ZEKARIA 9
9
Namdâ gu Heramzatme peireige Samrambe
1Tingwang ne ka’nggibe sam
Hadrak ram peireige la lei,
zai Damaska gene kuâ gu lei.
Aram gu namdi ramme,
zai Israel zat pelane ’nsangdu Tingwang gu chang lei;
2chige bambe Hamath ze du zai Tira benai Sidon,
penai dage kaningchingbe,
tâtewchibe bam leusedu pelane ze Tingwang gu chang lei.
3Tira ne pe runne pe hangge kerie bieting gai lei,
zai gepût ne kedeinia gum ze,
zai gechâk ne keloa’ndi ge kerachut gum ze kebauchu gai lei.
4Kane ni, Tingwang ne pechu pe heurâ ramme ze ruirittua ’ndu de lei,
zai hedui ge keliam gai kam ’ndu de lei,
zai pechu ze du hemi ne rûbuak ’ndu lei.
5Ashkelon ne chize ngau lu ze hing du lei;
Gaza ne du hing du lei,
zai pe duângga-desang ze bam gu lei;
Ekron ze du pa ne kaheguîbe ze pe lung lum ra gadibe ziegene pe duângga-desang ze bam gu lei.
Heguang ze Gaza gene ’ngga gai du lei;
Ashkelon ze ziemmena lungtadibe bâm chang gai du lei;
6ziemmena rehane zat ramme ne Ashdod ge lung gu lei;
zai Philistiame ne penui ’nrîmyi bambe ze I ne tew helêuku gai gu lei.
7Penui ne hejai tewpat ze hemei teube ze I ne penui mui gene gepentua ’ndu,
zai penui ne teumakrabe hetak ramme set ze bambe gene I ne kuitua ’ndu lei;
penui ze du Tingwang hangge ring’nsakpatme chang ze bam gu lei;
Juda kiria zat gum ze penui chang gu,
zai Ekron ze Jebusme gum bam gu lei.
8Chidezai mi-mi ramme ne chumpat chumgutchi lak ra I ne a ki gene reîkua ’ndu lei;
kategame mi-mige ne du penui je naîdaichi ra mak lei,
chuna â I ne a mik sing ne ngau daseu.
Wangdairabe Ting gu Heguang
9Hei Zaion ’mpuimi gau,
ning suiyi-desang zu lau!
Hei Jerusalem ’mpuimi gau,
ning ran-gechi ’ngkiak chu lau!
Ni, ning gu heguang ning dage wang la de lei;
keduîbe benai kengambe ze â pa ze de lei,
kecheiluîtew zai hekunmerângne chingchua,
hekunpoine hekunmerângne ching gezeu.
10Ephraim dagene hekuntimriang ze I ne teitat ’ndu lei, zai Jerusalem gene herei ka’nggibe hekun ze teitat tu lei;
zai hereika’nggibe bai’mpi ze I ne tew’nsia ’ndu lei,
dezai pa ne heramzatme peireige desieyirabe hang die gai gu lei;
pe gu samrambe rezie ze sungkling gene sungkling riâ,
zai ’Nggeuki gene kedeirei pemik ’nsangne riâ chang ze pebâm leine ge bam kam gu lei.
Hera gu Ziemmename je Nguawanggaikadaibe
11Kane ning hangge â,
ning dage a gu samhatkaibe gu hejai ziegene ning gu kebangtîm’ndime je heduigabe mâ-kuiki gene ’mpat kai gu lei.
12Ningnui ’nseubâm ’mbe helatwang zu lau,
Hei heguîkualak ti ze bamme gau;
nemai ge I ne ningchu peibe gene dêt na pei gu lei, be
I ne rang’nchi gai lei.
13A gu bai’mpi je gum ze I ne Juda je ’nsung’mbungring gai ’nde lei;
zai Ephraim ze bai’mpitu hangge tew gai ’nde lei.
Hei Zaion gau,
ning na ’mpeumi ramme je I ne gechung gai gu de lei,
Hei Grees gau,
penui ne ningchu herei gu hiazutkie ne gechi ra hangge zeu.
14Chidezai Tingwang ne penui peireige liâ gu lei,
dezai pe gu bai’mpitu ze tingkepitplikkaibe gum gi-pliktat tu lei;
Tingwang Hera ne hegeîluîkie kuâ ’mmutpat kai gu lei,
zai tingpî ’mbia gu tingkai ka’nruibe gene pa zuapat ku lei.
15Tingwang baudime Rapeu ne penui je ’nggum gu lei,
zai penui ne bai’mpi teime ramme je tew’nsia ze chaîkau gai gu lei;
zai penui jai ne hezau chang ze penui sak ku lei,
zai mâkuak ge hedui kaipuigitkaibe riâ penui puiting bam gu lei,
herâtewbe kaira pemik-mik ge chimbiak bambe gum zeu.
16Chipau mai ge Tingwang penui Rapeu ne penui je tew’nringpat kai gu lei,
pe gume gu melidung chang dadegeu;
heguangpeichûp ge tingchugeu ramme gum ze pe gu heram lungge penui lerba ze bam gu lei.
17Eu lei, chi nung ze yi-desang gu de lei!
Chêu ne rehangme ze rengachai bam ra tew gai gu lei,
zai wain karchibe ne heleume je du chigum tew gai gu lei.
Currently Selected:
ZEKARIA 9: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
