JOHAN 18

Isua je Nimbe

(Mat 26.47-56; Mrk 14.43-50; Luk 22.47-53)

1Isua ne aipau sam ramme sa gai lu dege, pe gu kenieme je ngua lu, Kidron kâm kapat ti de lei, chige merie kat bam lei, zai pa benai pe gu kenieme chige gut ti de lei. 2Chunage Judabe, pechu zuapeu du chipau bâm chî lei; Isua chigene pe gu kenieme je hedau-ka’nsui dadegeu. 3Chidadege Judabe ne sipaime bau kat, zai tingkugechîngme benai Pharisaime ne langgaibeime saibe ramme je ngua lu, hemibung, zai keleu, zai hereimerua ramme tei lu, chilia tat ti de lei. 4Dadege Isua pe peireige mâ-mâ wangchangrabe ramme leine chî lu ze pat ze penui je, “Châu je ningnui peu lau?” kacheu de lei. 5Penui ne pechu kak ze, “Nazareth’mpeu Isua je lei,” kacheu de lei. Isua ne penui je. “I ze pa de lei,” kacheu de lei. Judabe pechu zua ra kelutewpeu penui ruage sap bam lei. 6Pa ne penui je, “I ze pa de lei,” acheu bei dege ’nchai’ngngîn ze kedei ge penui kau gai di lei. 7Dadege pa ne penui je neu dai ze, “Châu je ningnui peu lau?” kacheu de lei. Dadege penui ne, “Nazareth’mpeu Isua je lei,” kacheu de lei. 8Isua ne kak ze, “I ze pa de lei, ze ningnui je I rang bei de zeî lau; chidaze achu ningnui peu dizaine â, aime je ’mpat kai be lau,” acheu bei de lei. 9Aize pa ne “Nang ne achu peibeime je mî de I tew’ngga mak lei,” acheu ze sagai’ndibe sam tewpui gai ra hangge zeu. 10Dadege Peterbe ne, pe dage hiazutkie bambe tukpat lu, tingkudilangpeu gu kebang je pahezat’mbia kun bitaktua ’ndi lei. Chi kebangpeu ji ze Malkabe lei. 11Isua ne Peterbe je, “Ning gu hiazutkie bechûp ge kai ne lau; Bepeu ne achu hepiak peibe ze I sak me ra mei?” kacheu de lei.

Annasbe suage Isua Sapbe

12Dadege sipaime bau benai penui gu pemuiteupeu zai Judame ruage saibe ramme ne Isua je nîm lu pechu pi de lei. 13Railangbe ge Annasbe tailam penui ne pechu nguatat ti de le; pa â Kaiaphabe pau (pe nâu peu) dadegeu, Kaiaphabe ne chipau tingkum ge tingkudilangbe chang de lei. 14Kaiaphabe â Judame je pezat kelei ge hangkat ne chai gai ra yi lei be nguageteitewpeu de lei.

Peterbe Isua je Ka’ngkimbe

(Mat 26.69,70; Mrk 14.66-68; Luk 22.55-57)

15Zai Simon Peterbe Isua chai suitat ti de lei, zai chigum ze kenie’mpeu du suitat ti de lei. Chi kenie’mpeu kêdapeu je â tingkudilangpeu ne chika’mmi dadege, tingkudilangpeu kisîam ge Isua je pa ne ngua lu gut ti de lei, 16Peterbe â kemuiki hela ge sapkua de lei. Chidadege chi kenie’mpeu (kêdapeu tingkudilangpeu ne chîka’mmibepeu) ne pat ze, kemuikireîpui je ’mpau gai lu Peterbe je kilûng ’mbe nguagut ti de lei. 17Chi kemuikireîpui zene Peterbe je, “Nang du aipaupeu gu kenieme ruage hangkat mak ti lau?” kacheu de lei. Pa ne, “I â mak lei,” acheu bei de lei. 18Chunage hegei di dadege tâka’ngguame ramme benai saibe ramme ne hegeikâng hemitewheigie gai lu, chige sap lu ze penui hemigûm bam de lei; Peterbe du penui ruage sap lu hemigûm bam lei.

Tingkudilangpeu ne Isua je Samneube

(Mat 26.59-66; Mrk 14.55-64; Luk 22.66-71)

19Chidadege tingkudilangpeu ne Isua je pe gu kenieme deu ge benai pe gu mâ-geteiliabe deu ge sam’nneu ze bam de lei. 20Isua ne pechu kak ze, “Kedeireime dage I ’ndûlang ze I sa gai bei de lei; pehî’nsangne ge Judame leine wangka’ndui bâm ge, ka’nduibeki ramme ge zai kellumki lungge I mâ-geteilia ze bam-ka’nsui de lei; ’ngkim ne I â mâ de sa gai me lei. 21’Ndaitew ze nang achu mâ-kanneu lau? A sam seulume je penui dage I ’ndaikau sa mei be ’nneu le lau; I ’ndaikau sa mei be penui chî lei,” kacheu de lei. 22Aize pa ne sa gai bei dege, chige saibe ramme sapme ruage hangkat ne Isua je gepei ze, acheu sa ze, “Aigum ze tingku dilangpeu je nang samkak mei?” kacheu de lei. 23Isua ne pechu kak ze, “I ne samau gai ’ndizai â chi kemaube peireige sakkitew lau; kane I ne sataû gai ’ndizai â ’ndaitew ze nang achu kagepei lau?” kacheu de lei. 24Dadege pechu pibambe luî gene Annasbe ne pechu tingkudilangpeu Kaiaphabe dage lang gai bei de lei.

