Sione 20
20
Ko e Toe Tu‘u ‘a Si̇̄suú
(Mātiu 28:1-8; Ma‘ake 16:1-8; Luke 24:1-12)
1Pea ʻi he hengihengi ‘o e ‘uluaki ʻaho ‘o e uiké, lolotonga ʻoku kei fakapoʻupoʻuli pē, naʻe ʻalu atu ʻa Mele Makitaline ki he fonualotó ʻo ne ʻilo, kuo ʻosi teka‘i ʻa e fuʻu maka naʻe tāpuni ʻaki̇ ʻa e fonualotó. 2Pea lele mai leva ia kia Saimone Pita mo e toko taha ako ko ē na‘e ‘ofa ai ‘a Sīsuú, ʻo ne talaange kiate kinaua: ‟Kuo nau ‘ave ʻa e ‘Eiki̇́ mei he fonualotó, pea ‘oku ‘ikai te tau ‘ilo pē kuo nau tuku ia ki fē.”
3Pea tutu‘u hake leva ‘a Pita mo e toko taha ako ʻe taha, ke ō ki he fonualotó; 4Peá na kamata lele fakataha, kae ve‘e vave ange ʻa e toko taha ako ko eé ‘ia Pita, ʻo ne fuofua a‘u atu ia ki he fonualotó. 5Pea naʻe punou hifo ‘o sio ki loto, ‘oku tuku mai ai ʻa e ‘ū kongokonga tupenu li̇̄neni̇́. Ka na‘e ‘ikai te ne hū ki loto. 6Kae faifai pea a‘u mai ‘a Pita, ‘o naʻe hū ki loto fonualoto ‘o vakai ki he ‘ū kongokonga tupenu līneni̇́, ʻene tuku ai̇́; 7Pea ʻi ai foki mo e konga tupenu na‘e takai ʻaki ʻa e fofonga ‘o Sīsuú. Na‘e ‘ikai ke tuku fakataha ia mo e kongokonga tupenu ko eé, ka kuo pelupelu ia ‘o tuku mavahe.
8Pea toki hū atu leva ʻa e toko taha ako ko eé, ‘a ē na‘e fua a‘u ki he fonualotó. Pea naʻe sio atu ia ki ai, ʻo ne tui.
9He kuo te‘eki pē ke mahino kia Pita mo e toko taha ako ko eé, ‘a e lau ‘a e Tohitapú, ki he pau ke toetu‘u ‘a Si̇̄sū mei he maté.
10Peá na toki foki atu leva ki he toenga ʻo e kau akó.
Ko e Hā ‘a Si̇̄sū kia Mele Makitaline
(Mātiu 28:9-10; Ma‘ake 16:9-11)
11Ka na‘e tu‘u ai pē ‘a Mele he ve‘e fonualotó, ʻo tangi. Pea lolotonga pē ʻene tangi̇́, naʻá ne punou hifo ‘o fakasio atu ki he loto fonualotó; 12ʻO ne vakai atu, tā ‘oku ‘i ai ha ongo ‘āngelo teunga hina ‘okú na ta‘utu he me‘a na‘e fakatokoto ai ʻa e sino ‘o Sīsuú, ko e taha mei ‘ulu pea taha mei va‘e. 13Pea ‘eke ange ‘e he ongo ‘āngeló kia Mele: ‟Fefine, Ko e hā ‘okú ke tangi ai̇́?”
Pea naʻe talaange: ‟Kuo nau ‘ave hoku ‘Eiki̇́, pea ‘oku ‘ikai te u ‘ilo pē kuo nau tuku ia ki fē.”
14Pea ʻi heʻene lea pehē: naʻá ne tafoki ‘o sio atu kimui, ʻo ne mamata ‘oku tu‘u mai ai ‘a Si̇̄sū, ka na‘e ‘ikai te ne ʻilo, ko Si̇̄sū ia. 15Pea ‘eke ange ‘e Si̇̄sū: ‟Fefine, Ko e hā ‘okú ke siʻi tangi ai̇́? Ko hai ‘okú ke kumi ki ai̇́?”
Pea pehē ‘e Mele ko e tauhi ngoué ia, ko ia, naʻá ne pehēange ki ai: ‟Tangata, kapau ko koe naʻá ke ‘ave iá, peá ke talamai mu‘a ‘a e feitu‘u naʻá ke tuku ia ki ai̇́, ka u ‘alu ‘o ‘omai ia mei ai.”
16Pea folofola ‘a Si̇̄sū kiate ia: ‟‘E Mele!”
Pea tafoki atu leva ‘a Mele ki ai ‘o naʻe pehē atu kiate ia, he lea faka-‘Alameá: ‟Lāponai!” ʻA ia, ko hono ‘uhingá, ko e ‟Faiako.”
