JUHAN 1

Oshuk Chitüikya Khüzün Kax

1Chaxwannu zingüi thoto wüi, Kax tüikya; Chix Zang füi ngokya, ilaxle chix Zang füi tuita changkya. 2Pongwang tokhange wüi kax a zang füi ngokya. 3Chix makhange Zange pangnu li zingle alai; zingkya khama oli tuitachu chix chichang homtoxle zingkya chitüi. 4Ija Kax a khüzün otong changkya#1.4: Ija Kax a khüzün otong changkya; chichangba Kax füi awonlaxle zingkya pangwüi ma khüzün tüile. üntoxle ija khüzüne khünaknünsa hato zangngai apüi. 5Ija zangngaie zangnak khato nyan ilaxle zangnake ija amüt ang chitho.

Juhan-e Fakya Hakhi

6 # Mat 3.1; Mrk 1.4; Luk 3.1,2. Zange chix kaxho mix Juhan le amünkya mix 7khünaknu hato zangngai bama apua ang tsanle apao. Pangnusae atat tamchu ong angkya kuxma chix hwom hato ngui. 8Chix tomtata a ija zangngai chichang; chix a ija zangngai bama apua ang nguikya mix. 9Chix a zangngai tsingtsing, zangngai ojae chaxwannu hato nguilaxle khünaknusa to nyanlaxpuix.

10Ifüima ija kax chaxwannu ma ngo. Chaxwannu Zange chix makhange zingle alai; ikoxlechu chaxwannue chix chitsing. 11Chix a ma khünaknu hato hüi, ikoxlechu ma khünaknue chix pongle chikop. 12Bachutix züizüie chix pongle koplaxle chix to ong; ija khoma chixe hwom ang Zangsu Zangsabu ang achang angkya tsakzong kox. 13Hwom a zangjang khünak hopa tuita makhange puxkya khoma Zangsu Zangsabu ang achangkya chichang; Zang chix tomtata hwom Hopa ang achang.

Kax a Müi ang achang

14Ija kax khünak ang achang laxle chingcha hia kaxtsinge awangle chix kem khama ngo. Hopa ang Hosa tuita wüi tüikya fuazang ningle kwome chix fuazang ngün.

15Juhan-e chix bama kaxkhi fa, ilaxle akhongle thüi: “Ku füima hüile ngokya mix a ku füi ngaxchu achongkya changpu; chemthüikoxle chix a ku puxüi thoto wüi tüile ngoünkya changle, le kue owa bama akaxpuix, ija a chix changpu.”

16Chemthüikoxle okhonguile tüikya chix chingcha kha angkya, tuita füima tuita le chixe kem to mohimanle. 17Zange Wanlom a Mosa makhange fa; ikoxlechu chingcha hia otsingtsing a Jisu Khrista makhange hüipu. 18Owaechu Zang ongaichu mangün tox; ikoxle Hopa hama chix füi tomwüi ngokya, tuita wüi tüikya Hosa etix chix apuale fapu.

Baptikya mix Juhan Kaxho

(Mat 3.1-12; Mrk 1.1-8; Luk 3.1-18)

19Jerusalem angkya Jehudi pünpa-chongwangbue chix ma “Nang Owa?”, le atüi ang nguapabu hia Liwibu tsanle apao. 20Chipyen homle Juhan-e tsaotha le ngaile lan: “Ku a Messaiah münchang.”

21 # Mal 4.5; Tsk 18.15,18. Hwome atüi: “Jangchangba nang a owa? Nang Elija hia? Nang ajepa hia?”#1.21: ajepa: Ngai angkya tüile le ongle ngokya tamchu Messaiah ngui angkya bama kax koxle thomkya.

Juhan-e lan: “Ku münchang!”

22Ikoxle hwome thüi: “Kwome tsanle apaokyabu hama kwome wüntsuak angkya oli changle; jangchangba nang a owa? Nange nang bama chemle thüiüi?”

23 # Isa 40.3. Chixe Isaia ajepa taile akax:

“Jowanpa le angkya lom atangle zingle banglax,

le faokha to akhongkya kaxzing a ku changpu!”

24Ifüima farisibue tsanle apaokya kaxho mixbue#1.24: kaxhomixbu, opang farisibue tsanle apaokyahex; chichangba hwome tsanle apaokya ibu a farisibu changkya; Juhan ma atüi, 25“Nang Khrista chuwüi chichang, tuita ajechu chichang, jangthüiba nange chemthüikoxle baptipu?”

26Juhan-e hwom ang thüi: “Kue ti ma baptipu ikoxlechu hünzome chitsing tsuakkya khünak tuita hünzom khama ajongle tüile. 27Chix a ku füima hüile ngole; ku a chix chisox zu da ang ngaxchu chiasukya mix changle.”

