TÂTEWBE 15

Jerusalem ge Ka’nduibe

1Kane ziemmena hanggesame ne Judia gene wangkeu lu ze pebaume je mâ-geteilia ze, “Mosabe gu hingde luigum ze ningnui je rumgetan makchai â, ningnui je tew’nringgaichi lak lei,” ze kacheu de lei. 2Chidadege Paulbe benai Barnabasbe ne penui dage getube benai kahegeibe kecheîne ta di de lei, zai aipau sam deu gene Jerusalem ge apostolme benai herakiangna ge gechîngme je hedautâu gai ra hangge Paulbe benai Barnabasbe, zai hanggesame je tat ra lang gai bei de lei. 3Dadege herakiangname ne penui je tat ra lang gai bei ze, Phoeniki benai Samaria tatpela ze penui tatkaibe ge Jentailme lung kahelibe rasam pau gai ze chime mi puiname je penui suî tew’mmi-desang gai bei de lei. 4Jerusalem ge penui hangchang dege herakiangname, zai apostolme zai gechîngme ne penui je ka’nchâ de lei; dadege Hera ne penai je nguatâtewbe rasam ramme bamkuame dage salia bei de lei. 5Kane Pharisaime kiangname keneime hanggesame ne sapchu lu ze, “Rumgetan sing ra ’nnang lei zai Mosabe gu hingde ze penui ne rei’mmi ra rang sing gai ra ’nnang lei,” ze kacheu de lei.

6Apostolme benai gechîngme ne aipau deu ze ’nning gai ra penui wang’ndui gai de lei. 7Zai samtu-desanggaibe chângge Peterbe sapchu lu penui ze, “Mi puiname nung gau, keraîbe ting ge Hera ne ningnui ruagene achu kakelâng de lei, Jentailme Gospel sam anui gene seu lu ’nnum’mmi le ra hangge zeu. 8Zai helung chîbepeu Hera ne penui je sakkitew gai ze anui je Herui Ka’nchibe peibe luigum ze penui je du pei gai de lei; 9zai penui benai anui kakge mâ de gechâmbe pa ne tew gai mak ze kane keneibe gene penui lung tew’nchichiak kai bei de lei. 10Chidaze chunage ’ndaitew ze anui peume benai anui ne pungchilakbe guangkâm kenieme ramme peireige tua gai ze, Hera je ningnui kedak ra tew lau? 11Kane Heguang Isua ka’nggiabe ziegene anui je tew’nringgairabe ze anui â ’nnumka’mmi lei, penui ne neibe luigum zeu,” ze kacheu de lei.

12Dadege baudime rim gai di de lei; zai Barnabasbe benai Paulbe ne Jentailme ruagene penai dagezene Hera ne ka’nchetbe ramme benai tâningdaulakbe ramme tewgaibe rasam salia bei ze penai kuâ penui ’ngking bam de lei. 13Penai sam sa kam lu dege, Jakobbe ne kak ze, “Mi puiname gau, a sam ’ngking le lau. 14Hera ne penui ruagene pe ji hangge pebau je nguapat kai ra Jentailme dage ’ngkiâmiegairaibe rasam tak ze Simeonbe ne salia gai de lei. 15Zai aipau geze kemeume sam ramme ne nguakahezuâ de lei, chi rawgaibe ge,

16‘Aipau chângge I wangkeu dai gu lei,

zai Dabidbe bambe bâm chi kâudibe ze tewchu gai dai gu lei;

siadibe ramme ze I ne teleuwang dai kam gu,

zai I ne chize tei’nsap kai gu lei,

17dezai ziemmena kêdame leine ne Tingwang je peu gu,

zai a ji gene kûgaibeime leine,

Jentailme ’nsangnedu achu peu gu lei,

18ze airamme tewgaipeu ’ndâgene chî ra tewgaipeu Tingwang ne rang lei,’ ze kacheube luigum zeu.

19Chidaze I ’nningaibe tak â Jentailme ruage Hera lam ’nreiwangme je anui deîhereu me ra lei, 20kane heraluîtewbe ramme gene mi je tewkahebâbe zat ramme, mi suitewkahereube zat ramme, zai mâ-mâ ketakedau tewchatbe gene benai hejai gene ’mmbiachi ra penui hangge anui sam raw lu pei ra yi lei. 21Rehei keraîbe ting gene Mosabe je keloa ’nsangne ge pe sam pauliame lamui, zai Judame ka’nduibeki ge ’ntakbambe mai ’nsangne pe rasam kiâ ka’nsui daseu,” kacheu de lei.

