MATHIU 15
15
Pulepate thugousie angaisah sih chia demna Jesu’n adawnna
1Tuachi’n Jerusalem khuo a um laigielmite leh Pharisaite Jesu kungah ahing pei ua, 2“Bangdinga na nuazuite’n upate thugousie palsana takhiel zing uh ahiei? a ann neh ding chieng un akhut uh asil ngai sih uhi,” achi uhi.
3Hinanleh Aman adawnga akung uah, “Bangzieh a nouten zong, na thugousie zieh ua, Pasian thupieh palsana takhiel na hi uoi? 4#Pawt. 20.12; Danp. 5.16; Pawt. 21.17; Siempu. 20.9Pasian in na nu leh na pa zatat in, koipou anu ahiei a pa ahiei, gausap pouma shi sah ngeingei ding chi ahi thuoi a, achi hi. 5Hinanleh nouten koipou anu ahiei apa ahiei kunga, kei kunga kipat a phattuomna na mu ding pouma Pasian kunga pieh ahita, chi pouma in, 6a nu leh apa azatat ding ahi sih na chi uhi. Tambangin, na thugousie zieh un, Pasian thupieh bangmalou na suohsahta uhi. 7Nou milepchiete aw, Isai in na tungtang thu uh ana genlawh adih mama hi!
8 #
Isai. 29.13
Tam miten akam un ahing nai ua,
akam un ahing zatat uhi;
Hinanleh alungtang un ahing gamlat uhi.
9Tualeh athuhilna uah mihing thupieh akihil zieh un,
Kei ahing bieh uh amawhna ahibou hi,
ana chi khu,”
achi hi.
10Tuachi’n Aman mipite ahan a, akung uah “Ngai unlen theisiem un. 11Kam a lut in asubua sih a, Kam apawtin, tuami ngei in mi asubua hi,” achi hi. 12Tuachi’n anuazuite ahing pei ua, akungah, “Pharisaiten tam thu azah ua alungkimlou dan uh na thei ei?” achi uhi. 13Hinanleh Aman adawnga akung uah, “Singkung chinteng, van a um ka Pa suonlou khu phungkal in a um ding hi. 14#Luk. 6.39Amaute awlmaw sih un, amaute khu mitto lamkaite ahi uh. Mittaw in mitto apui leh ani un kokhuh ah akekhawm ding uhi,” chi’n adawnghi. 15Tuachi’n Peter in adawnga akungah, “Tam gentena thu koute hing hilchien in,” achi hi.
16Tuachi’n Jesu’n, “Noute zong tutan dong theisiem lou a um nalai na ve uoh maw? achi hi. 17Kam sunga lut zousie gilpi ah atungsuh a, dailenna ah paidoh in a um chi na theisiem nai sih uh amah? 18#Mat. 12.34Hinanleh Kam a pawtte pen lungtanga kipat a hing pawt ahia, tuaten mi abuasah hi. 19Aziehpen lungtang akipat in ngaituona giloute, tuolthanate, angkawmnate,#Aangkawm zinei leh pasal neisate kaala lupkhawmna numei pasal kaala mawnate nungah tangval kiteng loute lupkhawmnate. numei leh pasal kaal a mawnate, guhtatnate, theipitu dihlou a pannate leh mi gensietnate ahing piengdoh zel hi. 20Tam silte khu ahi mihing buasah, hinanleh khut sil lou a ann neh in mi asubua sih hi, achi hi.
Jentel numei tanu suhdamna
(Mak. 7.24-30)
21Tuachi’n khuna kipat in Jesu apawtdoh a Tai-ar leh Sidon gam lam ah apeita hi. 22Tualeh Ngai vawi, tua gam akipat in Kanaan numei khat ahing pei a, “Aw Mangpa David Tapa Kei hing khotuo in, ka tanu dawimatin agim mama hi,” achi hi. 23Hinanleh Aman kamteng khat in zong adawng sih hi. Tualeh anuazuite ahing pei ua, akungah, “Amanu sawlmangin, inua ah akikou kou mai hi,” chiin angen uhi. 24Aman adawng a, Israel innkuonte lah a belam mangte kung loungal ah sawl ka hi sih, achi hi.
25Tuachi’n amanu ahing pei a, “Mangpa hing panpi in chi’n Ama abeta hi. 26Hinanleh Aman adawnga, “Tate tanghou lahpieh a, ui noute kunga pieh akilawm sih hi achi hi. 27Tualeh amanu’n, “Mangpa ahivang ahina hi, hinanleh uiten zong apu uh dawkan akipat a tanghou neng kete ane zel sam uhi, achi hi. 28Tuachi’n Jesu’n adawnga, amanu kungah, “Numei aw, na ginna thupi hina va-ia e, na lunggul bang tahin na tungah umta heh,’” achi hi. Tuachi’n atanu khu tua hun mama in adamta hi.
Jesu’n mi tampi adamsahna
(Mak. 7.31-37)
29Tualeh Jesu khuna pat in apei a Galili tuipi gei ah ahing tunga, tualeh muol ah apei tou a, khunah atouta hi. 30Tuachi’n mipi tampi, kengbaite, mittote, hamtheiloute, piengkhielte, leh natna dang neite hing pui in, Jesu kengbul ah alumsah ua, Aman ana sudam zel hi. 31Tuachia hamtheiloute ahing ham ua, piengkhielte ahing hoi ua, kengbaite kenga hing peitheita, mittoten khuo amu theita uh, chi mipiten amu tah un, lamdang asata ua, tuachi’n Israelte Pasian apahtawita uhi.
Mipi sangli vahna
(Mak. 8.1-10)
32Tuachi’n Jesu’n anuazuite akungah ahan a, mipite tuin ka kungah ni thum a umta ua, neh ding bangma aneilou zieh un, ka hepi mama hi. Tualeh amauh ann ngawl in ka peisah nuom sih hi, dachiengin lamkaal ah basam khava uh, achi hi. 33Tuachi’n anuazuiten akungah, “Mipi hichiza a tam gilvana tham ching tanghou gamdai ah, hei apat imu diei?” achi uhi. 34Jesu’n akung uah, “Tanghou pheng bangza na nei uoi? achi a; tuachi’n amaun, pheng sagi leh nga neu tawmnou khat, achi uhi.
35Tuachi’n Aman mipite tuol a tou dingin thu apie hi. 36Tualeh tanghou pheng sagi leh nga ala a, kipah thu agen a, aphal suo a, nuazuite kungah apie a, tualeh nuazuiten mipite kungah apie uhi. 37Tuachi’n abawn un ane ua agilva chietta uhi; tualeh aneh val neng uh akhop uleh seu sagi adim nalai hi. 38Tualeh anete pen numei leh naupang simlou in piching ngen tulli ahi uhi.
39Tuachi’n mipite asawlmang a, kuong sungah atuong a Magdala gam lam ah atungta hi.
Currently Selected:
MATHIU 15: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
