LUK 7
7
Jisu-e Roman Alixachong Da Amüi
(Mat 8.5-13)
1Khünaknue atatle Jisu-e ibu akax tsuak füima, chix Kaparnaum to pao. 2Ikha to Roman alixachong tuita ang chixe huanuma künkya da tuita tüikya; ija khünak zikoxlaxle kakle ngokya. 3Otue ija alixachonge Jisu nguikya zing atat, chixe Jisu hato, chix nguilaxle oda amüi angkya hanpakma züita Jehudi khünak mixpa tüichongbu tsanle apao. 4Üntoxle otue hwom Jisu hato ngui, hwome chix ma chingcha jule akax: “Chix to nange tüfong koxwüi müile tüile; 5chemthüikoxle chixe kwom jat-li to künle, ilaxle kwom Sinagok chuwüi chixe zingle fapu.”
6Ikhoma Jisu hwom füito pao. Ikoxle athax Jisu hwom hom makhange otukuxchu chiatsai le tüiponge, ija alixachonge Jisu hato hozuikhuibu ija kax füi tsanle apao: 7“Jowanpa, nang sik taxngün ngo, chemthüikoxle nang ku loxkax fang to pui angkya ku ojao münasu. Ikoxle kax tata laxkox, ima wüi ku da kak müiüi; 8chemthüikoxle ku chuwüi apün adakya mix fangma ngokya khünak tuita changle, ilaxle kuechu ku fang ma süpahibu thompu; kue mixhuak tuita ang ‘Paokox’ jangthüiba chix pao angkya wüi; ilaxle mama mix ang ‘Oman’ le jangseba chixchu hüi angkya wüi; üntoxle ku da ang ‘Ija mok kox’ le jangtsanba chixe ija mok angkya wüi.”
9Ibu atatlaxle Jisu abüt, üntoxle aküile hulaxle chix füito azuikya khünaknu othom ang thüi: “Kue hünzom ang thüipu, ija ningle mongong chongkya Israel khama kue ojongtochu ma atak!”
10Ilaxle mwot-tsan mixbu hom to chat. Hwom thoma da kak müile nui.
Jisu-e Zomnu Hosa tuita Chatle Azün
11Ifüima aluile#7.11: Ifüima aluile; züizüi laiza ma tüikya a Ofüinyix. chingo homle chix wangshembu hia khünaknu othom chongkya tuita füi chix Nain le nyak kya ting to ngui. 12Chixe pan lünkya füi tomle panjo mixbu jule apong. Zikya mix a zomnu sasün chix tata wüi tüikya lükasa changkya, ilaxle she füi tomle tingsho angkya khünaknu tüihukya. 13Otue Jowanpa-e she ngünpuix, chix mong ma she to chingchakyae awang, ilaxle chixe she ang thüi: “Taxsop.” 14Ifüima chix hüilaxle mangsuak to twon, ikoxle chix pai laxle hüikyabuchu wüi tangle ajong. Jisu-e thüi: “Kue thüipu, naosün zoün!” 15Ija zidaokya mix zo üntoxle zangwün ang süt, ilaxle Jisu-e chix honu ang achatle kox.
16Hwom pangnu wüi abütkyae aban ilaxle Zang mün achuak. Hwome thüi: “Kem khama ajepa chongkya laiüna. Zang, chix khünaknu khosün ang nguile tüile!”
17Jisu bama ija zangwün tomzi nok-za hia chaxwan pangnu khato pule pao.
Baptikya Mix Juhan Makhange Kaxho Mixbu
(Mat 11.2-19)
18Chix wangshembue Juhan hama ibu pangnu zangwün apüikya zuma, chixe mixsün anyi se; 19“Juhan-e wünle ngokya hüiüi tüikya a nang hia, hia kwome chatle owawa to hule ngo angkya?”, le atüi ang Juhan-e hokhi Jowanpa hato tsanle apao.
20Otue hokhi Jisu hato ngui, hokhie thüi: “Chixe akaxle ngokya hüiüi tüikya mix nang changcha hex, hia kwome mama owawa to hule shong ngo angkya? le atüi ang kukhi Juhan-e tsanle hüikya changpu.”
21Iponge Jisu-e kakmixbu huanuma amüi, haxshix chasa jwonle apao üntoxle mikduakbu ang mik daple kox. 22#Isa 35.5,6; Isa 61.1.Chixe Juhan Mwot-tsan nyi ang thüi: “Hünkhi chatlax ilaxle hünkhie chempang ngünpuix üntoxle atatpuix ibu Juhan hama wünle laxkox: Mikduakbue ngün ang kople, chafai mix ahamle, üntoxle angwonbu amüile;#7.22: angwonbu amüile: 5.12. To hulax naba mixe atat ang koxle, zidaokyabu azangle zole, ilaxle Kaxho Müikya zasabu hato apukle; 23ku to mongao chitüikyabu otukuxkya mohiman!”
