomvlo, sc:kokokki noluk ommangkvdv:dc mcnpakdang? Cdcmpidag bulu noluk kcbang ba:nckvdv:dc. 20Ckvdaggom cdc ngo:jc uimcnpaknancdc Ru:ncpvnckolokkcycmvlo, odomvlo Ru:ncpvnckc migom doko mo:pvdc pvnga:du:bong.

21“Kvnggv:pc tornc tani:konc, mi mag monancm aiyo:pc gcru:suge:la, bvk avkc lottadcm ka:sv:ycnc, bvk attarkvdv:dc aiyo:la du:do; 22Cmpige:la bvm torya:nckonc bvm moa:ycnc odokkc bvm mopvycnc, bv bvk mimag monancm la:pagamsudag okodcm bv mc:tinsudagaji, odokkc bvk rodkutla bomkunam attarkvdv:dcm orpansula la:dag. 23Sc:kobv ngok lcdulo du:mvnma:nc bv ngok tu:latpc ager innc; odokkc sc:kobv ngoluk lcdulo tvkumsuma:nc bv pidpakdag.

Aima:nc Yalodok Gvlatkunam

(Met 12.43-45)

24“Cdvlo cdc aima:nc uidc tani: akolokkc gvpakdagnc, bv dungko mala asi kamangko mo:taklo:pc gvgo:dag; odokkc sc:komsin pa:ma:la bv ludag, ‘Ngok okumpc ngo gvlatycku okolokkc ngo gvlenkaji.’ 25Odokkc aiyo:pc tvsv:tvmola lc:dopc gvpa:sudakku. 26Odo bvm aiya:ma:nc kvnvdkoda uiycm bv gvla gva:bodakku, odokkc bulu odo gva:la odo du:dag; odokkc cdc tani:dok dungapdodok du:namdc po:pckcdcmyam aiya:mang.”

Aro Mc:poponam

27Bv cdcm lunamc, yadkumsunc tani:kcrc:dok nc:ngakonc Bvm luto, “Nom amvrro du:bomnanc aki:dc, odokkc nok tv:nam anyukdc gernc-pu:nc!” 28Cmpige:la Bv luto, “Ckvdaggom sc:kobulu Ru:ncpvnckc agomcm taddagnc odokkc cdcmbulum lukamdcmpci idagnc bulumvn gernc-pu:ncn.”

Mcngapla:ma:nam Kanggodko Lcngkandopc Lujcmna Lunam

(Met 12.38-42)

29Yadkumsunc tani:kvdv:dc bojcnammc Bv lurobbomkang, “Sc opvnsc aisi:ma:nc opvnko; sc kanggodko madag, cmpige:la Jonangkc kanggodcmyam oko kanggodcmsin lcngkanma:yc. 30Kapila:nc Ninewedokkcpc Jona:bv kapc kanggodpc ika:nc, cdcmv:pc tani:kc Awodc:sin sc opvnsokkcpc iyc. 31Kcbang ba:dodcm Pcya:bok migom nc:dc dagrobycpc sc opvnsok tani:kvdv:dok lcdulo odokkc bulum aima:nc cmna luyc; kapila:nc mo:pv du:tcrdokkc Solomonkc kinncpa:nc do:yvngcm tadkapc gvka, odokkc ka:toka, Solomonmcyam bottcya:ncko sc dung. 32Ninewe:dok tani:kvdv:dc kcba:ba:dodcm sc appv:sokki dagrobyc odokkc cdcm aima:nc cmna luyc; kapila:nc bulu Jona:kc lutad luyirdodcm asincm mc:dvrra mc:latsutoku, odokkc ka:toka, Jona:mc bottcya:ncko sc dung.

Amvrdok Pvangc

(Met 5.15; 6.22-23)

33“Sc:kosin saki:ko romnotge:la arung ara:lo lc:mang cdcmpcmanggom agrubnc vsvng kcvglo lc:mang cmpige:la tvsa:la lc:nanckolo:mvn lc:dang, odomvlo gva:nckvdv:dc pva:dcm ka:begycpc cmna. 34Nok amikdc nok amvrdok saki:yc; nok amikdc aila du:mvlo, nok amvrdc pvangc dorbu:dag; cmpige:la cdc aima:dodcm nok amvrdc kcmmojv:jv:yc. 35Cdcmpidag ansulangka ckvma:mvlo nokkolo du:nc pva:dc kcmoyc. 36Cdcmpimvlo nok amvrappv:dc pvang bi:dagmvlo, inyopkosin kcmmokama:mvlo, cdc appv:dci unjeryc, mcru akonc nolum pvangcm pukannammcmpc.”