Peterbe ne Isua je ’Ngkimkadaibe

(Mat 26.71-75; Mrk 14.69-72; Luk 22.58-62)

25Chunage Simon Peterbe â hemigûm ze sapbam lei. Penui ne pechu, “Pe gu kenieme ruage nang du hangkat mak ti lau?” kacheu de lei. Pa ne chize ’ngkim ze, “I â mak lei,” kacheu de lei. 26Tingkudilangpeu guâ ka’ngguame ruage hangkat, Peterbe ne pe kun bitak’ndipeu kiduî’mpeu ne ’nneu ze, “Merie ge pe dage nang bambe ningchu I ngau mak semei?” kacheu de lei. 27Dadege Peterbe ne chize ’ngkim kadai de lei; dadege luakatne ’nruirie kua gai di de lei.

Pilatbe suage Isua je Nguawangbe

(Mat 27.1,2,11-14; Mrk 15.1-5; Luk 23.1-5)

28Dadege Isua je Kaiaphabe ki gene heguang kisîam kedi ’mbe penui ne nguatat ti de lei. Chize hechuasûn ge de lei. Penui â penui runne penui je tewhebâ mak ze Tat’ntuahengi-kuak puateuchi le ra hangge heguang kisîam kedi ’mbe â gut mak tai lei. 29Chidadege, Pilatbe penui tailam pat lu, “Aipaupeu peireige ’ndaikau gu kesiabe ’ndamgaibe ningnui teiwang lau?” kacheu de lei.

30Penui ne pechu kak ze, “Aipau peu ze tâ-kesiabe tewbe kau mak laîzaine â pechu anui bala gai ra mak te zeî lau,” kacheu lei. 31Pilatbe ne penui je, “Ningnui ne pechu tei lu, ningnui gu hingde luigum ze samram le lau,” acheu bei de lei. Judame ne pechu, “Anui ne mi-mi je du tewchat ra besie mak lei,” kacheu de lei. 32Aize ’ndaigumbe chit ne pa chai ra mei be teilia ra hangge Isua ne sagai’ndibe sam ze tewpui gai ra chang de lei.

33Pilatbe ze heguang kisîam kedi ’mbe gut dai lu, Isua je kû lu pechu, “Nang Judame Wangpeu de mei?” kacheu de lei. 34Isua ne kak ze, “Aize ning suichak gene nang sa mei, nune miramme ne ning dage a rasam salia bei lau?” kacheu de lei. 35Pilatbe ne kak ze, “I Juda’mpeu semei? Ning zatme benai tingkugechîngme ne ningchu a dage pei gai ’nde lei, nang ne ’ndaikau tew gai bei lau?” kacheu de lei. 36Isua ne kak ze, “I kaheguangbe â ai kedeirei gu mak lei; I kaheguangbe ze ai kedeirei gu dizaine â, a guâ ka’ngguame ne ’nggi gu lei, chidezai Judame ba ge achu pei gai mak ra hangge zeu; kane I kaheguangbe ze â ai kedeirei gu gene mak lei,” kacheu de lei. 37Dadege Pilatbe ne pechu, “Acheuzaine nang ze heguang de mei?” kacheu de lei. Isua ne kak ze, “I ze Heguang lei be nang ne sa la de zeî lau. Aipau hanggene achu lungkeu gai zai aipau hanggene kedeirei ge I wangkeu de lei, samsang sakkitew ra hangge zeu. Mi-mige samsang gu ziemmena changme leine â a kuâ seu lei,” ze kacheu lei. 38Pilatbe ne pechu, “Samsang ze ’ndaikau lau?” kacheu de lei.

Isua je Chairabe hang Samramgaibe

(Mat 27.15-31; Mrk 15.6-20; Luk 23.13-25)

Aipau sam pa sa gai lu dege, Judame tailam pa pat dai lu penui je rang gai ze, “Pe dage hetû-hera mâ de I ngaupat me lei. 39Kane Tat’ntuahengi ge ziemmena hangkat je I ’mpat kai ra ningnui sie ge lamui lei; chidaze Judame Wangpeu je ningnui hangge ’mpat kai be ra ningnui nei mei?” kacheu de lei. 40Penui ’nrung dai ze, “Aipaupeu je mak lei, kane Barabbabe je lei!” kacheu de lei. Chi Barabbabe ze hegasut-teupeu lei.

Currently Selected:

JOHAN 18: ZEMEBSI

Highlight

Copy