NASEPTE 17

Thessalonika a hattuom phuna

1Tuin Amphipolis khuo leh Apollonia khuo nawt in apei suoh ua, Thessalonika khuo atungta ua, tuanah Judate kikhopna inn khat a um hi. 2Tuachi’n Paul in abawl ngaina bangin akung uah alut a, khawlni thumvei, Laisiengthou thu amaute akikuppi zel hi. 3Khrist in athuohgim ding mawng ahidante, tualeh mishi lah akipat thoukia ngei ding ahidan leh tam na kung ua “Ka gen Jesu khu Khrist ahi chia hilchien in atahlang hi.” 4Tuachi’n alah ua mi pawlkhat in agingta ua, tualeh Pasian a mi kipumpieh Greek mite tampi leh numei lamkai tawm liei louten Paul leh Sailas azuita uhi.

Jason inn buluna

5Hinanleh agingtalou Judaten athangsiet ua, migilou thasie koite ahiei, vanzuona munte a kipat ahankhawm ua, khopisung zousie asubuoi ua, Jason inn abulu ua, Paul leh Sailas khu mipite kungah puidoh atum uhi. 6Amaute amulou tah un, Jason leh unau pawlkhatte khopi sung vaihawmte masangah akailut ua, akikou ua, “Leitung pumpi kikhulesah mihingte tami mun nasan ahing tungta ua, 7Jason in ana zintun a, tam miten Kaisar thupiehte kalin, Jesu kichi leeng dangkhat a um hi, achi uhi,” achi ua. 8Mipite leh khopi sung vaihawm miten tam thu azah tahun a pumbuoita uhi. 9Tuachi’n amauten Jason leh midangte akipat kihenna#Kiheenna = Sum ahiei ahisih leh van ahiei a kitatdohna. Bail or Security (Eng). silte ala ua, amaute ahadohta uhi.

Paul leh Sailas Beria khuo ah

10Tuachi’n unauten azan zanin Paul leh Sailas Beria khuo ah asawlkhe pai ua; khuna ava tuntah un, Judate kikhopna inn ah alut uhi. 11Beria mite khu Thessalonika khuo a mite sangin alungsim uh akihong zaw ua, lungsim kilawptah in thu apom ua, athugente uh adih leh dihlou theina dingin, nichin in Laisiengthou thu sui in a enchien zel uhi. 12Tuaziehin Judate tampi in agingta ua, Greekte lah a numei leh pasal zatat huoi tawm thamlouten zong agingta uhi. 13Hinanleh Thessalonika khuoa Judaten, Paul in Beria khuo ah Pasian thu agen hi chi, athei bep un, khunah zong ahing pei ua mipite hanthawn in achiilsie uhi. 14Tuachi’n unauten kintahin Paul khu tuipi lam a pei dingin asawlkhe pai ua, hinanleh Sailas leh Timothi pen Beria ah a um tadi uhi. 15Tuachi’n Paul vahaten ama Athen khuo ava tunpi uhi; tualeh Sailas leh Timothi khu akintheipen a akunga hing pei dinga athuhah thu puoin apeita uhi.

Athen khuo ah Paul

16Paul in Athen khuo a, Sailas leh Timothi ana ngah sungin, tua khopi milim pasiente a dim in amu a, alungthah mama hi. 17Tuaziehin kikhopna inn ah, Judate leh Pasian bie Jentelte thu akinielpi zel hi, tualeh vanzuona muna na um poumate zong nichin in akinielpi zel hi. 18Tuachi’n Epikuriamite leh Stoik mite lah a, mipil koite ahieiin zong, ama ahing niel uhi. Tualeh Pawlkhat in tam mi kamtampa’n “Bang ahiei agen tup?” achi uhi. Pawl dangkhat ten lah “Gamdang pasiente thugen hileh kilawm veh aw” achi uhi, ama’n Jesu thu leh athawkiana thu agen zieh ahi. 19Tualeh ahing pui ua, Areopagus mun ah atutta ua, akungah, “Tam thuhilna tha na gen khu na hing theisah thei diei? 20Sillamdang bang ahiei khat ka bil uah na hing zasahta a, bangchina ahiei a umdan ka thei nuom uhi,” achi uhi. 21Aziehpen Athen mite leh tua mun a um gamdang mite zousiein, sil tha tha genna leh ngaikhiehna loungal bangma dangin ahunte uh azang sih uhi.

Areopagus a Paul thugen

22Tuachi’n Areopagus#Areopagus muol min khat ahia, tualeh “Athens mite lah a thuneipen pawl zong Areopagus akichi hi. kikhopna lai ah Paul adinga, agenta hi Athen khuo a mite aw, Banglam pou ah sakhuo biehna ngaisah mi na hi uh chi ka mu hi. 23Aziehpen ka vah kawma na bieh silte uh ka et leh maitam khat atunga “THEILOU PASIAN A DING”, chi a kigiel nangawn ka mu hi. Tuaziehin theiloupi a na bieh pen uh, Ama ahi noute kunga ka kitangkoupi khu. 24#1 Leeng. 8.27; Isai. 42.5; Nasep. 7.48Leitung pumpi leh asunga sil um zousie siempa Pasian khu, lei leh van Mangpa ahiziehin, mihingte khuta bawl innte ah a um ngai sih hi. 25Ama pen tahsapna nei bangin, mihingte khuta nasep pieh in a um ngai sih hi, Aman mi zousie kungah hinna, nahna leh sil zousie ape zaw hi. 26Tualeh Aman mi khat sisan a kipat in mi namchin leitung pumpi luosuoh dingin abawl a, amaute dingin hunbite abawl pieh a, tenna ding gamgite ahunpieh hi. 27Tuachia amaun kinem tah a Mangpa asui ua; amai amai ua Ama amu teitei na ding un; Aman lah eite ahing gamlat chiet sih ngal a 28Aziehpen, Ama ah eite ihing ua, i pia ua, hinna inei uhi; Noute lah mama a na laphuoh siemte un: Eite zong Ama hahlesuonte i hi uhi, chi a agen bangun. 29Tuaziehin Pasian hahlesuonte ihi zieh un, Pasian pen mihingte khutsiem silbawl Sana, dangka, ahisihleh suong, banga ingaisut ding uh ahi sih hi. 30Adihtahin Pasian in bangma itheilou lai un, ahing kitheimaw bawl a, hinanleh tuin vang, mun chin a um mi zousie kisia dingin thu apeta hi. 31Aman ni achiem ziehin, tua ni chiengin ami guotpa tungtawnin leitung pumpi dihtattah in vai ahawm pieh dinga, Pasian in ami guotpa mishi lah a kipat kaithouin mi zousie kungah atheisahta hi, achi hi.”

32Amauten mishi thawkiana thu azah tah un, Pawlkhat in anuisat ua, pawlkhat in lah “Tam thu nanga kipat ka ngai nuom nalai uhi,” achi uhi. 33Tuachi’n Paul amaute lah akipat apeita hi. 34Ahivang in mi bangza ahiei in Paul azui ua, agingta ta uhi. Amaute lah ah Areopagus mi Dionisius leh numei khat amin Damaris leh akung ua midangte toh ahi uhi.

Currently Selected:

NASEPTE 17: ZOUBSI

Highlight

Copy