LUK 1

Thumakai

1I lah ua kichientah a gintat a na um, tua silte mi tampiin athu gel ana tup uh; 2Achiil a kipat a mit a mute leh thu nasemten ahing hil bangun, 3Zatat umpen Theophilus#Theophilus-Greek min khat ahia, akhiehna ‘Pasian it’ china ahi. aw, abul akipat in sil zousie theichienna bukimna nei in akizom diudeu a na kunga gel hoi kasa hi; 4Tuahileh tumasang lai a nang hing nakihil thute adih ngel ahina chi na theichien ding hi.

Pasian biehinn a Zakaria nasepna

5 # 1 Khang. 24.10 Judia gam a leengpa Herod dam lai in, Abijah pawl a mi, amin Zakaria kichi siempu nasem khat a um a, tualeh azi khu Aaron tanute lah a khat ahia amin Elizabeth ahi. 6Tualeh ani un Pasian mitmu in dihtat tahin a um ua, gensiet beiin Mangpa thupiehte leh adan zousie zui in a um uhi. 7Hinanleh Elizabeth a chiin ziehin ta anei sih ua, ani un kum upa lam ahi tuohta uhi. 8Tualeh tambang ahing hia, apawlte uh bawldan dungzui a ama hun a Pasian masanga siempu nna asep lai in, 9Siempu dan dungzui in Mangpa biehinn alut chienga gimnamtui hal khu atan ahi a. 10Tualeh gimnamtui akihal lai in mipite abawn un innpulangah thu ana ngen uhi.

Vansawlsiengin Johan pien ding thu agenna

11Tuachi’n Mangpa vansawlsieng khat gimnamtui halna maitam zietlam a dingin akungah ahing kilah hi. 12Tualeh Zakaria in ama amu tahin, amangbanga zauna in adimta hi. 13Hinanleh vansawlsiengin akungah, Zakaria, “Zau sin, na thungetna zah ahitah zieh in, na zi Elizabeth in tapa ahing neipieh dinga, amin Johan na hisah ding ahi. 14Tualeh nang nuomin na kipah ding a, tualeh mi tampite ama pienziehin akipah ding uhi. 15#Kisim. 6.3Mangpa mitmuin ama milien ahi ding a, uoin leh zu mawngmawng adawn sih ding, tualeh anu sunga kipat nangawnin Hagau Siengthouin adim ding hi. 16Tualeh Israel tate tampi Mangpa a Pasian uh langah akiheisah kia ding hi. 17#Mala. 4.5,6Tualeh pate lungtang tate lam a kiheisah ding leh thumangloute midihtat pilna lam a kihei sah ding, tualeh Mangpa ding a mite kimansa a umsah dinga na bawlmasa ding in, Elijah lungsim leh silbawltheina toh Mangpa mai ah apei ding hi, achi hi.

Zakaria ham theilouna

18Tuachi’n Zakaria in vansawlsieng kungah, “Tami bangchin ka thei thei diei? Kei lah tehsie hita ing a, ka zi zong ateh mama tahi,” achi hi. 19#Dan. 8.16; 9.21Tuachi’n vansawlsieng in adawnga, akungah, “Kei Gabriel Pasian masanga ding zel ka hi; na kunga thu gen ding leh tam thu kipah huoite hil dinga sawl ka hi. 20Hinanleh Ngai in, ahun banga hing tung ding tam ka thugente, na gintat lou ziehin, tam silte ahing tun masangsie’n hamtheilou leh thugen theilouin na um ding hi,” achi hi. 21Tualeh mipiten Zakaria ana ngah ua, Pasian biehinn sunga a um sawt seng ziehin lamdang asa mama uhi. 22Ahing pawtdoh tahin akung uah thu agenthei tasih a; tuachi’n biehinn sungah kilahna amu ahi chi atheita ua; aziehpen akung uah akhut in theisahnate abawl a, tualeh hamthei louin a umden ta hi. 23Anasepna ni abei tahin a inn langah apeita hi. 24Tuachi’n tua nite nua in, azi Elizabeth ahing gaita a, ha nga sung akibuta hi. 25Mite lah a ka minsie sel dingin, “Mangpa’n ahing mu tahin tambangin ka tungah abawlta hi.”

