SIEMCHILBU 14

Abram in Lot ahundohna

1Tualeh Shinar leengpa Amraphel leh Ellashar leengpa Ariok leh Elam leengpa Kedorlaomer leh namte leengpa Tidal damlai in hichi ahing hia. 2Amauten Sodom leengpa Bera leh Gomorrah leengpa Birsha leh Admah leengpa Shinar leh Zeboiim leengpa Shemeber leh Bela leengpa khu ahing douta ua. (Bela khu Zoar ahi.) 3Tamte zousie Siddim phaihawm ah apangkhawm ua. (Siddim khu chituipi ahi.) 4Kum sawm leh ni Kedorlaomer nuoi ah nna asem ua, a kum sawm leh thumna ah ahing helta uhi. 5Tualeh kum sawm leh lina ah, Kedorlaomer leh a kunga um leengte hing kuon in, Ashteroth Karnaim khuo ah Rephaim mite athat ua, Ham khuo ah Zuzimte athat ua, Shaveh Kiriathaim khuo ah Emimte athat uhi. 6Tualeh a umna uh Seir muol, gamdai zul a um, El-paran dongin Hormite athat uhi. 7Tuachi’n anuakia kia ua, Enmishpat ahing tung ua, tuami Kadesh ahi. Tualeh Amelek mite gam leh Hazezon-tamar khuo a teng Amorte nasan athat uhi.

8Tuachi’n Sodom leengpa leh Gomorrah leengpa, Admah leengpa, Zeboiim leengpa leh Bela leengpa (khum khu Zoar ahi) a pawtkhie ua, Siddim phaihawm ah amauh dou dingin apangkhawmta uhi. 9Elam leengpa Kedorlaomer toh, namte leengpa Tidal toh Shinar leengpa Amraphel toh Ellasar leengpa Ariok toh leeng lite khu leeng ngate toh akidou uhi. 10Tualeh Siddim phaihawm khu longnai khuh ngenin adim a, Sodom leh Gomorrah leengte ataizah ua, kimkhatte leihawm sungah a kelut ua, akelou teng muol ah ataizah ta uhi. 11Tuachi’n amaun, Sodom leh Gomorrahte neitah leh nehletah dingteng a unin ala ua, apeita uhi. 12Tualeh amaun, Sodom khuo a teng Abram sanggampa tapa Lot leh aneitah zousie ala ua apeita uhi.

13Tuachi’n gal a suohta mi khat ahing pei a, Hebru mi Abram ahing hil a, Ama khu Eshkol leh Aner sanggampa, Amor mi Mamre phaijang a gangpising lah a teng ahia, tamte Abram toh pangkhawm ahi uhi. 14Tualeh Abram in a sanggampa sal a mat in aum chi azahtah in, ama innsunga pieng achilsiemsa, asuohte zathum leh sawmkhat leh giet galvan in athuom a, Dan khodong in adelta uhi. 15Tualeh zanlaiin amauh dou dingin ama leh asuohte akihawmkhen ua, asat gawp ua, Damaska khuo mallam a um Hobah dong anuadel uhi. 16Tuachi’n neitah zousie ahing nua puoh kia ua, a sanggampa Lot zong aneitah teng toh, tualeh numeite leh mipi zousie zong ahing puikia siengta hi. 17Tualeh Kedorlaomer leh akung a leeng umte that zou a ahing kile kia nuain, Sodom leengpa khu Shaveh phaihawm ah (tuakhu leengpa phaihawm ahita) Abram dawn dingin ahing pei hi.

Melkizedek in Abram aguolzawl

18 # Heb. 7.1-10 Tuachi’n Salem leengpa Melkizedek in tanghou leh zu ahing tawi a, Ama pen Pasian tungnung pen Siempu ahi. 19Tualeh Aman Abram aguolzawl a, “lei leh van neipa; Pasian tungnungpen Abram khu guolzawl in um hen”. 20Tualeh na galte na khuta hing pepa Pasian tungnungpen phat in um heh, achi hi. Tualeh Abram in anei zousie sawm a khat apie hi. 21Tualeh Sodom leengpan Abram kungah, mihingte hing pien len, neitahte vang nangman kitan in achi hi.

22Hinanleh Abram in Sodom leengpa kung ah, “Lei leh van neipa, Mangpa Pasian tungnungpen lamah ka khut ka jahta hi. 23Vau zamkhat zong, kengtodap khau nasan zong, na neisa mawngmawng bangma lavawtsih vang, tuachilouin Abram keima hausatsah ahi na chikha ding hi. 24Tangvalten aneh beiteng u’leh, ka mi zawpite tanvou chilou bangma kala sih ding Aner, Eshkol leh Mamreten amauh tanvou uh kilah uheh” achi hi.

Currently Selected:

SIEMCHILBU 14: ZOUBSI

Highlight

Copy