LUK 14

Jisu-e Kakmix tuita Amüi

1Nyixta nazak nyix Jisu-e farisibu khama akhokya mixsün tuita hom to fongsax ang thung; khünaknue chix to khile hungo. 2Cha-chak fingle kak kya mixsün tuita Jisu hato ngui, 3ikoxle Jisu-e Wanlom tsingpabu hia farisibu ang thüi: “Nazak nyix kaklak chiamüimüikya li hex? Wanlom ma büle tüipuix?”

4Ikoxle hwome kaxsu chidün. Ikoxle chixe ija mixsün to twonle amüi ilaxle chix pao ang kox. 5#Mat 12.11.Ifüima chixe hwom ang thüi: “Thütba, nang naosa chichangba maihu nazak nyixkha tüküi khato düt, ikoxle nazak nyixkha changkoxchu ija nange nonokhaile münadünüi hex nyi?”

6Hwome ibu bama chix kax to lan ang chitho.

Jonaikya hia Wünpwon Mankya

7Mixwünbue ngwotnui amüimüi kop ang atinkya Jisu-e ngün, idaile ija kaxpan chixe hwom pangnu ang akax: 8#Wan 25.6,7.“Owawae nang tuiju nasom to ahyen pongma tüntong atsuakya ma thung ang taxthüi: olele nang füi süchongkya khünak tuita hopunue ahyenkya mix jangtüi thüiba, hünkhi ahyenkya mixe nang hato hüilaxle nang ang thüiüi, 9‘Ikhama chix wüi thung ang laxkox.’ Ijama thünzak kake nang akiakya khato thung ang achexle paoüi. 10Ikoxle otue nang nyaküi hex, nguilaxle nang apexkya ngwotnui ma thungkox, üntoxle otue nang ahyenkya mix hüiüihex, chixe nang ang thüiüi, ‘Tüinao, thakchi to dongkox.’ Ile changkyae tomle fongsax ang thungle ngokyabu pomthoma ma nang achuak kya tuita ang achangüi. 11#Mat 23.12; Luk 18.14.Chemthüikoxle owae ma alüile achen üihex, chix a ahixkya ang achangüi; üntoxle opange ma alüile ahixkya ang changpuix, hwom achenüi.”

12Ifüima chixe ahyenkya mix angchu thüi: “Otue nange fongkha üihex, nang zuikhuibu wüi changlax, tüinao wüi changlax, kako homkha wüi changlax, aluakya tomzi wüi changlax, tax ahyen; ile changkoxle hwome nang chatle ahyenüi, üntoxle ile nange chem fapuix ija olüix achatle koxkya ang achangüi. 13Otue nange fongkhaüi hex, mixshix-zasabu, chifai-chaknyaibu, üntoxle miksut nababu ahyenkox; 14ijama hwome nang to mohimanüi; chemthüikoxle hwome nang ang olüix achatle kox ang chithoüi; ikoxle otsao khünakbu chatle zo ningle Zange nang ang olüix a chatle koxüi.”

Fongkhat Achongkya Kaxpan

(Mat 22.1-10)

15Üntoxle chix füi tomle fongsax ang thungle ngokyabu kha angkya khünak tuitae ija atatkya zuma, chixe Jisu ang thüi: “Zang Wangting fongsüt ma hak angkyabu mohiman huanu!”

16Jisu-e chix ang thüi: “Khünak tuita huanuma fongkha laxle püntuxkya to khünaknu ahyenkya mixsün tuita tüikya. 17Pangnu achwon laxle fongsax üima, ‘Athaxpi oman, nguihüi! chemthüikoxle sütling pangnu wüi achwondaoa’ le ahyen daokyabu se ang oda tsanle apao. 18Ikoxle hwom pangnue wüi ata füima ata-e le, ‘Münnguitsuaküi, taxma ta thüikox’ le thüi ang süt. Owang angkya mixe thüi: ‘Kue haxtok tuita shakle kopdaoa, ku a ija to hu ang pao angkya changle, sütaxma ta thüikox.’ 19Mama mixe thüi: ‘Kue zangmo ang maihu han aga shakle kopdaoa, ku a ijabu wanle ano ang paoüi, sütaxma ta thüikox.’ 20Ata mixechu wüi thüi: ‘Athax kue kako tankop daoa, ku hüi ang münthoüi changa.’

21“Da chatlaxle ibu pangwüi hopupa hama wün. Opupa ang mongma, ilaxle chixe chix da füi akax, ‘Momlax! tingjang angkya hia osam osyen to ngokyabu mixshix-zasa, chifai-chaknyai, miksut naba hia ofai oshokbu hwople apüihüi.’ 22Ifüima aluile homle chingole dae thüi: ‘Opunu, nang kax ningle mokdaoa, ikoxle ngwotnui chatlechu tüihu le.’ 23Chatlechu hopupae da ang thüi: ‘Ja-lyet lomnu hia faokat-suiwün lom to paokox, ilaxle ku hom nax awang ang, tütale wüi changlax hwom sele apüikox. 24Chemthüikoxle kue thüipu, ami ahyendaokyabu owachu ku fongsüt ma hak ang münkoxüi!’”

Füizuimix ang achangkya Otha

(Mat 10.37-38)

25Hanpak tuita ma khünaknu othom chongkya Jisu füi tomle aham ngoponge, chixe aküile hulaxle hwom ang thüi: 26#Mat 10.37.“Ku hato hüikya owachu, chixe manu mapa, ma kako hia susabu, mana manaobu ilaxle ma to alüile künkya thak to ku to chiluaba, ku wangshem ang achang ang müntho. 27#Mat 10.38; 16.24; Mrk 8.34; Luk 9.23.Ku füito ma pünsak pai laxle chihüikya mix ku wangshem ang achang ang müntsuak.

28“Hünzom khama owawae long katuk zün zingse jangtsuba, mwot ashuk aza tang ngun chitüi hia tüipuixle awan ang, owangole chix thung üntoxle otha otukux sütüihex, ija ajangle kop angkya changle. 29Chixe ile chimok kop jangthüiba, ocha zaile mokfüima chixe mwot ashuk ang chithoüi; ilaxle ile changkya angün-ngün noke chix chanyiüi. 30Hwome thüiüi, ‘Ija mixsüne zing ang owang wanglanlaxle ashuk ang chitsuak langle!’

31“Chichangba süpahi jatbün füikya wanghom tuitae hozui wanghom zan to kaüima, chix füi azan ang jattsa kop laxle hüikya wanghom füi apong ang chithoüi hia thoüihex le, pongwangma wüi thung laxle ajangle kop angkya oli changle. 32Chixe chithoüi ningle jangchangba oba atsaile tüiponge wüi achale, chix hato kaxho mix akatle, muamüi angkya bama zangwün angkya changle. 33Ilailaile chix ma atüitüi bakle chiawüt tox jangthüiba hünzom kha angkya owachu ku füizuimix ang achang ang müntho.”

Mwot to Chithapkya Hum

(Mat 5.13; Mrk 9.50)

34“Hum amüikya, ikoxle ija tikya jang-amütdao thüiba, chatle ija atik tsuak angkya olom müntüi. 35Athax ija a haxwan zongmachu münmüi üntoxle pangtsa süinui zongmachu münmüi; khünake ija awütüi. Owa ma na zaipuix chixe apalax.”

Currently Selected:

LUK 14: WANCBSI

Highlight

Copy