MAK 15

Jesu Rome gam uhpipa Pilat mai adinna

(Mat. 27.1,2,11-23; Luk. 23.1-5,13-23; Jn. 18.28—19.15)

1Zingmawng ahing hitahin siempu liente khu upate leh laigielmite, tualeh vaihawm mite zousie toh akikumkhawm ua, Jesu akaan ua, azawpi ua Pilat kungah apedoh ta uhi. 2Tuachi’n Pilat in “Judate leengpa na hi amah?” chi’n adong a, Aman adawnga, “Nang na genta hi,” achi hi.

3Tualeh siempu lienten thu tampiin aheh ua, hinanleh aman adawng sih hi. 4Tuachi’n Pilat in a dong kia a, akungah, “Bangma a dawng lou na hiei mah? En in, sil tampi in ahing heh uhi,” achi hi. 5Hinanleh Jesu’n bangma in adawng nawnta sih a, tuachi’n Pilat in lamdang asa mama hi. 6Tualeh Pilat in pawi ni chiengin henta mi khat anget penpen uh apawt sah zel hi. 7Tualeh mi khat amin Baraba kichipa ahelpite toh kolbut khat a uma, amaun ahelna zieh un tuol athat uhi. 8Tuachi’n mipite ava peitou ua, ama ua dinga abawlpieh zel banga bawl dingin a ngen uhi. 9Hinanleh Pilat in a dawng a, akung uah, “Judate leengpa hing hadoh pieh leeng na ut uoi?” achi hi. 10Aziehpen siempu lienten thangsietna zieh a Ama apiehdoh uh ahi chi athei hi.

11Hinanleh siempu lienten, Baraba hing hadoh zaw in, chia ngen dingin mipite achiilta uhi. 12Tuachi’n Pilat in adawnga, akung uah, “Judate leengpa na chipa uh bang ka lawta diei leh?” achi kia hi. 13Tuachi’n amaun “Kross ah kilbeh in,” chiin akikou kia uhi. 14Tuachi’n Pilat in akung uah, “Bangdingin la, Aman bang bawlkhiel anei ei?” achi hi. Tualeh ama un “Kross ah kilbeh in,” chiin akihakou semsem uhi. 15Tuachi’n Pilat in mipite suhlungkim a ut a, Baraba ahadoh piehta hi, Tualeh Jesu ajep zouin Kross a kilden dingin apeta hi.

Sepaiten Jesu asimmawbawlna uh

(Mat. 27.26-34; Luk. 23.24-32; Jn. 19.16-22)

16Tuachi’n galkapten Ama khu innpi huongsung Praitorium achi uah, apuilut ua, tualeh galkap zousie akihankhawm uhi. 17Tualeh puonsandup a silsah ua, ling lukhu aphan ua, akhusah ua, 18tualeh Ama asalam ua, “Judate leengpa chiin salam abuh uhi!” 19Tuachi’n alu pumpengin asat ua, chil asietkhum ua, tualeh khupdin in Ama abie uhi. 20Tualeh chiemmui bawlna a azah zou un, puonsandup khu asatunga pat ahawhkhie ua, Ama puonte asilsah kia ua, Kross a kilden dingin azawpita uhi.

21 # Rom. 16.13 Tualeh mi khat gam lam a kipata hing pei, Sairin khuo a mi, Simon, Alexander leh Rufus pa khu Kross paw dingin amanta uhi. 22Tualeh Jesu khu Golgotha mun ah azawpi ua, tuakhu lugu mun, china ahi. 23Tuachi’n uoiin murrah toh kihal dawn dingin apie ua, hinanleh Aman asang sih hi.

