JO:N 18

Jisumc Ycnggabnam

(Met 26.47-56; Mark 14.43-50; Lu:k 22.47-53)

1Cdvlo Jisubv cdc agomkvdv:dcm lutoji, Bvk agom tadjvgnc tani: kvdv:dokki kidron adi: pongkogkc modi:dcm gvko:la gvkang, okolo bari:ko dungaji, okolo Bv:la Bvk agom tadjvgnckvdv:dc gva:toji. 2Cdcmpidodcm Juda:bv, sc:kobv Bvm miru alaglo tolvgtonc, bv:sin mo:takdcm kindagai; kapila:nc Jisubv mcna: mcna:pc odo Bvk agom tadjvgla gvmvnnc tani:kvdv:dcm rvgsudungai. 3Cdcmpila Juda:bv, mimag monc tani: kcrcngko mabomna gvbola odokkc migom ager gernc tani:ckkc dormo ager gerncdok bottarya:nc kvdv:dokkcm odokkc Parisi:kvdv:dokkcm gvbola, odopc mcrukokki odokkc to:skokki odokkc pamvnsunanc gvdv:yoktungkokki gvto. 4Odo Jisubv, Bvm motappc cmnangong idung cmna kinna, gvgcla gva:to odokkc luto bulum, “Sc:kom nolu madu:n?” Bulu bvm lubito,

5“Najaretdok Jisumc,” Jisubv bulum lubito, “Ngo:na Bv:nc.” Juda:bv, sc:ko Bvm miru alaglo tolvgtonc, Bvk lcdulo dagmvnna dungai. 6“Ngo:na Bv:nc” cmna cdvlo Bv lubisutonc, bulu ngedlatsukang odokkc amo:bo kcdtabamkang. 7Lckoda Bv bulum tawuto, “Sc:kom nolu madu:n?” Odokkc bulu luto, “Najaretolok Jisumc.”

8Jisubv lubito, “Ngo nolum lubitobong jc ngo:na Bv:nc: cdcmpidag, nolu ngom madu:mvlo, sc amikvdv:scm gvmotokuka.” 9Sc Bvk lunam agomkvdv:dc lukamdcmpc ipcnammai, “Sc:kobulum no ngom bitonc ngo akosin yogmotomang.”

10Odo Simon Pitorbv, madsvg asongko du:namc, cdcm sadlento odokkc dormo ager gerncdok bottarya:ncdok pagbodcm bvk lagbvkkc yeru:dcm papakto. Pagbodok amincm Malkus cmtungai. 11Jisubv Pitormc luto, “Nok matsvgdcm odok payugdo lc:tokuk; ngo bati:dokkcm tv:ma:yclang okodcm Abudc ngom bitu:ji?”

Jisubv Anna:kc Kcra:do

12Cdcmpila mimag monc tani: kcrc:dc odokkc buluk gvgur boncdc odokkc Jiwukvdv:dok migom ager gernckvdv:dc Jisumc sogabto odokkc Bvm rvbvki ycnggabto. 13Bvm bulu gvpo:danna Anna:kolo:pc gva:bokang; sc:kobv odo dv:tagdo dormo ager gernckvdv:dok bottarya:na:ji, kapila:nc bv Kaiapangkc atoai. 14Cdc Kaiapa:bvai sc:kobv Jiwukvdv:dcm luyirkaji jc tani:kvdv:dok lcgangc tani: akonc sipcnammc.

Pitorbv Jisumc Lupaksunam

15Simon Pitorbv Jisukc lcdu lcdulo gvmvnkang, odokkc cdcmv:pc agom tadjvgla gmvnnc kvdv:dok akosin gvmvnto. Cdc agom tadjvgla gvmvnncdc dormo ager gerncdok bottcncdcm kinna:yam, bv dormo ager gerncdok bottcncdok kcbang moko lottado:pc Jisukc lcdulo gva:to. 16Pitorbv cmpige:la moro:do yabgodo dagla du:pakkang. Cdcmpila cdc akon agom tadjvgla gvmvnnc tani:dc, sc:kom dormo ager gerncdc kindaganc, mo:ro:pc gvlenkang odokkc ager gerya:nc ko:nc:dcm luto sc:ko yabgodcm mokapla lc:toji, odokkc Pitormc ara:pc goga:bomtoku. 17Cdc ager gerya:nc ko:ncdc sc:kobv yabgodcm mokapya:la dunga:nc Pitormc luto, “No:sin sc tani:sok agom tadjvgla gvmvnnc akoncma:lang?” Bv luto, “ngo:mang.”

18Cdcmpinamc ager gerya:nc tani:kvdv:dc:lang migom ager gernckvdv:dc mere:kokki vmvko parto, kapila:nc odo ansv:dagai, odokkc bulu dagla amsula dungai; Pitorbv:sin buluk lcdulo dunggai, avyc dagla amsula.

