TÂTEWBE 18

Korinth ge bambe

1Aipau châng dege â, pa Athens sâu nan ze Korinth ’mbe tat ti de lei. 2Dadege Rom gene Judame leine je peize tat kam de ra Klaudiasbe ne sam diegaibeibe ziegene Pontas ge bampeu pe ji Akuilabe, pe nâu Priskillale je ngua lu Itali gene wangrî-desang ze wangpeu je ngau de lei. Zai penai je pa hedau gai ra tat ti de lei; 3zai penai tâ benai Paulbe tâ pa tingtie tâtewbe ze ka’nzuâbe ziegene penai je pa nguatatew ze bam lei, penui tâ zat â, paîkitewbe tâ lei. 4Zai ’ntakbambe mai ’nsangne ge Judame ka’nduibeki ge pa geikum ze bam ka’nsui lei, zai Judame benai Grikme je nei ra kiâmkuak lu ze bam de lei.

5Silasbe benai Timothibe Makedonia ’mbene wangchang gai dege Paulbe â Judame dage samyibe pau ze Krista â Isua de lei be sakkitewrua-desang laleu de lei. 6Zai penui ne pechu ’nggi ze ’nrû bei dege pa ne pe paî gechung ze penui je, “Ningnui ne chai ra hing makchai ningnui sui lei! I mâ de kemaube ga lei. Chuna gene seu ze Jentailme lam’mbe I â tat tu de lei,” ze kacheu de lei. 7Chidadege chigene pa sâu nan ze hangkat Hera je kellumbampeu pe ji, Titias Justabe ki ge pa wang gai di de lei; pe ki â ka’nduibeki hiage bam lei. 8Krispasbe, chi ka’nduibeki ge pemuitewpeu ze pa benai pe kiduîme leine Heguangpeu je ’nnum’mmi di de lei; dadege Korinth ge bamme misonggame ne Paulbe sam seu lu ’nnum’mmi di ze baptisma lu kam di de lei. 9Zai mai kat â tingmuî ge keliâbe gene Paulbe je Tingwang ne, “Hing se lau, kane sam sa lau, zai ning kuâneu mak ze bam se lau; 10ning dage I bam bam daseu, mî ne de ningchu ’nggi ze, tew’nteu gai ra mak lei; aipau namdi ge a gu ziemmena misongga lamui lei,” ze kacheu de lei. 11Zai pa penui ruage kum kat ze kêu seruk bam ze Hera gu sam geteilia ze bam de lei.

12Kane Akaia ge Galliobe ne laksaibe changbe ting ge Judame ze muikattew lu Paulbe je ’nggichu ze samrambe bâm ge nguawang gai de lei, 13acheu sa ze, “Aipau peu zene hingde makbe gene Hera je kellum ra ziemmename ramme je kiâmrua ze bam de lei,” ze kacheu de lei. 14Kane Paulbe ne sam sa ra heka gai dege, Galliobe ne Judame je, “Aize kemaube lam gu mei, nune hetû-hera tewgaibe lam gu mei dizai â ningnui je I ’ngkingrabe hang du pezeu bam gu lei, Hei Judame gau; 15kane sam ramme, zai heji ramme, zai ningnui gu hingde-sie deu chang di dadege ningnui runne chize râm le lau; I â aigumbe ramme gu samrampeu hang â changgailak lei,” acheu bei de lei. 16Dadege samrambe bâm gene pa ne penui je langtua ’ndi de lei. 17Zai penui ’nteumena ne ka’nduibeki ge pemuitewpeu Sosthenesbe je nîm lu samrambe bâmra suagene pechu bêu bei de lei. Kane Galliobe ne chige mâ-hangge du ’nning gai mak tai lei.

Antiok ’mbe Wangkeukadaibe

18Aipau chângge Paulbe â Korinth ge hezie misongga ze penui dage ’nnaihang gai de lei, chipau châng dege mi puiname dagene rimna lu ze Siria ’mbe Priskillale benai Akuilabe je ngua lu ze ’nnei gene penui tat ti de lei. Paulbe pa hatkailube bambe ziegene Senkria gene pe peîtam chiap te lei. 19Zai Ephesi ge penui wangchang lu, chige penai je pa sâu gai ’ndi de lei, kane pa â ka’nduibeki ge gut lu ze, Judame dage samtu ze bam lei. 20Betinggetie penui dage ’nnaibam gai ra penui ne pechu kiam lei, pa ne hezuâ gai mak tai lei; 21kane, “Hera ne pe suî zai â ningnui dage I wang dai gu lei,” ze acheu sa ze, penui dagene rimna lu ze, Ephesi gene ’nnei gene pa tat ti de lei.

22Zai Kaisaria ge pa kapatchang dege, herakiangname dage pa hang lu rechâ gai de lei, zai Antiok ’mbe pa wangkeu di de lei. 23Chige pa bamkenakkailube châng dege, pa tatchu dai ze kenieme leine lung tew’nrak kai ze, Galatia Phrigia huâzie tatpela ze tat ti de lei.

Ephesi benai Korinth ge Apollobe bambe

24Chunage Juda’mpeu hangkat pe ji, Apollobe, Alekzandria ge bambepeu, Ephesi ge wang gai de lei. Pa â ’nchichiak ze sam sachiduipeu, zai Hera gu sam chika’mmipeu lei. 25Chipau peu â Tingwang ’mpuî ge geteilube kau lei; zai pe ningni dadege Johanbe gu baptisma rasam runne pa chî leusedu Isua rasam ze pelingtid ne geteilia lu de lei. 26Ka’nduibeki ge hingmeluisui ze sam sachu di de lei; kane Priskillale benai Akuilabe ne pa samsabe seu lu dege, penai ne pechu ngua lu ze Hera gu ’mpuî tak ze ranglia’nchichiak kai bei de lei. 27Zai Apollobe Akhaia giam ’mbe katat nei di dadege, mi puiname ramme ne pechu pe zeu hang reheî gai ze peize kenieme ne pechu bamkuâ ze hedau ra hangge samkela raw gai bei de lei. Pa ne chige wanggaibeibe gene Hera ka’nggiabe gene neidime ramme hangge ’ngngâ’ndi-desang bei de lei, 28pa ne Judame ramme je haîrua gene kiâgetie ze Krista â Isua lei be Hera gu leisi sam gene teilia bei dadegeu.

Currently Selected:

TÂTEWBE 18: ZEMEBSI

Highlight

Copy