JUHAN 6

Jisu-e Hajat Aga Khünaknu Tux

(Mat 14.13-21; Mrk 6.30-44; Luk 9.10-17)

1Ijabu füima Jisu Galili Shinthuk-titung tachi to pao (chichangba ija ang Tiberia Shinthuk-titung lechu wüi nyakle). 2Khünaknu othome chix man tole tüikya; chemthüikoxle chixe kakmixbu amüikya hia ohünotün mwotbu mokkya hwome ngünle ngo. 3Jisu haxkho to donglaxle chix wangshembu füi thung; 4Ipongma Jehudi khünakbu Kaitox Pangpwon ngangle tüikya. 5Jisu-e ngom nwonle hu koxle khünaknu othom chix hato hüile ngokya ngünlaxle Filip ang thüi: “Khünak ibu ang kox ang keme süt ojong to shaküi?” 6(Ija a chixe Filip to wanle atwon wüi, chemthüikoxle chixe chem mok angkya hex ija mwot chixe alüile awan ngopu).

7Filip-e chix kax to lan: “Mixhuak noke muapong-muapong wüi saxkox lechu, anguile an shak ang, ngun huak khix ho-anyi onüi jao lax angkya changle.”

8Chix wangshembu kha angkya Simon Pitar honao Andriw-e chix füi akax, 9“Ikhama naosa tuita tüile, chix chak ma an khao aga tamchu nyax jang anyi le tüile, ikoxlechu isasae ibibi mix ang chempothaüi.”

10Jisu-e thüi: “Khünaknu thung ang laxkox.” (Ikhama hingzang tüihukya). Ile khünaknu akiak koxle hajat aga ikhama thung. 11Jisu-e an lax, münchong fa laxle chixe idu thungle ngokyabu ang ahanle fa. Ija ningle nyaxchu wüi ahanle kox. Ile hwom pangnue wüi wokfwot müile sax. 12Hwom ang wok afwot füima, chixe wangshembu füi akaxle thüi: “ota-otua pangwüi chiawüt le tswonle afoxkox.” 13Ijadaile hwome tswonle afox; ile ankhao aga hia nyax jang anyi makhange khünaknu tuxkya füima ata-atuale toxkya sang bün anyi amünle bang.

14Ija chixe mokkya ohünotün mwot ngünlaxle khünaknue thüi: “Chix a chaxwannu hato hüiüi tüikya otsingtsing ajepa changpu.” 15Hwom hüilaxle chix a wanghom ang achang ang atsang ang thütle ngokya hwom mong thwon loplaxle; Jisu anaolechu chix tata haxhua to pao.

Jisu Ti ding ma Ahamkya

(Mat 14.22-23; Mrk 6.45-52)

16Athax han asongkya ma, chix wangshembu tinu khato thai, 17Üntoxle khua ma nga füima, tinu tale Kaparnaum chito chat ang achex. Zangnak müi koxle ngaxchu athax kople Jisu hwom hato chichat. 18Ipongma zangcheie huanuma zongle thukya tokhange tinu tüle-tüle achap ang süt. 19Wangshembue mai anyi azom tukux cheile lekya füima, hwome Jisu titok ding to ahamle khua hato namle hüikya ngün ilaxle hwom tüle abüt. 20Ikoxle Jisu-e thüi: “Ija ku changpu, taxza!” 21Ifüima mongtsutsu le hwome chix khua ma angat; ilaxle lebama wüi khuae hwom pao angkya chaxwan alople bang.

Khünaknue Jisu Lom

22Ofüi nyix tinu tachi to ajongle ngokya khünaknu ang ikhama khua tuita wüi changkya ilaxle Jisu a wangshembu füi tomle khua ma chinga. Ilaxle hwome wangshembu a hwom tata paole ngünkya dai angle texle atak. 23Jowanpa-e münchong koxkya füima khünaknue an saxkya tinu kax ma, ofüi nyix Tiberia chitokya mama khuabu hüi. 24Otue hwome Jisu ikhama chitüikya awanle lax, ilaxle wangshembuchu wüi chitüi; hwomchu wüi khua ibu ma ngalaxle Jisu lomle Kaparnaum to ngui.