24Juhan mwot-tsan mix nyi achex füima, Jisu-e khünaknu hama Juhan bama akax ang süt: “Hünzome faokha to Juhan hato paokya zuma, hünzome chem ngünüi le texpu? Zangwin to aloxle ngokya fumchak laifa ngünüi le texpia? 25Hünzom chemto hu ang tomta paopu? Achong abong za-pua laxlaxle ngokya mix to hu ang hia? Hulax, jikjep kya nyiza laxkya mix hia mongtex ma sha le ngokya khünaknubu chongwang hom ma bangüi! 26Ku hama wünhu, ikoxle hünzom chemto hu ang tomta le pao? Ajepa to hu ang hia? Changpu, kue hünzom ang thüifang, ajepa tuita füichu süchongkya hünzome ngündaoa. 27#Mal 3.1.Otsao Lai kax ma zale thomkya a Juhan hanpak changpu. Zange thüi: Hulax, ku mwot-tsan mix, nang thoma lom achwonle bang ang tsanle apaopu.”
28Jisu-e thüi: “Kue hünzom ang thüipu, honue puxkya khakha ma Juhan thak to chongkya mix müntüi. Ikoxle zangkang to ahixkya ngaxchu chix füi süchongkya changpu.”
29 #
Mat 21.32; Luk 3.12. Chix kax atatkya pangnu, tamnüilechu Süisai mixbu Jowanpa Wanlom twonlaxle Juhan makhange baptikya kopkyabu changkya. 30Ikoxlechu Saduki hia farisibue hwom hanpakma tüikya Zang tutex pongle chikop ilaxle Juhan-e baptikya münlaxle chilax.
31Chatlechu Jisu-e thüi: “Jangchangba, kue athaxpongkya khünakbu chem füi apyenüi? Hwom chem ningle hex? 32Hwom a hat-süt nui to thungle ngokya naosombu ningle. Othom tuitae othom tuita füi asa: ‘Kwome hünzom ang sam hongpu, ikoxlechu hünzom chiazüi! Kwome jan tsai ngaopu, ikoxlechu hünzom chisop!’ 33Baptikya mix Juhan nguipu, ilaxle chixe süt chisax ti chilingle atsao üntoxle ju chiling, ikoxle hünzome chix ma bao tüile le thüipu! 34Khünak Hosa ngui, chixe saxling le chang; ikoxle hünzome thüi: ‘Ija khünak to hulax, chix a sütbakmix ilaxlechu juling mix changle; süisai mixbu hia tu to chilaxkyabu zuikhui!’ 35Ikoxlechu ija pongle kopkya mix pangnue wüi, Zang hwon-je otsingtsing wüi changpule ahole.”
Simon Hom to Jisu-e Fong Sax
36Simon le amünkya farisi mixsün tuitae Jisu chix hom to fongsax ang se, idaile Jisu chix hom to nguilaxle fongsax ang thung. 37#Mat 26.7; Mrk 14.3; Jhn 12.3.Ija tingsho ma ochax tsün ngokya mixcha tuita tüikya. Jisu-e farisi hom to fongsax ngole ta le she atat, ikoxle she e longthua tuita ma awangle ongan Müikya mün-nga kop; 38ilaxle she mikfi füi Jisu cha ashanle sopngale chix cha zuima, chix nuakfüima ajong. Ifüima she e chix cha she kho füi fwotle azua, ibu füi tun apong, ilaxle ibu to ongan Müikya müngae pale kox. 39Otue farisi süne ija ngün, chixe chix mongto mongzangwün: “Ija mixsün ajepa tsingtsing jangchangba, chix to lyetle ngokya mixcha owahex awanse; ilaxle she chem ningkya ochax tsün ma ngopuix chixe awanse!”
40Jisu-e thuile chix füi akaxle thüi: “Simon, kue nang füi lita kax akax angkya tüile.” Chixe lan: “Nwotmix, akaxhüi.”
41Jisu-e thüi: “Mixhuak anyi ma mixsün tuita ang kox angkya thashe tüikya. Tutae kox angkya ngunhuak ho-aga, ilaxle ata mixe kox angkya a punyi bün tüikya. 42Okhi monyie wüi chix ang thashe achat ang chitsuak le thom, ikoxle ija mixsüne hokhi monyi ang wüi thashe taxkoxngo le shu. Jangchangba chix to hokhi opupue süchongle künüi?”
43Simon-e lan: “Ku mongtex ma a thashe süchongle tüikya thailak atak kya mixe changüi.”
“Nang kax changtomtapu”, le Jisu-e lan. 44Ifüima chixe mixcha chito aküi le hulaxle Simon ang thüi: “Nange ija mixcha ngünchami? Ku hünzom hom to nguipu, ikoxle ku cha so ang nange ti ngax chifa, ikoxle she e ku cha mikfi füi solaxle kho füi fwotle azua fadaoa. 45Nange ku tun apongle chipongkop, ikoxle ku nguikya shemle she e ku cha füi tun apongkya chidan. 46Nange ku khang to pa ang olipe münga chifa, ikoxle she e ku cha a ongan Müikyae awang daoa. 47Ikhoma kue akaxpu, she e ahokya mongkün chongkya makhange zazazikya she ochax thailak atak kya ocha ahopu. Ikoxle owa ang hidaokya ochax thailak koxpuix chixe mongkün hidaole wüi ahole.”
48Jisu-e ija mixcha füi akax: “Nang ochax thailak koxdaoa.”
49Fongsüt tsap ma thungle ngokyabuechu tata füi zangwün: “Ochax thailak to apüi koxtsuak angkya chix owa hex?”
50Ikoxle Jisu-e ija mixcha ang thüi: “Nang mongonge nang sündaoa, nang mongsom ma paolax.”
Currently Selected:
LUK 7: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
