1 Tīmote 2
2
Ko e Hū ki he ‘Otuá
1‘Uluakí, ‘oku ou tapou atu ke ke lotu ma‘á e kakai kotoa pē. Kole ki he ‘Otuá ke ne tokoni‘i mo tāpuaki‘i kinautolu, peá ke fakahā kiate ia ‘a e hounga‘ia ho lotó koe‘uhi ko kinautolu tāutaha. 2Hūfia ‘a ha‘a tu‘i mo kinautolu kotoa ‘a e kau taki mā‘olungá, hei‘ilo te tau lava ai ‘o fai ‘etau lotu ki he ‘Otuá ‘i he funga ‘o e nofo melino mo fe‘ofo‘ofani. 3Ko e fa‘ahinga lotu ia ‘oku ‘aongá, pea ‘oku hoa mo e finangalo ‘o e ‘Otua ko hotau Fakamo‘uí. 4He ko e finangalo ‘o e ‘Otuá ke hao e kakai kotoa pē mo nau a‘usia kakato ‘a e mo‘oni ko ení,
5‘Oku toko taha pē ‘a e ‘Otuá,
pea ko Kalaisi Sīsū pē
te ne lava ‘o fakaa‘u kitautolu ki he ‘Otuá.
Ko e tangata mo‘oni ‘a Sīsū,
peá ne foaki ‘ene mo‘uí
ke fakahaofi ‘a kitautolu kotoa pē.
6Ko e ‘Otuá pē na‘á ne fakahā mai eni,
‘i he ‘aho na‘e tokateu ki aí.
7Ko hono ‘uhinga ia na‘e fili ai au ‘e he ‘Otuá ke u hoko ko e tangata malanga mo e ‘apōsitolo, ‘oku ou lea mo’oni ‘oku ‘ikai te u loi, ke fanongonongo ki he kakai muli ‘a e tui mo e mo’oni.
8‘Oku ou kole atu, kāinga, ke fai ho‘omou lotú, ‘o hiki hake homou nimá ‘i he loto-ma‘a, ‘o ‘ikai ‘i he ‘ita mo e feke‘ike‘i.
9Pea ko ‘eku faka‘amu ki he kakai fefiné, ke fai fakapotopoto ‘enau teuteú mo e ngaohi honau ‘ulú. ‘Oua mu‘a te nau kofu‘aki ha ngaahi kofu totongi mamafa, pe me‘a teuteu koula mo siliva mo mata‘itofe. 10Ko e teunga faka‘ofo‘ofa taha ‘o e kakai fefiné ‘a e fie tokoni ki he kakai kehé. 11‘Oku taau mo e kakai fefiné ke nau feinga ke fakalakalaka ‘enau ‘iló ‘aki ‘enau nofo fakalongolongo pē ‘o tokanga ki he ngaahi fakahinohino ‘oku faí. 12‘Oku totonu ke nofo fakalongolongo ‘a e kakai fefiné ‘o ‘oua ‘e fie fai tu‘utu‘uni ki he kakai tangatá. 13He na‘e ‘uluaki ngaohi foki ‘a ‘Ātama ‘ia ‘Ivi, 14pea na‘e ‘ikai ko ‘ātama na‘e kākā‘í, ka ko e fefiné, peá ne iku ai pē ‘o fai angahala. 15Ka ‘e fakamo‘ui e kakai fefiné ‘aki ‘enau fanaú, kehe ke nau anganofo ki honau husepānití, mo anga-lelei, mo anga-mā‘oni‘oni, mo anga-vaivai.
Currently Selected:
1 Tīmote 2: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