Gabriel in Jesu pian ding agenna

26Aha guhna ah Pasian in vansawlsieng Gabriel Galili gam a khuo khat, amin Nazareth kichi ah, 27#Mat. 1.18Nungah siengthou khat kungah asawl a, tua nungah khu David hahlesuon mi khat amin Joseph toh kikhamsa ahi ua, nungah siengthou min khu Mari ahi. 28Tualeh vansawlsieng khu a kungah alut a, akungah, “Nuomin nahpitaha deisahnu, Mangpa na kungah a um hi, numei lah ah hamphanu nahi,” achi hi. 29Hinanleh amanu’n ama amu tahin athugente ah alungbuoi a, tami bangchibang kinousietna ahitabep diei izaw, chiin akingaituo hi. 30Tuachi’n vansawlsieng in akungah, “Mari zau sin Pasian deisahna na tang hi. 31#Mat. 1.21Tualeh Ngai in, nau na pai dinga, tapa na nei dinga, amin JESU na hisah ding hi. 32#2 Sam. 7.12,13,16; Isai. 9.7Ama mi lien ahing hi dinga, Tungnungpen tapa akichi ding hi, tualeh Mangpa Pasian in, akungah, apa David Mangtoupha ape ding hi. 33Tualeh Jakob hahlesuonte tungah kumtawn in vai ahawm ding hi, achi hi. 34Tuachi’n Mari in vansawlsieng kungah, “Tami bang achi hi thei diei? Pasal lah nei nailou inga,” achi hi. 35Tualeh vansawlsieng in adawnga akungah, “Hagau siengthou na tungah ahing tung dinga, Tungnungpen silbawltheina in ahing liekhu dinga, tuaziehin Mi siengthou hing pieng ding zong Pasian Tapa akichi ding hi. 36Tualeh Ngai in, na sanggamnu Elizabethin zong ateh nua in tapa khat apaita hi, achiing achi nu uh tuin aha guhna ahita hi. 37#Siem. 18.14Aziehpen Pasian dingin ahitheilou bangma a um sih ding hi, achi hi. 38Tualeh Mari in “Ngai in, Mangpa suohnu ka hi, na thu bangin ka tungah tung heh,” achi hi. Tuachi’n Vansawlsieng in anuasieta hi.

Mari in Elizabeth avena: pahtawina la

39Khum hun lai in Mari akisadoh a, singtang gam a Juda khopi khat ah kintah in ahawta hi. 40Tualeh Zakaria inn ah alut a, Elizabeth anousiet hi. 41Tualeh Elizabethin Mari nousietna azah tahin asunga naungeh khu akidieng hi, tualeh Elizabeth khu Hagau Siengthouin ahing dimta hi. 42Tuachi’n aw ngaitah in akikoukhie a, “Numei lah ah hamphanu na hi, tualeh na gil a ga zong ahampha hi. 43Tualeh ka Mangpa nu ka kunga na hing haw, bangchidan ahiei? 44Ngai vawi, na hing nousietna aw gin kabil a alut tahin, ka gil sunga naungeh nuom in akidieng hi. 45Tualeh agingta nu zong ahampha hi, Mangpa’n akunga athugente tangtung ding ahizieh in, achi hi.

46Tuachi’n Mari in,

“Ka hinna in Mangpa apahtawi a,”

47ka hagau zong ka hundampa,

Pasian tungah anuom seng hi.

48 # 1 Sam. 1.11 Aziehpen Aman asuohnu ngiem dan athei a,

Ngai in,

tu akipat in khangtha zousie in,

hampha ahing chi ding uhi.

49Aziehpen Ama mihat in ka tungah,

sil thupitah ahing bawlpieh a,

Amin zong Siengthou ahi.

50Ama zaudan siemte tungah,

ahepina akhang akhangin a um hi.

