PONGWANG LAIPEX 45

Jusep-e Hotüi-Honao Hwom hama Chix Ngaile kox

1 # Mwt 7.13. Jusep-e chix dabu tunthoma mongnu adünle adu hüikya tsyen ang chithole changkya khoma chixe hwom pangwüi chix nui angkya laile pao ang kaxkox. Ile chix owa changkya hex, Jusep-e angaile wünpongma hwom khama mix owachu chitüi. 2Jusep akhongle sopkya Ijip khünakbue atat, ilaxle ija kax wanghom hato apüi. 3Jusep-e hotüi-honao hwom ang thüi: “Ku a Jusep changpu. Apa ozün ma tüilaxma?” Ikoxlechu hotüi-honao hwome ija atat pongma, hwom pangwüi abütle changkya khoma hwome kaxlan ang chitho. 4Ifüima Jusep-e hwom ang thüi: “Oman, ku hato soxle hüihüi.” Ijama hwom chix hato soxle hüi, Chixe hwom ang thüi: “Hünzome Ijip nok to hangle apaokya Jusep a ku changpu. 5Ami ku hangle changdaokya khoma athax hünzom ang mongmale taxngo. Hünzom thoma achale khünaknu khosün angkya hanpakma ku ikhato ngui ang tomkya a Zang mwot changle. 6Ija a chaxwannu hato hüile ngokya tuinu-nuaknu le angkya zanglao anyi-lükya tix changpu; chatle chu zanglao aga atale tüile; ija tuktuk ma thomwot-manzai hia puamün chemchu müntüi angkya changle. 7Hünzom üntoxle hünzom sixlibu pangwüi ija kaikuak-saonu lepongma azangle ngo angkya hanpakmale hünzom thoto pangnu atha-anyemle bang angkya hanpakmale ku ikhato achale Zang-e akatkya changpu. 8Idaile ku ikhato ka ang tomkya a otsingtomtata ma hünzom münchang ikoxle Zang tix changpu. Chixe ku a wanghompa füi atakya mix ang zingle dandaoa. Chix chaxwan athax pangwüi ku chak ma tüile. Ijip haxtok apün angkya khünak anyi-lükya a ku changpu.

9 # Mwt 7.14. “Athax hünzom momle chatlax ilaxle apa hama chix sasün Jusep kaxho ile laxkox: ‘Zang-e ku a Ijip nok apünkya mix ang zingle thomle; alüile hanhom chingo homtoxle ku hato kahüi. 10Nang, Goshen haxsha ma, nangsu-nangsa hwom, nang chunbu, nang zwonbu, nang maihubu, ilaxle nang tuina pangwüi füi, ku zui ma ngo ang thoüi. 11Nang Goshen ma jangngo thüiningle, kue nang to humele tsuaküi. Athax chuwüi tuinu-nuaknu kaile le-ang zanglao aga jao tüile. Nang, su-sabu hia tsom-pombu füi woknuak ma maxle ngo angkya to kue münlua.’”

12Jusep-e chatle chuwüi thüi: “Athax hünzom pangnue, Benjamin, nange chuwüi ku a Jusep changpule ngün ang tsuaküi. 13Ikhato ku chemtukuxle zax-zangle ngopuix tamchu hünzome ngünkya pangnu bama apa hama wünle laxkox. Ifüima momlax, nonole apa ikhato kat-hüi.”

14Chixe honao Benjamin to künle kop üntoxle sop ang süt; chixe künkya zuma Benjamin chuwüi sop. 15Ifüima chix sopngale hotüi-honao hwom pangnu füi tun apong. Hotüi-honao hwome chix füi zangwün ang süt.

16Chemtue Jusep hotüi-honao hwom nguikya kaxho wanghom khwa to nguipuix, hwom pangwüi ang mongmüi. 17Chixe Jusep ang thüi: “Hüntüi-hünnao hwom ang müibu ma sax hünzing laxle tix Kanan to chat ang tomkox. 18Hwome hwom hopa hia kako homkha pangwüi ikhato kat ang tomkox. Kue hwom ang Ijip haxtok amüimüikha koxüi. Hwom okhonguikya boma ngaxchu onüi tüinangle ngo ang tsuaküi. 19Hwom kakobu, hopa hia naosom hwom kat angkya kuxma, maihu-kanlinbu Ijip nok tokya wüi laxlaxtox angkya akaxlax. 20Hwome mamixbu danle tox angkya bama mongma angkya chemchu müntüi. Ijip chaxwan ma sümüikya kha haxtok hwom kux ang changüi.”

21Jakop sasün hwome ija lailaile mok. Jusep-e hwom ang maihu-kanlinbu kox ilaxle lomba to sax angkya sütbu kox. Ibu chixe wanghompa kaxtom ma mok. 22Chixe hwom pangwüi ang lüinyibu chuwüi kox. Chixe Benjamin ang khop ngunkhix 300 boma lüinyi aga kox. 23Chixe hopa hato Ijip haxtok ma tüikya bwot-ba sümüimüi mantsak bün ma awangle hünzing laxle an hia mama osüt-olingbu awün. Lomba to hwom sax angkya sütling chuwüi kox. 24Chixe hotüi-honao hwom hom to chat ang tom ilaxle hwom ang lomba to ahe-akakkya chitüi angkya kaxkhün koxle akaxle awün.

25Hwom Ijip chaxwan dantoxlaxle hopa hato Kanan to chat. 26Hwome hopa ang thüi: “Jusep a ozün ma tüile. Chix a Ijip haxtok apün ang ngole tüile!” Jakop ang khangkho sam ilaxle hwom zangwün to mongong ang chitho.

27Ikoxlechu chemtue hwome chix ang, Jusep-e hwom füi akaxkyabu wünle koxpuix tamchu hwom Ijip nok to laxlaxle kat angkya Jusep-e awünkya maihu-kanlin ngünle laxpuix, chix ang khangkho ngai. 28Chixe thüi: “Ku sasün Jusep ozün ma wüi tüile. Athaxpi ku chix hato kat-hüi. Ku maziziba wüi kue chix ngünle tox angkya changle.”

Currently Selected:

PONGWANG LAIPEX 45: WANCBSI

Highlight

Copy