MATHAI 16

Tâningdaulakbe tew gai ra Kiebe

(Mrk 8.11-13; Luk 12.54-56)

1Zai Pharisaime benai Saddusime pe dage wang de lei, zai pechu kedak ra tinggîm ’mbene dakka’nchetbe penui je peize teilia ra pechu kie de lei. 2Pa ne penui je kak ze, “Hegî dege ningnui ne, ‘Ting yi gu de lei; tinggîm gie la daseu,’ ze kacheu de lei. 3Zai hechua dege, ‘Nemai â tingsia gu de lei, tinggîm gie, zai ting du mâugit la daseu,’ ze ningnui acheu ka’nzie lei. Tinggîm ju bambe tak ningnui sakelichi lu da, kane beting ka’nchetbe ze ningnui ’nchetchi mak lei. 4Helungriaksiabe benai kahemabe reheime ne dakka’nchetbe ze peu da, kane dakka’nchetbe pei ra mak lei, Jonabe ne dak changbe runne zangno,” ze acheu bei de lei. Zai penui je pa sâu nan ze tatrimna di de lei.

Pharisaime benai Saddusime gu ’Nduihî

(Mrk 8.14-21)

5Zai pe gu kenieme katlam giam kapat dege, tingku penui tei’ngngaî ’ndi de lei. 6Isua ne penui je, “Pharisaime benai Saddusime gu ’nduihî gene ningnui ’ntîng le lau,” kacheu de lei. 7Dadege penui karai acheu tu ze, “Tingku anui teimakbe ziegene lei,” ze kacheu de lei. 8Kane chize Isua chî lu ze, “Hei keneibe chamme gau, ’ndaitew ze tingku gabe ziegene ningnui ruage tu lau? 9Ningnui ’nningchi mak kerei mei? Chang-mengeume gu tingku mengeu benai ’ntui ’ndaikie rui lu mei be ningnui ’nningdau mak kerei mei? 10Makchaine chang medaime gu tingku sena benai ’ntui ’ndaikie ningnui rui lu mei be ningnui ningdau mak kerei mei? 11Tingku rasam ningnui dage I sa mak lei be ze ’ndaitew ningnui chî mak lau? Pharisaime benai Saddusime gu ’nduihî gene ningnui ’ntîng le lau,” kacheu de lei. 12Chidadege ’nduihîkaibe tingku je ’ntîng ra rangbe mak lei, kane Pharisaime benai Saddusime geteiliabe je penui ’ntîng ra penui je pa rang lei be penui ’nningchi di de lei.

Krista lei ze Peterbe ne Rang’nchigaibe

(Mrk 8.27-30; Luk 9.18-21)

13Zai Kaisaria Philippi bak lungge Isua zuagut dege, pe kenieme je, “Miramme ne ziemmena Na je châu lei ze kacheu lau?” ze ka’nneu lei. 14Dadege penui ne, “Hanggesame ne sa ze, Baptistewpeu Johanbe lei acheu, hanggesame ne Elijabe lei acheu, zai hanggesame ne Jeremiabe mei nune kemeume ruage hangkat mei leu gu lei, kacheu lei,” ze kacheu de lei. 15Pa ne penui je, “Acheuzai ningnui ne achu châu lei ze sa gai lau?” acheu bei de lei. 16Simon Peterbe ne, “Nang â Krista, Hera keringpeu Na lei,” ze kak kai bei de lei. 17Dadege Isua ne pechu kak ze, “Simon Bar-jona, ning hang keyibe de lei! Aize ningchu hemei benai hejai ne liabe mak, kane a Peu tinggîm ge bampeu ne ningchu liâ daseu. 18Zai ningchu I rang lei, nang â Peterbe de lei, zai aipau chukâng peireige a gu herakiangna beichu gu lei, zai kechaibe gu rezie ne chize duî ra mak lei. 19Tinggîm heguangram chabi ramme ze ningchu I pei gu lei, zai kedeirei ge nang ne pibe leine ze tinggîm ge pi gu lei, zai kedeirei ge nang ne heipatbe leine tinggîm ge heipat ku lei,” kacheu de lei. 20Chidadege pa â Krista lei be mî dage du rang mak ra hang pe kenieme je samde sing gai bei de lei.

Isua ne Pa Hereulie ze Chai ra Rangka’ntuabe

(Mrk 8.31; 9.1; Luk 9.22-27)

21Chipau ting gene seu ze, Isua ne pe gu kenieme dage Jerusalem ’mbe pa tathimchangrabe, zai chige gechîngme, tingkugechîngme, zai leisirawme dagene misongga ze Pa hereulierabe benai pechu tewchatrabe zai pakechumbe mai ge teichugaidairabe rasam saliachu di de lei. 22Dadege Peterbe ne pechu nguachâm lu, “A Wang gau, aize Hera ne peize nam ne lau! Ning peireige mâtew-tewsedu peize wangchang se lau,” ze ka’ngngiam lei. 23Kane pa ’nreiwang lu, Peterbe je, “Satan, a chai ’mbe nang tat te lau! Nang â a ’mpuî tewnambe kau lei; Hera lam hang nang â ’nning mak ze, ziemmena lam hang ka’nning daseu,” kacheu de lei.

24Dadege Isua ne pe gu kenieme je salia ze, “Mi-mige de a chai suineibe kau â, pe runne pechu ’nzâ mak ze pe gu heling pua ze peize a chai sui lau. 25Mi-mige de pa keringbe tew’nring ra neibe kau â, pa keringbe tew’ngga gu lei, kane mi-mige de a ziegene pa keringbe tewka’nggabe kau â pa keringbe ngau gu lei. 26Ziemmena ne kedeirei pelane pe gu chang kam sede pa keringbe ’ngga dizaine â pe hangge ’ndaikau kegiebe chang ra lau? Nune ziemmena pa keringbe hangge ’ndaikau ne hiak le ra lau? 27Ziemmena Na â pe gu angelme ne ngua lu pe Peu ngeudibe gene wangkeu gu daseu, chidezai ziemmena tâtewgai’ndibe luigum ze pa ne peiruî dai gu lei. 28Pelingsing ze ningnui je I rang lei, aige sapme hangesame â kechaibe penui ’ndâu ra mak lei, ziemmena Na pe gu heguangram ge pa wangkeube penui ngau mak tâneu,” kacheu de lei.

Currently Selected:

MATHAI 16: ZEMEBSI

Highlight

Copy