TÂTEWBE 1

1Theophilasbe gau, keraîbe leisikuak ge Isua ne tâtewchube benai geteiliachube rasam ramme I raw gai de lei, 2apostolme pa ne kelângpatlume dage Herui Ka’nchibe gene samde peigai’ndibe châng pechu tinggîm ’mbe nguachudibe mai chang zeu. 3Pe gu kahereube liebe châng hezie hedaine lungge pe runne pechu ring ze peluîrun ze penui dage liâbambeibe ze, zai Hera gu heguangram rasam sabe ze misonggame ne chîsingbe kau de lei. 4Penui dage pa bambe luage, pa ne penui je, Jerusalem put kai mak se, kane Bepeu ne samhatkai’ndibe je kuâ bam ra rang sing gai lei, chize pa ne kerangbe ze, “Ningnui a dagene seube ze, 5Johanbe â hedui ne baptistew de lei, kane mâtiege makse Herui Ka’nchibe ne ningnui je baptistew gu lei,” kacheu de lei.

Isua je Tinggîm ’mbe Nguachudibe

6Zai penui wangka’nduibe luage pechu ’nneu ze, “Heguang gau, chuna luî gene nang ne heguangram ze Israelme dage pei dai ra de mei?” ze kacheu de lei. 7Zai pa ne penui je, “Bepeu ne panehî benai beting ze pe gu rezie ne diegaidiak’ndibe ze ningnui ne chîrabe mak lei. 8Kane Herui Ka’nchibe ningnui peireige wangkeu dezai tâtewchibe ningnui ngau gu lei; zai Jerusalem ge, Judia ge, zai Samaria ge zai kedeimik deulangbe chang ze a gu sakkitewme ningnui ne chang gu lei,” kacheu de lei. 9Zai aipau sam pa ne sa gai lu dege, penui piebambe gene pechu nguachu di de lei, zai penui ngauchanglak ’mbe kemâu ne pechu nguatat ti de lei. 10Zai pa chudibe penui tinggîm ’mbe ’ngngangpie bambe luage, pie le lau, hangna paî kehâbe bâ lu ze penui taige sap lu ze, 11“Galilime gau, ’ndaitew ze sap lu ningnui tinggîm ’ngngangpie bam lau? Ai Isua ningnui dagene tinggîm ’mbe nguachudibepeu ze, tinggîm chudibe ningnui ngaube luigumbe gene wangkeu dai gu lei,” kacheu de lei.

Judabe Keleileîpeu

12Kedeiloa Olibet kacheube gene Jerusalem ’mbe penui wang dai di de lei, chize â Jerusalem taihia, ’ntakbambe mai ge tatwang’nruiduibe ’mpuî lei; 13zai penui gut lu dege, kehube sîam, ’mbe chu di lei, Peterbe zai Johanbe zai Jakobbe zai Andriabe zai Philipbe, Thomasbe, Bartholomaibe, Mathaibe, Jakobbe Alphaibe na zai Simonbe heram hang keranpeu, zai Jakobbe na Judabe aime bambe bâm ’mbe chu di de lei. 14Aime bau ze suîkat ne kellum ze penui runne ne peipat ka’nzie lei, ’mpuimi ramme, zai Marile, Isua pui zai pe kiname ramme je ngua lu zeu.

15Chipau ting ge pebaume riak haî kat ze ’ngkai riâ gum ze wangka’nduibe ruage Peterbe ne penui ruage sapchu lu, acheu ze sa de lei: 16“A puiname gau, rawdiakkaibe sam ze tewpui himchang ra chang di de lei, chize Herui Ka’nchibe ne Dabidbe mui gene Judabe, Isua je nîmme je ’mpuî gechiauliâpeu deu ge rangka’ntua be zeu. 17Pechu â anui ruage riamgai’ndibe kau da, zai aipau tâ ka’ngguabe ge pe dam hang pei’ndipeu de lei. 18(Chuna aipaupeu ze helungriaksiabe gu getoabehi zene helubâm kat lui de lei; dadege pe peî ’mbene sukkeu ze pe pum sûngngangkelî gene puakpat ze pe rai ramme hela pat kam di de lei. 19Zai aize Jerusalem ge bamme leine ne chî kam di de lei, chidadege chipau helubâm ji ze penui lad ne, Akeldama acheu ze ku de lei, chize â, Hejai Lu kacheube lei.) 20Getoabe leukuak ge,

‘Pa bambe bâm ze peize perua chang gai de lau,

zai chige peize mî de lung se lau,’

kacheu de lei;

zai ‘Pe tabâm ge kêdapeu ne peize bam de lau,’

acheu ze raw gai ’ndi daseu.

21Chidaze anui ruage heguang Isua pehî’nsangne ge tatpat-tatgut ze bambe ting ziemmename ruage hangkat anui dage ngua-suitatbampeu, 22Johanbe gu baptistewbe ting gene chu ze anui dagene pechu (Isua je) kehu ’mbe teichudibe mai riâ chang ze anui dage bambepeu—aime ruage hangkat zene Isua kechaibe gene chukadaibe deze anui je nguasakkitew sing gu lei,” ze acheu zeu. 23Zai penui ne ziemmena hangna, Josepbe Barsabbabe ze kûpeu, pe ji Justabe ze ’ntakkaikadaipeu benai Matthiabe je tei’nsap kai lei. 24Zai acheu ze penui kellum ze sa ze, “Heguang, ziemmename lung leine chîbepeu gau, aibe kena ruage châu je nang kelâng gai mei be anui je teilia lau, 25pe bâm ’mbe Judabe tat kai de ra hangge ’nreitattibe geze, aipau tâ ka’ngguabe ge benai apostolme tâpungbe ge sappui gai ra hangge zeu,” ze kacheu de lei. 26Zai penai hangna kakge hedachak kai dege, Matthiabe pumgîm ge keu gai di de lei; dadege â pechu apostolme hangkereu-ze-katme ruage teigut kai de lei.

Currently Selected:

TÂTEWBE 1: ZEMEBSI

Highlight

Copy