28Ijabu pangnu Juhan-e baptile ngokya Jordan shuanu tachi to Bethani ma chang.

Zang Chun Hosa

29Ofüi nyix Juhan-e Jisu chix hato hüile ngokya ngün ilaxle thüi: “‘Chaxwannu ochax pao ang nguikya Zang Chun Hosa to hulax! 30Ku füima mixhuak tuita hüile ngole; chix a ku füi ngaxchu akhokya changpu, chemthüikoxle chix a ku mapux tanto wüi tüile ngoünkya changpu’, le kue akax ngokya mix a chix changpu.” 31Chix owa changüihex kue chiawan, ikoxlechu Israel khünakbu hama chix awanle kox angkya kuxma ti ma bapti fale ku nguipu.

32Ilaxle Juhan-e ija kaxkhi fa: “Osu ningle Chasa julaxle chix khangkho ma paxkya kue ngündaoa. 33Kue chix ija mix changle le chiawan; ikoxlechu Zang owae ku tima bapti le fa ang ngui ang tsanpuix, chixe ku ang thüi: ‘Nange owa ma chasa julaxle paxkya ngünüi hex, Otsao Chasa ma baptile fa angkya mix chix changpu!’ 34Ikoxle kue ngünle laxdaoa, ilaxle kaxkhi fapu; Chix a Zang Hosa changle.”

Pongwang angkya Jisu Wangshembu

35Anaole ofüi nyixchu wüi Juhan chix wangshem anyi füi ikhama ajongle ngokya. 36Chixe Jisu ahamle hüiüi ngünlaxle thüi: “Hulax! Chuja Zang Chun Hosa a!”

37Ija kax atatlaxle ija Juhan wangshem nyi Jisu füito pao. 38Jisu-e aküile hu koxle chix füito hokhi hüile ngokya ngünlaxle atüi: “Hünkhie chem lompu?”

Okhie chix ang thüi: “Rabai (thüikoxle Nwotmix), nang ojong ma ngopu?”

39Chixe hokhi ang thüi: “Oman. Hüilaxle hulax.” Idaile hokhi hüilaxle chix ngokya nui ngün. Iponge hansong ali baji tuk changkoxle hokhichu ija ja chix füi tomle pom.

40Juhan kax atatlaxle Jisu füito azuikya nyi khama tuita a Simon Pitar honao Andriw changkya. 41Pongwang ma chixe hotüi Simon atak ilaxle chix ang thüi: “Kwome Messaiah (Khrista) atakdaoa.” 42Ifüima Simon Jisu hato apüi.

Jisu-e chix to hulaxle thüi: “Nang a Juhan sasün Simon; nang ang Kefa le nyaküi.” (Ija a Pitar mün long changpu le thüikya tha).

Jisu-e Filip hia Nathanel nyi Nyak

43Ofüi nyix Galili to paosele tsu. Ikhato chixe Filip atak. Jisu-e chix ang thüi: “Ku füito oman.” 44Filip chuwüi Pitar hia Andriw hokhi ngokya Bethsaida nok angkya changkya. 45Filip-e Nathanel atak ilaxle chix ang thüi: “Mosa-e wanlom laipex ma tamchu ajebue hwom laipexbu ma owa bama zale tüipuix, kwome chix ngündaoa. Chix a Nazareth angkya Jusep sasün Jisu changle.”

46Nathanel-e chix ang thüi: “Nazareth angkya tuita müikya oli laitsuak angchami?” Filip-e chix ang thüi: “Hüilax ilaxle hulax.”

47Jisu-e Nathanel chix hato hüikya ngün ilaxle chix bama thüi: “Israel khünak tsingtsing to hulax; chix ma thaikya chem müntüi!”

48Nathanel-e chix ang thüi: “Nange ku chemle awanpu?” Jisu-e chix kax to lanle thüi: “Filip-e nang nyaküi thoto wüi, fupsa pün fangma ngopong ma wüi kue nang ngünpu.”

49Nathanel-e chix ang thüi: “Rabai, nang a Zang Hosa; nang a Israel wanghom changle.”

50Jisu-e chix kax to lanle thüi: “Nang fupsa pün fangma ngopong ma kue nang ngünpu le thüikya khoma nange ongkya changdaicha? Ifüichu süchongkya nange ngün angkya changle.” 51#Pon 28.12.Ilaxle chixe hwom ang thüi: “Kue otsingtsing ma akaxpu, nange zangding ka dapkya tamchu Khünak Hosa ma kaxtaimixbu dongkya hia jukyabu ngünüi.”

Currently Selected:

JUHAN 1: WANCBSI

Highlight

Copy