PAWTDOHNA 8

Gawtna ni-na ukeng

1Tualeh Mangpa’n Mosi ahoupi a, akungah, “Pharaoh kungah va pei inlen, akungah ‘Mangpa’n ka miten ka nna asep theina dingun Pei sah in, 2Na peisah nuom sihleh ngai in, na gamsung zousie ukenga ka gawt ding ahi. 3Tuachi’n lui in ukeng tampi ahing umdoh sah dinga, tuate ahing Peitou ding ua, na Innsungah ahing lut ding ua, na lupna pindan sunguh, na lupna tungah, na suohte innsung ah, na mite tungah leh na lungthu khuh sungah tualeh na tangbuong pawina kuong sung tanpha ah a dim ding uhi. 4Tualeh ukengte khu nang leh na mite tung leh na suohte zousie tung ah ahing kal ding uhi vachiin,” achi hi.

5Tuachi’n Mangpa’n Mosi ahoupia akungah, Aaron kungah “Luitate tungah, luipite tungah, tualeh tuikulte tungah na khut a nachieng tawi pum in na banzah inlen Izipt gam tungah ukengte umdoh sahin, chiin” achi hi. 6Tuachi’n Aaron in Izipt tuite tungah aban azah a tuachi’n ukengte ahing pawt khie ua, Izipt gam atuom suohta uhi. 7Tualeh mitphieldawi siemten a dawi thu un, tuachi mabangin abawl ua, Izipt gam ah Ukeng aum sah uhi.

8Tuabepin Pharaoh in Mosi leh Aaron ahan a, “Kei leh ka mite akipat ukengte alah mang thei na dingin Mangpa kungah ngen un, tuachi’n Mangpa kunga ava kithoi theina dingun mipite ka pei sah ding hi,” achi hi.

9Tualeh Mosi in Pharaoh kung ah “Tam zatatna pom inlen, nang apat leh na inn apat a ukengte sumanga luidung mai mai a, a um na ding u’leh nangma leh na suohte leh namite a dingin bangchih chieng in kang nget pieh diei,” achi hi.

10Tuachi’n Pharaoh in “Zing chiengin” achi hi, Tualeh Mosi in “Mangpa ka Pasian uh bang koima a um sih chi na thei na dingin, na chibang hita hen. Achi hi. 11Tualeh ukengte nang akipat, na innte akipat, nasuoh te akipat leh namite akipat apawtkhe ding ua, lui dungah a umta ding uhi.” 12Tuachi’n Mosi leh Aaron Pharaoh kung apat apawt khie ua, tualeh Mosi in Pharaoh tunga atunsah ukengte ziehin Mangpa kungah angenta hi. 13Tuachi’n Mangpa’n Mosi thu bangin abawlta hi. Tuachi’n ukengte khu innte akipat, inn huongsungte akipat leh loute akipat ashi gamta uhi. 14Tualeh miten aluoh khawm ua, asievum ua, gamsung a uita hi. 15Hinanleh Pharaoh in ukengte abeita chi amu bep in, Mangpa’n agen bangin, alungtang akhausah a, a gen uh angaisah nawn sih hi.

Gawtna thumna Hit-a gawtna

16Tuachi’n Mangpa’n Mosi kungah, “Aaron kungah na chieng lamtou inlen Izipt gamsung a leivui zousie hit asuoh thei na dingin sat in, chiin” achi hi. 17Tualeh tuabangin abawl ua, Aaron in akhut in achieng alamtou a, lei a leivui asat a, tuate khu mite tung leh sate tung ah hit ahing suoha Izipt gam pumpi a, leivui zousie hit a suohta hi. 18Tualeh mitphieldawi siemten zong a dawi thu un tuabanga hit umsah a tum ua, hinanleh a bawl thei sih uhi, tuachi’n mi tung leh sa tungah hit a umta hi. 19#Luk. 11.20Tuachi’n mitphieldawi siemten Pharaoh kungah “Tami Pasian khut nasep ahi bou hi, achi ua, tualeh Pharaoh lungtang akhau semsem a, Mangpa’n agen taah mabangin a thu uh a ngai khe sih hi.

Gawtna lina thou

20Tualeh Mangpa’n Mosi kungah “Zingmawng matahin thou inlen, Pharaoh masangah va dingin, ngai in, lui lam zuona hing pei ding ahi, tuachi’n akungah Mangpa’n tambangin achi hi, Ka nna asep thei nading un ka mite pei sah in, achi hi vachiin.” 21Khuchilou a, ka mite na pei sah sihleh ngai in, nangma tung leh na suohte tung leh na mite tung leh na innsungah thou ka hing sawl ding a, Izipt mite innsung leh a umna leitung uh thou honin adim ding hi. 22Tualeh tuami hun chiengin, ka mite tenna, Goshen gam khu, thou hon um lou dingin, ka khen tuom ding hi, tuachi’n leitungah kei khu Mangpa ka hi chi na hing thei ding hi. 23Tualeh ka mite leh na mite kikaal ah ki khenna koi vangin, zing chiengin tam chiemtena a um ding hi.” 24Tualeh Mangpa’n tuabangin abawla, tuachi’n Pharaoh innsung leh a suohte innsungah leh Izipt gamsung tengah thou hon lungjin huoitah ahing tung ta a, thou honte ziehin agam a segawp ta hi.

25Tuachi’n Pharaoh in Mosi leh Aaron ahan sah a, “Pei unlen tami gam sungah na Pasian kung uah va kithoi ta un,” achi hi. 26Tualeh Mosi in “Tuabanga bawl akilawm sih, aziehpen Mangpa ka Pasian uh kunga, Izipt mite dinga kidah huoi, kithoina lan ding ka hi uh; ngaiin Izipt mite mitmu a akidah huoi kithoina lanta uleng suongin hing sep lou ding uh amah? 27Gamdai a nithum lamah ka va pei ding ua, ahing thupieh ding banga Mangpa ka Pasian uh kunga kithoina bawl ding in.” 28Tualeh Pharaoh in “Gamdai a, Mangpa na Pasian uh kunga, na kithoithei na dingun kahing peisah dinga, hinanleh gamlapi va pei sih pou ulachin, kei dingin zong thu hing nget pieh un” a chi hi.

29Tualeh Mosi in, “Ngaiin, na kunga kipat ka pawt khe dinga, Pharaoh apat leh asuohte apat leh amite apat a, thou honpi apeimang theina dingun, Mangpa kung ah ka ngen ding hi. Hinanleh Mangpa kunga kithoi dinga mite peisah lou dingin Pharaoh lepchie sih heh,” a chi hi.

30Tualeh Pharaoh kungah akipat Mosi apawtkhie a, Mangpa kungah thu a ngen ta hi. 31Tualeh Mangpa’n Mosi gen bangin a bawla, tualeh Pharaoh apat, asuohte apat leh amipite apat thou honte alakhie a, khat zong a um nawn sih hi. 32Hinanleh tam hun in zong Pharaoh a lungtang a khausah a, mite apeisah tuom sih hi.

Currently Selected:

PAWTDOHNA 8: ZOUBSI

Highlight

Copy