LUKA 15

Gadibe Meli

(Mat 18.12-14)

1Chunage ’mpuâhame benai hemuime leine pe sam ’ngking ra pe tailam zuawanghechut kai de lei. 2Zai Pharisaime benai leisirawme katelum de lei, acheu sa ze, “Aipaupeu ze hemuipungme je ’nchâ, zai penui je mâ-nguateu zeu,” ze acheu katelum de lei. 3Dadege pa ne penui je aipau sam’nda ne salia de lei: 4“Ningnui ruage mige pe gu meli haî kat bam ze chipau ruagene kat ga dizai â, hênamkang ge riaksekui ze sekui je sâu gai nan ze gadibe ze ngau mak tâne châu peu mak kau la lau? 5Zai chize pa ne ngau lu dege, chize pe keîtoa ge kai lu pe suî’nta ze bam de lei. 6Zai pe ki ge pa wangchang dege, pe kangme benai pe kiningme je kûwang’ndui lu ze penui je, ‘Achu ningnui suiyi’ntagaihâ lau, a gu meli gadibe ze I ne ngau dai lu daseu,’ ze kacheu de lei. 7Chigum ze ningnui je I rang lei, tinggîm ge katelingme riaksekui ze sekui keyime helung-heli dai sua ra ’nangtadime je sua â, hemui kau hangkat helung-heliwangpeu pumgîm ge tinggîm ge hesuiyi’nteu ze bam gu lei.

Tew’ngga’ndibe Rangkângpum

8“Zai ’mpuimi hangkat mige pe gu rangkângpum kereu bam ze kat tew’ngga ’ndizai â, hemibung ’ntau lu, heki biak ze chize ngaudau mak tâne châu peu mak ta ra lau? 9Zai chize pa ne ngau lu dege â, pe kangme benai pe kiningme je kûwang’ndui lu, ‘Achu ngua ningnui suiyi’ntagaihâ lau, a gu rangkângpum gadibe ze I ne ngaudau lu de lei,’ ze kacheu de lei. 10Chigum ze ningnui je I rang lei, hemui kau hangkat helung-heliwangbe peireige Hera gu angelme suagene hesuiyi ze bam lei,” ze kacheube sam zeu.

’Nggadibe Na

11Zai pa ne sa ze, “Hangkat pe na ’mpeumi hangna bam lei; 12zai penai ruage henabipeu ne pe peu je, ‘A peu gau, kilûng-heurâ a dam hang changrabe achu pei zu lau,’ ze kacheu de lei. Dadege pa ne penai hangna hangge pe gu keringbe heurâ ze ’nzi gai bei de lei. 13Zai bechâng dege henabipeu â pe gu bambe leine teiwang’ndui kam lu, heram kedeu ’mbe tat ti de lei, zai chige kerubit ze bam ze pe heu ketadau tew’ngga kam gai ’ndi de lei. 14Zai pe gu kebambe leine tew’ngga kam gai dege, chipau heram ge herakûm kedibe wangchu di de lei, chidadege â pa pe duângga di de lei. 15Dadege â chipau heram ge hangkat dage pa ’ngkeuwang gai di de lei, pechu pe gu helu ’mbe tat ze pe gu kebak ramme guî ra langgaipeu dage zeu. 16Zai kebak ramme ne teipi ramme teubeibe pa du teu’nggeugit kai nei dun ze bam de lei; zai pechu mî ne de mâ de pei mak lei. 17Zai pe runne pechu ’nningchiwang dege pa acheu sa ze, ‘A peu ki ge tâtewme teu-ze-sak kam lak bam ze kane I â aige ’njei ze ga gai gu de lei! 18I chu lu a peu tailam tat ku de lei, zai pechu, “A peu, Tinggîmme benai ning mikngau ge I hemui gai ’ndi de lei; 19ning na hang achu kû ra bui ta de lei; ning gu tâtewme ruage hangkat hang gum ze achu chak kai lau,” ze I acheu ra de lei,’ ze kacheu de lei. 20Dadege pa zuachu lu pe peu tailam wang di de lei. Kane pa kedeu ’mbe tatbambe luagene du pe peu ne pechu ngau lu ’nggia-desang di ze pakpat lu pechu pam ze kakeput te lei. 21Zai pa ne pe peu je, ‘A peu, tinggîmme benai ning mikngau ge I hemui gai ’ndi de lei; ning na hang achu kû ra bui ta de lei,’ kacheu de lei. 22Kane pe peu ne pe gua ka’ngguame je, ‘Kelua ze paî yilangbe teipat ze pechu bâ gai zu lau; zai pe ba ge baroine kap kai zu lau, zai pe pî ge pîchûp kai gai zu lau; 23zai getumpoine guîka’mmibe teiwang lu ze tewchat le lau, mi suiyi’nta ze nguateu zu kei lei; 24ai a na chai di ringchu kadai de lei; zai ’ngga di ngaudau kadai de lei,’ ze kacheu de lei. Chidadege â penui suiyibe tâ tewchu di de lei.

25“Chunage pe na chîngbipeu ze â helu ge bam di lei; zai pa pe ki lam’mbe wanghechut dege, heleutewbe heleu’mmung kuâ ramme benai kelimbe ’ncheu pa seu de lei. 26Dadege pa ne tâka’ngguame ruage hangkat je kû lu chize ’ndaikau tewbe kau mei ze ka’nneu de lei. 27Dadege pa ne pechu, ‘Ning kinapeu wang bei ze ning peu ne pechu yi ze hedaulube ziegene guî’mmilube getumpoine pa ne tewchat kai bei lei,’ acheu bei de lei. 28Kane pa â pe râta di ze, kilûng ’mbe gutmeu di lei. Pe peu ne pat ze pechu kiam de lei. 29Kane pa ne pe peu je, ‘Ni, patingkum aitiege ningchu I ’nggua ze bam lei, zai ning gu samde mâdau de I pheumakbe ga lei; chi acheusede nang â a kangme je ngua a suiyi’nta gai ra hang melipoine katte mâdau de achu pei mak lei. 30Kane ai ning name ruage hangkat ne ning gu keringbe heurâ ramme hepumzuateume dagene nguateu’ngga kam lu wang bei ze nang ne pe hangge guî’mmilube getumpoine tewchat kai bei zeu!’ ze kacheu de lei. 31Dadege pa ne pechu salia de lei, ‘A na gau, nang â a dage pehî’nsangne bam la dezeî lau, a gu leine ze ning gu kam de lei. 32Chidaze mi suiyi’nta ze mi suiyi ze bam ra betâu sing lei; ai ning kina chaidibe ze ring dai di de lei; zai pa ’nggadibe ze pechu ngaudau lu de lei,’ ze acheu zeu,” kacheu de lei.

Currently Selected:

LUKA 15: ZEMEBSI

Highlight

Copy