JENESIS 14

Lotbe je Abrambe Meupatbe

1Heguangme hangmedai, Shinar gu heguang, Amraphelbe, Ellasar gu heguang, Ariokbe, Elam gu heguang, Ked-or-laomerbe, zai Goiim gu heguang Tidalbe, 2aime bau ne kêdabe heguangme hangmengeu je kaherei de lei; Sodom gu heguang Berabe, Gomorra gu heguang Birshabe, Adma gu heguang Shinabbe, Zeboiim gu heguang Shemeberbe, zai Bela (chize Zoar) gu heguang, aime bau je ka’nggi de lei. 3Zai aime heguangme hangmengeu ze penui gu hereikangme ramme je ngua lu Siddim kâm, (chize ’Nchaî Sungkling) ge wangherua gai de lei. 4Ked-or-laomerbe ne samrambe kangge penui kum kereu ze kena ’nggua bam gai de lei, kane kum kereu ze kechum changbe kum ge penui ne pechu ’nggi chu di de lei. 5Kum kereu ze medai changbe kum ge Ked-or-laomerbe benai heguangme ne penui gu hereikangme je ngua lu ze Ashteroth-karnaim ge bamme Rephaime, Ham dei ge bamme Zuzimme, Shabe-kiriathaim ge bamme Emimme, 6zai penui gu Seir deiloa ramme ge bamme Horime je duî kam ’ndi de lei, tingkangram ’nrai Elparan riâ chang zeu; 7dadege penui ’nreiwang dai lu Enmishpat (chize, Kades) ’mbe helatwang dai di de lei, zai penui ne Amalekme dei leine sut kam lu zai Hazazon-tamar ge lungme Amorme je du duî lu de lei. 8Chidadege Sodom gu heguang, Gomorra gu heguang, Adma gu heguang, Zeboiim gu heguang, zai Bela gu heguang, (chize, Zoar) aime heguang hangmedaime ne heguangme hangmengeu je penui gu hereikangme je herei ra hang Siddim kâm ge wang’ndui ze, 9Elam gu heguang, Ked-or-loamerbe, Goiim gu heguang Tidalbe, Shinar gu heguang Amraphelbe, zai Ellasar gu heguang Ariokbe, aime heguang, heguang hangmedai ne heguang hangmengeu je ka’nggi de lei. 10Chi Siddim kâm ge kedeicham lube kuiki misongga bam de lei; zai Sodom gu heguang benai Gomorra gu heguang ze kahereibe bâm gene pak’mbia ra heka dadege chipau kuiki ramme ge penai keu gai di de lei, kane kêdame heguang hangchum â peloa ramme ge pak’mbia gai di de lei. 11Heguangme hangmedai ne Sodom benai Gomorra ge bambe ramme leine benai penui hetak hang kaigekuagaibe du tei kam lu ze tat ti de lei. 12Abrambe kinapeu na Lotbe â Sodom ge lung ze bam de lei, pechu du nîm lu pe heurâ ramme leine sut ’ndi de lei.

13Kane pak’mbiapatlupeu mi hangkat ne airamme rasam ze Abrambe Hebrai’mpeu je salia kam gai bei de lei, Amor’mpeu Mamrebe gu ka’nchibe ’mpubang ramme hiage lungpeu jeu. Mamrebe benai pe kina kena Eshkolbe benai Anerbe â Abrambe je ka’ngngame bau de lei. 14Pe kinapeu na je nîm ’ndi de lei be Abrambe seu lu dege, pa ngualungme pe kiningme ziemmena haî chum ze kereu ze desat, herei ge tewchime je kû’ndui lu, Danram riâ chang ze penui je gua’nchumie de lei. 15Chige pe gu ziemmena ramme je pebau-bau ’nzipâng gai lu, penui teureime je tingmuî ne ka’nggi de lei, zai penui je duî lu de lei. Damaska gene tingpeî ’mbia Hoba riâ chang ze pa ne penui je ’nchumie de lei, 16zai sut-tattibe kerua ramme leine ’nri dai kam lu de lei. Pa ne pe kinapeu na Lotbe zai pe heurâ ramme, ’mpuimi ramme benai ’mpeumi ramme, zai kebang hang sut-tattime je nguawang gai kadai de lei.

Melkizedekbe ne Abrambe je ’Nnamgaibe

17Ked-or-laomerbe benai heguang kêdame je Abrambe duî lu wang dai dege, Sodom gu heguang ne pechu Shabe-Kâm (heguang gu bekâm, ze du kube) gene suidau de lei. 18Zai Melkizedekbe, Salem gu heguang ne wain benai tingku teipat kai bei de lei; pa ze Hulangpeu Hera gu tingku lei. 19Zai pa ne pechu ’nnam gai ze, “Peize Hulangbe Hera ting benai kedei ka’ndampeu ne Abrambe je ’nnam gai be lau; 20zai ning teureime je ning ba ge peigaipeu Hera Hulangpeu je peize suang lau!” ze kacheu de lei. Zai Abrahambe ne pa sutdailube leine gene kereu ge kat Melkizedekbe je pei de lei. 21Sodom gu heguang ne Abrambe je, “Nang ne sutlube merua ramme â kai le lau, kane a gu ziemmena ramme je achu pei dai lau,” ze kacheu de lei. 22Abrambe ne kak ze, “Tingwang Hulangbe Hera Ting benai kedei ka’ndampeu suage I kadeseu de lei, 23ning gu gene mâ de I lu ra mak lei, kelangkie kat mei, nune pichûpria kat mei ’nsangdu lu ra mak lei. Chidezai nang ne, ‘Abrambe je I ne keheupeu hang tew gai lei,’ ze nang acheuchi lak ra hangge zeu. 24Mâ de a hangge I lu ra mak lei, a gu ziemmena ne penui tâu ka’nnangbe hangge ’ndaikau tew ’ndi mei be runne I lu gu lei. Kane peize achu nguatatme Anerbe, Eshkolbe, zai Mamrebe je penui dam ze lu le lau,” ze acheu bei de lei.

Currently Selected:

JENESIS 14: ZEMEBSI

Highlight

Copy