Jisu a Khüzün Süt

25Ilaxle tinu tachi to Jisu nuikya ma hwome thüi: “Rabai, nang ikhato otue nguipu?”

26Jisu-e hwom kax to lanle thüi: “Otsingtsingma kue hünzom ang thüipu, hünzome kue mokkya ohünotün mwotbu tsingle laxkya tokhange chichangle an füi wok afwotle sax ang atakkya khoma ku lomle ngo wüi. 27Male paoün angkya süt hanpakma mwot taxmok, ikoxle oshuk chitüikya tsün füi tomwüi ngo angkya süt hanpakma moklax. Ija süt a Khünak Hosae tix hünzom ang koxüi; chemthüikoxle Hopa Zange chix ma münwan shin tople fadaoa.”

28Idaile hwome chix ma atüi: “Zang mongtex mwot mok ang kwome moktsuak angkya chem tüi?”

29Jisu-e hwom kax to lanle thüi: “Zange tsanle ahüikya mix to ong angkya a hünzom hanpakma Zang mongtex mwot changpu.”

30Hwome chix ang thüi: “Kwome ngünlaxle ongkya lima nange münwan ang chem mokle ahoüi? 31#Lai 16.4,15; Mts 78.24.Otsao Lai kax ma ‘Chixe süt hwom ang zangkangting tokya fa’ le zale thomkya ningle, kwom pupa hwome faokha to manna saxpu.”

32Jisu-e hwom ang thüi: “Otsingtsingma kue hünzom ang thüipu, hünzom ang zangkangting tokya manna fakya mix a Mosa chichang; zangkangting tokya otsingtsing süt fakya mix a ku Apa changpu. 33Chemthüikoxle Zange fakya süt a zangkangting tokhange hüi ilaxle chaxwannu ang tsün fakya mix a chix changpu.”

34Ikoxle hwome chix ang thüi: “Nwotmix, ija süt othuithuima kwom ang koxle ngohüi.”

35Jisu-e hwom ang thüi: “Khüzün süt a ku changpu; Owa ku hato hüiüihex chix ang wok münano ilaxle ku to ongkya mix ang otuechu ti münalan; 36Ikoxlechu kue hünzom ang thüipu, hünzome ku ngünpu ikoxlechu chiongüi. 37Apae ku ang koxkyabu pangwüi ku hato hüiüi ilaxle kue hwom otuechu münachatüi; 38chemthüikoxle ku a zangkangting tokya, ku mongtex ma mok ang chichangle, ku tsanle ajokya mix mongtex ma mok ang nguipu. 39Chixe ku ang fadaokya tuitachu chiamütüi, ikoxle oshuk ma ibu pangwüi ozün ma zo ang tom angkya ku tsanle ajokya mix mongtex changpu. 40Chemthüikoxle Hopa mongtex a ija changle: Opange Hosa ngünpuix tamchu chix to ongpuix, hwom ma oshuk chitüikya khüzün tüiüi; Ilaxle oshuk nyix kue hwom ozün ma ngo ang tomüi.”

Jehudi Nok ang Fakya Kax

41Chixe “zangkangting tokhange ajokya süt a ku changpu”, le akaxkya khoma Jehudi khünakbue kax atsat. 42Idaile hwome thüi: “Ija Jisu a Jusep sasün münchangkox hia? Chix honu hia hopa nyi keme awan ngopu. Jangchangba chix zangkangting tokya jukya changpu le chixe chemle akax ang thopu?”

43Jisu-e lanle hwom ang thüi: “Hünzome tata bama zangwün atsat le taxngo. 44Apa owae ku tsanle ajopuix, chixe chiahüi thüikoxle owaechu ku hato hüi ang müntho; ilaxle kue oshuk nyix chix ozün ma zo ang tomüi. 45#Isa 54.13.Ajepae ile zakya tüile: ‘Pangnusa hama Zange apuaüi.’ Owae Apa kax atatüi hex tamchu chix makhange awanle laxüi hex, chix tix ku hato nguile. 46Zang tokhange hüikya mix boma mama owaechu Zang ngündaoa le münchang; Hopa a chixe tix ngüntan; 47Otsingtsingma kue thüipu, mongongkya khünak ang oshuk chitüikya tsün khüzün tüile. 48Ku a khüzün süt changpu. 49Hünpu hünpa hwome faokha to manna saxpu, ikoxchu hwom zipu. 50Ikoxle zangkangting tokhange jukya süt a, ija saxkya mix chizi angkya hanpakma changpu. 51Ku a zangkangting tokya jukya süt changpu; owae ija süt kha angkya saüihex, chix a oshuk chitüile ozün ma ngoüi; ilaxle süt oja kue chaxwan azün ang koxüihex, ija a ku müi changle.”

