SIEMCHILBU 44

Joseph in a unaute aze-etna

1Tuachi’n aman a innsung vaisaipa kungah, “Tua mite tumbu ah apuoh zaw zaza uh bu sung dim inlen, asum chiet uh a tumbu sung chiet uah guongin achi hi. 2Tualeh tua ka Dangka nou pen anaupang penpa tumbu ah guongin, abu man sum toh chiin thu apie a,” tuachiin aman Joseph genbangin a bawlta hi. 3Tualeh zingmawng khuo ahing vah tahin tuamite a Sabiltungte utoh a sawl kheta uhi. 4Tualeh khopi akipat apeikhiet nua uh gamla atun masangun Joseph in a innsung vaisaipa kungah, “Kisa inlen tua mite vadel in, tualeh na phah tah chiengin akung uah, bang chidan a hoina sietna a thuh na hi uoi?’ 5Tami ka pu uain dawnna leh a aisanna nou hilou ahiei mah? Tambanga na namtat uh takhiel hi uteh va chi in,” achi hi.

6Tualeh amaute adel phata a, akung uah tam thute abang bangin agen ta hi. 7Tualeh amaun akung ah, “Pu bang chidana tambang thute na gen ahiei? na suohten tambang sil ka bawllou ding dan uh.’ 8En in, ka tumbu gong ua ka sum mute uh zong Kanaan gam apat na kungah ka hing tawikia uhi, bang chidanin na pu inn apat dangka ahiei, Sana ahiei ka gu thei ding uoi?’ 9Na suohte lah a na muna penpen ama lah shi henlen, kouma zong na suoh hi mai va ung,” achi uhi.

10Tualeh aman “Tuin na thu bangun hiheh, akimuna penpen ka suoh hi vanin, noupen getsiet banglou hi va uteh,” achi hi. 11Tuachi’n amaun a tumbu chiet uh akin theibangin leiah anga khe pai chiet ua, michin in a tumbu chiet uh ahong uhi. 12Tuachi’n aman a upa pen ua pat apan a anau tumpen pa tan dongin asui pai a, tuachiin nou khu Benjamin tumbu ah amuta hi. 13Tuachi’n amaun apuonte uh abotkeh ua, a sabiltungte uh posah chiet in khopi lamah ahing kile kiata uhi.

14Tualeh Juda leh a sanggamte Joseph inn ah ahing pei ua, ama khunah ana um nalai a, tualeh amasangah abohkhup chiet uhi. 15Tualeh Joseph in akung uah “Bang sil bawla kinei na hi uoi? Kei bang mite aisan asiem teitei uh chi theilou na hi uoi mah?”

16Tuachi’n Juda in a kungah “Bang kagen ta ding uoi? Bang e kang hil taah ding uh? ahisihleh bang kachi gen veng ta ding uoi? Pasian in na suohte khelna mukhie ahita, Ngaiin, kou leh akhut a nou kimunapa” achi hi. 17Hinanleh aman, “Tuachibang a ka bawllou ding dan, hinanleh akhut a nou amuna pen pa vang ka suoh hivanin, noute pen na pa uh kungah hamuong tahin peita un” achi hi.

18Tuachi’n Juda in Joseph ahing nai a, “Pu aw hepitahin na suohin ka mangpa bil a na zah dingin thu tengkhat hing gensah inlen, na lungthahna na suohpa tungah kuongsah sin, nang pen Pharoah bang nahi ta ngal a. 19‘Ka pu in na suohte kungah, ‘Pa ahiei sanggam ahiei na nei uoi?’ chiin na hing donga,’ 20Tualeh kouten ka pu kungah Pa tehsie khat leh ateh nua a anei tapa naupang nalai ka nei uh, a upa a shita a, anu hin lah ah ama ngen um ahita a, apan lah a it mama hi, kachi uhi.’ 21Tuachi’n nang na suohte kungah, ama ka mit a ka mu theina dingin ka kungah hing puisuh un na chi hi.’ 22Tualeh kouten ka pu uh kungah naupang in apa nuasie thei sih va, apa nuasie leh apan shi law ding hi ka chi uhi. 23Hinanleh nangman na suohte kungah, na nau tumpen uh na hing zawpi sih u’leh ka mel mu nawnsih va uteh, na hing chi hi.

24“Tuachi’n hichi ahia, ka pa uh na suohpa kunga ka tuntou un, ka pu thu gente a kungah ka hil uhi. 25Tualeh ka pa un peikia unlen, bu tawmnou khat beeh valei kia un achi hi. 26Hinanleh kouten ka pei suh thei nawn sih ding uh, ka nau tum un ahing zuiding leh peisuh va ung, aziehpen ka nau tum un ahing zui sihleh tua mipa mel muthei lou ding hi ung, ka chi uhi. 27Tuachi’n na suohpa ka pan ka kung uah, ka zi in tapa ni ahing hinpieh chi na thei ve uo le; achi hi.’ 28Tualeh khat in ahing peimang santa a, bawtel a um hita valon ding hia, ka chia, tuami nualangsie ama ka mu kha nawn vawt tasih hi.’ 29‘Tuachiengin tampa zong keia pat a na puimang ua, lamkaal ah tuosiet khat tuoh taleh ka lukaang khu lungkham tah a hankhuh tungsah ding na ve uoh maw,’ achi hi.

30“‘Tuaziehin tuin ka nau un kou hing zuilouin um taleh na suohpa ka pa kungah tung taleng naupang hinna leh ahinna kigahkhawm ahi ziehin. 31‘Tambang ahing hi dinga, naupang in hing zuilou chi amu chiengin ashi mai ding hi. Tuachi’n na suohten ka pa uh na suohpa lukaang khu lungkham tah a han a tungsah ding hita ve ung maw!’ 32‘Tuazieh in, na suohpa’n na kunga ka hing tutkia sih pouma leh amaw ka pa lah a tangtawnin povang chiin ka pa kungah naupang tungtang ah maw puoin ka na pangta hi.’ 33‘Tuaziehin tuin hepitahin na suoh khu naupang taangin kapu dingin suohin hing umsah in, tualeh naupang pen a ute toh peitou sahin.’ 34Aziehpen ka nau toh zawhlouin bang chiin ka pa kungah ka pei tou thei diei? Ka pa tunga sietna tung ding ka mu ngamsih hi,” achi hi.

Currently Selected:

SIEMCHILBU 44: ZOUBSI

Highlight

Copy