SIEMCHILBU 20

Gerar a Abraham suhkhelna

1Tualeh Abraham khuna pat in simlam Zuonin akisuon a, Kadesh leh Shur kikal ah ateng a, tualeh Gerar munah aum tadi hi. 2#Siem. 12.13; 26.7Tualeh Abraham in azi Sarah khu ka sanggamnu ahi achia, tuachi’n Gerar Lengpa Abimelek in mi a sawl a, Sarah ava puisahta hi. 3Hinanleh Pasian khu zanlaiin Abimelek mangin a kungah ahing pei a akungah, “Ngaivawi na numei lah nu mi zi ahiziehin mishi giap na hita hi, aziehpen ama mi zi ahi,” achi hi. 4Hinanleh Abimelek in akithuopi naisih a, tualeh aman, “Mangpa nam dihtatte nasan zong suliading na hiei mah?” 5Aman ka kungah “Ka sanggamnu ahi achisih amah? Tualeh amanu ngel in zong ka sanggampa ahi achi ngal a, lungsim siengthou tah puo leh khut siengthou tah nei kawm in tamsil kana bawlta hi,” achi hi. 6Tualeh Pasian in a mangin akungah, “Ahi, lungtang dihtah puoin tam sil na bawl hi chi ka thei a, tuachi’n ken zong ka tunga na khelding kana kham ahi, tuaziehin ahi, amanu na khoi ding ka phallou. 7Tuaziehin tuin tua mipa zi pekia in, aziehpen ama guolnei ahia, Aman thu ahing nget pieh dinga, tuachi’n na dam ta ding hi. Na piehkia sihleh vang, na shi ngei ngei ding ahi chi theimai in, nangma leh na nei zousie toh” achi hi. 8Tuaziehin Abimelek zingmawng matahin athou a, a suohte zousie ahan a, tam thute ahil a, a mite azau mama uhi. 9Tuachi’n Abimelek in Abraham ahan a, a kungah “ka tung ua na silbawl bang chidan ahiei le? achia, na tungah bang ka bawlkhiel a, kei leh ka leenggam tunga sil hoilou lienpi hing tut na hiei? Na bawl vawt lou ding sil ka tungah na bawl hi” achi hi. 10Tuachi’n Abimelek in Abraham kungah “Bang ngaituona nei a, tam sil na bawl ahiei?” chiin adong kia a. 11Tualeh Abraham in, “Ken tam khuo ah Pasian giinna um vawtsih vanin, ka zi ziehin hing that mai khava uteh chia ka ngaituo zieh ahi. 12Hinanleh ka sanggamnu zong ahi mawng a, ka pa tanu ahia, hinanleh kanu tanu vang ahisih a, tuachi’n ka zi ahing hita hi. 13Tualeh hichi ahing hi a, Pasian in ka pa innsung akipat a ahing vahvaisah laiin, keiman amanu kungah, ka tunga na suhlat ding na hepina tami ahi. I peina mun pou ah ka sanggampa ahi hing chizel in, kana chi mawng ahi” achi hi. 14Tuachi’n Abimelek in Belamte, Bawngtalte, suohpate, suohnute azawpi a, Abraham kungah apie a, azi Sarah zong apekia ta hi. 15Tualeh Abimelek in, “En in, ka gam na masang ah aum hi, na ut utna ah tengin achi hi.” 16Tuachi’n Sarah kungah, “En in, na sanggampa dangka tul khat ka peta hi, Ngaivawi, na kunga um zousiete nang a dingin mit khuna ding ahi, achi hi. Na tungthu ah na dih sieng kiata hi,” achi hi. 17Tuachi’n Abraham Pasian kungah a thum a, tualeh Pasian in Abimelek leh azi leh asuohnute adamsah a, tuachi’n tate anei kiata uhi. 18Mangpa’n Abraham zi Sarah ziehin Abimelek innkuonpite zousie ana chiingsah siengta hi.

Currently Selected:

SIEMCHILBU 20: ZOUBSI

Highlight

Copy