JOHAN 21

Tiberia dil a Jesu kilahna

1Tam silte nuain Jesu Tiberia diilah, anuazuite kungah akilah kia a, tambangin akilah hi. 2Simon Peter toh, Didum kichi Thomas toh, Galili gam a Kana khuo a um Nathanael toh, Zebedi tapate toh, tualeh anuazui dang ni toh, umkhawm ahi uhi. 3#Luk. 5.5Simon Peter in akung uah, “Ngaman a kuon ding ka hi,” achi hi. Amauten akungah, “Kouzong hing haw va ung,” achi uhi. Tuachi’n akuonkhie ua, kuong sungkhat ah atou pai ua, hinanleh tuami zan in bangma aman sih uhi. 4Hinanleh zingmawng ahing hitah in, Jesu diilpieu ah a ding a, hinanleh nuazuiten Jesu ahilam athei sih uhi. 5Tuachi’n Jesu’n akung uah, “Naute aw, nga khatbeh manlou na hi uoi mah?” achi hi. Amaun “Manlou” chiin adawng uhi. 6#Luk. 5.6Jesu’n akung uah, “Kuong gei zietlam pangah na len uh sep un, them khat na man ding uhi,” achi hi. Tuachi’n amaun asep ua, tuachi’n nga atamseng ziehin akaidohzou sih uhi. 7Tuaziehin Jesu’n a it nuazuipa’n Peter kungah, “Mangpa lah ahi’n,” achi hi. Simon Peter in Mangpa ahi chi azah tahin apuonah tungnung asil zuai a (guohtanga um ahi ziehin) tui lah ah atawmkheta hi. 8Hinanleh nuazui dangten len a ngate kaikawmin kuong neu khat in ahing pei ua, aziehpen tuipi pieu gei gamla lou tong zani vel a um ahi uhi. 9Tuachi’n amauh pieu gaw ahing tun tah un, meihol kitaw kuong leh atunga nga leh tanghou kikoi amu uhi. 10Jesu’n akung uah, “Na nga matte uh themkhat hing tawi vawi un” achi hi. 11Simon Peter khu apeitou a, nga lienpipi za leh sawmnga leh thum dim len khu pieu gei ah ahing kaidoh hi tuabang khopin nga tam nanleh len akeh sih hi. 12Jesu’n akung uah, “Hing pei unlen zing ann hing ne un” achi hi. Hinanleh nuazuite koiman, “Nang koi na hiei?” achi ngam sih uhi, Mangpa ahi chi athei uhi. 13Tuachi’n Jesu ahing pei a tanghou ala a, akung uah apie a tuamabangin nga zong apie hi. 14Tam pen Jesu shina akipat athawkia nua a, anuazuite kunga akilah thum veina ahi.

Jesu leh Peter kihouna

15Tuachi’n a zing ann neh zou un, Jesu’n Simon Peter kungah, “Simon Johan tapa, tamte sangin kei nang it zaw ei?” achi hi. Aman akungah, “Hi Mangpa ka hing it chi na thei hi,” achi hi. Jesu’n akungah “Ka belamnoute vah in” achi hi. 16Jesu’n ani veina dingin akungah “Johan tapa Simon, Kei nang it ei?” achi kia hi. Aman akungah, “Hi, Mangpa ka hing it chi na thei hi,” achi hi. Jesu’n akungah “Ka belamte ching in,” achi hi. 17Jesu’n athumveina dingin, “Simon Johan tapa Nang kei nang it ei?” achi hi. Jesu’n akunga thumvei tah, “Nang kei na hing it ei” achi ziehin Peter alunggim hi. Tuachi’n Peter in akungah “Mangpa nang sil zousie na thei a; Ka hing it hi chi na thei hi,” achi hi. Jesu’n akungah, “Ka belamte vaa in,” achi hi.#Jesu’n Peter kung na hing it ei chia thum vei adohna pen Peter in thum vei akitheimaw bawl toh genkah thei ahi. 18Chitahtahin ka hinghil a hi, na naupan lai in na kawng nangma’n na kigah a, na utna lamlam ah na kivah kawi hi; hinanleh na hing upat chiengin na khut na zah dinga, midangten na kawng ahing gahpieh dinga, na utlouna lamlam ah ahing kai ding uhi, achi hi. 19Jesu’n tam thu agen pen, Peter in bangchibang shina thuoh a Pasian apahtawi ding ahiei, chi agenna ahi. Jesu’n tam thute agen zouin akungah “Kei hing zui in,” achi hi. 20#Jn. 13.25Tuachi’n Peter akinuahei leh Jesu’n nuazui a itpa, nitah ann neh lai a, a anga kingam a “Mangpa koi ahiei Nang hing mansah ding?” chipain hing zuiin amu hi. 21Peter in amapa amu tah in Jesu kungah, “Mangpa tam mipa’n bang abawl diei?” achi hi. 22Jesu’n akungah, “Ka hing pei masangsie dam a umden dingin dei leng, nang bang phatmawna a um ei? Nang hing zui in,” achi hi. 23Tuachi’n tam nuazuipa khu shilou ding ahi chiin unaute lah ah tam thu kigen akithangta hi, Jesu’n lah ama ashi sih ding achi sih a, “Ama ka hing pei masangsie dam a umden dingin dei leng, nang bang phatmawna a um ei,” achi ahizaw hi. 24Tam silte theisahpa leh tam thute gielpa khu tam nuazuipa ahi, tualeh athu theisah khu adih ahi chi ithei hi. 25Tualeh Jesu’n abawl sil lamdang tampi zong a um nalai hi, tuate gelkim sieng ding hileh laibu kigiel dingte khu leitung pumpi in zong dawl zou dingin ka gingta sih hi. Amen.

Currently Selected:

JOHAN 21: ZOUBSI

Highlight

Copy