Gênesis 7

Ngoo pygua kuery reve Noé kanoã py oikeague

1Ha'e gui Senhor aipoe'i Noé pe:

— Eike ke kanoã py, ndee ha'e ndero pygua kuery ha'e javive, mba'eta aikuaa xerenonde heko porã va'e reikoa aỹgua kuery mbyte.

2Ha'e javi regua mymba pe'u aguã ha'eve va'e ma sete irũ va'e 'rã reraa ava ha'e kunha. Ha'e rã mymba ha'eve'ỹ va'e ma peteĩ'i irũ va'e eraa ava ha'e kunha.#7.2 Ha'e kuery ma amongue mymba pe “Ha'eve'ỹ va'e” he'i 'rã, ha'e rã amboae pe ma “Iky'a e'ỹ va'e” he'i 'rã. Ha'e nunga Levítico 11 py omombe'u porãve.

3Guyra oveve va'e voi sete irũ va'e 'rã reraa ava ha'e kunha, peteĩ-teĩ regua okuave aguã yvy re.

4Mba'eta sete araa py ambo'oky 'rã yvy re, quarenta ára ha'e quarenta pytũ peve. Yvy gui amokanhymba 'rã amoingo va'ekue ha'e javi — he'i.

5Ha'e ramo Noé ojapo Senhor ojapo uka va'ekue ha'e javi.

6Noé ma seiscentos ma'etỹ oguereko, yy ovu vy yvy ojao'i jave.

7Oky ramo yy ovu va'e gui Noé oike raka'e kanoã py. Hexeve oike avi ta'y kuery, ta'yxy ha'e ta'y ra'yxy kuery.

8Oike avi mymba ha'eve va'e ha'e ha'eve'ỹ va'e, guyra ha'e yvy rupi otyryry va'e ha'e javi.

9Ha'e kuery ma Noé-a py oikepa kanoã py. Mokõ-mokoĩ oike ava ha'e kunha, Noé pe Nhanderuete ojapo ukaague rami.

10Ha'e gui sete ára rire yy ovu ouvy yvy áry.

11Seiscentos ma'etỹ Noé oguereko jave, mokoĩ jaxya ha'e dezessete araa py ma yy yvy guy gui ovu vy omondoropa ygua ha'e javi, ombokua ja'ea, ha'e yva voi ojepe'apa.

12Ha'e rami vy oky vaipa yvy re quarenta ára ha'e quarenta pytũ re.

13Ha'e va'e árave Noé oike raka'e kanoã py. Oike avi ta'y kuery Sem, Cam ha'e Jafé, ta'yxy ha'e ta'y ra'yxy kuery reve.

14Ha'e kuery ha'e mymba peteĩ-teĩ regua, vaka, yvy rupi otyryry va'e, guyra, guyra'i ha'e ipepo va'e ha'e javi,

15ho'o va'e ipytuẽ va'e ha'e javi gui mokõ-mokoĩ oike Noé reve kanoã py.

16Temimoingo ha'e javi regua gui oike ava ha'e kunha, Nhanderuete Noé pe ojapo ukaague rami. Ha'e rã ha'e oike rire ma Senhor omboty okẽ.

Yy ovu jave guare

17Yvy áry ma quarenta ára re yy ou. Ovuve ovy vy oguerovu heravy kanoã yvy áry gui.

18Yy ouve vy typyve ovy yvy áry. Ha'e rã kanoã ma ovu oupy yy áry.

19Yvy áry yy ou vy ojao'ipa. Yvyty yvatekueve va'e yva guýry ikuai va'e ha'e javi ojao'i.

20Yvyty ikuai va'e yy ojao'i vy sete metros raxa peve typy hi'áry.

21Temimoingo yvy re ikuai va'e omanomba: guyra, mymba oka regua ha'e ka'aguy regua, yvy re omyĩ va'e ha'e avakue ha'e javi.

22Opa marãgua ipytuẽ va'e, yvy pirua rupi ikuai va'ekue omanomba.

23Ha'e rami py temimoingo kuery yvy re ikuai va'ekue opa, avakue, mymba, otyryry va'e, guyra oveve va'e, ha'e javive okanhymba yvy gui. Noé anho oikove, ha'e hexeve kanoã py ikuai va'e guive.

24Cento e cinqüenta ára re yy itui yvy áry.

Currently Selected:

Gênesis 7: gunBible

Highlight

Copy