Jesu kildenna

24 # Late. 22.18 Tualeh Kross a akilbet zou tahun, michin in atan ding chiet uh theina dingin aisan in apuonsilte akihawm uhi. 25Tualeh Ama akilbet hun u’khu nai thumna vel ahi. 26Tualeh ahehna lai uh, atunglam ah atah ua, “JUDATE KUMPIPA” chiin agiel uhi. 27#Isai. 53.12Tualeh Ama toh suomhat mi ni akilbet ua, khat azietlam ah, khat avei lam ah. 28Tuachi’n Laisiengthou in, “Ama khu mi giloute toh simtha ahi,” achi khu atangtungta hi. 29#Late. 22.7; 109.25; Mak. 14.58; Jn. 2.19Tualeh khum mun a hing pei kha pouma in alu uh thinkhum in, “Ehei! Nang Pasian biehinn susie a, ni thum sunga lamdoh kia pa; 30Nangma kihundoh inlen, Kross akipat hing kumkhie in, chiin a elhou uhi.” 31Tuachibangmain siempu lienten zong laigielmite toh amau’leh amauh kihouin, a elhou ua, “Aman mi dang ahundoh a, Ama akihunkhe thei sih hi. 32I mu a, tualeh igintat theina dingin, Khrist, Israel leengpa tuin Kross apat hing kumkhie heh” achi uhi. Tualeh Kross a Ama toh akilbet khawmte un zong Ama a elhou uhi.

Jesu shina

33Nai guhna ahing hitah in, gam pumpi tungah nai kuona tandongin mielna a umta hi. 34#Late. 22.1Tualeh nai kuona ah, Jesu aw ngaitah in “Eloi, Eloi lama Sabakthani?” chiin akikoukhie a, tua khu “Ka Pasian, Ka Pasian bangdinga hing taisan na hei?” china ahi. 35Akunga ding pawlkhatten tuami azah tahun “Ngai un, Elijah ahan hi,” achi uhi. 36#Late. 69.21Tuachi’n mi khat atai a, spanji khat zu thua a die dimin, pumpeng chieng dawna tahin adawn dingin apie a, ngaisahda un, “Ama lakhe dingin Elijah ahing pei ngel ei mah en vai,” achi u hi. 37Tuachi’n Jesu aw ngaitah in akikou a, a hagau ahata hi. 38#Pawt. 26.31-33Tuachi’n Pasian biehinn a puonjah khu atunglam a kipat anuoilam tan dongin phalni kisuo in ahing kehsuohta hi. 39Tualeh Ama maingat a ding galkap lienpan tuabanga kikoudoh leh ahagau ahata chi amu tahin “Tam mipa pen Pasian Tapa hi ngeingei va,” a chi hi.

40 # Luk. 8.2,3 Khunah numeite zong gamlatah akipat a en in a um ua, tuate lah ah, Mari Magdalene, Jakob naupangzaw leh Joses nu Mari, tualeh Salomi apang uhi. 41Amaute khu, Galili gam a aum lai a Ama zui a, a nna seppiehte zong ahi uhi. Tualeh numei dang tampi Jerusalema Ama toh zawhtoute zong a um uhi.

Jesu kivuina

(Mat. 27.57-61; Luk. 23.50-55; Jn. 19.38-42)

42Nitahlam ahing hitah in, kiginni ahi ziehin, tua khu khawlni#Khawlni = Sabbath ni masang ni ahi. 43Joseph Arimathai khomi vaihawm zatathuoitah Pasian gam hing tung ding kilam en zinga um, ahing pei a hangsantahin Pilat kungah alut a, Jesu luong ava ngenta hi. 44Tuachi’n Pilat in hichibanga ashi pai khu lamdang asa mama a, tuachi’n galkap lamkai khat ahan a ashina asawt taimah chiin adong hi. 45Tualeh galkap lamkaipa a kipat ashita chi atheichien tahin, aluong Joseph kungah apeta hi. 46Tuachi’n aman puon nem alei a, Jesu alakhie a, puon nem in atuom a, suong khuoh kuoh han khat ah asielta hi, tualeh suong khat hankot ah alia a, akhata hi. 47Tualeh Mari Magdalene leh Joses nu Mari in asielna amu uhi.

Currently Selected:

MAK 15: ZOUBSI

Highlight

Copy