Jentailme Keneime dage Samkela ’Mputkaibe

22Dadege apostolme zai gechîngme zai herakiangname leine ne suîkat hezuâ gai ze, Paulbe benai Barnabasbe je Antiok keloa nguatat ra pebau ruagene ziemmena hanggesame je kelâng gai de lei. Penui ne Judabe, Barsabbabe kacheupeu benai Silasbe, pebaume ruage pemuitewbe kena je langpat kai ze acheu ze sam raw gai de lei, 23“Anui apostolme benai gechîngme ningnui puiname ne ningnui Antiok ge zai Siria ge zai Kilikia ge anui puiname Jentailme je rechâgaibe sam lang gai lei. 24Anui ruage hanggesame ne, anui ne penui je geteitew gai mak sedu, sam ramme ne ningnui je tewkeleu ze ningnui lung tewkeheugaibeibe rasam anui seuchanglube luigum ze 25anui gu baudi ’nduiwangbe gene ziemmena kelâng gai ze anui kehungbe Barnabasbe benai Paulbe je ningnui dage lang gai ra anui ne hezuâ gai de lei, 26anui Wangpeu Isua Krista hangge penai keringbe peipat-kai-’nzâmakbe kena peireige zeu. 27Chidadege Judabe benai Silasbe je anui lang gai de lei, penai sing ne penai mui sing gene ningnui dage aipau sam ramme salia gu lei. 28Mâ ka’nnangbe tewbeibe peireige â, heput ritka’nteube â ningnui peireige tua gai mak ra yirabe hang Herui Ka’nchibe lam gene du, zai anui lam gene du ’nning gai de lei: 29chize herâtewbe ramme hang mâ-mâ herâtew ze peipatkaibe teurabe, zai hejai sakrabe, zai ketakedau mâ-mâ tewchatbe benai hangleutewbe gene ningnui ’mbiachi ra de lei. Airamme gene ningnui runne ningnui je reîchi ze bam dizai â, ningnui yi gu lei. Kellum de lei, yi ze bam lau,” ze acheu zeu.

30Chidadege â penai je lang gai bei ze Antiok ’mbe penai tat ti de lei; zai baudime je penai ne kûwang’ndui lu, penui je chi samkela ze pei bei de lei. 31Zai penui chize kiâ gai lu ze, helung tew’ndigaibe sam ge penui suiyi di de lei. 32Zai Judabe benai Silasbe penai kemeu’mpeu kena zene sam misonggabe ramme zene penui lung tew’ndi gai ze penui ran tew’nchi gai bei de lei. 33Zai chige penai ’nnaibamgailube chângge penai je langgaime dage wang dai ra hang mi puiname ne penui suiyi ze penai je lang gai bei de lei. 34Acheuleusede Silasbe hang â chige bam-bamderabe ze yi di de lei. 35Kane Paulbe benai Barnabasbe â Antiok ge ’nnai ze miramme misonggame dage du Heguangpeu gu sam paurua ze geteilia ze bam lei.

Paulbe benai Barnabasbe Karimnabe

36Zai beting mâtiege makse Paulbe ne Barnabasbe je, “Namdi ramme ge Heguangpeu gu sam anai paugai’ndibe bâm leine ge mi puiname je ’ngkiâwang dai ze, penui ’ndaigum bam mei be pie gai ra anai wang dai kei lei,” ze acheu bei de lei. 37Zai Barnabasbe ne Johanbe, chi Markabe ze kacheupeu je penai dage nguatat nei lei. 38Kane chipaupeu Pamphilia ge penai je sâu gai nan ze, penai tâtewbe bâm ge tatmakpeu je â Paulbe ne nguatat nei mak lei. 39Chidadege penai chigene samtu’nsia nan ze kat-kat dagene châmtat ti de lei; Barnabasbe ne Markabe je ngua lu Sipra ’mbe tat ti de lei, 40kane Paulbe â Silasbe je kelâng lu, penai je Hera ne peize ’ngngâ ra mi puiname ne peipat kai bei ze tat ti de lei. 41Zai pa Siria benai Kilikia tatpelatat ze, herakiangname ramme je penui ran tew’nchi gai ze tat ti de lei.

Currently Selected:

TÂTEWBE 15: ZEMEBSI

Highlight

Copy