JUHAN 21

Galili Shinthuk-titung Kax to Jisu Laikya

1Ija füima Tiberia Shinthuk-titung ma Jisu-e anaolechu wangshembu hato chix ngaile aho; ija a ile chang: 2Simon Pitar, Thoma (apyetle puxkya mix) Nathanel (Galili tokya Kana angkya), Zebedi sasün hwom tamchu Jisu wangshem mama anyi, hwom bibi tomle asukya. 3#Luk 5.5.Simon Pitar-e hwom ang thüi: “Kupi nyax dao ang kaüi.”

Hwome chix ang thüi: “Kwom chuwüi nang füito kaüi.” Hwom khua ma ka. Ija ja hwome tuita ngaxchu chikop. 4Ikoxle zanghan chüdüne Jisu shua kax ma ajong, ikoxle wangshembue ija a Jisu changpu le chitsing. 5Ikoxle Jisu-e hwom ang thüi: “Naosombu, hünzome chemchu münkop hia?”

Hwome chix ang thüi: “Jangta ngaxchu münkop.”

6 # Luk 5.6. Ikoxle chixe hwom ang thüi: “Khua zongma chichi kao ma sha fulax, jangchangba hünzome tükopüi hex.” Ikoxle ijongkha ma hwome sha fu. Izuma nyax huanuma wom, ikhoma hwom zongto sha wai ang tüle tsak.

7Wangshembu khama owa to Jisu-e mongkün puix, chixe Pitar ang thüi: “Ija a Jowanpa changpu.” Ikoxle ija a Jowanpa changpu le atatkya zuma, Simon Pitar-e nyi lax (chemthüikoxle chix ipongma ohua ma asukya), ilaxle ti khato füt. 8Ikoxle wangshem mamabue khua ahixkya ma sha a nyaxe awang le bele jen (chemthüikoxle hwom a fa makhange fak hota tukux atsai lanle tüikya). 9Otue hwome fa alop, izuma wünhan dingma nyax hia an hiadaole le ngün. 10Jisu-e hwom ang thüi: “Hünzome athax kopkya kha angkya nyax tüjen hüi.”

11Simon Pitar khua ma ngalaxle nyax chongkyakya hota punyi bün azome awangle tüikya sha fako to bele alai; ile ibibi nyax tüikox ngaxchu sha chikyet.

Jisu-e Ahanle Fa

12Ilaxle Jisu-e hwom ang thüi: “Hüilax üntoxle saxlax.” Chix a Jowanpa changpu le awanlaxle “Nang a owa?”, le atüi angkya wangshembu khama owa ang mong chichong. 13Jisu hüilaxle ija nyax hia an hwom ang kox.

14Jisu zidaokya anaole zokya füima wangshembu hato laile ahokya ija a othom azom lükya.

Jisu hia Pitar Nyi

15Hwome süt saxle tsuak füima Jisu-e Simon Pitar ang thüi: “Juna sasün Simon, ijabu to nüile nange ku to künpuix nyi?”

Simon Pitar-e lanle thüi: “Changpu Jowanpa, kue nang to künle le nange awan ngopu.”

Jisu-e Pitar ang thüi: “Ku chun hosabu to hume kox.” 16Jisu-e chix ang anaolechu wüi thüi: “Juna sasün Simon, nange ku to künpuix nyi?”

Simon-e lan: “Changpu Jowanpa, kue nang to künle le nange awan ngopu.”

Jisu-e thüi: “Ku chunbu nyekox.” 17Jisu-e chix ma othom azom lekya machu atüi: “Juna sasün Simon, nange ku to künpuix nyi?”

Chixe Jisu to mongkün puix nyi le othom azom ma akaxkya khoma Pitar ang mongtsik dong. Ilaxle chixe Jisu ang thüi: “Jowanpa, kue nang to künle le nange bakle awan ngopu.”

Jisu-e chix ang thüi: “Nange ku chunbu tuxkox.”

Kem Hanpakbu a Chix Chak ma

18“Otsingtsingma kue nang ang thüipu, nang naosün ma ngopongma nange nang lualua to züpak apakpu, tamchu nang ochito paose tsupuix ichito paopu; ikoxle ongai nang mixpa ang achangüi hex, nange nang chak thuiüi ilaxle owawae nang chak ma khaüi ilaxle nang paose chitexkya chito syetle paoüi.” 19Chix chemle zikya makhange Pitar-e Zang hato fuazangkya apüi angkya hex; Jisu-e chix füi ija bama akaxkya changkya. Ilaxle chixe ija kax akax füima Pitar ang thüi: “Ku füito azuilax.”

Jisu hia Mama Füizuimixbu

20 # Jhn 13.25. Pitar-e aküile hu, ikoxle Jisu-e mongkünkya wangshem tuita, owa ajaning fong sax pongma Jisu thünkhux ma ana laxle ngokya hex, tamchu “Jowanpa nang khohang angkya mix owa?”, le atüikya wangshemchu füichi ma ngün. 21Chix ngünlaxle Pitar-e Jisu ang thüi: “Jowanpa, ija mixsün a chemle changüi?”

22Jisu-e chix ang thüi: “Ku mahüi tanto chix a ozün ma ngo ang tom koxle nang to chem pox, nange a ku man tolax!”

23Ikoxle ija wangshem a münzi angkya ta le Jisu wangshembu khama zangwün pu. Ikoxle Jisu-e chix ang münzi angkya le thüikya chichang. Ikoxle chixe thüikya a: Chix mahüi mahüile ija mixsün ang ozün ma wüi tanle ngo ang tom angkya Jisu mongtex namchang thünba Pitar to chem pox, le thüikya kax changkya.

24Ijabu bama kaxkhi fa tamchu owae zale kop, ija füizuimix a chix changpu. Chix kaxkhi a otsingtsing changpu le kwome awanle.

Kaxshuk

25Jisu-e mokkya mama mwotbuchu wüi tüihukya. Ibu pangnu zale koppuix thüikoxle, zangfang awang le lai sha koxle ngaxchu okho münnguise le kue thütle. Amen.

Currently Selected:

JUHAN 21: WANCBSI

Highlight

Copy