LUK 15

Belam mang gente thu

(Mat. 18.12-14)

1 # Luk. 5.29,30 Tuachi’n sie dongmite leh mikhielte zousie in athu ngaikhe dingin akunglam ahing zuon uhi. 2Pharisaite leh laigielmiten, “Tam mipa’n mikhielte akigoppi a, ann aneh khawmpi hi chiin a phunchiehta uhi.” 3Tuachi’n Aman akung uah, tam gente thu agen hi:

4“Noute lah a koi ahiei in belam za nei henlen, alah a khat mangsah taleh, sawmkuo leh kuote gamdai a nuasie a, amangpen amu masangsie va sui lou ding koi na hi uoi? 5Tualeh amu kia tahin kipahtahin aliengkou ah apuo hi. 6Tualeh inn atuntahin, alawmte leh a innvengte ahan khawma akung uah, Hing kipahpi un, ka belam mang ka mu kiata hi, achi hi. 7Ka hing hil ahi, tuachimabangin midih kisiana tuon ding neilou sawmkuo leh kuote tung sangin mikhiel khat kisiana tungah van ah kipahna a lien zaw ding hi.

Sum mang gente thu

8“Tualeh numei koi ahiei in dangka sawm nei henlen khat mangsah taleh meivah de a inn phiet in amu kia masangsie lunglut tah a sui lou ding koi ahiei um? 9Tualeh amu kia chiengin alawmte leh a innvengte ahankhawm a, hing kipahpi un, ka dangka mansah ka mu kiata hi, achi hi. 10Ka hing hil ahi, tuachimabangin Pasian vansawlsiengte masang ah mikhiel kisia khat tungah kipahna a um hi.”

Tapa tangmang gente thu

11Tuachi’n Aman “Mi koi ahiei in tapa ni anei a; 12Anaupang zaw pen in apa kung ah, Pa Kei tan ding gou teng hing piein achi hi. Tuachi’n apa’n asum khu ahawm piehta hi. 13Tualeh ni sawtlou nuain tapa naupang zaw pa’n atan teng abawnin alakhawm a khuol gamlapi ah azinta a, tua mun ah anei zousie noptat tahin azang bei siengta hi. 14Tualeh azah bei sieng tahin khum gam ah kiel thupitah ahing tunga, neh ding ahing kitasamta hi. 15Tuachi’n ama apei a khum gam mi khat ava belta a, tuachi’n aman ama khu voh ann pe dingin alou lang ah ana sawl hi. 16Tualeh vohte neh begapsau hawte a agil vasah a ut mama a, koiman lah bangma ape sih hi. 17Hinanleh ama leh ama ahing kiphawhkhiet tahin, Ka pa kunga kilaw suohte ann neh senglou nei atam tam u’toh, Kei lah tana gilkiel a shi ding hita mai veng in! 18Ka thou ding a, ka pa kungah ka pei dinga, akungah, “Pa aw van a tungah leh nangma mitmu in sil ka bawl khielta; 19Na tapa chi taah zong ka hi nawn sih, na kung a kilaw na suohte khat bangin hing bawlin, ka chi ding,” achi hi. 20Tuachi’n athoua, apa kungah ahing peita hi. Hinanleh gamlapi a aum lai in apa’n ana mu a, alainat mama a, ana del a, a ngawngkawi a, tualeh atawpta hi. 21Tuachi’n atapa’n akungah, Pa aw van a tung ah leh nangma mitmuin sil ka bawlkhielta hi; na tapa chi taah zong ka hi nawn sih, achi hi. 22Hinanleh a pa’n asuohte kungah puontuol hoi penpen kintahin hing ladoh unlen, silsah un, akhut ah khutsip but sah unlen, akengah kengdap bun sah un. 23Tualeh bawngnou thautah tanah hing la unlen, gou un, tuachi’n ine ding ua, kipah tahin i um ding uhi. 24Aziehpen tam ka tapa ashi a ahing hingkiata hi; amanga akimu kiata hi, achi hi. Tuachi’n kipahtahin a umta uhi.

25“Tualeh atapa upazaw pen lou ah a um hi. Inn ahing tun kuon in tumging leh lam husa azata hi. 26Tuachi’n asuohte khat ahan a, Tamte bang china atai leh? chiin adongta hi. 27Tualeh aman akungah, na nau ahing tunga chidam lu dam a amukia ziehin na pa’n bawngnou thautah agou hi, achi hi.

28Tuachi’n ama khu alungthah ta a, alut nuom ta sih hi. Tuaziehin apa ahing pawtdoh a, ahing zawlta hi. 29Tuachi’n aman adawnga, apa kungah, Ngai in, kum hitan veipi na nna sem ing a, na thupiehte lah khat zong palsan ngailou inga; ka lawmte toh guolnop ka bawlna dingin kelnou khat nangawn zong na hing pe ngai sih hi. 30Hinanleh tam na tapa, kizuate kunga na neina lam teng va netum siengpa ahing tun tahin ama a dingin bawngnou thautah na gou pai viel a, achi hi. 31Tuachi’n apa’n akungah, ka tapa nang pen ka kunga um ngitnget na hi a, Ka nei zousie zong nang a ahi. 32Kipahtah leh nuomtah a i um ding hizawlou ahiei mah? Tam na nau ashi a, ahing hingkiata hi, amanga i mu kiata ahi, achi hi,” achi hi.

Currently Selected:

LUK 15: ZOUBSI

Highlight

Copy