LUK 2

Jisu Puxkya

(Mat 1.18-25)

1Iponge Roman Wangting pangkha towüi khünak akiak angkya chongwangpa Agastas-e kaxkox. 2Ija owang lekya mix akiak ponge, Kuirinas a Siria ma gowarnor ang tüikya. 3Ifüima khünak pangnu wüi ma mün za angkya hanpakma ma tingshosho to ngui.

4Galili angkya Nazareth tokya Jusep Jehudi angkya Bethlehem, Wanghompa Dawid puxkya tingsho to ngui, chemthüikoxle chix a Dawid sixli changle. 5Chix füi tuizing-nazex daokya Meri kop laxle chix münza ang ngui. She a naowok ma tüikya, 6üntoxle hokhi Bethlehem to tüi ponge she ang nao ngün tu ngangle hüi. 7She e somwang nao lükasa pux, naonam nyi füi nam laxle naosa maihu süt khua ma thom, chemthüikoxle hwom ang hommong to ngo ang nui chitüi.

Chun-Nyetmixbue Jisu Waikya

8Ija tui to, zang kotho to wünpomle ma chunbu nyele ngokya chun-nyetmixbu züita tüikya. 9Jowanpa kaxtaimix hwom hato ngai, üntoxle Zang fuazang kya e hwom to nyan. Hwom huanuma za, 10ikoxlechu kaxtaimixe hwom ang thüi: “Taxza! Ku ikha to khünaknu nok hato wüi mongmüi hüi angkya Kaxho Müikya füi nguipu. 11Anyix kha Dawid tingsho ma Jowanpa Khrista hünzom khosünpa puxle tüile! 12Üntoxle ija bama hünzom ang münwan a ija changle: Hünzome naosa nyie nam laxle maihu süt khua ma danle thomkya ataküi.”

13Allele ija kaxtaimix füi tomle kaxtaimixbu othom lai, ilaxle Zang achuakle tsai ngao:

14“Zangkho atsua kya khato,

Zang fuazang kya naxtüi;

zangfang ma chix mongmüikyabu füi,

mongsom naxtüi!”

15Hwom ha angkya kaxtaimixbu zangkho to chat füima, chun-nyetmixbue tata ang thüi: “Hai, kem Bethlehem to paohax ilaxle Jowanpa-e kem füi akax kya ningle changkyabu to huhax.”

16Idaile hwom momle pao üntoxle Jusep hia Meri nyi atak, üntoxle naosa maihu süt khua ma danle thomkya ngün. 17Chun-nyetmixbue ija naosa ngünkya zuma, kaxtaimixbue chix bama wün kya hokhi hama apua. 18Chun-nyetmixbue wünkya kax atatkyabu pangnu wüi abüt. 19Meri-e ibu pangnu texle atak üntoxle ibu hanpakma zule ajang. 20Hwome atat kya hia ngünkyabu khoma Zang mün achuakle tsai ngaonga le chun-nyetmixbu chat; ibu pangnu kaxtaimixe hwom hama akax kya lailaile chang.

Jisu ang Mün Fakya

21 # Liw 12.3; Luk 1.31. Hatdang tuita füima, naosa Khwonzüt-Zom zing angkya hanpak nguile hüikya zuma, chix wok ma tüiüi tho towüi kaxtaimixe koxle toxkya mün ma, chix ang JESU le amün.

Jisu Zangshwom-Hom to Koxkya

22Mosa Wanlom ma tüikya ningle, athax Jusep hia Meri nyi hato atsaole zomzing angkya hanpak nguile hüi. Ijadaile hokhie naosa Jerusalem to pao ilaxle, 23#Lai 13.2,12.“Owangma puxkya lüka naosa nok wüi Jowanpa hanpakma atsaole kox angkya oli”, le Jowanpa Wanlom ma zale thomkya ningle chix Jowanpa ang kox. 24#Liw 12.6-8.Üntoxle Jowanpa Wanlom ma tüikya ningle, hwome chatlechu osu oshem tuita chichangba jua-o shem tuita le tö kox ang pao.