Jisubv Parisi:kvdv:dcmlang Lujvg-luro Poyirnckvdv:dcm Lugc:la Aima:pc Lunam

(Met 23.1-36; Mark 12.38-40)

37Bv agom lula du:dodcm, Parisi: akonc bvk lcdulo domvndopc Bvm gogsuto, cdcmpila Bv ara:pc gva:to odokkc doko tcbuldo teda:to. 38Parisi:dc ka:la kangaksukang Bv:jc doa:ma:dapc lasuk suma:namdcm ka:la. 39Odokkc Ru:tumbv bvm luto, “Su:pak c:i Parisi:kvdvnga nolu bati:loklang arcmlok ru:yidcm vrpu:do, cmpige:la ara:bo nolu luyir lukanclang aima:nc asinangc. 40Empcsin monsi-monba:nc kvdvnga! Ru:yidcm sc:ko rungkaji ara:bcmsin ru:ma:lang? 41Cmpige:la ara:bok atvkvdv:dok lcgangc kogo:ncm binamcm bido; odokkc ka:toka appvng atvdci noluk lcgangc narc:dag.

42“Ckvdaggom Parisi:kvdvnga nolu:kkcpc Pcsola mc:dvrla pcsopcnamc! Kapila:nc nolu poduna:lokkcmlang marsang lokkcmci gagyvngdok agagko bido, odokkc aropc inam gvnamcmnang Ru:ncpvnckc ayangcm cmmumcmpc mc:dag; cdcmbulum nolu ipcnammai, akekvdv:dcm cmmumpc mc:ma:pc. 43Parisi:kvdvnga nolu mc:dvrpcnamc! Kapila:nc nolu kumko okumkvdv:dok aiyangarnc tedgcng kvdv:dcm aipc mc:dag odokkc attar kokokvdv:do kumrvgsunamcm. 44Yowc: Yowa! Nolu mc:dvrpcnamc, kapila:nc nolu ka:begma:nam aggompc idag, odokkc tani:kvdv:dc cdcm kinma:pc odok tayc:do lambcm gvdag.”

45Lujvgluro kinna lunc akonc Bvm lubito, “Luyirna, cdcmpc ludodcm no ngolumsin ge:la ludung.”

46Odo Bv luto, “yowc: yowa lujvg luro kinna lunckvdvng nolusin mc:dvrpcnamc! Kapila:nc nolu tani:kvdv:dcm jo:la:ma:nam jo:namcm jonggc:lvgdag, odokkc nolu avkvdv:dc jo:namkvdv:dcm lakke: asongkvdv:dokkisinci darsangkvmang. 47Yowc: yowa nolu mc:dvrpcnamc! Kapila:nc nolu lungor lunckvdv:dok aggom gcsa:do sc:kobulum noluk abukvdv:dc mokekaji. 48Cdcmpidag noluk abukvdv:dok inam agerkvdv:dok ka:nc odokkc agom tolvgnc; kapila:nc bulu bulum moketo, odokkc nolu buluk agokvdv:dcm modag. 49Cmdcmpidag Ru:ncpvnckc Kinnc agomdc:sin ludag, ‘Ngo bulukkolo:pc lungor lunncmlang Ru:ncpvnckc ager gerdopc mclvgnam tani:kvdv:dcm mclvgyc, odokbuluk akedcm bulu mokeyc odokkc irvsinyom iyc.’ 50Odomvlojen lungor lunckvdv:dok i:yc mo:pvsok lensa:dodokkc, su:pakkc appv:so:pci lagiycpc, 51Abelkc i:dokkc Jakariangkc i:do:pc, sc:kobulu kumko amo:doklang angunnc mo:takdok pongkokdo singapka:ji. C:, ngo lubidung nolum, cdc sc opvnsokkcpc lagiyc.

52“Yowc: yowa nolu lujvgluro kinna lunckvdvnga mc:dvrpcnamc! Kapila:nc nolu kinnamlok sabi:dcm la:pakto; nolu av avkvdv:dc gva:mang cmpige:la cdc sc:kobulu gva:dagji bulum motumdag.”

53Odokkc gvpaknammc ainc agom luyirnckvdv:dc:lang Parisi: kvdv:dc, Bvm aglvng sa:la bojcrungko agom lumopcmna, 54Bvm lume:lula Bvm toya:la, Bv o:kailumvlo gagpc cmna, Bvm nv:rumbomkang.

Currently Selected:

LU:KKC 11: MISIBSI

Highlight

Copy