17Pea folofola ange ‘a Si̇̄sū: ‟‘Oua te ke ala mai kiate au. He kuo te‘eki ai ke u ‘alu hake ki he Tamai̇́. Ka ke ‘alu ki he‘eku kau akó ‘o tala kiate kinautolu, Te u ‘alu hake ki he‘eku Tamai̇́ ʻa ia ko hoʻomou Tamai̇, pea ki hoku ‘Otuá ʻa ia ko homou ‘Otuá.”
18Pea toki ‘alu ‘a Mele ‘o tala ki he kau akó: ‟Kuo u mamata ki he ʻEiki̇́.” Pea naʻe fakamatalaange kiate kinautolu ‘a e me‘a na‘e folofolaʻaki ange ‘e he ‘Eiki̇́ kiate iá.
Ko e Hā ‘a Si̇̄sū ki He‘ene Kau Akó
(Mātiu 28:16-20; Ma‘ake 16:14-18; Luke 24:36-49)
19Pea ʻi he efiafi hifo ʻa e ʻaho Sāpate ko iā, naʻe nofo taha ‘a e kau akó ʻi ha fale kuo tātāpuni koe‘uhi̇̄ ko ‘enau ilifia ki he kau taki ʻo e kakai Siú. Pea fakafokifa pē kuo tu‘u ‘a Si̇̄sū ‘i honau lotolotongá, ʻo ne fakalea atu kiate kinautolu: ‟ʻTauange ke nofoʻia kimoutolu ʻe he melinó.” 20Pea naʻe toki fakahā ange leva hono ongo nimá mo hono vakavaká.
Pea fiefia lahi ʻaupito ʻa e kau akó ‘i he‘enau mamata ki he ‘Eiki̇́.
21Pea toe fakalea ange ‘a Si̇̄sū kiate kinautolu, ʻo pehē: ‟Tauange ke ʻiate kimoutolu ʻa e melinó. Hangē ko hono fekau mai au ‘e he Tamai̇́, ‘oku pehē foki ‘eku fekau atu kimoutolú.” 22Pea naʻe toki hō kiate kinautolu, ʻo ne pehē ange: ‟Mou ma‘u ā ʻa e Laumālie Mā‘oni‘oni̇́. 23Kapau te mou fakamolemole‘i ʻa e angahala ‘a ha taha, pea kuo fakamolemole‘i ia. Pea kapau ‘e ‘ikai te mou fakamolemole‘i ha taha, pea ‘e ‘ikai ke fakamolemole‘i ia.”
Ko Si̇̄sū mo Tōmasi
24Ka ko e toko taha ʻi he kau akó, ko Tōmasi, ʻa ia naʻe hingoa fakatenetene ko ‟Titimasi̇́,” na‘e ‘ikai ke nofo fakataha mo kinautolu ‘i he ha‘u ko ʻeni ‘a Sīsuú. 25Ko ia, naʻe talaange ‘e hono toé ki ai: ‟Na‘a mau mamata kimautolu ki he ‘Eiki̇́!”
Ka naʻe pehēange ‘e Tōmasi kiate kinautolu: ‟Kau ka toki sio ki he mataʻilavea ʻi hono nimá ʻo mono ki ai hoku tuhú, pea mo ʻai hoku nimá ki he mataʻilavea ʻi hono vakavaká, te u toki tui ki ai.” 26Pea ‘osi ha uike ‘e taha mei ai, kuo toe nofo fakataha ʻa e kau akó, pea na‘e ‘i ai foki mo Tōmasi. Neongo na‘e tātāpuni ʻa e falé, ka na‘e ha‘u pē ‘a Sīsu ‘o tu‘u honau lotolotongá ‘o fakafeʻiloaki atu kiate kinautolu. 27Pea naʻe toki pehēange kia Tōmasi: ‟Ala mai ki hē. Sio mai, ko hoku nimá ē. Pea ʻai mai ho nimá foki ki hoku vakavaká. Pea tuku hoʻo taʻe tui̇́, ka ke tui.”
28Pea tali ‘e Tōmasi kiate ia: ‟Tā ko hoku ‘Eiki̇́ pē koe mo hoku ‘Otuá!”
29Pea folofola ‘a Si̇̄sū ki ai: ‟Ko ho‘o toki tui̇́ koā ʻeni ‘i ho‘o sio tonu kiate aú? ‘Oku monūʻia ange ʻakinautolu kuo ʻikai te nau mamata tonu kiate au, ka nau tui pē.”
Ko e ‘Uhinga Na‘e Fa‘u ai ‘e Sione ‘ene Tohí
30Na‘e fai foki ‘e Si̇̄sū ha ngaahi mana kehekehe na‘e mamata ki ai ‘ene kau akó ka kuo ‘ikai hiki he tohi ko eni̇́. 31Ka kuo hikitohi̇ eni̇́, ke mou tui ko e Mi̇̄saiá ‘a Si̇̄sū, ko e ‘Alo ‘o e ‘Otuá, pea ‘i ho‘omou tui̇́, ke mou maʻu moʻui ʻi hono huafa.
Currently Selected:
Sione 20: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
