SIEMCHILBU 17

Pasian bangkimbawltheipa kilahna

1Tualeh Abram kum Sawmkuo leh kuo ahi in Mangpa a kungah ahing kilah a, a kungah, “Kei Pasian Bangkimbawlthei.”#Pasian Bangkimbawlthei: Hebrew ham in “El-Shaddai” ahi. Ka hi, ka masang ah pei inlen tualeh hoi bukim in um in. 2Tualeh Kei leh nang kikaal ah ka thuhun hung vangin, tualeh hatangpi’n kahing pungsah ding hi,” achi hi. 3Tuachi’n Abram khu abohkhup a, tualeh Pasian in a houpi a, akung ah, 4“Ngaivawi, Keima’n ka thuhun na kungah kahung hi; Tualeh nangpen nam tampite Pa nahi ding, achi hi. 5#Rom. 4.17Na min zong Abram#Abram: “Pa toisang aum” china ahinawn sihding a, hinanleh na min Abraham ahizaw tading hi, aziehpen nam tampite Pa in ka hing bawlta hi. 6Tualeh hahlesuon tampi suongin hing chi phasah vangin, nang apat nam lientah siem vangin, tualeh nang a kipan in Lengte hing pieng va uh.

7 # Luk. 1.55 Tualeh Kei leh nang leh na nua a nahah nasuonte, suon sawn sawnte dongin zong ka thuhun pen nang ading leh na nua-a nahah nasuonte dinga a Pasian uh hiding in tangtawn thuhun dingin ka sukip ding hi. 8#Nasep. 7.5Tualeh nang leh na nua a nahah nasuonte kungah mikhuol na hina gam, Kanaan gam zousie tangtawn gou dingin hing pevang in, tualeh keima a Pasian uh ka hi ding,” achi hi.

9Tualeh Pasian in Abraham kungah, “Tuaziehin nang pen in ka thuhun na zui ding ahi, tualeh nang leh na nua a, nahah nasuonten akhang akhang ua azuiding uh ahi hi. 10#Nasep. 7.8; Rom. 4.11Tampen kei leh nang leh na nua a nahah nasuonte kikaal a na zui ding uh ka thuhun ahi, nalah ua Pasal naupang pouma atep na tan ding uhi. 11Tuachi’n natep vun uh tanva uchin, tuakhu kei leh nang kikaal a thuhun chiemtena ahi ding hi. 12Tualeh nalah ua ni giet a upa pasal naupang pouma na hah nasuon sawn sawn dongin zong, na inn a pieng hiin, ahilouleh sum a kilei mikhuol hitaleh nahah nasuon pasal pouma nangma hahlesuon hilou zong tep tan ding ahi. 13Na inn a pieng leh sum a nalei zong tep tan tei tei ding ahi, tuachi’n ka thuhun khu tangtawn thuhun dingin nasa tung uah aumta ding hi. 14Tualeh pasal tep tanlou, atep vun uh tan a umlou pouma, tua mi khu amite lah apat suhmang ahi ding, aman ka thuhun apalsie ahi”.

Isak piending thuhun

15Tualeh Pasian in Abraham kungah, “Na zi Sarai khu amin Sarai nachi nawnsih dinga, hinanleh amin Sarah a hizawta ding hi. 16Tuachi’n ama ka guolzawl dinga, ahi, ama namte nu ahidinga tualeh ama apat tapa ahing pieng dinga, ama apat mite leengte ahing um ding uh achi hi.

17Tuachi’n Abraham khu akhupboh a, anui a, a lungsim in, mi kum za a upa in ta anei ding adiei? Tualeh Sarah, kum sawmkuo a upa in Ta ahing ding adiei?” achi hi. 18Tualeh Abraham in Pasian kungah, “Ishmael na masang ah umthei leh aw”, achi hi.

19Tuachi’n Pasian in Abraham kungah, Hilou e, na zi Sarah in tapa hing hinpieh tahtah ding a, amin dingin Isak na hisah ding hi; tualeh ka thuhun khu ama leh ahahasuonte toh tangtawn thuhun dingin ka sukip ding.

Ishmael nam khat hiding

20Tualeh Ishmael tung thu zong ka hing ngaikhiet piehta hi. Ngaivawi ama ka guolzawlta hi, ka chi phasah ding a, nahpitah in zong ka supung ding hi. Leng sawm leh ni ahing dinga, ama nam thupitah in ka siem ding hi. 21Hinanleh ka thuhun pen kumkia tuhun chienga, Sarah in ahing hinpieh ding Isak kungah ahi, ka suhkip ding, achi hi. 22Tuachi’n akung a thugen atawpsan a, Pasian in Abraham apeitou santa hi. 23Tuachi’n Abraham in Pasian in a kunga agen bangin, atapa Ishmael leh a innsunga pieng zousie, sum a alei zousie leh Abraham innkuonte lah a pasal pouma apui a, tuani mama in atep vun uh atan piehta hi. 24Tualeh Abraham in atep atan laiin kum sawmkuo leh kuo a upa ahita hi. 25Tualeh atapa Ishmael in atep vun ana tanlai in kum sawm leh kum thum ahita hi. 26Tuami ni ngel ngel in Abraham leh atapa Ishmael teptan ahita uhi. 27Tualeh a innkuonpite lah a pasal zousie toh a inn a piengte toh mi khuolte lah a sum a aleite zong ama toh teptan ahisiengta uhi.

Currently Selected:

SIEMCHILBU 17: ZOUBSI

Highlight

Copy