51Abantha in athahat dan a ensah a,

mi kiliensahte lungtang ngaituona athethang hi.

52 # Job. 5.11; 12.19 Aman mi hatte khu amangtoupha ua pat in akaikhie a,

mi ngiemte atawisangta hi.

53Aman gilkielte sil hoi in agilva sah a,

tualeh mihausate khu khutguohin asawlmangta hi.

54Ahepina theizingnain asuoh Israel apanpita hi;

55 # Siem. 17.7 # 1 Sam. 2.1-10 kumtawn a dinga ipu ipate,

Abraham leh ahahasuonte kunga,

ana chiemsa mabangin.

56Tualeh Mari akungah ha thum vel ataam a,

tuachi’n a inn ah apei kiata hi.

Baptispa Johan pienna

57Tualeh Elizabeth khu anau suoh hun ahingtungta a; tapa ahing neita hi. 58A innvengte leh asanggamten, Mangpa’n ahepina thupitah atungah asulangta chi azah tahun akipahpi uhi. 59#Siempu. 12.3Tuachi’n a ni giet niin naungeh teptan dingin ahing pei ua, amin dingin apa min mama Zakaria hisah atum uhi. 60Tuabepin anu’n adawnga, “Tuabang hilou e, Johan hisah zawh ding ahi,” achi hi. 61Tualeh amaun amanu kungah, “Na be na phung lah ah tami min puo koima umloupi,” achi uhi. 62Tuachi’n amaun apa kungah, amin bang na hisah nuom ei chiin theisahna abawl uhi. 63Tuachi’n ama’n laigelna suonglai khat angen a, “Amin Johan ahi,” chi’n agielta hi. Tualeh amaun lamdang asa mama uhi. 64Thakhat in akam ahing kihongta a, alei ahing kiham a, ahing ham a, Pasian apahtawita hi. 65Tuabepin akim ua, umte zousie azauta ua, tualeh tam thute Judia singtang gam zousie ah, athangsuoh ta hi. 66Tualeh azakha zousiein, alungtang uah a vom chiet ua, “Tam naungeh bangchibang ahing hi tabep diei izaw?” achi uhi. Tualeh Mangpa khutin ama a umpi hi.

Zakaria in Johan nasep ding agenlawhna

67Tuachi’n apa Zakaria Hagau Siengthouin ahing dim a, thu agenta a, 68“Israel Mangpa, Pasian pahtawi in um heh, Aziehpen Aman amite ahing ve a, ahing tanta hi. 69Tualeh asuoh David innkuonte lah ah hundamna kii#Hundamna kii Hundampa thahat china ahi. ahing tungdoh ta hi. 70Leitung pienchil apat aguolnei siengthoute kam a ana gensa mabangin; 71Igalte lah a kipat leh ahing mudate zousie khut akipat hundam in i um a; 72Ipu ipate kunga ana chiemsa khotuona tangtungsah ding leh athuhun siengthou thei ngitnget dingin; 73ipu uh Abraham kunga kichiem a akihahsiel na khu, 74I galte lah a kipat in ahing hunkhie a, zauloua Ana isep theina dingin, 75I damsung nite a, Amasang a siengthou leh dihtattah a um dingin. 76#Mala. 3.1Tualeh nang naungeh, Tungnungpen guolnei ahing kichi ding hi; aziehpen alampite bawl dingin Mangpa masangah na pei ding hi. 77Akhelnate uh ngaidamna dinga, amite kunga hundamna theina pe dingin. 78I Pasian uh khotuona nemtah zal in; tunglam a kipat nisuoh in ahing khawta hi.” 79#Isai. 9.2Miel lah leh shina lim nuoi a toute tanvah ding leh hamuonna lampi a i kengte hing puipieh ding in, achi hi. 80Tuachi’n naungeh khu ahing khang lien a, hagau lam ah ahing hat deudeu a, Israelte kunga ahing kilah masangsie in gamdai ah a umta hi.

Currently Selected:

LUK 1: ZOUBSI

Highlight

Copy