MATHAI 6

Kegame je Mâ-peibe

1“Ningnui tâ-yibe tewbe ramme ze, miramme ngau mak ra hangge ’ntîng le lau; makchai â ningnui Peu tinggîm ge bampeu dage ningnui hî hang ga du lei.

2“Chidaze nang miramme hangge mâ-pei dezai, helunglimpungme ne peize penui je toagaineibe ne, ka’nduibeki ge mei, ’mpuî’mmai ge mei, ze tewbe tak gum ze nang â ning suage hegeîluîkie ’mmut kai se lau. Pelingsing ze ningnui je I rang lei, penui â penui hî hang ngau lu de lei. 3Kane nang â miramme hang mâ-pei dezai ning ba hezat’mbia ba ne peibe ze, peize heku’mbia ba ne chî se lau. 4Chigum ze nang mâ-peibe ze ngaumakbe chang le ra hangge zeu; chidezai ning Peu ’ngkim ne ngaupeu ne ningchu peiruî dai gu lei.

Teseurei ze Kakellumbe

(Luk 11.2-4)

5“Zai nang kellum dezai helunglimpungme gum ze bam se lau; penui â miramme ne penui je ngau ra, ka’nduibeki ge, zai ’mpuî’mai-mai ge sap lu ze kakellumbe je ka’nchâ daseu. Pelingsing ze ningnui je I rang lei, penui â penui hî ngau lu de lei. 6Kane nang â kellum dezai, nuksing ’mbe gut ze ’ngkam kainam lu, ning Peu ngaumakpeu dage kellum lau; chidezai ning Peu ngau mak ze bambepeu ne ning hî hang pei gu lei.

7“Zai kakellumbe ge Jentailme gum ze sam damlube dam’nruiwang dai se lau; penui â sam saka’ngkiebe gene penui sam ’ngking gu lei, ze penui ’nning gai daseu. 8Chime gum ze bam se lau; pe dage ningnui mâkie makge ningnui Peu â ningnui ’ndaikau ka’nnang mei be chikâ la daseu. 9Chidezai ningnui acheu ze kellum lau:

Anui peu tinggîm ge bampeu,

Ning ji peize ’nchi bam lau;

10ning gu heguangram peize wangkeu lau;

ning suî ne tinggîm ge tew gum ze,

kedei ge du peize tew lau.

11Nemai ge anui gu nai’nsangne gu hetak pei lau;

12Anui pâu pungme je anui lun gum ze anui pâu du lun gai lau;

13Anui je duairabe ge ngua gai se lau,

kane kesiabe gene anui je ripat kai lau, Amen.

14Miramme hedieka’ngkabe ramme je ningnui lun dizai â ningnui Peu tinggîm ge bampeu ne ningnui je lun gu lei; 15kane miramme hedieka’ngkabe ramme ze ningnui lun mak tizai â, ningnui Peu tinggîm ge bampeu ne du ningnui hedieka’ngkabe ramme ze lun ra mak lei.

Teseureibe

16“Ningnui teseurei dezai helunglimpungme gum ze desungra ze bam se lau, penui â penui teseureibe ze miramme ne peize chî ra hangge penui ju desungra ze bam lei. Pelingsing ze ningnui je I rang lei; penui â penui hî ngau lu de lei. 17Kane nang â teseurei dezai, ning peî taudui ’nnuk lu, ning ju ’mpiau lu bam lau, 18dezai nang teseureibe ze ziemmename ngau mak ra, kane ngaumakbe ge bambepeu ning Peu ne ngau ra hangge zeu; zai ning Peu ’ngkim ne ngaupeu zene ningchu getoabehi pei gu lei.

Tinggîm ge Mi Heu ramme Gekuagaibe

(Luk 12.33,34)

19“Kedei ge tereî benai ’ntû ne teu’nsiaduibe ge, zai mâ-kahegame ne riput ze mâ-hegaduibe ge ningnui heu hang gekua gai se lau, 20kane tinggîm ge tereî benai ’ntû ne teu’nsiamakbe ge, zai mâ-kahegame ne riput ze hegamakbe ge ningnui heu hang gekua gai le lau. 21Ningnui heu bambe bâm ge ningnui lung du bam daseu.

Mi Pum gu Kebabe

(Luk 11.34-36)

22“Hemik â mi pum gu hemibung lei. Chidaze ning mik ’nchi dezai ning pum pelane ba kam du lei; 23kane ning mik sia dizaine â, ning pum pelane muî kam du lei. Chidaze nang ge kebabe bambe ze muî dizaine â chi kemuîbe ze ’ndaizeuge muî de ra lau!

Hera benai Kedeirei Heu

(Luk 16.13; 12.22-31)

24“Mige de heguang hangna guâ ’ngguachi lak lei; hangkat je pa ’nrie, zai hangkat je pa hung gu, nu hangkat je mêuhâ zai hangkat je pa ngaugailak ku lei. Hera benai mi heu guâ ningnui ’ngguaheruadau lak lei.

25“Chidaze ningnui je I rang lei, ningnui keringbe hangge ningnui ’ndaikau teu ra mei, zai ’ndaikau sak ra mei, zai ningnui pum hangge ’ndaikau ningnui bâ ra mei, ze ’nninghereu se lau. Keteu-kesakbe suadu keringbe â betâudi zai mi paîni sua mi pum â betâudi mak ti lau? 26Kehu ’mbe liamruabe ’nruine je pie gai ni lau: penui hetâ du ta mak, zai gat de gat mak, zai ’nseu ge du kai’ndui mak, kane ningnui Peu tinggîm ge bampeu ne penui je ka’ngkut lei. Ningnui â penui sua â pemîhung sang hung mak semei? 27Zai ningnui ruage châu pehut peireige ’nninghereu ze sâu kat kaisuâ dui lau? 28Zai paîni hangge ningnui ’ndaitew ra ’nningkahereu lau? Lilipâ ramme peningkâm ge bambe ’ndaigum ze chîngchu mei be ’nning gai ni lau, penui chîngchube tak zeu; penui â tâtew mak, zai kelâng du zui mak lei; 29sedu ningnui je I rang lei, Solomonbe je du pa pe ngeudibe leine ge airamme je gum ze pechu keru gai mak lei. 30Kane Hera ne peningkâm ge nemai ge bambe hereuneu ze ’nchuamai dezai ’mmang ge tuâgai’nderabe je chigum ze bâ gai dizai â chipau peirei ningnui je â bâ gai me ra semei, Hei ningnui keneibe chamme bau gau? 31Chidaze ‘’Ndaikau anui teu ra mei,’ zai ‘’Ndaikau anui sak ra mei,’ zai ‘’Ndaikau anui bâ ra mei,’ ze acheu ’nninghereu se lau? 32Jentailme â airamme je peu-peu lei; zai ningnui Peu tinggîm ge bampeu ne airamme leine ningnui tâuka’nnang lei be chî lei. 33Kane pe gu heguangram benai pa katelingbe ze peuraî le lau, dezai airamme leine ningnui hang chang gu lei.

34“Chidaze ’nchuamai hangge ’nninghereu se lau, ’nchuamai hang â pe runne pe hang ’nninghereu du lei. Mai kat hereugaibe gu ze mai kat hereu hî hangge bui de lei.

Currently Selected:

MATHAI 6: ZEMEBSI

Highlight

Copy