SIEMCHILBU 43

Joseph unaute Izipt gam a nivei ahawna uh

1Tualeh khum gamah kiel anase mama a, 2Tualeh hichi ahing hi a, Izipt gam a ahing bu puohte uh aneh zou un apa un akung uah “Peikia unlen, bu tawmnou khat beeh valei kia un” achi hi.

3Hinanleh Juda in a kungah, “Tua mipa’n na naupa uh na hing zawpi sih u’leh ‘ka mel na mu sih ding uh chiin ahing kal chinten hi.’ 4Ka nau uh na hing zuisah ding leh peisuh va ungin, bu hing valei pieh va ung; 5Hinanleh ama na hing sawl sihding leh pei sih va ung, Aziehpen tua mipa’n ka kung uah, na naupa uh na hing zawpi sih u’leh, ka mel mu thei sih va uteh achisa ahi ziehin chiin,” agen hi.

6Tualeh Israel in “Bang dinga kei lungkham na dinga nau dang khat nei nalai ung chia tua mipa nava hil sese uh ahiei,” achi hi. 7Amaute’n “tua mipa’n kouma leh i innkuon tungtang thu pilvangtah in ahing donga, na pa uh adam nalai ei? Pienpi sanggam dang na nei na uoi? Chi’n ahing dong a, tuachia ahing doh dungzui a ka hil mai uh ahi, Na naupa uh hing zawpi un achi ding lam ka thei va teh sih uhi,” chiin a dawng uhi.

8Tuachi’n Juda in apa Israel kungah “Nautum in hing zuisah in, ka kisa ding ua ka kuon ding uh, nang leh kou leh ka tate uh ashi louna dingin. 9Keima’n amaw paw vangin, keima lah ah amaw hing phut in, na kunga ka hing tut sih a na masanga ka hing dinsah sihleh tangtawn in amaw ka paw ding hi. 10Kinawngkai den sih leh ani veina zong hing tungkia tham ta ding hi unga,” achi hi.

11Tualeh apa uh Israel in akung uah, “Tuin tuachibang ahi vanglah leh tambang in bawl un, na nasepna chiet ua, tam gam a theiga hoi pente leh Singnai damdawi, khuoizute, gimtuite, murrahte, thei hawsate, makhate them khat chiet tua mipa nuomman dingin puo un. 12Tualeh sum a leni a tam keng unlen, na tumbu gongte ua ahing sum puosahte u’zong tawikia un, a mukhiel hikhava. 13Tualeh na naupa u’zong zawpisuh ta unlen tua mipa kungah haw kia un. 14Tualeh na naupa khat pen u’leh, Benjamin ahing hakhiet na dingin bangkim bawlthei Pasian in tua mipa hing khotuosah tahen, ka tate taan kahileh kataan maiding hi,” achi hi.

15Tuachi’n amaun, silpieh dingte atawi ua, sum aleni a tam akeng ua, Benjamin toh Izipt ah apeisuh ta ua, Joseph masang ah adingta uhi. 16Tualeh Joseph in akung ua Benjamin um amu tahin a innsung vaisaipa kungah “Tam mite innsung ah puilut inlen, sa gou inlen bawlin, tam miten kei toh sun chiengin ann a ne ding uhi,” achi hi. 17Tuachi’n tua mipa’n Joseph gen bangin a bawlta hi, tualeh aman tua mite Joseph inn sungah apuilut ta hi.

18Tualeh Joseph inn a puilut a aum bep un, a zauta ua, “I haw masah laiun, i ipte ua sum hing kinuapieh kia zieh a ahing puilut hita ven izaw? i tunga imawna ding uh sui a, hing kihoupi a, eileh i sabiltungte uh suoh leh sal a hing mat sawm ahita ve uoh,” akichi uhi. 19Tualeh Joseph innsung vaisaipa kungah avapei ua, inn kotkhah zungah ama ahoupi uhi. 20Pu aw “Ka hing hawmasah laiun ann lei dinga hing hawsuh ka hi ua, 21Hinanleh hichi ahing hi a, giehbuh ka tun ua ka ipte uh ka hon u’leh ngaivawi, ka sumte chiet uh ka ip gong chiet uah ana um hi, tua sumte abuh za mama ana um hi, tuate pen kahing paw kia uhi. 22Tualeh, bu leina ding zong sum dang ka hing keng kia uhi, ka sum uh ka tumbu sung ua koi na guon adiei chi ka thei sih uhi,” achi uhi. 23Hinanleh aman akung uah, “Hamuang tahin um unlen zau vawtsih un, na Pasian uh na pa uh Pasian in na tumbu sung ua gou ahing pieh ahi; na sumte uh ka mu na hi,” achi hi. Tualeh aman Simeon akung uah ahing pui hi.

24Tuachi’n amapa’n tua mite khu Joseph inn sungah apuilut a, tui apie a, akeng uh asil ua, tualeh a sabiltungte uh ann apie hi. 25Tuachi’n anuomman puohte uh Joseph ann ne dinga ahing pei chienga dingin mansain akoi ua, aziehpen tam mun a ann ne ding ahi uh chi athei uhi. 26Tuachia Joseph inn ahing peitahin akhut ua nuomman umte inn sungah akung ah atawilut ua, khupboh in amasanga kunin chibai abuh uhi. 27Tuachi’n aman atung thu uh a donga “Na pa uh thu na gen uh tua puteh adam nalai ei? ahing nalai ei mah?” achi hi. 28Tualeh amauten a dawng ua, “Na suohpa ka pa uh adam nalai hi,” achi ua, tualeh alu uh kunin chibai abuh uhi.

29Tualeh ama adahtou a anu tapa, a sanggampa Benjamin amu a, “Tampa himaw, na nau tumpa uh, a tanchin na hing hil uh?” achi hi. Tualeh ama main, ka tapa, Pasian in hing hepi hen achi hi. 30Tualeh Joseph in anaupa amu tahin, ahase sengin kintah a pawtin akaana ding mun asui a, tuachi’n pindan a lut in ava kap kheta hi. 31Tuachi’n amai aphiet a, ava pawtkhe kia a, kideh tei tei in “Ann neh ding bawl un” achi hi. 32Tuachi’n ama ding a tuom in, ama ua ding a tuom in, tualeh Izipt mite anehpi dingte ading a tuom in abawl uhi. Aziehpen Izipt miten Hebru mite toh ann ane khawm ngaisih uhi. Tuabanga bawl ama ua dinga sienglou ahi. 33Tuachi’n upa pen ta masa hina dungzui in nau tumpen anaupanna dungzui in akizom ditdet in Joseph masang ah atou ua, lamdang sa in khat leh khat aki-entuo uhi. 34Tuachi’n Joseph in amasanga mite akipat in atanvou uh ann aban piehsah a, hinanleh Benjamin tan pen ama ua teng sangin ale nga in atam zaw hi, tuachi’n ama toh adawn ua nuom asa chiet uhi.

Currently Selected:

SIEMCHILBU 43: ZOUBSI

Highlight

Copy