JUHAN 3

Tamchatle Puxkya

1Farisi othom khama Nikudema le amünkya mix Jehudi khünak tuita tüikya. 2Jata chix Jisu hato nguilaxle atüi: “Kwome nang a Nwotmix tuita ningle Zang tokhange hüipu le awanle; Zang womle chingo thüikoxle nange mokkya mwotlom owaechu münmok tho.”

3Jisu-e chix kax to lanle thüi: “Otsingtsingma kue nang ang thüipu, tamchatle chipux#3.3: tamchatle; chichangba thaktokhange. jangthüiba owaechu Zang Wangting ngün ang münkopüi.”

4Nikudema-e chix ang thüi: “Khünak tuita owüi ole tsong füima, chix tam chatle chemle puxüi? Chix anaole honu wokkha to donglaxle tam chatle pux ang tho angkya fang münchang.”

5Jisu-e lan: “Otsingtsingma kue nang ang thüipu, khünak tuita ti ma hia Otsao Chasa ma chipux jangthüiba chix zangkang ting to nop ang tsuak angkya fang münchang. 6Khünak tuita tsangtsa ma honu hopa makhange puxpaile; ikoxlechu chix chasa ma Chasa makhange puxpaile. 7Hünzom pangwüi anaole pux angkya#3.7: anaole; chichangba thaktokhange. changle lekya ku kax thoto nang taxabüt. 8Zangwine chix mongtex ma jeple; hünzome ija ozing ma atatle, ikoxlechu hünzome ija ojong tokya ngui ilaxle ojong chito pao angkya hex müntsing. Chasa ma puxkyabu pangwüi ija ningle changpu.”

9Nikudema-e lanle chix ang thüi: “Ija chemle chang ang thoüi?”

10Jisu-e chix ang thüi: “Nang Israel khama achongkya nwotmix tuita chang üntoxle ibu ngaxchu chitsing le hi? 11Otsingtsingma kue nang ang thüipu, kwome chem awanpuix ija akaxpu, ilaxle kwome ngündaokya bama kaxkhi fapu; ikoxlechu hünzom opupue ngaxchu pongle kop ang chitsu. 12Kue hünzom hama chaxwannu mo wün pongma ngaxchu hünzome ku to chiong, kue zangkangting mo jangwün tomning ku to chemle ongüi? 13Khünak Hosa owa zangkangting tokya nguipuix, chix boma owaechu zangkangting mangün.

14 # Huak 21.9. “Mosa-e faokha to pu chemle nwonpuix, ija lailaile Khünak Hosa chuwüi ding to nwon angkya changle; 15Ikoxletix chix to ongkyabu ang khüzün atak angkya hanpakma, 16Zange chaxwannu to tüle mongkün laxle chix to ongkya mix chimax le oshuk chitüikya khüzün tsün atak angkya hanpakma chix ang Hosa tuita wüi tüikya chaxwannu ang kox; 17Chemthüikoxle Zange chix Hosa chaxwannu to, kaxfün fa ang chichangle, chix makhange chaxwannu khosün angkya hanpakmale ajo.

18“Hosa to ongkya mix ang kaxfün müntüi; ikoxle chix to chiongkya mix bama kaxfün fadaoa; chemthüikoxle chixe Zang Hosa tuita wüi tüikya to chiong. 19Ilaxle kaxfün a ija changle: Zangngai chaxwannu to hüidaoa, ikoxle khünake zangngai füi zangnak towüi sükün, chemthüikoxle hwom mwotbu a ochax chang. 20Chemthüikoxle opange ochax mwot mokpuix hwome zangngai thua anule ilaxle chix mwotbu ngaiüi daile zangngai to münlai. 21Ikoxle owae otsingtsing mwot mokpuix, chix mwot Zang mün ma mokpu le ngai ang tom angkya hanpakma zangngai to laile.”

Jisu hia Juhan Nyi

22Ifüima Jisu hia chix wangshembu Jehudi chaxwan to pao; ikhato chix noxta nuilaxle bapti fa. 23Juhan-echu Salim zui angkya Aenon ma bapti fale ngokya, chemthüikoxle ikhatochu ti okhongui le tüikoxle khünaknu chix hato nguile chixe hwom ang bapti fale ngo. 24#Mat 14.3; Mrk 6.17; Luk 3.19,20.Chemthüikoxle iponge Juhan kun kha to masho changkya.

25Juhan wangshem züizüi hia Jehudi khünakbu bama, sole atsaole khongaikya zom bama ala ang süt. 26Hwom Juhan hato ngui ilaxle thüi: “Nang füi tomle Jordan shua tachi to owa ngokya hex, owa bama nange kaxkhi fale hüipuix; hulax, chixe bapti fale ngole, ilaxle pangnusa wüi chix hato nguile!”

27Juhan-e lanle thüi: “Zange fakya chichang thüiningle khünake chemchu kop ang müntho. 28#Jhn 1.20.Kue ku ‘Khrista münchang’ ibachu ku chix thoma achale hüikya mix changpu le thüikya bama kaxkhi hünzom changpu. 29Tuinu zongto Tuipa tix hopupa changpu; ikoxlechu tuipa hozui owae ajong laxle chix kax apale ngopuix, tuipa kaxzing atatlaxle chix mong sisi huanuma müiüi; ku mongmüi okho anguikya a ija lailaile changpu. 30Chix a chong angkya changle, ikoxle ku a hix angkya changle.

Zangkangting tokya Nguikya Mix

31“Owa thak tokya nguipuix chix a pangnu thakma achongkya changle. Owa chaxwannu angkya hex chix a chaxwannu kux changpu. Idaile chixe chaxwannu kux füikya sütmwot bama zangwünle. Owa zangkangting tokya nguipuix, chix a pangnu thak tokya changle. 32Chixe chempang ngündao laxpuix ilaxle atat dao laxpuix, ibu bama chixe zangwünle; ikoxchu chix kaxkhi owaechu pongle chikop. 33Ikoxle owae chix kaxkhi pongle kop, chixe Zang otsingtsing changkox a le chix mong ma shingmongle kopdaoa. 34Owa Zange tsanle apaopuix, chixe Zang kaxbu akaxle, chemthüikoxle Zange chix ma ma Chasa okho anguile fale. 35#Mat 11.27; Luk 10.22.Hopae Hosa to mongkün ilaxle pangnu li wüi chix chak to dandaoa. 36Hosa to mongongkya khünak ma oshuk chitüikya khüzün tüile; owae Hosa kax ma chilax puix, chix ma khüzün müntüi; ikoxle Zang mongtsik chix füi ngoüi.”

Currently Selected:

JUHAN 3: WANCBSI

Highlight

Copy