52Ija khoma Jehudi khünakbue ija bama tata füi zangwünle thüi: “Ija khünake kem ang chix müi sax ang chemle kox angkya changkoxpuix?”

53Jisu-e hwom ang thüi: “Otsingtsingma kue hünzom ang thüipu, hünzome Khünak Hosa müi sax tamchu chix aji chiling jangthüiba, malualua to ozün ma ngo ang münthoüi. 54Owae ku müi sax tamchu ku aji linglaxüi hex, chix oshuk chitüi le ozün ma ngo angkya changle, ilaxle oshuk nyix kue chix ozün ma zo ang tomüi. 55Chemthüikoxle ku müi a süt tsingtsing ku aji a ju tsingtsing changle. 56Owae ku müi sax tamchu ku aji lingüi hex, chix ku ma ngoüi ilaxle ku chix ma ngoüi. 57Chemle ozün ma tüikya Apae ku tsanle ajo puix, ija lailaile chix kuxma tix ku ozün ma ngopu. Ija ningle owae ku müi saxlaxpuix, chixchu ku khoma tix ozün ma ngo angkya changle. 58Ija tix zangkangting tokya jukya süt changpu. Ija a hünpu hünpa hwome saxlaxle zikya manna ningle chichang, ikoxle owae ija süt saxlaxüi hex, oshuk chitüi le ozün ma ngo ang ataküi.”

59Chixe ija kaparnaum ma hwon-anole ngopong ma sinagok ma akax.

Oshuk chitüikya Khüzün Kax

60Ija atatkya ma wangshembue thüi: “Ija hwon-nwot a tüle tsakle. Ija owae tsingle thoüi?”

61Ikoxle chix wangshembue ija khoma zangwün atsat ngole le awanlaxle Jisu-e hwom ang thüi: “Ija kaxe hünzom ang chikho asua ang tompia? 62Jangchangba Khünak Hosa amipongkya chix ngwotnui to chatkya ngünkoxle hünzome chemle thüiüi? 63Khüzün koxkya a Zang Chasa changpu, khünak tsakzong a chem angchu münchang ikoxle kax oja kue hünzom füi akaxpuix, ijabue hünzom hato ozün ma tüikya Zang Chasa apüile fapu. 64Ikoxlechu hünzom züizüie ija to chiong.” (Opange chix to chiong puix, ilaxle owae chix dyenüi hex, pongwang tokhange wüi Jisu-e awanle ngo). 65Ilaxle Jisu-e thüi: “Ija khoma kue hünzom ang thüipu, Apae koxkya wüi chichang thüiningle hünzom ku hato owachu hüi ang müntho.”

Pitar Mongong Ngaikya

66Ija khoma züizüi chix man tole ngokyabu chix füito chiahamle chat. 67Ija khoma Jisu-e bün anyi ma atüi: “Hünzome chuwüi dantoxse texpuix nyi?”

68 # Mat 16.16; Mrk 8.29; Luk 9.20. Simon Pitar-e lan: “Jowanpa, kwom owa hato paoüi? Tsün khüzün koxkya kax nang ma tüipu; 69Ija to kwome ongpu tamchu nang a Zang tokhange nguikya Otsao changpu le kwome awanle.”

70Jisu-e hwom kax to lan: “Hünzom bün anyi kue kamle kopkya münchang dai hia? Ikoxlechu hünzom khama tuita a haxshix changle.” 71Chixe ija a Juda, Simon Iskariot sasün mo wünkya changpu. Chemthüikoxle chixchu wüi wangshem tuita changkoxchu, chixe Jisu khohang angkya changle.

Currently Selected:

JUHAN 6: WANCBSI

Highlight

Copy