MALAKI 2
2
1“Chunage Hei tingkume gau, aipau samde ze â ningnui hang de lei. 2Ningnui ne ’ngking mak, zai a ji tew’ndi ra ’nning mak ze bam dizai â desetkaibe ningnui peireige lang gai gu zai ningnui gu ’nnamgaibe ramme ze I ne deset kai gu lei, ze baudime gu Tingwang ne kacheu de lei; ningnui lung ge teimakbe ziegene chiramme je â deset’ntierie gai ’nde lei. 3Pie le lau, ningnui chaname je I ne ’ngngiam gai gu lei, zai ningnui ju ge ningnui gu kaurui peipatbe bâ keneirarip kai gu lei, zai a dagene ningnui je tei’mbia ’ndu lei. 4Chidezai Lebibe dage a gu samhatkaibe ze tei’nsap ze bam ra, aipau samde ze ningnui dage I ne lang gai de lei be ningnui chî gu lei, ze baudime gu Tingwang ne kacheu de lei. 5A gu samhatkaibe pe dage bambe ze â keringbe benai lunghegeikatenaibe gu samhatkaibe lei, achu hing ze hengêutew ra chiramme pechu I pei gai de lei; zai pa achu hing de lei, a ji je pa â hengêutew ze bam de lei. 6Samsang geteiliabe ze pe mui ge bam de lei, zai karasa sam â pe mui ge bam mak te lei. A dage pa â nguadesieyi zai lungsangtew ze bam de lei, zai pa ne ziemmena misonggame je kemaube gene teiheliwang gai dai bei de lei. 7Tingkupeu mui ge â mâ-’nningchibe tei’mmi ra lei, zai ziemmena ne pe mui gene mâ-geteiliabe ze peu himchang ra lei, pa â baudime gu Tingwang gu sampaupeu daseu. 8Kane ningnui â ’mpuîki gene kemak ’mbe tat ti de lei; ningnui mâ-mâ geteiliabe gene misonggame je tewkau gai bei de lei; Lebibe gu samdiegaibe ze ningnui ne tew’nsia ’ndi de lei, ze baudime gu Tingwang ne kacheu de lei, 9chipauziegene ziemmena leine ruagene ningnui je ’nnaha ze bam, zai helêuku ze bam ra I ne ningnui peireige tew gai lei, a ’mpuî ze ningnui tei mak ze kane ningnui hingde geteiliabe ge kehung-ka’nrie tewdibe luigum zeu,” kacheu lei.
Ziemmename ne Hera dage Lungsanggabe
10Anui ’nteumena peu â kat mak semei? Hera kat ne anui je ’ndam gai mak semei? Acheuzai ’ndaitew ze anui peume gu samhatkaibe tew’nsia ze kat-kat karai peireige lungsang kai mak ze bam lau? 11Juda â lungsangtewbe tei mak ze bam di lei, zai Israelram benai Jerusalem ge mi katenetbe tâ tew ze bam di lei; zai Tingwang ka’nchâbe bâm pebâm ka’nchibe ze Juda ne tewhebâ gai ’nde lei, zai heram kêdabe gu hera na ’mpuimi je pe nâu hang lu di lei. 12Aigum ze tewme je â Jakobbe gu hetiampaîki gene peize Tingwang ne tei’mbia kam ne lau, mige aigumbe tewme, sakki tewme, samkakme zai Tingwang baudime Rapeu dage kela peipatme jeu!
13Zai aize du ningnui ne tew kadai gerei lei. Hemikdui benai kehapbe, zai hoipun-punbe zene Tingwang gu herâtewbe bâm ze ningnui ne tewpuigit kai de lei, kela pualiabe ze pa ne mâ-hangge du ’nning gai mak, zai ningnui ba ne mâ-peibe du pa ne ’nchâgaimakbeibe ziegeneu. 14“’Ndaitew ze pa lu mak lau,” ze ningnui ne kacheu de lei. Nang benai ning rîting gu ning nâu kakge samriagaibe, zai chipaupui je samriagaibe gene ning pampui zai ning nâu chang ze bam sedu pe peireige nang lungsangtewmakbe ze sakkitewpeu â Tingwang di dadege aigum ra chang de lei. 15Anui hang keringbe gu herui ze Hera kat bambepeu ne ’ndam gai ze pei gai mak semei? Zai ’ndaikau pa ne lunei lau? Hera je gechîbe chana ze de lei. Chidaze ningnui runne ningnui je reî ze tei’mmi le lau, zai mige de pe riting ge pe nâu changbepui je lungsangtew mak ze bam se lau. 16“Henâutabe ze I ne ngaugailak daseu, ze Israelme Rapeu Tingwang ne kacheu de lei, zai katîmphibe gene miramme je naîlatewchibe kau je du ka’nrie lei, ze baudime gu Tingwang ne kacheu de lei. Chidaze ningnui runne ne ningnui je ’ntîng le lau, zai lungsang pei gai mak ze bam se lau,” ze kacheu de lei.
Samrambe Mai Nadibe
17Ningnui sam ramme ne Tingwang je tewlei gai bei de lei. Kane ningnui ne, “’Ndaigum ze anui ne pechu tewlei gai bei lau?” kacheu de lei. “Tâ-kesiabe tewme leine Tingwang mikngau ge â ziemmena keyime kam lei, zai penui peireige pe suiyi ze la lei,” ze acheu sagaibeibe ge zeneu? Makchai “ ’Ndaige pelingtewbe Rapeu la lau?” acheu ’nneugaibeibe gezeneu?
Currently Selected:
MALAKI 2: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