25Iponge Simeon le amünkya mixpa tuita Jerusalem ma tüikya. Chix a müikya mix tuita, zangshwom ma zongkya üntoxle Israel khosün hanpakma tanle ngokya mix tuita changkya. Otsao Chasa chix ma tüikya. 26Üntoxle tsaole thomkya Messaiah mangün tanto chix chizi angkya kax Otsao Chasae chix füi akax. 27Otsao Chasae zunle Simeon Zangshwom-Hom to ngui. Wanlom ma tüikya zomzing ang otue honu hia hopa nyie naosa Jisu Zangshwom-Hom to apüi; 28Simeon-e naosa chix chak ma twon üntoxle Zang mün achuak:

29“Jowanpa, nang kaxtsao nange changle thomdaoa,

athax nang kax ningle,

nang da ku mongsom ma pao ang koxhüi;

30Ku mik makhange kue nang khosün ngündaoa;

31khünaknu thüntho ma nange achwondaokya a;

32 # Isa 42.6; 49.6; 52.10. Mixnokbu hato nang mongtex ngai angkya,

zang-ngai üntoxle nang khünaknu,

Israel hato fuazang apüi angkya bama.”

33Ija naosa bama Simeon kax atatlaxle honu hopa nyi abüt. 34Simeon-e hwom to mohiman ilaxle honu Meri ang thüi: “Ija naosa a, ama angkya bama üntoxle Israel khünaknu huanuma khosün angkya hanpakma Zange kamdaoa. Khünaknue owa mo amale wünüi hex ilaxle owae hwom huxsa mongtex angaile kox üihex, 35Zang tokhange hüikya münwan ija ang chix achangüi. Üntoxle anax kya changlo tuitae tsunkya ningle, sikngün e nang mongto tsunüi.”

36Ashar jat angkya Fanuel sasün ajenu Anna le amünkya azunu tuita tüikya. (She owüiole azu-ünkya; üntoxle she naocha ponge zang anüt hokakopa füi ngo laxle, 37she zang puli ali nguile zomnu ang achangle hüi).#2.37: she zang puli ali nguile; chichangba she zang puli ali nguile zomnu ang achangle hüi. She e chisax chilingle atsaole zangjop hanpak laxle anyixningchu üntoxle awünningchu ojao chidan le Zangshwom hom ma nui. 38Ipongkhae she Zangshwom-Hom to nguilaxle Zang ang münchong kox, üntoxle Jerusalem khosün tanle ngokyabu pangnu hama she e ija naosa bama akax.

Nazareth to Chatkya

39 # Mat 2.23. Jusep hia Meri nyie Jowanpa Wanlom ma tüikya komle mokle ashuk kya zuma, hwom Galili angkya ma tingsho Nazareth to chat. 40Naosa tsong üntoxle tsak-hi-zong le tüi; chix hwon hia je e amünle tüi, üntoxle Zang mohimanbu chix ma tüikya.

Zangshwom-Hom to Naosa Jisu

41 # Lai 12.1-27; Tsk 16.1-8. Jisu honu hopa hwom zangfo le Kaitox Pangpwon pangpua to Jerusalem to pao. 42Jisu zangbün anyi ma tüipongma hwom paozaikya ningle pangpwon ma hak ang pao. 43Ongai pangpwon ashukpuix, hwom hom to chat ang anong, ikoxle naosa Jisu a Jerusalem to ngo. Chix honu hopa hwome ija chiawan; 44hwome chixchu othom khato jangwüi tüingoüna le thüt, ilaxle nyixtung le aham füima tix hwome ma-mixbu hia zuikhuibu khato chix tüichale hu ang süt. 45Okhie chix chiatak, ikhoma chix lomle Jerusalem towüi chat. 46Nyix azom lekya to tix hokhie chix Zangshwom-Hom to atak. Chixe Jehudi nok wanlom tsingpabu kax apa ilaxle chixechu hwom ma kax atüikyalibu atüile ngokya. 47Chixe tsing-wan kya hia khosam chitüi le kaxlankyabu atatlaxle atatkyabu pangnu wüi abüt. 48Chix ngünlaxle honu hopa nyi huanuma abüt, ilaxle honue chix ang thüi: “Kusa, nange kwom kho chemkuxma asampu? Hünpa kukhipi nang lom ang huanuma aban max daoa.”

49Chixe hokhi ang thüi: “Hünkhie ku chemto lom ngokya? Ku Apa hom ma ngo angkya changle le hünkhie münawan hia?” 50Ikoxle hokhie chix kaxlan awan ang chitho.

51Okhi füi tomle Jisu Nazareth to chat, ikha to chix hokhi kax ma laxle saxmok le ngo. Onue ibu pangnu wüi she mongto akhün le thom. 52#1 Sa 2.26; Wan 3.4.Jisu a tsangtsa hia je ma, üntoxle Zang hia khünaknu mikngün ma sule tsong.

Currently Selected:

LUK 2: WANCBSI

Highlight

Copy