Dormo Ager Gernclok Bottarya:ncdc Jisumc Agom Tawunam

(Met 26.59-66; Mark 14.55-64; Lu:k 22.66-71)

19Dormo ager gernclok bottancdc odo Jisumc Bvk agom tadjvgla gvmvnnc tani:kvdv:dcmlang Bvk luyir agom kvdv:dok agomcm tawunam agomki tawuto. 20Jisubv bvm lubito, “Ngo rcngamscm ka:de:pc lubitobong; ngo lo:dcm kumko okumkvdv:do odokkc Ru:ncpvncmc kumko okumkvdv:do luyirto, okolo Jiwuappvngc gvkumsudagji; ngo okkomsin lc:sula lutomang. 21Kapila ngom tawudang? Sc:kobulu ngom tattonc ngo bulum lutoji, bulum tawutoka; bulu kindag ngo okkom lukaji.” 22Bv cdvlo cdcmpc lutonc, migom ager gernc akonc kcra:do dagla du:nckonc Jisumc bvk alagdokki, scmpc lula: lula pito, “Cdcmpci no dormo ager gernclok bottarya:ncm lubidon?”

23Jisubv bvm lubito, “Ngo lumurko lutomvlo, lumurdokkcpc lukancm lubido; cmpige:la ngo lugabko lutomvlo, no kapila ngom dcmdu:n?” 24Annasbv Bvm odokkc ycngge:la Kaiapangkolo:pc dormo ager gernclok bottarya:ncdo:pc mclvgto.

Pitorbv Jisumc Lckoda Lupaknam

(Met 26.71-75; Mark 14.69-72; Lu:k 22.58-62)

25Cdcmpidodcm Pitorbv avdc dagla dungge:la vmv amsula dungai. Bulu bvm luto, “No:sin Bvk agom tadjvgnc tani: akka:ma:lang?” Bv cdcm lupaksuto odokkc luto, “Ngo:mangai.” 26Dormo ager gernclok ager gerya:nc kvdv:dok akonc, cdc tani:dok opvnakonc sck yerungcm Pitorbv papakkanc, tawuto, “Nom ngo ba:ri:do Bvk lcdulo ka:mangalang?” 27Pitorbv lckoda cdcm lupaksuto; odokkc vgcmpc porogdc kokkang.

Jisumc Pilatkc Kcra:dopc Boma:nam

(Met 27.1-2,11-14; Mark 15.1-5; Lu:k 23.1-5)

28Odo bulu Jisumc Kaiapangkc okumdokkc kcbang mokodo:pc gva:boto. Odo rokomai. Bulu avkvdv:dci kcba:mokodo:pc gva:manggai, bulujen bulu avkvdv:dc narc:ma:pc ima:ycpc cmna, cmpige:la gvbo:la gvnamdok dopun-dojardcm dola:ycpc cmna. 29Cmpige:la Pilatbv bulukkolo:pc gvlento odokkc luto, “Oko lugcngcm nolu sc tani:scm lujcmna luge:la gva:botang?”

30Bulu bvm lubito, “Sc tani:sc aima:nc ager germa:nckka:mvlo, ngo Bvm togclvgma:ya:pc.” 31Pilatbv bulum luto, “Bvm nolu avyc gvbokangkuk odokkc nolu avyc lujvg lurokokki kcbangcm ba:ta:kuka.” Jiwukvdv:dc Bvm luto, “Tani: akoncm mokenamdc ngolukkcpc lujvgluro lukamdcmpc imang.” 32Cdc agom lukamdcmpc ipcnamla okodcm Jisubv lukaji kapinc sinamki sipcnammcji cdcm lukamdcmpc cmna ikang.

33Pilatbv kcbang mokodo gvangkang lckoda odokkc Jisumc goga:to, odokkc Bvm tawuto, “No:i Jiwukvdv:dok migomdc?” 34Jisubv lubito, “No cdcm avkc mcngkampci ludu:nc, cdcmanggom amme nom ngok agomcm lubikanci?”

35Pilatbv lubito, “Ngo Jiwuclang? Nok avkc opvnc odokkc dormo ager gernckvdv:dok bottarya:nc kvdv:dc nom ngokkolo togc:lvgtung; no okkom iton?”

36Jisubv lubito, “Ngok migom donamdc sc rcngamsokka:mvlo, ngok ager gerya:ncdc mimagcm moiya:pc, ngom Jiwukvdv:do togclvgma:dopc cmna; cmpige:la ngok migom donamdc mo:pvsokkcmang.” 37Pilatbv Bvm luto, “Cdcmpcmvlo no migomci?” Jisubv lubito, “No:na ludagnc ngo:jc migomkonc cmna. Kapila:nc scmpc ngom onamai, odokkc sok lcgangcna ngo rcngamso:pc gvdu:nc, okodok lcgngc lukanko lubikapc. Sc:kobvi arodokkcnc ngok gomugcm taddag.”

38Pilatbv Bvm luto, “Arodc okkon?”

Jisumc Mokedopc Lulvgnam

(Met 27.15-31; Mark 15.6-20; Lu:k 23.13-25)

Bv cdcm luge:la, bv Jiwukvdv:do:pc lckoda gvlenkang, odokkc bulum luto, “Ngo Bvkkolo oko imur-gvmurkosin pa:tomang. 39Cmpige:la nolukkc itcng-gvtcngko dung jc Gvbo:la gvnamdok dopun-dojar donam-tv:namdo ngo tani: ako mclennvgpa:doku; nolu Jiwukvdv:dok migomdcm ngom mclennvgmokupcyc?” 40Bulu lckoda, jc:sangkang, “Sc tani:scmmang, cmpige:la Barabba:mc!” Cmpige:la Barabbabv rodkutnckai.

Currently Selected:

JO:N 18: MISIBSI

Highlight

Copy